شتاء جنوب المانيا و لمحات من بعض جيرانها في 2018

ابو عبدالله · 02-03-2018, 12:47 AM

كالعادة ننام بدري ونصحى بدري ومثل ماقلت انه اليوم بداية الكرنفال واللي يستمر مدة 3 ايام في المدن والقرى الكبيرة شوي ... القرية اللي كنا ساكنين فيها عبارة عن شارعين ومحطه فما راح يكون فيها شي ... افطرنا في البيت شي سريع وتكلنا على الله الى انسبروك النمساوية ... خطة الزيارة كان من ضمنها توقف في زحليقة ايمست Winter - Imster Bergbahnen & Alpine Coaster Imst والزحلقة هذي طول مسارها 3.5 كيلو والصعود لنقطة البداية يكون بالكرسي المعلق ثم نكمل منها لانسبروك بس شيكت بالليل عشان اشوف اوقات دوامهم وطلع معي انهم بالشتاء الزحليقة تشتغل بالويكند بس وحسب الطقس بعد اذا كان ثلج قوي ماتشتغل ( ثلج قوي يقصدون يندفن مسار الزحليقة ) فصار الحين وقتها مو مناسب لنا لان ماراح نكون بقارمش !! الحقيقه كان احباط شوي لان في البداية كنت متوقع ان الزحاليق ماتفتح بالشتاء وانها فقط صيفية ..بس يوم عرفنا انها تشتعل بالشتاء تحمسنا ويوم صار الوقت مايناسبنا انقهرنا !! بس انا ماكنا نعلم الصغار بأي شي لان كنا متوقعين كل شي قابل انه يتغير لاخر لحظه ....الحمد لله عوضناها في بادن بادن بوحده مقاربة لها بالطول وبذكرها بوقتها ان شاء الله ... توكلنا على الله لانسبروك والطريق بحد ذاته كافي للاستمتاع بقدر كبير ... يكفي انه كان افضل بمراحل من اللي كنا متوقعينه وجربنا السياحة الشتوية في الارياف والجبال وكانت بالنسبة لي تستحق التجربة وما امانع من تكرارها ...

الطريق جدا ممتع وملتوي لانه صاعد في الجبال وفيه لفات خطيرة للي يسرعون بس انا كنت ماخذ وضع الشايب .. مو مستعجل على شي ...

الطريق مخدوم لانه يمر على عدد كبير من القرى والاماكن السياحية بس ماجربت اطلع لان كنا بدري شوي وجرافات الثلج توها مابعد غطت كثير من المناطق باستثناء الطريق الرئيسي اللي ماواجهت في مشكلة الحمد لله ... وماكنت ابي يضيع يومي وانا متعلق بشارع جانبي !! لان مااخذت سلسلة معي للسيارة ..والسلسلة احس انها مفيدة وتركيبها سهل في اعتقادي ... هي تركب على الكفر الرئيسي اللي يحرك السيارة وشفتهم يفرشونها بالارض ويمشي فوقها ثم يقفلها ... ماتاخذ وقت وسهل تركيبها وفكها .... وتساعد على المشي بالثلج .. واللي يركبها لازم يفكها واعتقد مو مسموح يمشي بها في الشوارع اللي مافيها ثلج .... وصلنا انسبروك الحمد لله وكانت الشمس طالعة والجو كان برد بس يظل حلو ... وقاعدتي ان البرد حلو بس انت البس واستمتع ... فكنا قبل السفر شارين بعض الاشياء من حقين مستلزمات التزلج مثل القفازات مثلا عشان اللعب بالثلج ..... وماخذين جزم وابوات المطر اكرمكم الله وكانت جدا مناسبة في الثلج بدل الجزم او الكاوتش العادي وتاركينها بالسيارة ونستعملها وقت الحاجة ..اشياء صغيرة بس تحدث فرق كبير في الرحله ... وكانت الخطه جولة في انسبروك ونطلع بالتلفريك لقمة النورد بارك ... وقفنا السيارة في مواقف سبار هنا ( تاخذ الكرت حق الموقف واانت داخل وتخليه معك مو بالسياره عشان وانت راجع تسدد داخل السوبر ماركت من المكينة اللي جنب المصاعد )
https://www.google.com.sa/maps/place...6!4d11.3981371

دايم كل موقف لازم اصور السيارة عشان مااضيعها ولو ضيعتها ممكن احد يساعدني اذا كان فيه رقم او لوحه او مدخل شي معين وهنا مدخل السوبر ماركت ....

طلعنا برا وكانت محطة القطار اللي يطلع للجبل قدام المواقف واسم المحطه Hungerburgbahn والمحطة هذي هي تعتبر اول توقف في الصعود اذا كنت طالع من البداية من محطة Nordkette Cable Car ... طبعا كالعادة عند اول مكان اجديد افهي شوي واجلس اشوف الناس وش تسوي !! جاء قروب كبار سن وطلبوا المصعد وطلعوا فوق لرصيف المحطة ..
رحنا للمكينة نشتري التذاكر وبما انه نبغى القمة فما لقينا خيار الصعود لها !! ومااعرفنا وش نسوي !! هو نقدر نشتريها من فوق مو من هنا بس ماكنا نعرف الشي هذا .. قررنا نصعد لاخر نقطة اللي هي Hungerburgstation Hungerburg ... وقبلها محطتين وحده فيها حديقة حيوان اسمها Alpine zoo station ومحطة ثانية ... شرينا التذاكر بس ماقدرت استعمل فيزا التسوق هنا لان طلب رقم سري وانا ماكنت حاط لها رقم ( تقدر تسوي لها رقم سري من المباشر ) وحاسبت ببطاقة صراف عادي ومشى الحال .... اعتقد اذا كان المبلغ اكثر من 50 يورو فبيطلب منك رقم سري لها ....

هنا تستعمل التذاكر وهنا حصل معنا مشكلة !!!

الى الان انا ماادري المشكلة وين .... عشان نطلب المصعد لازم نسوي سكان للتذاكر والا مايشتغل زر المصعد ... سويت سكان وطلبت المصعد وما جاء .. جربت بتذكرة ثانية ونفس الشي .... وكل التذاكر !! جيت اجرب ثانية رفض وطلع احمر يعني التذكرة مستعمله خلاص !! وش نسوي !! انتظرنا واللي يمر نساله كان يتكلم انقليزي ... الين لقينا وحدة تتكلم ... وكانت جدا متعاونه واخذنا من وقتها يمكن 10 دقايق .....جربت معنا المصعد ونفس الشي وجربنا مع المدخل الدرج ونفس الشي !! فيه تلفون جربت معه ومحد رد !! هنا خلاص قلت خلاص روحي شوفي شغلك وشكرا لك ... قالت بقي حل اخير اللي هو روحوا للمحطه الاولى وتبعد عن هنا 500 قدم يمكن وهناك فيه مكتب اشرحوا لهم ... علمتنا عن المحطة اللي هي Nordkette Cable Car وشكرناها ورحنا على وصفها ...
نهر اين ( طوله 500 كيلو يمر سويسر والنمسا والمانيا ومنبعه جبال الالب ومصبه في الدانوب وهنا اعتقد نصف طوله ...

الدنيا مثلجه والناس وحركة المرور قليلة

لقينا المحطه وكانت جنب مبنى كبير ...وشرحنا للموظفة سالفتنا وشيكت تذاكرنا وقالت خلاص مو مشكلة اطلعوا من هنا وفتحت الحاجز لنا وركبنا بالقطار ... القطار ثلاث عربات اعتقد والافضل اعتقد الاولى والاخيرة لانك تقدر تشوف المسار قدامك بعكس العربة الوسطى اللي رؤيتك بتكون محصورة بالجوانب فقط ... واعتقد ان محطات القطار من تصميم المهندسة العراقية زها حديد والمكان مليان بصورها وطبعا لها انجازات كثيرة مثلا مبنى شركة بي ام دبليو ومركز الملك عبد الله للدراسات والبحوث البترولية واوبرا دبي والمبنى العائم في دبي ومسجد الافنيوز في الكويت واماكن اخرى كثيرة ...

الناس اللي طالعين مررره قليلين ... وبعضهم معهم معدات تزلج ... فكنت مستغرب !! لان كيف بيصعدون .. بس قلت انتظر واشوف ...

صورة القطار بعد ماوصلنا فوق

صورة المحطة من برا

الاطلالة كانت قطعة من الجمال والروعة ( لاأكثر )

اتوقع حسب مشاهداتي ان الاماكن اللي تتغطى بالثلوج في الشتاء تكون زاهيه الخضرة اكثر من الاماكن الممطورة فقط ...

هنا في الاعلى لقينا محطة التلفريك اللي تاخذك للقمة وتاخذ تذكرة التلفريك منها هنا ... بس الغريب انه ماكان موضح تحت كذا الا كاني ماانتبهت ... فاللي يبي القمة لازم يصعد بالقطار الى هنا ثم يحجز التلفريك من المكتب خارج محطة الوصول ...ومكتب التذاكر منفصل عن مبنى التلفريك للمعلومية ....هنا في الاعلى موجود دورات مياه عامة ... ومطعم وكوفي وقرية صغيرة ...احس مع كثرة الصور عندي وكثرة الجوالات كاني فقدت شي من الصور او تجاوزته وقت الفرز فالعذر اني ما ارفقت صور لبعض الاماكن والا فالحق لكم اني اوثق كل شي .... المطعم يطل على انسبروك من اعلى بس كان وقت زيارتنا مقفل ... نقطة البداية للصعود والنهاية للنزول من القمه هنا

اعتقد الكبينة تشيل حتى 40 شخص في كل مره ... ومدري هل فيه كبينه ثانيه فوق او لا واعتقد تتحرك كل 30 دقيقه ووقت الرحلة 10 دقايق ... والصعود يكون على مرحلتين ( فيه محطة نزول )

بالبداية قلنا ناخذ جولة بالمكان ...

اللي ع اليسار مدخل مبنى التلفريك

طبعا برد ومع البرد الواحد يجوع شوي مثل ماانتم عارفين والاكل يدفي ايضا.... فقلنا نجدد النشاط شوي في الكوفي الموجود ...

الفلافل كانت حلوه

شاهي اخضر مالقينا غيره

طبعا كنسلنا فكرة الصعود للقمة لان كان فيه رحلة مدرسية وكان زحمه والانتظار بيطول شوي ومافيه شي مغري للصعود ....

اخذنا جولة صغيرة ونزلنا ...

رجعنا واخذنا سيارتنا واخذنا لفة بالسيارة في المنطقة ورجعنا لقارمش ... مرينا القرية اللي قال لنا صاحب البيت انه بيحتفلون وكانت بطريق الرجعه وكان مرورنا لانه معنا وقت ساعة قبل المغرب بس كانو مخلصين احتفال وشفناهم بالشوارع لابسين ملابس تنكرية ... الحمد لله اليوم كان حلو وممتع والطريق رغم انه متعرجع صعود ثم هبوط بس كان جميل ومخدوم وسيارات الثلج كانت قايمه بشغلها تمام ....

الجزء القادم ان شاء الله بيكون ميونخ ولقطات سريعه من اماكن محدوده منها مثل مركز فونف هوف وفكتولين ماركت وغيرها ....سامحونا ع القصور ...

AL Tunaiji, آخـــرفـــرصـــة, مقدام و 8 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
آخر أيام الصيفية فى جنوب القارة الأفريقية.......(جنوب أفريقيا مارس 2015)	Bika	تقارير لا تنسى	96	04-07-2021 09:31 AM
تنبيه مهم جدا جدا لمن يريد زيارة جنوب أفريقيا و كيب تاون في صيف 2018 م	Oman Knight	بوابة جنوب افريقيا	33	15-09-2019 01:28 PM
شروط الحصول على تاشيرة جنوب افريقيا 2018	abumohmd	فيزا دول اخرى	19	28-05-2019 05:27 AM
لمحات و ذكريات_رحلتي لأسبانيا 2015	عاشقة مسقط	بوابة اسبانيا	136	19-02-2018 12:43 AM
لمحات و نصائح ونقاط سريعة من رحلتي للشمال الغربي التركي -اوردو - وما حولها	jeddah1425	تركيا	17	19-07-2015 06:23 PM