رحت المكتب يوم الأحد كان موعدي في الألمانية

للأسف تجربة كانت أسوأ من السيئة
في البداية اعترضوا على عدد الايام في المانيا وقالوا لازم ما يقل عن 15 يوم (مدري من وين اخترع هذا القرار وتهاوشت معه الهندي طبعا)
حجزت فندق اضافي و غيرت خطتي اللي الحمدلله كان فيها كم يوم فاضيه ما قررتهم وخليتهم في قارمش
و اخذت رقم جديد في نفس اليوم
هالمره وحده سعودية قالت ناقصكم خطاب التعهد بصحة المعلومات لكل شخص والأطفال أقل من 18 سنه أبوهم و أمهم يوقعون عنهم (تلقونه في الموقع حق VFS)

ورجعت مره ثانيه و عبيت الخطاب هذا و ووقعناه كلنا و أخذت رقم من جديد لأن رفضت و ختمت عليها Missing document

يوم جا دوري للمره الثانية قالت ناقصكم نسخة من تعرف راتب الأب لانه المتكفل بالمصاريف ( هنا أنا فصلت عليهم و غسلت شراعهم ليه ما تقول كل شي مره وحدة بس اللي فهمته يبونك تصور ووتطبع عندهم و يستفيدون من الفلوس)
فصلت عليها و هاوشتهم و الحمدلله يوم دورت في الأوراق اللي معي لقيتني مصورته احتياط
بعدين طلبت توقيع النموذج للجميع والأطفال تحت 18 يوقع عنهم الأب والأم

في النهااااااية الأوراق اللي رسينا عليها :

1.الجواز موقع في الصفحة الثانية مكان توقيع صاحب الجواز والأطفال تحت 18 سنة يوقع عنهم الأب فقط و ترفقون صورة اول صفحتين (صفحة التوقيع و صفحة الجواز) في أوراقهم
2. النموذج موقع من كل شخص ولازم التوقيع مطابق تماماً للي في الجواز لأن رجعونا عليها بعد و غيرنا النموذج والأطفال تحت 18 سنة طبعاً يوقع عنهم الأب والأم و يكتبون Father و Mother تحت كل توقيع
3. أصل خطاب تعريف راتب للمتكفل بالمصاريف ونسخه منه في اوراق افراد العائلة الباقين ولو كان كل واحد متكفل بمصاريفه الخاصة يجيب خطاب تعريف له.
4. أصل كشف حساب البنك ولازم ما يزيد عن 3 أيام قبل الموعد ( ما يحتاج صورة منه لأن طلعت صور كشف الحساب كلها)
5. أصل خطاب تكفل بالمصاريف ونسخه منه في ملف كل شخص من أفراد العائلة
6. تأمين ساري خلال فترة السفر تأميني كان التعاونية ما شريت تأمين ولا شي هو تأميني حق العمل سويت منه برنت و طبعته ملون و قبلوه سألتها لازم ختم أصلي قالت لا دام الكتروني ملون كافي
7. حجوزات جميع الفنادق مرتبة بالتواريخ و ما يكون فيه أي gap أو فترة مالها حجز لازم تحجز رحلتك كاملة
8. حجز السيارة (لو تنقلك بسيارة كاثبات مواصلات وتأكيد لحجوزاتك انها مو وهمية) أو قطار أو طيران بين دول شنغن
9. حجز رحلتك الدولية من بلدك الأساسي و وعودتك له ولازم مؤكدة لو free cancelation بيرفضونه ولو كانت عودتك عن طريق بلد خارج شنغن ( في حالتنا كانت العودة من التشيك إلى بريطانيا وكم يوم في لندن وبعدها الرياض) لازم يكون عندك فيزا صالحة للبلد اللي بتطلع منه.
10. خطاب موافقة والدين على سفر الأطفال اللي تحت 18 سنة والنموذج موجود في موقع VFS فيه اسم الأم والأب وأرقام جوازاتهم واسم الطفل ورقم جوازه وتاريخ ميلاده و توقيع الأم والأب و نسخة منه للأطفال والأصل عند الأب
11. صورة من جواز
12. عدد 2 صور شخصية ما يبين فيها الكتف ولا يغطى الشعر (النساء عادي الحجاب بس يبين منابت الشعر)
13. صورة أي فيزا شنغن سابقة سواء صالحة أو منتهية وارفاق الجواز اللي هي فيه لو كان جواز قديم

وبعدها تبصيم و على بيتكم ان شاء اللع

هذا كل شي بعد معاناة و قلق معاهم
رجعوا لي نموذج العنوان الوطني و صور من كشف الحساب و مخطط الرحلة (قالوا الحجوزات تكفي)

في نفس اليوم 15 جولاي وصلتني رسالة باستلام الجوازات في المكتب
اليوم الإثنين 16 جولاي وصلتني رسالة بإن الفيزا تحت الإجراء

و نشوف تطلع متى

شكرا لكل شخص ساعدني و ما قصر بالمعلومات
هذي تجربتي و ان شاء الله تفيدكم
بس النصيحة اللي بقولها صوروا كل شي و خلوا معاكم صور لأن يرجعونها لكم أحسن من تكون ناقصة

اكتشتف انهم نفسيات وبالمزاج و كل أحد يطلب أوراق شكل لأن اخذت 3 ارقام وكل شوي شخص يطلب شي جديد


سفرتي في 2 اغسطس دعواتكم تطلع قبل

السلام عليكم
من خبرتكم يا اخوان هل بالامكان تقديم موعد للحصول على فيزا شنغن المانية بتاريخ1 اوقست والحصول على فيزا قبل تاريخ
23 اوقست علما باني اول مرة اقدم على فيزا شنغن

لو سمحتو ، كم لازم يكون في حسابي ، بالنسبة لشنغن الالمانية

السلام عليكم ورحمة الله وبركاته

الحمدلله كان موعدنا اليوم والله يسرها
موعدنا 9 نادونا 9:15
كان متعاون الهندي
وقعنا أوراق وااااجد أنا وأبوهم صرنا نوقع على بياض مع أني مجهزة كل شي وسبحان الله النسيان
صورة الجواز كانت بدون توقيع تعاون معنا الموظف وصوره بنفسه

اللي جنبنا ناقصتهم ورقة وقالت لها روحي صوريها بره

كنّا مجهزين الأوراق مدبسة فصلهم ورقة ورقة
سال كم يوم في ألمانيا قلت 7 حسب حجوزات الفنادق
أخذ لكل واحد كل الأوراق من تأمين وحجز وطيران
عدا المتقدم الأساسي أخذ كشف حساب وصور بطاقات الفيزا ما طلبهم للمرافقين
أخذوا صور بطاقات الأحوال ودفتر العائلة عربي ما ترجمناه وما طلبوا وتعريف العمل أخذوه للجميع مع الضمان والموافقة للي أقل من 18 سنة
الكشف والتعريف تاريخ أقل من أسبوعين ما اشترطوا 3 أيام مثل تجربة أختنا قبل كم يوم
الحجوزات الداخلية المواصلات ما سال عنها والحمدلله لأنا ما حجزنا شي غير الفنادق والطيران
التأمين أكسا مطبوع ملون للجميع نسخة إلكترونية
التشك ليست طبعتها للجميع ما أخذوها هو عبى من عنده نموذج واحد فقط

المبلغ أخذوا 1546.25 ريال
2 كبار
13
9
سنتين

هم رفعوا الرسوم ولا كيف المبلغ زاد
الدفع كاش طبعا

كان قريب منا رجال وزوجته قالت له الموظفة حسابك قليل ما ينفع أقل من 25 ألف

على ما خلصنا الأوراق انتظرنا للتبصيم حوالي ساعتين
المدة كلها 3 ساعات يوم نمشي كانت 12 ما توقعت ناخذ كل هالوقت

قالوا لنا توصلكم مسج بعد 10 أيام تكون جاهزة بإذن الله

هذا استفدت من جميع ردودكم وجهودكم جزاكم الله خير
كنّت قلقة وأحاتي وأحس الأوراق واااجد
وندمت ما خليت مكتب هو كلمت مكتب قال الفيزا للشخص 900 حسيتها كثير المبلغ
والحمدلله عادي تتيسر اللي يقرا هذا الموضوع كله في إجابة لكل الأسئلة والاشياء اللي ما تخطر على بال الشخص