رحلة لمدة 5 ليالي في برشلونة ،

أوربي · 16-04-2018, 09:34 AM

اقتباس : المشاركة الأصلية كتبت بواسطة alenore

وعليكم السلام ..

توصل بالسلامة ورحلة سعيدة ، دام زيارتك الأولى لبرشلونة زين إنك خليتها 5 أيام وأصلاً يوم ضايع عليك حق المباراة خخخخخ ..

متأكد إنها راح تعجبك ، مدينة جميلة وونيسة وفيها حياة ورعشة مثلها مثل باقي مدن أسبانيا ..

معالمها السياحية كثيرة طبعاً دام إنك برشلوني أكيد الكامب نو من المعالم المهمة إنك تزور المتحف فيها
في يوم آخر غير يوم المباراة ،

قلعة مونجويك مكان مرتفع جميل تقدر توصله بالتلفريك وفي نفس اليوم تشبك معها القرية الأسبانية ..

ساحة بلازا دي أسبانيا وفيها مبنى متحف كاتلونيا ونافورة راقصة رهييييبة تشتغل يومياً أعتقد حول تسع الليل وتقدر تتأكد من الريسيبشن حق الفندق أو أي مكتب إستعلامات سياحية ..

حديقة بارك غويل ،، كنيسة ساقرادا دي فاميليا ذي اللي لهم مية سنة يبنون فيها وما خلصوها خخخخخخخ
للأمانة معلم جبار وبناء رهيب ممكن تمر حوله ، ولو تبي تدخله إحجز عن طريق موقعهم الرسمي مثل ماعملت لأنه زحمة عند شبابيك قطع التذاكر ..

جهة المارينا والميناء الأولمبي فيها مطاعم وكافيهات وجلسات وممكن تاخذ لك تور بحري .

وعندك الرامبلا ستريت وساحة كتالونيا عاد هذي ما يحتاج من أهم الأماكن فيها وكنت دايماً مخليها في برنامجي اليومي لازم أمر عليهم وأجلس في كافيهاتها وكنت أتعمد في الزيارتين لبرشلونة أسكن حولهم .
في وسط الرامبلا سوق لابوكيريا ، سوق قديم يبيع فواكه عصاير مكسرات شوكلاته مميز بطريقة العرض ، وفيه بعد الحي القوطي حي تاريخي قديم متفرع من الرامبلا .

عندك شارع الباسيج دي غراسيا من الشوارع المهمة والجميلة في المدينة ، شارع راقي وحق تسوق .

هذي الأشياء اللي تحضرني الحين ونت ممكن ترجع لموقع التريب أدفايزرو أهم موقع سياحي وفيه أهم المعالم السياحية وترتيبها حسب أراء زوار الموقع ، أكيد راح يفيدك .

بعد لا أنسى الباصات السياحية ممكن تاخذ تذكره حقت يوم أو يومين ولها أكثر من خط ومسار ، بالنسبة لي مدري بس إذا بجلس في المدينة أكثر من 3 أيام ما أفضل أركب الباص السياحي وتكون كل تنقلاتي يا بالمترو أو الباص .

موقع الفندق معقول جنبك معلم سياحي على نفس إسم الفندق أذكر في زيارتي العام الماضي دقيتها مشي من ساحة كاتلونيا لهالمعلم وخذا مني حول ربع ساعة ، وترا الميناء الأولمبي حولك تقريباً بس على أطول شوي ، بس مثل ما قلت لك ميزة المناطق اللي حول ساحة كتالونيا إنها حية في الليل يعني لو جعت وفكرت تنزل إثنعش بعد إثنعش منتصف الليل راح تلقى عالم ، أما المنطقة اللي إنت فيها ما أدري كيف وضعها الليل ..

ورحلة موفقة وأي شي حنا حاضرين ..

الله يسلمك ياغالي ،،
الله يعطيك العافيه يارب ، أفدتني جداً والله ،، وإن شاء الله يستفيدون اللي يقرون هالموضوع ،،
بالمناسبة رحت وابشرك الحمدلله برشلونة مدينة خُرافيييية جداً ، بعيد عن التحيّز لها طبعاً
إلا أنها والله شاملة في كل شي ماشاء الله ،، وكل الاماكن اللي ذكرتها الصراحة زرتها ابشرك هههههههههه ..

بالنسبة للسكّن الصراحة أكثر من مُمتع وبجانبك جميع الاحتياجات ، من ضمنها متجر ابل وساحة كذا صغيرة ومطاعم عربية وكل شيء ، ( مع إني ما افضل المطاعم العربية في السفر ، أحب التجربة )
بس للأمانة السكن كان من الأختيارات الحلوه جداً ، واذا صحيت بدري أو نمت متأخر ماهي مشكلة المنطقة تحتك حيوية ، وتقدر تروح وتجي في أي وقت ، من كثر ماهي حيوية ، اللي يعيب الشقة أنها ماهي فندق ولا فيها ريسبشن أو طاقم عمّل ، يجون يسلمونك المفتاح ويشرح لك كم شيءَ عن المدينة ويعطيك معلومات ويمشي ( وللأمانة ماقصر ) برضو أفادنا ..
بالنسبة للمدينة الصراحة احس ودي ارجع لها مره ثانية < واضح أني مامليت هههههههههههه ..

شكراً لكم جميعاً ،

للمسافرين لبرشلونة ، روح ولا تترددّ في هذه المدينة ماراح تطفش ابداً ، بتحصل كل شيء تبيّه واي شي ع جوك بتحصله ، نصيحة كنت اتوقع شخصياً أن مافيها شيء من كلام الناس اللي سمعته عنها ،
لمن رحت ، والله تُعتبر افضل دولة زرتها من ناحية كل شيءَ ، أفضل من ميونخ

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الى برشلونة	برشلون	بوابة اسبانيا	3	20-10-2016 06:58 PM
برنامج سياحي (باريس النمسا يوروبا بارك البندقية برشلونة لمدة 22 يوم )	septa	بوابة النمسا	13	19-06-2016 08:50 PM
رحلة للبوسنة لمدة ثمان ليالي ... أرجو اقتراح جدول	بو تميم	بوابة البوسنة	34	22-04-2015 06:18 PM
جدول رحلة لمدة 10 ليالي بورصة يلوا سبانجا اسطنبول	أبومهند	تركيا	8	15-02-2015 05:46 PM