سلام عليكم ورحمة الله وبركاته .

عدت والعود أحمد .

كما وعدتكم ياحبايب راح أنقل لكم تجربتي مع السيارة والسواقة في اسطنبول .

في البداية أشكر كل من ساهم في الموضوع برأيه وإفادته .

ورغم حرصي على الأخذ بما أشار عليه البعض من شركات عالمية إلا أني لم أجد السيارة التي أرغبها من ضمن الخيارات .

فكان التوجه لشركة قارنتا .

إجراءات الاستلام كانت جيدة . أضفت تأمين شامل بحوالي 260 ريال .

أخدو تأمين 500 ليرة تركية .

السيارة ماشاء الله ممتازة وشبه جديدة . رينو ميقان .

بدون قوقل ماب مستحيل كنت حسوق هناك ههههه

بصراحة لو الله ثم قوقل ماكان اتحركت خطوة .

بخصوص الزحمة بتكون في أوقات معينة وخاصة أو قات الذهاب للدوامات أو وقت العودة منها . أما غير كدا فالوضع طبيعي جدا جدا جدا . وخاصة في الليل أبو الروقان .

المشكلة الأهم هي المواقف . لكن مع توفر مواقف بالفلوس كل شي ينحل . بس عاد تترك السيارة والمفاتيح . المهم تحرصوا على إنه ما يكون في شي مهم في السيارة .


بصراحة عن نفسي استمتعت كتير بالتجربة . وخاصة في موضوع التدفئة طول الوقت مشغل الدفاية في السيارة . وما عليك إلا توصل المكان اللي تبغاه ةتنزل فشي طبيعي إنه فيه كمان دفايات .

والسيارة ساعدتني في عدم التعرض للبرد كتير بصراحة .

عشرة أيام عبيت ديزل تلات مرات . شامل اللفلفة في اسطنبول وبورصة وجبل اولوداغ .

مرة عبيت ب 150 ليرة ومرة 180 وآخر مرة وأنا رايح أسلم السيارة عبيت ب 70 عشان أسلمها فل زي ما أستلمتها .


إجراءات التلسيم ما أخدت مني ولا 5 دقايق . حتى ما شيكوا عالسيارة لأني سلمتها مغسلة نظيفة كما إستلمتها وأحسن . فقط شيكو على العداد .

انا إيجاري كان مفتوح الكيلو متر . ودا عطاني حرية التنقل والصرمحة هههه

عشرة أيام كانت تكلفة الإيجار حوالي 1050 ريال . مقارنة ببعض الدول أنا اشوفه جدا ممتاز كحجم ونوع السيارة ومفتوح الكيلو .



بس يا حبايب هادي تجربتي بإختصار مع إستئجار سيارة في تركيا . وهي الحل الأمثل في حال إني حروح هالبلد في أي وقت لاحق إن شاء الله .

حتى الفندق وفر لي موقف مجانا طول المدة .

لم أتعرض لأي مضايقات أو تفتيش لجان أو مرور . ياغريب كن أديب وهادا مبدئي في السفر .



وحدة مرة تم إيقافي في لجنة في الليل في ترابيا . وبمجرد قلت لهم سلام عليكم بلهجتنا المكاوية ؟

قالي ( تمام ) وأشار بيده إني أمشي .

والحمد لله الأمور كانت سهالة . حتى لما تشتري أغراض أو شي تحطها في شنطة السيارة وإنت مطمئن .





وأحب أنوه إلى تجربتي مع الكونكت اللي قريت عنو هنا في المنتدى وكانت تجربة أكتر من رااااااااااااااااائعة

نت مفتوح ولا مشاكل الشرايح والشحن والصداع دا كلووووو

تقدر تشبك عليه عشرة أجهزة جوال في آن واحد . معاك في السيارة في الفندق في أي مكان يدون انقطاع إشارة . والسرعة ممتازة ..

افادني كتير بعد الله عز وجل في موضوع القوقل ماب