سلام عليكم .. انا عضو جديد في هالمنتدى والصراحة استفدت واجد من المعلومات الا جفتها فيه , واطمع لمساعدة منكم ..

انا الشهر الجاي رايح لاوروبا(باريس,بروكسل,امستردام) وبكون من ضمنها باريس , وهذي اول طلعه ليي لاوروبا من جدي متخوف شوي .. بكون في باريس من 8 ابريل الى 12 ابريل ,طبعا خلصت حجز الفنادق , وبكون سكني قريب من برج ايفل ( فندق Mercure Paris) , وحاب تساعدونني في كم نقطة ..

اول نقطة:
بخصوص البرنامج السياحي , عقب ما قرأت في المواضيع الا في المنتدى استقريت ع بعض الاماكن عشان ازورها , الا هي : برج ايفل, ديزني, الاوتليت, شارع الشانزيليزيه وقوس النصر, متحف الشمع, الحي الاتيني, حديقة لوكسمبورغ , بالاضافة لجولة في الباص السياحي وجولة في نهر السين ... شنو البرنامج السياحي الا تنصحوني ابه بحكم مدة اقامتي ؟ وهل في اماكن قريبه من هالاماكن اقدر اضيفها للبرنامج ؟

ثاني نقطة:
شنو انسب نوع بطاقة ميترو اشتريها ؟ احنا بنكون شخصين انا وزوجتي..
*ملاحظة: حاط في بالي ان ديزني ليها يوم كامل + بروح الاوتليت يوم ثاني الصبح , غير جدي تنقلاتي كلها بالميترو.

ثالث نقطة :
بغيت بطاقة انترنت لرحلتي كامل (تشتغل عندي في باريس وبروكسل وامستردام ) .. في شركات معينة تنصحوني فيها ؟ وكم تكلفتها ؟ استخدامي ليها بكون بسيط , اغلبه لقوقل ماب وسناب فقط ..

اخر نقطة :
في مطاعم معينه قريبه مننا تنصحوننا فيها ؟

ولكم جزيل الشكر