السلام عليكم ورحمة الله وبركاته
اعرف اني مقصر كثير في حق المنتدى بس الواحد يجيه تبلد من كثر الشغل ويطب عليه كسل عجيب لانه مهما سوى يحس انه ماانجز شي ... عندي اشياء كنت بنزلها عن كذا مكان بس انها مع الايام راحت وبردت انا لان حسيت اني يمكن نسيت بعض المعلومات ...
اليوم تقريبا من كم ساعة رجعت من المانيا بعد اجازة موب طويلة بس الحمد لله المهم انها اجازة ... قلت لازم اسوي تقرير لو بسيط ومااعتقد اني يعني ابضيف للمنتدى او للمحتوى عن المنطقة هذي شي كثير بس اللهم ان اكثر الموجود حسب علمي هو ان المتوفر عنها هو وقت الصيف ويمكن محد يفضلها في الشتاء وانا كنت فعلا خايف وماكنت انصح ان احد يجي في الشتاء ... التقرير كثير من اماكنه جدا مشهورة ومعروفة وفيه منها اللي ماخذ حقه من المدح او الذم حتى اني صرت مثل اللي جالس بين الشمس والظلال مدري وش اسوي ... وماتدرون وش سويت .. الرحلة صار فيها احداث ومن اليوم الاول بعد !! ... بس الجميل ان فعلا السفر مو مجرد رحلة او اجازة تخلصها وترجع لحياتك العادية .. هو بتعدد السفرات واختلاف الوجهات راح يكون عند الواحد وهو مايدري رصيد خبرات يقدر بواسطته يسيطر على انفعالاته ويتخذ قراراته واللي ان شاء الله راح تكون صح ...
هذي مقدمة بس عشان اربط نفسي والتزم بوضع التقرير والا انا اعرف انها ميب مفيدة ابدا لكم واعتذر لكم عنها ...
اتمنى اني اقدر انقل صورة حقيقية للي شفته حسب استطاعتي وبحاول وانا اكتب اني مااتذكر بعض الناس من الكتاب هنا اللي ماشاء الله لااله الا الله ينقل الصورة ويحسسك انك كنت معه واتمنى تنسونهم بعد عشان مايجيكم احباط ..

اشوفكم قريب ان شاء الله ...

وعليكم السلام ورحمة الله وبركاته

يا هلا أبو عبدالله

مشتاقين لنقزاتك السريعة والخطافية


ما عليك من وساويسك

اسدح التقرير والمشاهدات والاحداث

جنوب المانيا حلو ومشهور خصوصا القريب من الغابات السوداء

يلا لا تطول علينا

تحياتي لك

ناطرين الصور

وعليكم السلام ورحمة الله وبركاته

بانتظارك وبانتظار التقرير الشتوي واهم الاحداث اللي صارت فيه

بانتظار التقرير

رجعت لكم ....
جيت بحمل الصور وطلع لي ((لا يمكن معالجة طلبك، لأن رمز الأمن مفقود أو غير متطابق.اذا كان هذا حدث غير متوقع, الرجاء تبليغ الإدارة وتوضيح المشكلة وعلاجها قبل ظهور هذا الخطأ.))وتم الابلاغ وينقلني لصفحة بيضاء. عاد بسولف عليكم الين يزين مركز التحميل ...
فكرة السفر كانت قبل شهر ونص تقريبا ... كان فيه اجازة اسبوع ... فكنا نقول نروح ايطاليا ادفى شوي ومايعيقنا البرد كثير ... بس قلنا ليش مانجرب الشتاء خصوصا ان ولدي وده يشوف ثلج طوله وهذي فرصة اجازة وفي الشتاء .. واحترنا في المكان وين نروح ووقع الاختيار على المانيا وكانت الفكرة اننا نقسمها الى مرحلتين اساسيتين .. الاولى قارمش والثانية بادن بادن .. وبما ان الجو هناك مو واضح عندي مره وبما ان قرار السكن راح يكون في القرى والوقت راح يكون شتاء ونزول ثلوج ومالقيت مواضيع عن المنطقة في الشتاء فقررنا ان الوصول والمغادرة بتكون من مطار بادن بادن ... شيكت على حجز الطيران في اكثر من موقع وطيران يوصل بادن بادن من لندن ووقع الاختيار على طيران راين اير www.ryanair.com وهو طيران اقتصادي وكل شي لازم تدفع له وكل راكب له شنطة ظهر وحده بمقاس محدد اما شنطة الكبينة وشنطة الشحن فلازم تدفع لها للاتجاهين ( الروحه والرجعه ) وحجزت لشنطة كبينة وشنطة شحن وممكن ماتدفع للكبينه بس عند البوابة ياخذونها منك ويحطونها من الشحن وتستلمها في المطار من سير الشنط . ومع كذا كان سعرهم وقتها هو الافضل ويدعمه موعد وصولها الى المانيا كان جدا ممتاز وهو عشر الصباح
- حجز السكن والسيارة بتكم عنه في وقته ..
..وقت السفر كان من 11 فبراير 2018 الساعة 8 الصباح بتوقيت لندن من مطار ستانستد لندن الى مطار بادن بادن في المانيا ووقت الوصول الساعة 10بتوقيت بادن بادن ووقت الرحلة كان ساعة ( فيه فرق ساعة بالتوقيت بين بريطانيا والمانيا) والعودة 17 فبراير ..
الاماكن اللي تمت زيارتها متوزعة بدون اي عدل بين المانيا والنمسا وسويسرا وفرنسا لان بعضها صار تحت حكم ظروف الطقس ... بحاول اسرد الرحلة حسب تسلسلها الزمني مع الصور قدر الامكان ... عندي مئات الصور بس بختار منها مجموعة اتمنى تكون مفيده في نقل بعض الصورة والا فابداع الخالق جل جلاله لايبلغه وصف واصف ولا نقل ناقل حتى وان كانت صورة ...
من الاشياء اللي اسويها دايم من ضمن الحجوزات هو اني احجز موقف للسيارة في المطار قبل وقت وغالبا بعد حجز الرحلة مباشرة عشان اقدر احصل على سعر حلو ومايهم مكان الموقف لان كل المواقف فيها نقل ترددي ... وفيه طريقة انك تحجز موقف عند الصالة ويقابلك موظف الموقف وياخذ منك السيارة لخارج المطار وهي فكرة حلوه بعد وسبق جربتها ووقت وصولك تكلمهم ويجيبونها لك ....
المهم يوم السبت وهو قبل الرحلة بيوم طلعت الصباح من البيت بركب سيارتي الا والقاها مصدومه !!!!! طبعا اللي صادمها هرب والصدم كان بالليل لانها كانت مثلجه ... وسالفه على ماعرفت انها مصدومه او مسروقه .. وخفت يؤثر على سفري بس كلمت االتامين وقالوا سافر واذا جيت كلمنا ... وكانت هذي اول روعه ( تخويف او حدث سلبي ) والروعات واجد ...
مشينا من البيت قبل وقت الرحله بساعتين ونصف والحقيقه انه وقت غير كافي ابد خصوصا اني بداية رحت لموقف غلط !! ودلني الموظف هناك على المكان الصحيح وهو يبعد خمس دقايق بالسيارة بس يظل وقت ثمين جدا للمتأخر مثلي ورحت بسرعة وجتني الروعه الثالثه ( الثانية ان الموقف غلط ) المواقف جدا كبيرة وغير اللي انا متعود عليه ( متعود اسلمهم السيارة وعلى طول يوصلوني بفان او الباص يكون باقي عليه شوي وحولك موظفين تقدر تسالهم ) ولازم اوقف السيارة وانتظر بموقف الباص ونظامهم مثل المواقف العمومية بالشوارع توقف الين يجي الباص وماتدري متى بيجي ومافيه احد تساله وماتدي كانه توه ماشي او لا !! وانا اصلا متأخر وباقي على موعد الاقلاع ساعه ومعي شنطة لازم تنشحن !!! واشتغل بليس علي ماعنده غيري !! سيارتي مصدومه والرحلة تبي تفوتني .. والفلوس غير مسترده ...يالله الخيره ... الا ويوصل الباص الحمد لله ونركب والوقت للمطار تقريبا ربع ساعة وننزل بسرعة وطيران للكاونترات ... ونمسك سرى الين جاء دورنا ... قالت الموظفه وراكم توكم تجون !! يالله حط الشنطة واركضوا للبوابة يالله يمديكم .... والاها صادقه ... مطار صغير تشوفه بس انه مصير !! متلوي وزين !! بس ماشفنا من زينه شي ماامدانا .. ركض بالممرات + حسايف على سوقهم الحره .. يمكنه ينافس هيثرو ووقتها يمكنه ازين منه عشان ماقدرنا نشوفه ...واذا صرت مستعجل كل شي ممكن يعطلك لازم يصير لك ... واتعطل عند البوابة حقت التفتيش عشان سحاب البلوزة رن عليه الجرس وامسك سرى مع اللي ماسكين عشان يتأكدون ... ثم نكمل الركضة الين وصلنا بوابتنا وصرنا اخر ناس بالسرا ماورانا الا اثنين كانوا موجودين قبلنا بس جالسين ع الكراسي .... والحمد لله مشت امورنا ولحقنا طيارتنا ...

اشوفكم قريب ان شاء الله مع الصور

يا سلام يا أبو عبدالله

حلو الأكشن والتشويق من البداية
الحمدلله مشت الأمور يا أبا عبدالله
في انتظار المغامرات بالصور

وعليكم السلام ورحمة الله وبركاته
رساله سلبيه لكن توكلك علي الله يحولها بإذن الله إلي ايجابيه

والله يا حوسه المطار لا تعلمني عنها قلق