سأزور الكويت في فبراير باذن الله و احتاج الى اجابات بعض الاستفسارات :

ما هي افضل منطقه للسكن ؟حيث توفر مراكز التجاريه و المطاعم و ما فعاليات هلا فبراير؟؟

ايهما افضل التنقل عن طريق الأجرة و هل يوجد Uber او استئجار سيارة ؟؟

افيدوني بجدول المقترح لمدة ثلاثة ايام مع افضل المطاعم

وجزاكم الف خير

اهلا فيك وحياك الله الكويت تنور بوجودكم

المنطقه افضل السالميه
او الديرة

اوبر اعتقد عندنا بس في تكاسي جواله كثيره

التأجير افضل لان المواقف عندنا غالبيتها مجانيه
او بسعر زهيد

الاماكن شوف انا مسويه جدول لاحد الزوار
شوف اللي يناسبك منه واي سؤال احنا موجودين


هذا الجدول


جدول الكويت
خلي اول يوم المباركيه تغدوا او تعشوا هناك في مطعم فريج صويلح او مطعم الشمم وبعدها تمشوا بالسوق سوق المباركيه وايد حلو وشعبي وبتستانسون فيه
وبعد ما تخلصون السوق
روحوا تمشوا في حديقة الشهيد
في مرحلتين
المرحله الاولى فيها مطاعم والمرحله الثانيه حلوه فيها نافورة ونماذج لمعالم الكويت

هذا اليوم الاول ☝��

اليوم الثاني بيكون الجمعه
اكيد بتطلعون بعد صلاة الجمعه
وصلاة الجمعه بكل المساجد ممتازه ولكن اذا ودكم بزيارة المسجد الكبير فيه زيارات بجولات فيه بس ماني عارفه توقيتهم

بعد الصلاة انصحكم اذا حابين تتمشون الظهر تروحون الافنيوز
مول الافنيوز كبير جدا وتقدرون تتمشون وتتسوقون وفيه مصليات بعد اذا تبون للعصر والمغرب اذا حابين اكل كويتي بعد او تركي او هندي
يعني رز وجذيه روحو منطقة "السوق " هذا قسم بالافنيوز كأنه سوق قديم وفيه مطاعم وجلسات

المطاعم هني كلها اكلات حلوة ارشح لك مطعم الدروازه ...ومطعم كافيه بزه ...او سوتيش التركي
تقدر تطلب منهم القهوة العربيه
او تتقهون بمطعم "حليب وهيل " وتحلون بالحلويات الكويتيه
واعتقد بتلاقونها بالمطاعم نفسها هنا

بعد الافنييوز
في اماكن بالكويت حلوه افتحوها مطاعم وتمشي
١- مركز جابر الاحمد الثقافي
٢-حديقة البوليفارد السالميه
٣-مارينا كريسنت حلو المكان على المرسى للمراكب واليخوت والمكان مطاعم وجلسات
فيه عندهم مراكب او مثل ما تقول تاكسي بحري ياخذكم بجوله بالبحر قريب من الشاطئ تصورون المدينه منها

بعد ما تخلصون من جولة البحر روحوا المركز العلمي فيه اكواريوم
ومكان حلو للاطفال وكافيه
في مطعم بابل على البحر حلو بس غالي شوي بس وايد حلوة قعدته تلاقيه مبنى لحاله على البحر جميل وقعدته جميله

اليوم الثالث
اذا حابين تتسوقون للدراريع تلاقون في المباركية سوق الصفاة
هذا يكون عندهم دراريع جاهزه وحلوة
بعدها روحوا مول ٣٦٠ مجمع تمشوا هناك "
المروج مجمع مطاعم وايد حلو المكان ومزدحم بالناس يعني روحو مبجر
انصحكم بالمكان مميز بالمطاعم والجلسات اللي فيه
وان شاءالله اذا حابين شي ثاني احنا بالخدمة



على فكره
اذا تبون السينما موجوده بكل المولات الافنيوز و٣٦٠ والمارينا


المولات الماركات الغاليه
مجمع الصالحية
برج الحمرا
مجمع الرايه


عندك بعد مجمعات بالعقيله بس ما انصحك بالويكند لانها زحمة وتاخذ وقت بس علشان تطلع من الشارع
المولات هي
مجمع الغيت والبيرق
ومجمعات فيها العبايات واسواق الملابس الخفيفه وسلامتك

واذا ودكم بشي ثاني احنا حاضرين

حياك الله بالكويت
عندنا تطبيق كريم واوبر واسعارهم ممتازة افضل من التكسي العادي
واكيد الافضل انك تأجر سيارة تتمشى على راحتك

ماقصرت ام حسين بالشرح كفت ووفت

وحياكم الله اهل عمان السكن ( السالمية - بنيدالقار - الديره )

عندنا كريم بس انا افضل التأجير ارخص وعلى كيفكم والمواقف متوفره ورخيصه

والمقاهي الشعبيه و سوق شرق القعده على المرسى وايد حلوه
واذا تبون الاسواق الرخيصه الشعبيه في منطقه الضجيج اسواق حلوه ورخيصه مثل ( فاشن مل - صهيب - KU - طيور الجنه ستي ستار
او منطقه الري فيها بعد اسواق شعبيه صوب المشاتل و لولو هايبر و في معرض افكاري

في المعارض و التجمعات اللي يسونها الشباب تلقاهم في موضوع الأنشطة والفعاليات
وعندكم قرية الموروث الشعبي والمزارع اللي تفتح للزوار ايام الويك اند
و في مسرحيات و ان شاءالله راح انزل لكم جدول هلا فبراير

مرحبا مرحبا
الحمدلله الحجز على طيران العماني الى الكويت بتاريخ 7 مارس باذن الله وسابقى حتى تاريخ 10 مارس باذن الله في رحله مع زوجتي ....

عندي استفسارات افيدوني افادكم الله :

أبراج الكويت لم يذكرها أحد في الجدول السياحي هل تستحق الزيارة ؟؟

محتار بين عدد من الفنادق ارجو افادتي من فضلكم من حيث الموقع قريبه من اماكن السياحيه وجزاكم الله خير :

فندق إيبس الكويت السالمية

فندق ملينيوم الكويت

فندق راديسون بلو الكويت

فندق هوليدي ان الكويت

الابراج حلووه واحلى مافيها انك تصعد للمطعم للريوق حلوو والى الكرة الدواره في الاعلى لتشاهد الكويت من اعلى مع وجود اسماء المعالم على الزجاج

اما بالليل فتكون الابراج مضاءه خارجيا وراح تشوفها وانت تمر عليها بالسياره او تقف بالمواقف للابراج لتصورها عن قرب

الفنادق اعرف هوليدي ان الكويت اكيد بيكون بالقرب من المباركيه بس تحتاج سياره وماتبعد مناطقنا عن بعض بالسياره اكثر من نص ساعه
اي فندق يعجبك حلووو
ايبس السالميه يقع في منطقه حيويه قريب منك الفنار وليلي غاليري فيهم السينما اذا حاب تسهر وقريب ترجع للفندق مشي
في مركز سلطان ومجمع مطاعم
الشارع كله مطاعم واسواق فيها سينما على اليمين واليسار
وبعد قريب منك اسواق السالميه والمارينا وفريج صويلح

انصحك بالايبس وهو فندق اقتصادي يعني تخدم نفسك بس نظيف ومرتب والشارع مميز