شتاء جنوب المانيا و لمحات من بعض جيرانها في 2018 - الصفحة 3

فيصل · 24-02-2018, 06:29 AM

يسعد لي صباحك

ثلج في ثلج
والله تخاف تزحف فيك السياره عاد وش يردها

السلاسل مهمه جدا في مثل هالمشاوير

منظر الثلج علي الأشجار يعطيك حماس

واضح كثرت الناس عند التزلج

أسعارهم جدا مناسبه

لا تقول مشيت بدري لأنسبروك ورجعت ولحقت علي الكرنفال

أم ريمه, أبو مهاب, آخـــرفـــرصـــة و 2 آخرون معجبون بهذا.

أم ريمه · 25-02-2018, 08:27 AM

رحنا ميونخ قبل سنتين مع نهاية ديسمبر و القصد نقضي فيها راس السنة
و من يوم الوصول كان الثلج ينزل
و درجة الحرارة ما تزيد عن -12 ... المشكلة مو بالبرد
المشكلة كانت بما ان الثلج ينزل ما كنا نقدر نمشي وايد

بصراحة اخر شي تمللنا و حجزنا طيران داخلي على باريس و قضينا راس السنة هناك ومرينا ديزني بعد ههههههه

و رجعنا قبل رحلة العودة ب يوم

في المطار قبل لا تطير الطيارة يرشون عليها مادة لزجة لونها اخضر من شاحنات
و سألنا المضيفة و تقول انها تمنع تكون الجليد على الطيارة و بالذات الجناح

و منها سميت ميونخ The White Lands ههههههههه

مستمتعين و بإنتظار باقي المغامرات

فيصل, أبو مهاب, آخـــرفـــرصـــة و 3 آخرون معجبون بهذا.

حكايات مسافرة · 26-02-2018, 04:24 PM

الله جميلة الغابة السوداء في الثلج

سيكست شركة محترمة تعاملاتي معها كلها جيدة

حلوة ساحات التزلج

متابعة معاك تقريرك الشيق

فيصل, آخـــرفـــرصـــة, أم ريمه و 3 آخرون معجبون بهذا.

آخـــرفـــرصـــة · 27-02-2018, 11:00 AM

مدري ويني عن التقرير ما انتبهت له عذراً

شغلك كله مغامرات يابو عبدالله هههههه
من اختيار هذا التوقيت للرحلة الى الحادث البسيط ثم التزلج على الجليد
مناظر الاشجار رائعة والثلج عليها فعلاً يعطي لون فضي خرافي
المشكلة لما ترجعون لابد يكون البيت دافي ولا مافيه نوم بالليل

صحيح الخبز الالماني مميز ويسوونه عندنا بجدة
كمان المخبوزات الفرنسية متميزة ولعل اهمها الكروسان

انسبروك صعبة بالشتاء خاصة أن طرقها ملتوية
والطريق الى سيفلد جداً صعب وقت نزول الجليد

متابعين معاك يا عسل

أم ريمه, ابو عبدالله, AL Tunaiji و 1 آخرون معجبون بهذا.

منيرة · 27-02-2018, 11:09 AM

اي والله نسكر الدفايات 11 بالليل
وانا كيف انام يا حبيبي

سكروها بالنهار حنا طالعين مانهجد الا بالليل

أم ريمه, ابو عبدالله, توبليرون و 1 آخرون معجبون بهذا.

ابو عبدالله · 01-03-2018, 05:08 PM

اقتباس : المشاركة الأصلية كتبت بواسطة فيصل

يسعد لي صباحك

ثلج في ثلج
والله تخاف تزحف فيك السياره عاد وش يردها

السلاسل مهمه جدا في مثل هالمشاوير

منظر الثلج علي الأشجار يعطيك حماس

واضح كثرت الناس عند التزلج

أسعارهم جدا مناسبه

لا تقول مشيت بدري لأنسبروك ورجعت ولحقت علي الكرنفال

هلا ابو خالد ... اي والله وش يردها !! والاسعار اقل من المتوقع بكثير .. ودك تعطيهم زود من الفرحه ... ورحنا انسبروك بدري بس ماخططنا نرجع للكرنفال لانه مو جونا ابدا ... منور ابو خالد وشكرا لمتابعتك ..

اقتباس : المشاركة الأصلية كتبت بواسطة أم ريمه

رحنا ميونخ قبل سنتين مع نهاية ديسمبر و القصد نقضي فيها راس السنة
و من يوم الوصول كان الثلج ينزل
و درجة الحرارة ما تزيد عن -12 ... المشكلة مو بالبرد
المشكلة كانت بما ان الثلج ينزل ما كنا نقدر نمشي وايد

بصراحة اخر شي تمللنا و حجزنا طيران داخلي على باريس و قضينا راس السنة هناك ومرينا ديزني بعد ههههههه

و رجعنا قبل رحلة العودة ب يوم

في المطار قبل لا تطير الطيارة يرشون عليها مادة لزجة لونها اخضر من شاحنات
و سألنا المضيفة و تقول انها تمنع تكون الجليد على الطيارة و بالذات الجناح

و منها سميت ميونخ The White Lands ههههههههه

مستمتعين و بإنتظار باقي المغامرات

حياك الله ام ريمة ... ميونخ حلوه والله ... بس الثلج ممكن يصير مشكلة خصوصا مع كثر مشي الناس يصير يزحلق يلا المهم تصرفتوا كويس واستمتعتوا الحمد لله .... معلومة جديده هذي اللي يرشونها ... شكرا لك على متابعتك وحياك الله..

اقتباس : المشاركة الأصلية كتبت بواسطة حكايات مسافرة

الله جميلة الغابة السوداء في الثلج

سيكست شركة محترمة تعاملاتي معها كلها جيدة

حلوة ساحات التزلج

متابعة معاك تقريرك الشيق

حياك الله اختي حكايات مسافرة وفعلا جدا جميلة اكثر من المتوقع في الشتاء ... وسيكست حلوه بس لو يعدلون نظام الدفع شوي خصوصا الان كثير من بطاقات الدفع اصبحت مثل نظام الكريدت ويقدرون يسوون بلوك على المبلغ ويرجعونه ثانية للبطاقة ... شكرا لحضورك ومشاركتك ..

اقتباس : المشاركة الأصلية كتبت بواسطة آخـــرفـــرصـــة

مدري ويني عن التقرير ما انتبهت له عذراً

شغلك كله مغامرات يابو عبدالله هههههه
من اختيار هذا التوقيت للرحلة الى الحادث البسيط ثم التزلج على الجليد
مناظر الاشجار رائعة والثلج عليها فعلاً يعطي لون فضي خرافي
المشكلة لما ترجعون لابد يكون البيت دافي ولا مافيه نوم بالليل

صحيح الخبز الالماني مميز ويسوونه عندنا بجدة
كمان المخبوزات الفرنسية متميزة ولعل اهمها الكروسان

انسبروك صعبة بالشتاء خاصة أن طرقها ملتوية
والطريق الى سيفلد جداً صعب وقت نزول الجليد

متابعين معاك يا عسل

هلا ابو غسان ... الله يعظم اجركم والله وماتقصرون ابدا والله في الدعم مهما كان مستوى التقرير خصوصا انك مايحتاج كاتب فوق مستوى الاحتراف ... والتغيير بعض المرات زين حتى لو كان لمستوى اقل مثل ايام ماكنا نطلع للنفود او البر في الصيف !! درجة الحرارة 50 ونشرب شاهي تحت شجرة !! بس تظل حلوه ... والاكل هناك اجمالا لذيذ خصوصا الخبز ونقانق لحم البقر ... .... شكرا لك ابو غسان على دعمك وحياك الله ..

اقتباس : المشاركة الأصلية كتبت بواسطة منيرة

اي والله نسكر الدفايات 11 بالليل
وانا كيف انام يا حبيبي

سكروها بالنهار حنا طالعين مانهجد الا بالليل

اي والله كيف ننام ... بس كنا نحط الدفايات على اعلى رقم ولما نرجع يكون البيت جدا دافي واذا بدت البروده ترجع شوي يصير وقت تشغيل الدفايات ... ماكان مزعج الا يمكن اول يوم لان الدفايات ماكانت مطول عليها بالقدر الكافي وفتحنا البلكونه شوي بالليل ودخل البراد وماكنا متوقعينها من العجوز والله .. شكرا لك اختي منيرة على متابعتك ودعمك ....

شكرا لكم جميعا على متابعتكم والجزء القادم تقريبا جاهز ... بس عاد هاليومين زحمة اشغال شوي والجو عندنا سيء شوي وثلوج وامس غرزت سيارتي واحاول ساعتين اطلعها واخر شي خليتها لليوم والحمد لله قدرت اطلعها ... رحنا ندور الثلج بالمانيا وجانا لعند البيت الحين ... شكرا لكم على اضافاتكم مرة ثانية والليلة احط جزء جديد ان شاء الله

آخـــرفـــرصـــة, أم ريمه و توبليرون معجبون بهذا.

ابو عبدالله · 02-03-2018, 12:47 AM

كالعادة ننام بدري ونصحى بدري ومثل ماقلت انه اليوم بداية الكرنفال واللي يستمر مدة 3 ايام في المدن والقرى الكبيرة شوي ... القرية اللي كنا ساكنين فيها عبارة عن شارعين ومحطه فما راح يكون فيها شي ... افطرنا في البيت شي سريع وتكلنا على الله الى انسبروك النمساوية ... خطة الزيارة كان من ضمنها توقف في زحليقة ايمست Winter - Imster Bergbahnen & Alpine Coaster Imst والزحلقة هذي طول مسارها 3.5 كيلو والصعود لنقطة البداية يكون بالكرسي المعلق ثم نكمل منها لانسبروك بس شيكت بالليل عشان اشوف اوقات دوامهم وطلع معي انهم بالشتاء الزحليقة تشتغل بالويكند بس وحسب الطقس بعد اذا كان ثلج قوي ماتشتغل ( ثلج قوي يقصدون يندفن مسار الزحليقة ) فصار الحين وقتها مو مناسب لنا لان ماراح نكون بقارمش !! الحقيقه كان احباط شوي لان في البداية كنت متوقع ان الزحاليق ماتفتح بالشتاء وانها فقط صيفية ..بس يوم عرفنا انها تشتعل بالشتاء تحمسنا ويوم صار الوقت مايناسبنا انقهرنا !! بس انا ماكنا نعلم الصغار بأي شي لان كنا متوقعين كل شي قابل انه يتغير لاخر لحظه ....الحمد لله عوضناها في بادن بادن بوحده مقاربة لها بالطول وبذكرها بوقتها ان شاء الله ... توكلنا على الله لانسبروك والطريق بحد ذاته كافي للاستمتاع بقدر كبير ... يكفي انه كان افضل بمراحل من اللي كنا متوقعينه وجربنا السياحة الشتوية في الارياف والجبال وكانت بالنسبة لي تستحق التجربة وما امانع من تكرارها ...

الطريق جدا ممتع وملتوي لانه صاعد في الجبال وفيه لفات خطيرة للي يسرعون بس انا كنت ماخذ وضع الشايب .. مو مستعجل على شي ...

الطريق مخدوم لانه يمر على عدد كبير من القرى والاماكن السياحية بس ماجربت اطلع لان كنا بدري شوي وجرافات الثلج توها مابعد غطت كثير من المناطق باستثناء الطريق الرئيسي اللي ماواجهت في مشكلة الحمد لله ... وماكنت ابي يضيع يومي وانا متعلق بشارع جانبي !! لان مااخذت سلسلة معي للسيارة ..والسلسلة احس انها مفيدة وتركيبها سهل في اعتقادي ... هي تركب على الكفر الرئيسي اللي يحرك السيارة وشفتهم يفرشونها بالارض ويمشي فوقها ثم يقفلها ... ماتاخذ وقت وسهل تركيبها وفكها .... وتساعد على المشي بالثلج .. واللي يركبها لازم يفكها واعتقد مو مسموح يمشي بها في الشوارع اللي مافيها ثلج .... وصلنا انسبروك الحمد لله وكانت الشمس طالعة والجو كان برد بس يظل حلو ... وقاعدتي ان البرد حلو بس انت البس واستمتع ... فكنا قبل السفر شارين بعض الاشياء من حقين مستلزمات التزلج مثل القفازات مثلا عشان اللعب بالثلج ..... وماخذين جزم وابوات المطر اكرمكم الله وكانت جدا مناسبة في الثلج بدل الجزم او الكاوتش العادي وتاركينها بالسيارة ونستعملها وقت الحاجة ..اشياء صغيرة بس تحدث فرق كبير في الرحله ... وكانت الخطه جولة في انسبروك ونطلع بالتلفريك لقمة النورد بارك ... وقفنا السيارة في مواقف سبار هنا ( تاخذ الكرت حق الموقف واانت داخل وتخليه معك مو بالسياره عشان وانت راجع تسدد داخل السوبر ماركت من المكينة اللي جنب المصاعد )
https://www.google.com.sa/maps/place...6!4d11.3981371

دايم كل موقف لازم اصور السيارة عشان مااضيعها ولو ضيعتها ممكن احد يساعدني اذا كان فيه رقم او لوحه او مدخل شي معين وهنا مدخل السوبر ماركت ....

طلعنا برا وكانت محطة القطار اللي يطلع للجبل قدام المواقف واسم المحطه Hungerburgbahn والمحطة هذي هي تعتبر اول توقف في الصعود اذا كنت طالع من البداية من محطة Nordkette Cable Car ... طبعا كالعادة عند اول مكان اجديد افهي شوي واجلس اشوف الناس وش تسوي !! جاء قروب كبار سن وطلبوا المصعد وطلعوا فوق لرصيف المحطة ..
رحنا للمكينة نشتري التذاكر وبما انه نبغى القمة فما لقينا خيار الصعود لها !! ومااعرفنا وش نسوي !! هو نقدر نشتريها من فوق مو من هنا بس ماكنا نعرف الشي هذا .. قررنا نصعد لاخر نقطة اللي هي Hungerburgstation Hungerburg ... وقبلها محطتين وحده فيها حديقة حيوان اسمها Alpine zoo station ومحطة ثانية ... شرينا التذاكر بس ماقدرت استعمل فيزا التسوق هنا لان طلب رقم سري وانا ماكنت حاط لها رقم ( تقدر تسوي لها رقم سري من المباشر ) وحاسبت ببطاقة صراف عادي ومشى الحال .... اعتقد اذا كان المبلغ اكثر من 50 يورو فبيطلب منك رقم سري لها ....

هنا تستعمل التذاكر وهنا حصل معنا مشكلة !!!

الى الان انا ماادري المشكلة وين .... عشان نطلب المصعد لازم نسوي سكان للتذاكر والا مايشتغل زر المصعد ... سويت سكان وطلبت المصعد وما جاء .. جربت بتذكرة ثانية ونفس الشي .... وكل التذاكر !! جيت اجرب ثانية رفض وطلع احمر يعني التذكرة مستعمله خلاص !! وش نسوي !! انتظرنا واللي يمر نساله كان يتكلم انقليزي ... الين لقينا وحدة تتكلم ... وكانت جدا متعاونه واخذنا من وقتها يمكن 10 دقايق .....جربت معنا المصعد ونفس الشي وجربنا مع المدخل الدرج ونفس الشي !! فيه تلفون جربت معه ومحد رد !! هنا خلاص قلت خلاص روحي شوفي شغلك وشكرا لك ... قالت بقي حل اخير اللي هو روحوا للمحطه الاولى وتبعد عن هنا 500 قدم يمكن وهناك فيه مكتب اشرحوا لهم ... علمتنا عن المحطة اللي هي Nordkette Cable Car وشكرناها ورحنا على وصفها ...
نهر اين ( طوله 500 كيلو يمر سويسر والنمسا والمانيا ومنبعه جبال الالب ومصبه في الدانوب وهنا اعتقد نصف طوله ...

الدنيا مثلجه والناس وحركة المرور قليلة

لقينا المحطه وكانت جنب مبنى كبير ...وشرحنا للموظفة سالفتنا وشيكت تذاكرنا وقالت خلاص مو مشكلة اطلعوا من هنا وفتحت الحاجز لنا وركبنا بالقطار ... القطار ثلاث عربات اعتقد والافضل اعتقد الاولى والاخيرة لانك تقدر تشوف المسار قدامك بعكس العربة الوسطى اللي رؤيتك بتكون محصورة بالجوانب فقط ... واعتقد ان محطات القطار من تصميم المهندسة العراقية زها حديد والمكان مليان بصورها وطبعا لها انجازات كثيرة مثلا مبنى شركة بي ام دبليو ومركز الملك عبد الله للدراسات والبحوث البترولية واوبرا دبي والمبنى العائم في دبي ومسجد الافنيوز في الكويت واماكن اخرى كثيرة ...

الناس اللي طالعين مررره قليلين ... وبعضهم معهم معدات تزلج ... فكنت مستغرب !! لان كيف بيصعدون .. بس قلت انتظر واشوف ...

صورة القطار بعد ماوصلنا فوق

صورة المحطة من برا

الاطلالة كانت قطعة من الجمال والروعة ( لاأكثر )

اتوقع حسب مشاهداتي ان الاماكن اللي تتغطى بالثلوج في الشتاء تكون زاهيه الخضرة اكثر من الاماكن الممطورة فقط ...

هنا في الاعلى لقينا محطة التلفريك اللي تاخذك للقمة وتاخذ تذكرة التلفريك منها هنا ... بس الغريب انه ماكان موضح تحت كذا الا كاني ماانتبهت ... فاللي يبي القمة لازم يصعد بالقطار الى هنا ثم يحجز التلفريك من المكتب خارج محطة الوصول ...ومكتب التذاكر منفصل عن مبنى التلفريك للمعلومية ....هنا في الاعلى موجود دورات مياه عامة ... ومطعم وكوفي وقرية صغيرة ...احس مع كثرة الصور عندي وكثرة الجوالات كاني فقدت شي من الصور او تجاوزته وقت الفرز فالعذر اني ما ارفقت صور لبعض الاماكن والا فالحق لكم اني اوثق كل شي .... المطعم يطل على انسبروك من اعلى بس كان وقت زيارتنا مقفل ... نقطة البداية للصعود والنهاية للنزول من القمه هنا

اعتقد الكبينة تشيل حتى 40 شخص في كل مره ... ومدري هل فيه كبينه ثانيه فوق او لا واعتقد تتحرك كل 30 دقيقه ووقت الرحلة 10 دقايق ... والصعود يكون على مرحلتين ( فيه محطة نزول )

بالبداية قلنا ناخذ جولة بالمكان ...

اللي ع اليسار مدخل مبنى التلفريك

طبعا برد ومع البرد الواحد يجوع شوي مثل ماانتم عارفين والاكل يدفي ايضا.... فقلنا نجدد النشاط شوي في الكوفي الموجود ...

الفلافل كانت حلوه

شاهي اخضر مالقينا غيره

طبعا كنسلنا فكرة الصعود للقمة لان كان فيه رحلة مدرسية وكان زحمه والانتظار بيطول شوي ومافيه شي مغري للصعود ....

اخذنا جولة صغيرة ونزلنا ...

رجعنا واخذنا سيارتنا واخذنا لفة بالسيارة في المنطقة ورجعنا لقارمش ... مرينا القرية اللي قال لنا صاحب البيت انه بيحتفلون وكانت بطريق الرجعه وكان مرورنا لانه معنا وقت ساعة قبل المغرب بس كانو مخلصين احتفال وشفناهم بالشوارع لابسين ملابس تنكرية ... الحمد لله اليوم كان حلو وممتع والطريق رغم انه متعرجع صعود ثم هبوط بس كان جميل ومخدوم وسيارات الثلج كانت قايمه بشغلها تمام ....

الجزء القادم ان شاء الله بيكون ميونخ ولقطات سريعه من اماكن محدوده منها مثل مركز فونف هوف وفكتولين ماركت وغيرها ....سامحونا ع القصور ...

AL Tunaiji, آخـــرفـــرصـــة, مقدام و 8 آخرون معجبون بهذا.

آخـــرفـــرصـــة · 02-03-2018, 04:32 PM

رائع يابو عبدالله

ما شاء الله جمال المنطقة وسط الثلوج واضح
معلومة حلوة واتوقع المنطقة اللي يجيها ثلج دايم ممطوره
لذا خضارها يكون ازهى
مادام وصلتوا المفروض استمتعتوا بالتلفريك

بانتظار جزء ميونخ
ولا تنسى تصور الثلج اللي جاكم قريب
رحتوا له بالمانيا وجاء عندكم

فيصل, أم ريمه, أبو مهاب و 3 آخرون معجبون بهذا.

AL Tunaiji · 02-03-2018, 11:10 PM

أثلجت صدورنا بهذا التقرير يا ابو عبدالله

فعلا معظم التقارير صيفية وتندر التقارير الشتوية

هذا لا يعني أنه لا يوجد من يسافر في الشتاء للتمتع بالثلج ، لاكن للأسف أغلبهم لا يكتب تقارير بذلك

قرارك ممتاز وخطوة جريئة ونتمنى أن نقوم بمثلها

لذلك كتبت تقرير عن منطقة وينتربيرج في ألمانيا ، المناسبة للسياحة الشتوية والثلجية والعائلية بحكم طبيعة المنطقة وتعدد الفعاليات

حيث تعتبر طبيعتها أسهل وجبالها أصغر وأسهل للتزلج وهي مناسبة للمبتدئين

بالرغم من اني لم أزرها

بتقريرك هذا نقلت لنا صورة رائعة ومناظر جميلة ، تبين مدى جمال السياحة الشتوية

وكذلك معلومات مفيدة ، تزيل بعض اللبس أو التخوف من السياحة الشتوية

شكرا جزيلا ، ومتابعين معك

فيصل, أم ريمه, أبو مهاب و 2 آخرون معجبون بهذا.

فيصل · 04-03-2018, 07:10 AM

ما شاء الله عليك

يعجبني تدون أي شيء تحسه بيفيد المسافر

الثلج جميل

الرحلات الشتويه أعتقد لها محبين كثر

التلفريك اذا انتظار بيكون ممل للأسف لكن خيره

تحياتي

أم ريمه, أبو مهاب, ابو عبدالله و 2 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
آخر أيام الصيفية فى جنوب القارة الأفريقية.......(جنوب أفريقيا مارس 2015)	Bika	تقارير لا تنسى	96	04-07-2021 09:31 AM
تنبيه مهم جدا جدا لمن يريد زيارة جنوب أفريقيا و كيب تاون في صيف 2018 م	Oman Knight	بوابة جنوب افريقيا	33	15-09-2019 01:28 PM
شروط الحصول على تاشيرة جنوب افريقيا 2018	abumohmd	فيزا دول اخرى	19	28-05-2019 05:27 AM
لمحات و ذكريات_رحلتي لأسبانيا 2015	عاشقة مسقط	بوابة اسبانيا	136	19-02-2018 12:43 AM
لمحات و نصائح ونقاط سريعة من رحلتي للشمال الغربي التركي -اوردو - وما حولها	jeddah1425	تركيا	17	19-07-2015 06:23 PM