ان شاء الله يكون هذا اخر جزء من الرحلة



انطلقنا من بورتفينو للاوت ليت الي مدحوه لنا وقريت عنه في النت وعلى طريقنا
والخطه نوصل له نتقضى فيه لكني محدد ايجار السيارة اني برجعها لهم الساعه 5 العصر
هذا وانا يوم اخطط قبل السفرة حاط 5 العصر قلت اخاف اتاخر شوي ولا الخطه اني اكون في ميلان على 2 او ثلاث

لكن تجري الرياح بما لا تشتهي السفن
وانطلقنا للشمال وزي ماقلت الطبيعة تغيرت جبال لكن باين الشتاء عليها والشجر كله بني ودرجة الحراره كل مالها تنقص تبرد

يوم قربنا من الاوت ليت الا اشوف لوحات تدل على ان فيه مدينه اسمها سيرفال موب اسم الاوت ليت لان يوم دخلت مع المخرج الا اشوف فيه كم اوت ليت وفيه لوحه تبي الاوت ليت الفلاني رح يسار ال هذا يمين
طبعا انا شايف صوره في قوقل قبل اروح ولا ادري عن الباقيه وصراحه مابي اتاخر على ميلان مابي اوصل ميلان الليل ومعي شنط وقروشه

المهم وصلنا العصر الا المواقف فل العالم تضف عشان الكريسمس ونهاية السنة
وطبعاً انا حاطين في بالنا بنضف معهم

بشكل عام المكان مرتب وحديث وفيه كل الخدمات والمواقف وسيعه
على طاري المواقف ..
المعزبه وضعها ذاك اليوم ماتتحمل تمشي كثير وبرد فقلت بنزلك وادور لي موقف ..
وكنت احاول ابي قريب بس راح علي الوقت قلت يارجال وقف بعيد شكلهم معششين موب طالعين الا الليل
طبعا كل سياراتهم صغير ومواقفهم بعد على مقاسهم

واحصل موقف وادخل السياره بالريوس وكان فيه عامود اناره يخلي مقدمة السياره تطلع شوي عن الموقف
يوم فكرت قلت لا اخاف على الموتر ماتسوى علينا يجي احد يحكها وسالفه مع اني مامن شامل

واطلع ادور موقف مره ثانيه .. ولعلي من الملل طلعت على وحده كانت مستعجله وضربت بوري وفكني الله ماصدمتني الغلط علي 100 بال 100
وانا الي استخدم سياسة اعمل نفسك ميت وادخل مع اقرب لفه واشوفها في المرايه عطتني نظرة ال.. طوووط طووط طيييط

والله واكمل لفلفه وحصلت واحد طالع واوقف مع انه بعيد الشاهد توني موقف ونازل بقفل الا اشوف سكيورتي يدور على السيارات الي في الصف الي وراي ويسجل مخالفات للي موقف على الخط الي بين الموقفين ولا الاي سيارته خارج الموقف

وانا الي اطلع من موقفي واضبطه تضبيطه بالمسطره
راح وقتي على هالموقف

وننطلق نستكشف الاوت ليت .. في البدايه بيضيعك لكنه واضح لانه مصمم تقريبا زي الهلال ولا هوب ذاك الضخامه يعني سوق تقريبا كبر سوق الرياض جلري لكن دور واحد وممرات .. وفيه واي فاي مفتوح ودورات مياه وانتو بكرامه منتشره ونظيفه
وبالنسبه للاسعار فيه شئ رخيص وفيه شئ نفس عندنا .. وخاصه ان الايطالين عندهم نظام بايخ في التاكس فري .. لازم مشترياتك من المحل الواحد تكون 150 يورو اظاهر عشان نعطيك تاكس فري

موب زي فرنسا وبريطانيا اي شئ تشتريه يعطونك عليه تاكس فري في الاخير تجمع الفواتير وتاخذ التوتل
بس ذا الاوت ليت فيه ميزه حاطين لك مكتب حق التاكس فري في المجمع اذا خلصت لازم تمرهم ويعطونك الفلوس بدون مايشوفون وش شريت ولا وش معك لكنهم يقولون لك لازم معك فيزا ويقولون لك وانت في المطار لاجيت تطلع من ايطاليا عطهم هالورقه المختمه الي تفيد انك استلمت المبلغ ولا ترى بتاريخ بنسحب من فيزتك المبلغ الي عطيناك اياه

المهم ما طلعنا من السوق الا العشاء تغدينا في برجر كينج واغلب ربعنا فيه يتغدون
وفيه باصات تاخذك من ميلان وتردك بس ناسي المبلغ اظاهر 60 يورو ذهاب وعوده ؟؟ منيب متاكد
واظهر كاني منيب واهم وقت نا كانوا يقفلون الساعه عشر الليل عشان موسم اجازه فيبيلك تشيك على اوقات دوامهم قبل تروح



وتوكلنا على الله وانطلقنا الى ميلان بلد الذوق والاناقة والموضة والطريق ممتاز لكن المشكله في السرعة العالم تشطفني وانا امشي على بيض
الوجهه الى مطار ميلان الدولي لتسليم السيارة وثم الذهاب الى الفندق بالقطار .. ومرسلين لي قبل يوم شركة ايجار السيارة اذا جيت ترجعها رجعها للمواقف رقم كذا البوابه كذا الدور كذا

وطبعا شارطين علي ارجع البنزين زي ماخذته الي فل بس ما تدري هو فل الفل ولا بس اهم شئ يكون المؤشر على علامة فل

الشاهد قبل لا نوصل شيكت على الجي بي اس اقرب محطه من المطار وين وانطلقنا
عشان نسلمها لهم فل لو ماسلمتها فل بيحاسبونك بسعر اللتر تبعهم والغالب يكون اغلب من السوق

والله واحصل محطه داخل موب على الطريق السريع صراحه مغامره في ديره ما اعرفها وليل الساعه اظاهر 9 او 10 الليل
والله واحصل المحطه مافيها احد مقفله خدمه ذاتيه انتهى دوامهم .. طبعا انا عبيت قبل في محطه لكن واحد ضبطني لكني اذكره معبي لي ديزل سبيشل الزبده ديزل معه كلمه ثانيه

واناظر المكينه الا كله ايطالي
انا قد جربت اعبي بنفسي لكن مكينتهم ذي جديده علي ولا فيها انجليزي افهم وش يقول
الزبده فتحت التانكي وحطيت البيب لكن مايعبي ...ويجي واحد ان شاء الله انه ولد حلال

واقوله ياحبيبنا افزع لنا ترانا من بلاد العرب بلاد الكرم والنخوه ترانا مسافرين وعلى باب الله محتاجين قيمة البنزين بس <-- استغفر الله الحمد لله على النعمه

الشاهد والله قال ابشر وجاء ويقراء حسسني انه اول مره يعبي زيي ..
قال بكم تعبي <-- هنا اشتغل التحري قلت هو بيسال عشان يبي يعرف كم معي .. بس والله خله يضبطني بس لاسوى حركه بايخه اضرب ولا تشاور
قلت له 50 يورو .. لان الموتر باقي فيه اظاهر ربع او نص فقلت خله يعبي ويرجع الباقي البطاقه ما اضمنهم
والله وسحب البيب رجعه مكانه ثم قال حط الفلوس وحطيتها ثم قال يالله عب وبداء يعبي وعطتني فاتوره ويوم عبيته فل الفل طلع اظاهر 20 يورو

اناظر في المكينه احتريها ترجع لي الباقي احاول اقراء الكلام شئ طلعت البيب ودخلته من جديد ماش مافيه
وانادي صديقي قبل لا يروح تعال وين الباقي ..؟؟ ويرجع يقراء الجهاز والتعليمات
قال مدري قلت وش مكتوب في الفاتوره طيب هنا هالكلمه .. ناظرني وابتسم وقال هذي معناتها مع السلامه

قلت طيب اشلون وش العلم .. !! قال مالك الا تجيهم بكره وتعلمهم يرجعون لك الباقي ..الله يخلف علي
قلت الحمد لله انها على بس 20 ولا زرفو شئ اكبر

والله واكمل طريقي للمطار وكان فاضي مافيه احد الحمد لله عادي اضيع واهدي اقراء اللوحات على روقان
والله وكل شئ واضح زي ماقالوا في الرساله .. واوقف الموتر وانزل الاغراض ويجيني الموضف واعطيه الورقه وشك على السياره .. مع اني مامن شامل الا انه يشيك
ثم قال خلاص بحفظ الله .. قلت طيب ورقه شئ والمبلغ المحجوز .. قال خل العقد معك وخلال هاليومين بنفك الحجز خلاص انا ارسلت بالجهاز ان ماعليك مشاكل وانك سلمت السيارة

ما ارتحت يوم دخلت المطار رحت سالت الموظف الي داخل قال ايه كذا نظامنا .. قلت خير ان شاء الله
الان خل ناكل لنا شئ ميتين جوووع بنفطس.. طلعنا للمطار الدور الاول في دور المغادرون فيه المطاعم
والله ونطلع المطار فاااضي يمكن مافيه الا رحله وحده ونحصل مطعمين ماك وفيه مطعم ايطالي مرتب
قلنا نبي اكل يشبع لان بنرجع للفندق ننوم على طول مافينا حيل من الصباح نفر .. خذنا لنا بيتزا وسلطه..وانا صراحه على اعصابي ودي اطلع بسرعه تاخر الوقت تقريبا الساعه 11 والطريق في قوقل يقول 50 دقيقه للفندق من المطار.. قطار ومعك ثلاث شنط ووقت متاخر ولوني لحالي عادي بس المعزبه انا بدبر اموري
المهم يوم خلصنا قلنا يالله وين لل القطار ..

يوم دخلنا الصاله الا فيها حركه ارتحت شوي فيه ناس لكن مافيه الا مكاين الكترونيه عشان التذاكر
طيب وش الطريقه الا اشوف موظفين يسولفون وانا من اول ماش قلبي ناغزني
وانا اقرب منه طلعت الجوال بطلع اسم المحطه الي ابيها عشان يعلمني كيف اقص التذكره

الا يقول اهلا ياباشه اخدمك بحاقه <-- طلع مصري وانا كنت شاك انه عربي لكن لان اشباه الايطاليين بعضهم قريبه منا فخفت اخش فيه وينلخم .. قلت له ضبطني ابي اروح هنا

قال تعال وختار المسار والمحطه وخويه الي معه قال انا بعد رايح لنفس الموحطه قلت زين
وننزل تحت الا القطار باقي له خمس د ويوصل ومعنا ناس موب لحالنا ومعهم اغراضهم

يوم وصل القطار الا اركب اول واحد مدري اشولن اوصف القطار لكن للي قد راح لدزني باريس بيعرف وش اقصد بالقطار موب ميترو

اول ماتدخل فيه ممر موزع يمين ويسار الكباين وفيه واحده تطلع بدرج ووحده تنزل درجتين انا وقفت في الموزع مع شنطي لانها كبيره صعب انزلها شوي الا احصل كل واحد من الي ركبوا معنا حط شنطته جمب شنطنا وراح وخلاها وجلس .. استوعبت انه كذا نظامهم مع العفش تخليه في الممر عند الباب وتجلس والله واتكي واجلس ورانا ساعه على ما نوصل وكنت اتبع كل محطه بالجوال واقراء اسمها

الى ان وصلنا ونزلنا مع العالم وانطلق معهم هم بيدلونك على المخرج ... وصلنا لبواباااات كثيره جنب بعض
وتحط كرتك تسحبه المكينه وترجعه ويفتح الباب .. واشوف بعضهم يدخلون ورى بعض بدون كرت مخالفين بس شكلهم متعودين

جاء دوري ودور المدام والله والبطاقه تقول خطاء ماتفتح .. الا وحده ايطاليه معها عيالها دفت ولدها ودخلت بتكت واحد وعطت حرمتي تكت ودخلت ... وانا جالس لحالي بالعفش اناظرها من خلف الحاجز والعبره في عيني وفيه وجلس يعزف ناي <-- لا ابالغ بس اعطيكم جو

المهم وش السوات المصري شكله غلط باسم المحطه فالحين وش السوات ماتفتح لي الا ذيك المحطه
ايه نسيت اقولكم في القطار فيه واحد جاء يدور يشيك على التذاكر
المهم جلست انتظر احد يجي عشان اسوي نفس الحركه مافيه حل الا كذا مافيه موظفين ولا عسكر بجلس الى بكره كذا لحالي المهم جاء شباب واناظره وحس اني بدخل وراه وضحك وقال كلمه ايطاليه زي الي ادخلك عطيته ابتسامه والله وحط الكرت وتاخر شوي عشان ادخل على الحساس مايقفل علي وتشكرت منه ماقصر


انحلت هذي المشكله جينا للمشكله الثانيه بجلس اسحب الشنط الفندق تقريبا خمس الى عشر دقايق مشي في هالبرد .. وقتها كنت اتشوف لتكسي لو يقربنا شوي مع انها ماتسوى بس عشان الليل
طبعا الصوره الي في بالي عن ايطاليا الان رجعت انها مافيا وعصابات وغالبا المدن في الليل تشوف متشردين
لكن كان الجو هادي ورايق وذكرتني بباريس من حيث التصميم العام

والله وقلت يالله بس نمشي قريب ونسحب هالشنط بس والله تعبتنا الشطن لان شوارعهم زي البلاطات المكعبات فمتعب تسحيب الشنط عليها ... ويوم وصلنا للفندق كنت صراحه بعد خايف منه انه مايكون مثل الصور او تكون الصور قديمه لكن الحمد لله توفقنا في الفندق ووصلنا بسلام وحصلتهم مجهزين كل شئ لاني حاجز غير مسترد عن طريق موقعهم ومعطيني غرفه حلوه وسيعه ولها اطلاله وفي اعلا دور
وخذ لك احلا نووومه الرايقه الي خلاص ما وراك شئ تشيل همه وحتى عندك وقت تتمشى في المدينه بدون استعجال فعادي لو ماتصحى الا المغرب

اعتذر لكم ما اقدر اكمل لان حصل لي شغل .. فنكتفي بهذا القدر اليوم والباقي ان شاء الله بكره ولا عقبه ونختم على خير

آخر مواضيع ATL

- المالديف مايو 2023 - اشتراطات الدخول لالمانيا - تغيير الصالة في رحلة الترانزيت - رأيكم بخط السير ؟؟ - القاهرة، مصر !! رحلة الغصب

توقيع : ATL

اللهم لا تجعل في قلوبنا غلاً للذين آمنوا