رحلتي للجنوب الفرنسي (نيس وكان وموناكو وغيرها )

هداوه · 01-04-2015, 06:59 PM

الجزء الاخير من اليوم الرابع

غراس

معلومه

غراس

قريه قديمه وماشفت فيها سنتر فيه محلات وكوفيهات ومطاعم ويلسات

ولكن تكثر فيها المصانع والمتاحف والمزارع

عندهم في شهر فبراير ومارس ( 2 و 3 ) تنبت أزهار فيولييت VIOLETTES

وفي جون ( 6 ) ورود اللافندر LAVENDER

وفي مايو ( 5 ) ورود الروز ROSE

وفي اوغست ( 8 ) ورود الياسمين JASMINE

وعندهم ورود ثانيه تنبت في غراس بس ما أدري متى موسمها مثل

tuberose

mimosa

للاسف في فترة وجودنا ماكان موسم اي نوع من الورود

تفاصيل اليوم الرابع

مصنع زيت الزيتون الحديث

عقب ماطلعنا من مصنع زيت الزيتون القديم شفنا عندنا وقت وماكنا يوعانين

والجو يخبل وممطر

فقررنا نتبع بروشور ثاني لمزارع الزيتون

نحن كنا نتبع البرشور ونحن مب عارفين شو بنشوف جدامنا هل مزرعه ولا مصنع

حطينا العنوان ومشينا

موقعهم الاكتروني

http://www.moulin-dopio.com/boutique/en/

كان مطر واشوف سيايير مصطفه وناس واقفه طابور

بركنا ونزلنا

عقب مانزلنا قاللي بوعيسى انا مابسير هناك وين اليمعه

قلتله ممشكله انا بسير اشوف شو السالفه وبرجعلك

يوم وصلت هناك شفت المزارعين يطلعون من سياراتهم صناديق الزيتون

ويوقفون في الطابور يسجلون محصولهم

اعتقد هم يسلمون المصنع الزيتون ويسجلون الكميه

وعقب كل مزارع ايي ويستلم زيت الزيتون ماله

للاسف ماحصلت حد يشرحلي بس هذا اللي استنتجته

كان الطابور اطول بس عقب لما صورت خفوا شويه الناس

تجولت بروحي في المعصره الحديثة ولاحظت انه المكان أنظف وارتب

نوعا ما كنت فاهمه الطريقه لأنها تشبه الطريقه القديمه بس باسلوب مطور وبالأجهزه

شوفوا اللوحه الخلفيه تعبر عن مزارع الزيتون

بعد ماتجولت بروحوي ، وبدون محد يشرحلي وبدون ما أسأل حد بسبب الزحمه وانشغال الناس رجعت

صوب بوعيسى ودخلنا المعرض اللي يبيع منتجاتهم

معرضهم او محلهم وايد يفتح النفس من كبره وتنوع بضاعته ومن عند هذا اشتريت

اكثر

حبيته وايد

شامبوهات وكريمات وصابون كلها من منتجات طبيعيه

بس انا ما اتشريت من هالجزء لأنه عندي وايد مشتريه

من اوروبا ومن تايلند

السلام عليكم ورحمة الله وبركاته
السلام عليكم ورحمة الله وبركاته
السلام عليكم ورحمة الله وبركاته
السلام عليكم ورحمة الله وبركاته

تايم التذوق والتجربه

سلات حلوه تصلح للهدايا

للأسف نسيت أصور مشترياتي وأسعارهم

عموما انا اشتريت منهم زيت الزيتون

وزيتون مخلل بنكهة الفلفل وثاني مخلل بالاعشاب

واشتريت زيتون مطحون اللي ينحط ع الخبز

والسله الهديه اللي فيها تشكيله منتجات الزيتون

واشتريت بلسميك

وبعد زيت زيتون في غرشه وداخله أعشاب وفلفل وتعطينا طعم حار

وهي نفسها اللي يحطونها في المطاعم الايطاليه حق البيتزا

ولما ييت بحاسبهم طلبت منهم يغلفون هدية فوفو وغلفوها لي تغليف الهدايا

والباقي طلبت منهم يغلفونها لي بالبلاستيك اللي فيه فقاقيع الهواء عشان مايتكسرون

والموظفه اللي ع الكاونتر كانت طيبه وبشوشه سألتها عن المصنع الثاني لفراجونارد وراويتها البروشور

وقلتها مايطلع عندنا ع الجارمن

المسكينه ماقصرت سوت اتصالاتها وكتبتلي عنوانهم وعطتني ياه

يعني ان شاءالله موعودين لزياره ثانيه لمصنع العطور

بالنسبه لرحلة اليوم

أنصحكم بزيارة المكان ع الأقل عشان تشترون من منتجاتهم الحلوه

خلاصة اليوم الرابع

من الصبح بدينا رحلاتنا واللي ضمت 3 متاحف ومحلات للعطور بالاضافه لمصنعين لزيت الزيتون
وفي آخر اليوم لابد من زيارة مطعم

لأنه لين الحين ماكلنا شي غير الريوق وشوية خفايف من اللي اشلهم

وقررنا نسير المطعم اللي اول يوم كلنا فيه في المدينه القديمه
تذكرونه ؟

هذا المطعم عجبنا

ومن ناحيه ثانيه نحن يوعانين وتعبانين ومالنا بارض ندور

فقلنا ع طول بنسير نتعشى عندهم

طلبت حوت سيباس

صدق انه حوت وشكله بايخ
بس من يوعي كلت الخضر واليابس

وهذا طلب بوعيسى

وبعد كلت منه

وعقب ماخلصنا عشانا رجعنا سويتنا الرائع بعد يوم ممتع قضيناه في غراس

تابعوني في اليوم الخامس ورحلتنا لـ
لموناكو

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شرح حجز القطار من فيينا الى سالزبورغ وغيرها	حبْر	بوابة النمسا	39	19-07-2019 09:28 PM
سؤال شو يعنني جنيف الجانب الفرنسي احترت	india	بوابة سويسرا	10	04-08-2017 04:58 PM
في قرى قريبه من نيس وكان للسكن ؟	ريما عبدالعزيز	بوابة فرنسا	3	08-05-2015 08:47 PM