اولا الف مبروك ياعريس والله يتمم لكم على خير أن شاء الله

مدة 15 يوم تقدر تستفيد منها بشكل كبير لزيارة 3 دول والافضل تشطب النمسا من الجدول بما انك عريس تكفى 3 دول وكمان ترتاح من الهجوله والمسافات البعيده

انا اقترح عليك 4 ايام باريس واعتقد تكفي لزيارة أهم الاماكن والمناطق السياحية في المدينة
بعدها اطلع قطار ع جنيف ليلتين ومنها زيارة انسي الفرنسية
تاجر سيارة من جنيف وتذهب الى انترلاكن 3 ايام + يوم في زيورخ
بعدها تاخذ طيران ع فينيسيا يومين
تاجر سيارة من فنيسيا ثالث يوم وتذهب الى ميلانو اخر ايامك ومنها تزور كومو وكذلك لوغانو السويسرية والعودة تكون من ميلانو
يصير جدولك كالاتي:
4 ايام باريس
2 يومين جنيف + انسي
3 ايام انترلاكن
1 يوم زيورخ
2 يومين فينيسيا
3 ايام ميلانو
---------------
ثانيا المصاريف
1- حجز الطيران يكون خلال هالفتره فالعروض والاسعار قد تكون مناسبة جدا وكل تاخير راح تتدبل الاسعار
2- الافضل تحجز الفنادق من الحين فكل تاخير اعرف ان الاسعار فيها ترتفع وكذلك فرصة ايجاد السكن والموقع المناسب تكون قليله فشد حيلك ياعريس خاصة اذا صامل ع السفر

اما المصاريف الشخصيه حد 1000 ريال يومي وممكن تزيد شويا وعليك الحساب
طبعا تقدر تقتصد كثير فمثلا الوجبات مو لازم كل وجبة غدا وعشاء في مطاعم فخمه او مطاعم عربية وتطلب اصناف كثيرة تقدر تستغني عنها فاسعار المطاعم غالية جدا ومرهقة للميزانية في اوروبا
والبديل مطاعم وجبات سريعه /بيتزا/ شاورما.. ولايمنع تعزم العروسه يوم او يومين بمطاعم فخمة بس بدون تبذير
عندك بعض الانشطه تذاكرها غالية ممكن توصل 500 ريال للشخص هذي اسحب عليها ويوجد بدائل كثيره لها
كمان عندك التسوق مو لازم فانت رايح سياحة وتنبسط مو رايح تتسوق إلا اذا فلوسك زايده هذا شيء تاني ولايمنع من هدايا رمزيه وتذكارية عشان العروسه
1000 ريال في اليوم ممكن لو اقتصدت وصرفت باعتدال يصير 600 الى 700 ويمكن اقل وانت وشطارتك ياعريس وأهم شيء لاتهايط قدام العروسه ترا بتصرف الفين مو الف
واخيرا الاماكن السياحية في كل دوله بتزورها ممكن تاخذ لك فره في البوابات وتقرأ التقارير وصدقني راح تصير خبير وترد ع الاستفسارات وانت لسى ماسافرت
سجل الاماكن اللي تعجبك وكمان خلي العروسه تاخذ فره كمان ع البوابات عشان تكملو بعض ويصير خلفيتكم 100% عن الاماكن اللي بتروحو لها
واي استفسار او معلومة تنقصك حنا والاخوان هنا في الخدمة نعين ونعاون وجميع الاعضاء ان شاء الله مايقصرون
شوف الجدول اذا ناسبك تمام او حدد الدول اللي تبيها بالضبط والايام واكيد الاعضاء بيعطونك اقتراحاتهم

نتمنى لك رحلة ممتعه وسعيدة بإذن الله

آخر مواضيع فارس من خيال

- من أجمل ما رأت عيني (جزيرة جيجو - كوريا ) - استطنـــــ(في خاطري شوق وحكايات واسرار)ـــبول - على اطلال (هونج كونج)2017 - هَِنأّ يِّفِّيِّض أّلَأحٌَّسأَّّس وِتّشٍبِعٌ أّلَحٌوِأَّّس(أوِروِبِــًـِـُـأّ) - بين الكلام والصمت جمال (نيوزيلــــ New_Zealandـــــدا)

توقيع : فارس من خيال

يوماً ما سَـأرحل دُون »وَداع« أَتمنى أن يَذْكرني أحدكم بدَعــوهْ Save