رحلتي للجنوب الفرنسي (نيس وكان وموناكو وغيرها ) - الصفحة 7

هداوه · 28-03-2015, 11:50 PM

اليوم الرابع

نتابع معاكم جولتنا في

غراس

المصنع الثالث للعطور هو ...

موقعهم ع النت

http://www.galimard.com/index.php/en/online-boutique.html

ما أدري هم اللي نحسين ولانحن

لما وصلنا عندهم كانوا في استراحة الغدا

ونفس الشي جزء المتحف مسكر وما أدري اذا في مصنع

المهم انه الموظفينمموجودين

ومفتوح بس صوب المحل حق البيع

في البدايه خلوني آخذكم من وين مابركنا

يالا ندخل

بوعيسى تكلم مع موظفة الاستقبال وهي خبرتنا انه الموظفين عندهم استراحه الحين

وقالت تقدرون تنزلون تحت تتفرجون لين يرجعون الموظفين

نزلنا تحت

ما أدري نحن نزلنا ولا طلعنا

أحيد نزلنا ولكن الصوره تقول طلعنا

هههههههههههههههههههه

المهم اني بدخلكم المحل

بس قبل المحل كم صوره ع الطاير

اعتقد انه هو متحف وما اعتقد انه هالجزء مصنع

بس

هل كان في مصنع موجود ؟

ما أدري ليش ماسألت ؟

الظاهر كان راسي منتفخ من العطور وماقمت أركز بس امشي واصور

كأني صحفيه

هاي الصوره تقول نزلنا

ياربي احترت

من هذا المحل اتشريت حق بناتي وحقي

تشوفون القهوه

شفطيتها تشفيط من كثر العطورات اللي دخلت مخيخي

اشتريت حق كل وحده من بناتي عطر وانا بعد خذيتلي عطر وكريم مرطب للبشره

اللي اذكره انه الكريم تقريبا بـ 400 درهم وهو من منتجات طبيعيه

ولما جربته شفته حلو ، وانا في العاده أشتري من ماركات وأغلى بوايد

فانصحكم تاخذون من عندهم

هاي المره تذكرنا وطلعنا البروشور اللي في الخصم ولما عطيناهم ياه

خصمولنا 10 %

انصحكم بزيارة هالمحل لأنه عنده وايد منتجات من صناعتهم حلوه

والموظفه اللي موجوده كانت جدا لطيفه وهي يلست تختار لبناتي حسب اعمارهم

واختياراتها عجبتني

عموما انا ماتشريت وايد من هاي السفره مجرد أشياء بسيطه مثل ماشفتوا

عقب ماخلصنا تشري قررنا ماننتظر الموظفين يداومون وقلنا بنختصر الوقت وبنسير

صوب مزارع الزيتون

جولتنا اليايه بتكون ممتعه مع مزارع الزيتون اللي سرنا ندورها وشو

اكتشفنا

وشو تعلمنا

تابعوني ..

مع شجرة الزيتون

هداوه · 28-03-2015, 11:52 PM

تفاصيل اليوم الرابع

غراس

تذكرون لما مريت ع المكتب السياحي اول ماوصلت غراس

وقتها سألتها عن مزارع الزيتون

عطتني وقتها بروشورات وعناوين

وهاي العناوين اللي عطتني ياها الصراحه ممتأكده اذا هي مزارع ولامعاصرللزيتون
عموما اللي انا جربتهم بعرضهم عليكم

العنواين

موقعم ع النت

http://www.moulin-dopio.com/boutique/en/

موقعهم ع النت

http://www.huilerie-sainte-anne.com/

موقعهم ع النت

http://www.moulinbaussy.com/

موقعهم ع النت

http://www.moulin-du-rossignol.com/

هاي المزرعه اللي خبرتنا عنها أم عمار

موقعهم ع النت

http://www.royrie.fr/index.php?lang=english

معصره زيتون القديمه

عقب ماخلصنا مصنع العطور قررنا نسير مزرعة الزيتون

واتبعنا هالبروشور

موقعهم عن النت وعنوانهم
http://www.huilerie-sainte-anne.com/

وصلنا

دخلنا في هاي السكه

وصلنا لنهاية السكه وشفنا مثل هالكوخ

وشفنا سيارتهم واقفه
هنيه تأكدنا انه نحن في المكان الصح

تابعوني في زيارتنا لمعمل زيت الزيتون

PrinceOfPersia · 28-03-2015, 11:59 PM

تقرير مشوق ورائع

متااااااااااابع

الايمان · 29-03-2015, 10:12 AM

روووعه يا ام عيسى ابدعتي
انا مارحت الحنوب الفرنسي ومخططه ان شاءالله اني اروح والكل قاللي اسكن في كان
لكن من بعد تقريرج حسيت انه نيس احلى واونس
بالنسبة لي السكن جدا مهم احب بعد تعب وفراره اليوم ادخل غرفتي ارتاح
ام عيسى الحين تنصحين بزياره اخر مصنع للعطور؟؟؟

Haksa77 · 30-03-2015, 02:12 PM

سلمت أياديكـ مميزتنا أم عيسى
ع التقرير الرائع والمميز
دوماً مبدعة يالغالية ماشاء الله
متاااابع وياااك

فيصل · 31-03-2015, 07:51 PM

هذا اللي اقصد له اكثر من مكان في باريس ومعرض في الاوبرا

Fragonard : PARFUMEUR - GRASSE * PARIS * EZE

تسلمين ام عيسي جزء العطور مهمه جدا بنظري

هداوه · 31-03-2015, 11:36 PM

مسالورد والياسمين

اليوم وانا أتفرج ع التلفزيون شفت حاطين في ناة دبي برنامج ع الفاشن

وتخيلوا كان الموضوع عن المصمم العالمي روشاس وعن حياته في الازياء والعطور والتركيز كان ع العطور

والمذيعه خذتنا الى غراس

ياسلااام ع غراس استرجعت ذكرياتي فيها وانا أتفرج ع هالتقرير

واكتشفت انه كان فيه مصنع روشاس في غراس ووقتها ماعرفت عنه والصراحه ما أدري اذا هالمصنع مفتوح للزوار ولا لا

فاللي بيسير يسأل عنه هناك

وخذتنا المذيعه لمزرعةورود الروز واللي يصنعون منها بعض عطورات روشاس

وراوونا كيف أستخراج الزيوت من ورود الروز وبعدين نقلتنا الى باريس وعند خبير العطور وكيف يكونون عطورهم من هالزيوت

الصراحه تقرير جميل ويشعرك انه العطور مش مجرد عطر بس انما هو فن وذوق وشي كبير

الصراحه ما ألومهم يوم عطوراتهم تكون غاليه ، الحين قدرت الصراحه صناعة العطور في باريس

ودايما باريس هي الرائده في مجال العطور وتتميز فيها

تابعوا البرنامج ع قناة دبي كل ثلاثاء ع الساعه 10 ونص بالليل

انا شفته بالصدفه وفي كل مره ينقلكم لماركه جديد وعالم جديد من الموضه والفاشن سواء عطور ولا لبس ولا اكسسوار

الصراحه برانامج جدا جميل

توا طلعت الاعلان من اليوتيوب

هداوه · 31-03-2015, 11:43 PM

اقتباس : المشاركة الأصلية كتبت بواسطة PrinceOfPersia

تقرير مشوق ورائع

متااااااااااابع

اقتباس : المشاركة الأصلية كتبت بواسطة الايمان

روووعه يا ام عيسى ابدعتي
انا مارحت الحنوب الفرنسي ومخططه ان شاءالله اني اروح والكل قاللي اسكن في كان
لكن من بعد تقريرج حسيت انه نيس احلى واونس
بالنسبة لي السكن جدا مهم احب بعد تعب وفراره اليوم ادخل غرفتي ارتاح
ام عيسى الحين تنصحين بزياره اخر مصنع للعطور؟؟؟

اقتباس : المشاركة الأصلية كتبت بواسطة Haksa77

سلمت أياديكـ مميزتنا أم عيسى
ع التقرير الرائع والمميز
دوماً مبدعة يالغالية ماشاء الله
متاااابع وياااك

اقتباس : المشاركة الأصلية كتبت بواسطة فيصل

هذا اللي اقصد له اكثر من مكان في باريس ومعرض في الاوبرا

Fragonard : PARFUMEUR - GRASSE * PARIS * EZE

تسلمين ام عيسي جزء العطور مهمه جدا بنظري

شكرا يا أحلى متابعين

ان شاءالله اليوم انتظروا مني جزء يديد ان شاءالله

هداوه · 01-04-2015, 06:41 PM

نتابع معاكم

نزلنا وسألنا الموجودين هناك شو اللي عندهم بالضبط

فخبرونا انهم عندهم معصره قديمه للزيت الزيتون

ودخلونا المصنع وراوونا كيف يعصرون الزيتون

ومن حظنا كانوا يشتغلون هاذيج الساعه في عصر الزيتون

هذا هو المعمل

حجمه صغير والشغل كله في هاي الغرفه

صناديق الزيتون

وهنيه يحطون الزيتون ويطحنونه بهاي الخشبه الدائريه الكبيره
ويطحنونه ويالبذور وياه بدون غسيل

الحين يحطون الزيتون

تشوفون هالريال

خلاني قرفت من هالمصنع

هذا الريال دخل داخل هاي الدائره وهو لابس بوت ويلس يطلع الزيتون اللي انطحن

وعقب ماخلص وطلع من الدائره سار يمشي برع ويلس يدخن

يعني هذا البوت يدوس فيه الأرض وهو نفسه يدخل فيه في الدائره
الصراحه لاعت جبدي اتخيل هالزيت بيطلع ملوث

وفي هذا الصندوق يحطون فيه الزيتون المطحون

عقب يحطون الزيتون اللي طحنوه في هالخيش

عقب يحطونهم فوق بعض ويكبسونهم

عقب العصر

ينزل في هاي الدبات بس شقايل ما أدري نسيت كيف شرحه لنا

عقب عصر الزيتون يفرغونه البقايا ويعقونه ( يرمونه ) في الزباله

للاسف نسيت أسألهم بعد مايعصرونه وين يودونه وكيف يعبونه في علب خاصه للبيع

وكيف يصنعون منه بعض المنتجات

يمكن في موقعهم تحصلون تفاصيل أكثر

الصراحه ماقريته

هداوه · 01-04-2015, 06:45 PM

نتابع جولتنا

عقب ماتفرجنا وصورنا خبرونا نسير الصوب الثاني

وهناك في محل يبيع المنتجات المصنوعه

من الزيتون وزيت الزيتون واشياء ثانيه

جوله في المحل

أحلى شي

التذوق

الموظفه شرحتلنا انه هاي المعصره تعصر بالطريقه القديمه يعني يدوي

وانه في مصنع او يمكن أكثر

الله اعلم يعصر بألات حديثه

ولما كانت تراوينا منتجاتهم كانت تخبرنا اي نوع من الزيوت

اللي معصور بالطريقه القديمه

واللي معصور بالطريقه الحديثه

هاي مشترياتنا

العلبه المعدن هو زيت الزيتون

ولين الحين مافتحته أبا أنسى اللي شفته في المصنع عشان اقدر اشربه

والشفاف الأخضر هذا شامبو من زيت الزيتون بعدني ماجربته

وصابونتين من زيت الزيتون وحده الحين فتحتها واستعملها

والغرشه السودا

هي زيتون مطحون مثل اللي يحطونه في المطاعم الايطاليه وناكله ويالخبز

بس للاسف ماعيبني لما فتحته وتذوقته حسيته مالح ومافي اي نكهه

ماأدري مااتشجعت اشتري وايد اشياء

شجرة الزيتون هاي

أنا شفتها عقب ماطلعت من مصنع العطور جاليمارد

ع فكره نسيت أخبركم في يوم ثاني بعد بوديكم مصنع العطور اللي كنت أدوره وماحصلته في هاليوم

طلعت قراره

انا وبوعيسى

ماكنا متأكدين اذا هو زيتون ولاثمره ثانيه لأنه عمرنا ماشفنا شجرة الزيتون

وتمينا نتشاور عليها

وعقب قطعت وحده وطعمتها

جان احسها مره وعقيتها

بس بعد ماسرت المعصره وشفت الزيتون جدامي

عرفت انها فعلا كانت شجرة زيتون

انطباعي عن المكان

المكان ماحسيته مهيأ لأستقبال السياح

والمعمل غير منظم ولامرتب ووسخ

ومافي موظفين متخصصين لأستقبال الزباين عشان يشرحولهم

الصراحه نحن رزينا ويهنا وهم كانوا مرحبانيين

وواحد شرحلنا شوي لما سألناه

وكنت اتمشى داخل واصور ومايقولولي شي

استمتعنا بانه نشوف ونعرف شي عمرنا ماشفنا شراته جدامنا

في الأخير الخيار لكم في زيارة المكان

ولو اسافر جنوب فرنسا مره ثانيه بجرب العناوين اللي ماجربتها

عشان اشوف اليديد عندهم

تابعوني ..

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شرح حجز القطار من فيينا الى سالزبورغ وغيرها	حبْر	بوابة النمسا	39	19-07-2019 09:28 PM
سؤال شو يعنني جنيف الجانب الفرنسي احترت	india	بوابة سويسرا	10	04-08-2017 04:58 PM
في قرى قريبه من نيس وكان للسكن ؟	ريما عبدالعزيز	بوابة فرنسا	3	08-05-2015 08:47 PM