تابع جولتنا في اليوم الثالث
المدينه القديمه



عقب مانزلنا من التله والدنيا بدأت تظلم سرنا صوب المدينه القديمه ، وهي مب بعيده عن التله







دخلنا بين السكيك



شفنا كنيسه



هذا السيكل اللي فيه كرسي وما أدري اذا للتأجير ولالأ




شفنا مطعم هندي هندوسي



كملنا مشي







الحلو في هالمكان انه ناس رايحه وناس يايه
وخصوصا يوم الأحد والمكان يضج بالحياه
وانا وايد يعيبني جذي



بدينا ندخل في سكيك كلها محلات من الصوبين وفيها بعد مطاعم وكوفيهات والمحل اللي يعجبنا ندخله







دخلنا هالمحل وهو يبيع زيت زيتون وبلسميك واشياء ثانيه



وايد حبيته هالمحل واشتريت غرشتين وحده زيت زيتون
والثانيه بلسميك ( للاسف مافكرت اجمعلكم الأسعار )
وهو تم يذوقنا من الأنواع
وعقب غلفهم بالبلاستيك حق الطياره
هذا البلاستيك اللي فيه فقاعات هواء
ع فكره اذا اشتريتوا أي شي زجاج اطلبوا منهم يلفون حق الطياره















دخلنا هذا المحل واشتريت نعال كروكس بس شتوي حق عبادي وايد حلو وماسبق شفت منه











عجبني عرضهم كان مغري بس ما اشتريت منه







لما مشينا جدام لقينا محل أحذيه ويبيع نفس اللي اشترينا حق عبادي بس هذا يبيع للكبار
وع طول خذيت واحد لي ولبناتي وناسيه بكم اشتريناهم بس
اعتقد بـ 20 يورو







هاي شوزاتنا
عا يوم يبتهم هنيه وقمنا نلبسهم لما نسير المزارع الكل يسأل عنهم والصراحه هم يدفون



وهذا اسم المحل



هذا مطعم وما أدري شو يبيع بس كان عليه زحمه



هذا الولد اللي يمص مصاصه
ذكرني بنفسي لما كنت صغيره ولين 5 سنوات وأنا أمص المصاصه
وكل مايعقونها عني اسير عند الدكان اللي عدال بيتنا وآخذ من عنده وحده يديده وهو يحاسب أهلي
لين أدبني ابويي الله يرحمه وحرمت عقب



هذا المحل يبيع بهارات







من عرضهم الحلو ودك تشتري منهم











وماتشريت من المدينه القديمه الا اللي خبرتكم عنه
وفي وايد محلات
وماصورت كل شي وماشفت كل شي بس استمتعت في المكان
وعقب طلعنا من السكه ع الساحه



ومن هاي الساحه سرنا صوب سيارتنا



وانتهت جولتنا في المدينه القديمه في هذا اليوم
ولكن
كررنا زيارة المدينة القديمه في يوم ثاني وفي النهار
وكان قبل سفرنا بيوم عشان أبدل مقاس واحد من النعله
ويومها تمشينا أكثر
ما ابا أحرق التقرير وفي يومها بعطيكم صور ثانيه عن هالمكان
وتفاصيل أكثر

آخر مواضيع هداوه

- جديد دبي ...حديقة دبي المتوهجه - يومياتي في منتجعات كارلوفاري وبراغ ( الشيك ) - مغامراتي البحريه في الكروز MSC للأراضي النروجيه - الدليل السياحي الشامل لسويسرا بالمختصر المفيد... - الدليل السياحي الشامل للنمسا بالمختصر المفيد...

توقيع : هداوه

حياكم الله في كل تقاريري

العشاء


خذينا سيارتنا وسرنا صوب المطعم اللي في الصباح نشنا عليه انه نتعشى فيه ، تذكرونه اللي عدال فندق ميركور

























































هو فيه يلسات داخليه وخارجيه














هاي طلباتنا

سيزر سلط

( اللي في كان أحلى ))







هذا طلبي





وهذا طلب بوعيسى

بيتزا بالباذنجان







الصراحه كانت وايد لذيذه

وهي يقدمونها جذي مب كامله ما أعرف شو الحكمه من هالشي














عقب ماخلصنا عشانا اللذيذ

يت اللحظه الحلوه وهي رجعتنا للفندق واليوم الأول في سويتنا الرآئع

لكن

باقي شغله بسيطه لازم نحلها وهي

الباركن

تذكرون لما خبرتكم عن الباركن لما خبرونا في الفندق الثاني انه بيكون بـ 30 يورو في اليوم

فكرنا نشوف أقرب باركن ونبركن نحن بروحنا فيه ونشوف ثاني يوم كم بيطلع علينا السعر ، وحصلنا باركن ورا فندقنا يعني عدالنا

عقب مابركنا وعند المخرج شفنا لوحة الأسعار حسب الساعه





فهمتوا اللوحه

لين ساعه مجانا ومن عقب يبدأ يحسب ، مثلا


ساعه ونص بـ 3.70 يورو وجذي

وبهاي الطريقه قام يطلع علينا الباركن أقل من 30 يورو يوميا



وهاي المكينه اللي ندفع فيها قيمة الباركن





وعقب سرنا صوب فندقنا القريب

ولما دخلنا الغرفه شفنا مفاجأه حلوه





شوفوا الذوق

شوفوا الناس اللي تفهم

حاطين لنا ماكرون وغرشتين عصير

العصير الأحمر حلو بس الثاني طعمه ألذ واااايد

والمكرون شو لذيـــــــــــــــــذ

اللي نآكله هنيه كله غش





عاد ياريت لو كل يوم حطولنا منه





بس كل يوم يحطولنا ع السرير شوكولا ومنيو الريوق

لوحبينا نتريق في الغرفه بس ولامره تريقنا في الغرفه لأنه


بيدفعونا زياده ، وبعدين الريوق تحت في البوفيه وايد أحلى وأشرح





وبعد شكولاتتهم لذيذه

أول شي كنت أجمعهم قلت بعطيهم عيالي ولما تذوقنا انا


وبوعيسى منه عيبنا وايد

طلعت اللي يودته وقمت آخذه ويانا في رحلاتنا ونتسلى منه


في الطريج ، والعلبه فيها حبتين شوكولا

بعطيكم صور ليليه من غرفتنا

















كان يوم جميل وطويل بس ماحسينا بالتعب فيه قد ما استمتعنا

وأحلى شي في هاليوم انه بنختمها في

سويتنا الرائع



تابعوني في اليوم الرابع اللي فيه الكثير من الرحلات

في مدينة غراس

آخر مواضيع هداوه

- جديد دبي ...حديقة دبي المتوهجه - يومياتي في منتجعات كارلوفاري وبراغ ( الشيك ) - مغامراتي البحريه في الكروز MSC للأراضي النروجيه - الدليل السياحي الشامل لسويسرا بالمختصر المفيد... - الدليل السياحي الشامل للنمسا بالمختصر المفيد...

توقيع : هداوه

حياكم الله في كل تقاريري

ماشاء الله ...رووووعة


متابعين

وايد وايد وايد حبيت السفره مشاءالله جولاتكم حلووووه الفندق الاول كلش مالومكم فيه انا مثلج السكن عندي وايد مهم مستعده مااتسوق بس اسكن في مكان عدل والقريه اللي رحتي لها اللي فيها سجن وبيوتهم ومحلاتهم واااااااااااااااااايدحبيتها وحطيتها في بالي اذا رحت هناك ان شاءالله ونيس اتهبل والقمه اللي رحتوا لها حبيتها وسالفة الحوت ضج صحكتني ههههههههههههههههههههههاي زين انج قلتي لي عن الحوت علشان اذا قالوها ماانصدم واما بنجور حسيت فيج لما سمعتيها يالبييييه انا كل يوم اسمع بحكم ان اعيالي في مدرسة فرنسيه سكتي اتعذب كل صبح خخخخخخ تاخذني الذكرى على ايام فرنسا هذا حالي كل صبح يمكن الوحيده بين الامهات اللي جذيه خخخخخخ والمغاربه فرنسا بلادهم حتى المدرسات اللي في مدرسة اليهال والمدرسين بعضهم فرنسين وبعض مغاربه وجزائرين كانوا عايشين في فرنسا متمكنين من اللغه اتوقع اعيالي بيكون لهم ربع من المغرب العربي وايد بسبب اللغه الفرنسيه ،،، فرنسا صارت بلادهم لهم هيبه في البلد من كثرتهم

وفندقكم الاخير يجنن مشاءالله والسويت والعصاير اتشهي حبيت العصير الاحمر احس طعمه حلوووو ... وايد وايد استقدت من هالتقرير شكرا ياام عيسى الله لايحرمنا منج ومن خفة دمج يجنن التقرير واسلوبج روعه الواحد مايمل ابدا ... تنصحيني اروح لها في الصيف مع اليهال وهل عندج خلفيه اذا الجو حار موت ولا الجو حلو انا احس في الصيف فيها حياه وناس اكثر انتي اشرايج يهمني رايج ياشبيهتي ... وشنطتج مثل شنطتي اتوقع اللي كانت على السرير هي اقنر ؟ انا شاريتها من هولندا من سنتين ووايد انفعتني للسفر لاني ماحب اشل شنطه بيدي في السفر كله اللبس هاذي وخفيفه وحلوه للمشي

منتظره اعرف باقي مغامراتكم تحياتي لج ياام عيسى