بسم الله الرحمن الرحيم
صباح/ مساء الخير

هذا أول تقرير لي في عالم منتديات السفر
دايما قبل لا أسافر أقرا في المنتدى لحد ما أشبع
و أحط لي قوائم بالمطاعم و أحسن الأماكن
و كل شي بالتفصيل
و إستفدت منكم كلكم بلا حد
هالتقرير تقديراً لمعروفكم معانا و مع كل المسافرين
و لأنه مثل ما قلت أول تقرير

فإعذروني على أي تقصير


اضرب في أرجاء الدنيا سافر حيث شئت.. سترى أشياء كثيرةٌ في العالم تغنيك.. تفتح أمامك آفاقًا لم تكن تخطر لك على بال كل هذا يجددك


نحتاج للتجديد في حياتنا
يبعدنا عن ضغوط العمل و مسؤوليات البيت و العيال
و أنا ما أشوف هالتجديد إلا في السفر

من رجعنا من إجازة الصيف مع العيال و أنا أقول ل زوجي في كل مرة بيسافر فيها لشغل
خذني معاك تكفى .. و تكفى تهز رجال
لكنه للاسف ما اهتز الا الحين هههههههههههههه

لا ... للامانة ما ناسبني إني أروح معاه في كل مرة يا يكون عندي شي
أو هو يكون معاه واحد من أصحابه

وتتعدد الأسباب و الرفض واحد

و قلت يالله أصبر ل ديسمبر مع إجازة العيال .. و مثل كل سنة نسافر من آخر ديسمبر ل راس السنة

لكن ... تجري الرياج بما لا تشتهي السفن (كأني كثرت حكم ... معليه تحملوني أحب أهذر)

صارت لخبطة في دوامي و ما راح أقدر آخذ إجازة مثل كل سنة في ديسمبر و لا حتى نص يوم

شالحل يا زوجي العزيز ... أبد ما باليد حيلة نصبر ل يناير

لكنه بعد كم يوم قال لي .. عندي سفرة لتركيا .. يومين مع الويكند يصيرون 4 أيام حلوين كتغيير
شرايج ؟

أنا مو من محبي تركيا (سامحوني) بس الموضوع فيه طيارة و سفر و إجازة شوي من العيال

أوكي يالله

حجزنا الأول كان من الثلاثاء 14 نوفمبر للسبت 18 نوفمبر
فقط اسطنبول
و التذاكر على طيران الخليج
و الفندق بيرا بالاس جميرا

بعد أسبوع من حجزنا أختي قالت لي إنها بتسوي عملية تاريخ 15 نوفمبر
ف على طول قلت لزوجي و كنسلنا الحجز و قلت عساها خيرة

بعدها بإسبوع ثاني أختي رجعت و قالت إن عمليتها تأجلت ل ديسمبر
قلت لزوجي يالله نحجز مرة ثانية

قال لي تعبان من زود ضغط الدوام و سفرة بس شغل بتعب فيها أكثر
شرايج نمدد و نخلي السفرة أسبوع .. و نشوف مكان غير إسطنبول تغيير
قلت له تم
و قعدت أحوس بالنت و طبعاً بالمنتدى هني
و أشوف شنو أنسب منطقة في تركيا في هالوقت من السنة
الشمال وايد برد
سبانجا الجو غير مناسب
أنطاليا و ما جاورها ... ما راح نستفيد من كل الفعاليات
وين .. وين .. وين ؟

طحت على كبادوكيا .. جذبني السكن في الكهوف
والتجارب الجديدة اللي فيها
في السفر أحب أكون غير تقليدية
من حيث السكن
و من حيث الاماكن و الانشطة

فحبيت كبادوكيا من أول نظرة
و اللي فهمته إنها تحتاج بين 3 ل 4 أيام عشان تغطي كل الانشطة فيها


و بحثت في احسن منطقة للسكن فيها وإخترت غوريمه مدينة صغيرة و الفنادق اللي فيها اغلبها بوتيك هوتيلز و هي الأقرب للانشطة اللي أبي أسويها هناك

من التجارب اللي قريتها قليل يشجعون على تأجير سيارة هناك و يقولون الافضل تأجر سيارة ب سايق يوديكم على أهم الاماكن

فإستقرينا على غوريميه و بديت أبحث عن فنادق فيها
بصراحة أسعار الفنادق هناك خيالية

أسعار الليلة ما تتعدا 40 دينار

فكانت معاييري
القرب من سنتر المدينة
نظافة الغرف
تقييم بوكينغ ما يقل عن 9
وجود بانيو أو جاكوزي
السعر من 17 ل 20 نوفمبر ما يزيد عن 100 دينار

و قلصت اللستة ل 10 فنادق و قلت لزوجي خلاص تعبت انت اختار

و اختار الفندق اللي توقعته (عشان اسمه بس هههههههههه)

ِAmber Cave Suites
السعر ل 4 ليالي 87 دينار شامل الفطور
تقييم الفندق في بوكينغ 9.5
تقييمي أنا 8 ... لكن ما أظن راح أسكن فيه مرة ثانية
لأسباب راح اذكرها بعدين في التقرير

وبعد الحجز عن طريق بوكينغ
الفندق طرشو لنا ايميل بالانشطة اللي ينظمونها (يتعاملون مع شركة سياحية)
و أغلب اللي كنت أبي أسويه مشمول
فقررنا نستغني عن فكرة السايق الخاص و نعتمد على الفندق
و رديت عليهم بإيميل باللي أبي احجزه ( بنتكلم عن الرحلات بالتفصيل في وقتها)

في اسطنبول (هالكلام من اول التخطيط اللي تكنسل)
كنت ابي احجز شي على البحر
الفورسيزون او الكمبنسكي
(آخر مرة كنا في اسطنبول حجزنا الشانغريلا و كان جميل جداً)
بس الاسعار لليلة مبالغ فيها ف قلت ادور شي على الاقل فيه اطلالة على البحر

معاييري وقت البحث
اطلالة على البحر
حجم الغرفة ما يقل عن 30 متر مربع
5 نجوم
تقييم بوكينغ ما يقل عن 9
سعر الليلة ما يزيد عن 100 دينار

وانا ابحث تذكرت اني من فترة شفت تقرير عن احسن 10 فنادق في اسطنبول
ف شفتهم و اللي ناسبني منهم (هو اللي اخترته اول مرة)

Pera Palace Jumairah
السعر من 20 ل 24 نوفمبر 280 دينار بدون فطور
تقييم بوكينغ 9.2
تقييمي 9 و أنصح فيه


في النهاية

مع الترتيبات صارت الرحلة من 17 نوفمبر ل 24 نوفمبر
8 أيام ل شخصين أنا و زوجي

الطيران كان طيران الخليج
حجزنا من الاميال السعر لشخصين إضافة 180 دينار

الطيران الداخلي
كنت أبي شي من مطار أتاتورك عشان أستغل أول يوم بدل ما نبات ليلة في إسطنبول
يعني الطيران المفروض يسمح بوزن الشناط اللي ويانا كلها
ف إخترت الطيران التركي

وفي مطارين في كباودكيا
Nevsehir و المسافة 40 دقيقة ل غوريميه بس وقت الذهاب قريب من وقت وصولنا في إسطنبول ف خفت يصير تأخير و نتوهق و وقت العودة وايد من الصبح
و تم إستبعاد المطار
Kayseri و المسافة ساعة و 5 دقايق ل غوريميه و الرحلات متعددة على طول اليوم
و السعر مناسب
79 دينار لشخصين


هذا كان جزء التخطيط
أتمنى إنه يكون وافي

و أتمنى ما أكون غلطت في أي معلومة (اللي يعرف شي يصحح لي)

و الأهم أتمنى إني ما أكون ثقلت عليكم بكثر الهذرة

اهلا بك اختي ام ريمه .. يشرفني أكون أول الحاضرين في التقرير وبلاشك ان بدايتك في مرحلة التخطيط كان مدخل رائع وياليت كلنا نكون بنفس هذا المستوى من التخطيط ... بإذن الله متابعك وبعناية فائقة لاحتياجي الدائم لمثل هذه المعلومات

انا سكنت في( غورميه ان ) الغرف داخل مافيها اي منظر او تهوية و الفطور متوسط او عادي وفيه اي شي ثاني مثلا بتتغدا او عشا او كوفي كله من خارج الفندق


بنسبه الى مطار كيسري Kayseri يعتبر خارج كابيدوكيا و التابع
لمدينة هوNevsehir

بالعموم انا كنا طلعنا من انقره اقرب مطار دولي وفيه طيران مباشر من الدوحة

مدينة جميله جدا ممكن الفندق يرتب مع الشركة لرحلة المناطيد

هلا بك ام ريمه ... تخطيط رائع

متابع معك

ماشاء الله يا أم ريمه

مثل ما وعدتينا في السناب بانك تكتبي تقرير عن رحلتك

تخطيط مرتب وحلو

وكثري من السوالف

ومتابعين

ويا حلوو هالسواليف
شفت شوية من السناب مع اني ما احب برنامج السناب
بس عجبتني سناباتج
وتخطيطج حلوو ومرتب
وباين الفنادق راقية اللي اخترتيها
بس بعرف اشمعنى عجبكم على الاسم بس فندق كبادوكيا
منتظرين التقرير والصور الجميلة
وبالاخير نتمنى السلامة لاختج وربي يقومها بالسلامة ان شاءالله