السلام عليكم

ماكتبت التحديثات الي صارت معي لاني ماكنت ضامن قبول الفيز لكن اليوم الحمد لله طلعت

موعدي كان الاثنين الي راح 16/7 قبل موعدي بساعه ونص انا ماحجزت طيران وماختمت التامين الي معي" تكافل الراجحي نسخه مختومه الكترونيه" وكشف الحساب له عشرين يوم وهم يطلبون ١٤ يوم

ترددت اني اروح للموعد على الحوسه الي عندي وفي النهايه توكلت على الله وحجزت حجز وهمي على الخطوط السعودية

يعطونك فرصه يوم كامل للسداد

حجزت الذهاب من الرياض الى ميونخ في ٦ اوقست والعوده في ١٦ اوقست وانا مخطط رحلتي اني اوصل ٥ اوقست ( مالقيت حجز في ٥ اوقست )

سويت حجوزات كامله من جديد للفنادق في نفس اللحظه بحيث اننها تناسب رحلة الطيران

وصلت لمركز التاشيرات متاخر على موعدي ٢٠ دقيقه ودخلوني

كان قدامي تقريبا ٦٠ رقم ورحت لموظف هندي وسالته اقدر اجيكم بكره؟ اوراقي ناقصه قال كلم المدير

كلمت المدير وقال وش الي ناقصك؟ قلت له التامين مب مضبوط وحجز الطيران موب مؤكد. قال التامين عندنا تامين تحت قلت عندي تامين لكن نسخه اسود وابيض والختم الكتروني وقال عادي يمشي

قلت والطيران ؟ قال اهم شي الفنادق تكون مؤكده الطيران مايهم!

استغربت انا ورجعت مكاني وجلست

يوم نادوا على رقمي شيك على الاوراق وطلب مننا نوقع على الجوازات بحيث انها تكون مطابقه للابلكيشن.

يوم شاف كشف الحساب قال المفروض يكون جديد وقلت له هذا الموجود

سالته وقلت على هالاوراق اموري تمام؟ ( كان خوفي من التامين وحجز الطيران وكشف الحساب وصور زوجتي لان مقاسها مب مضبوط ) وقال ٨٠٪ تمشي

اليوم الاثنين 23/7 يعني بعد اسبوع بالضبط وصلتني رساله ان الجوازات جاهزه للاستلام

رحت استلمتها والحمد لله عطونا ٣ شهور ونص

خلاصة الكلام ان التامين يمشي, حجز الطيران يمشي حتى لو موب مؤكد, والسفاره ماتدقق التدقيق الي كنا متخيلينه والامور الحمد لله سهالات مافيها تعقيد

لكن جوازاتنا فيها فيز امريكيه وفيها ختوم دخول لامريكا اكثر من مره خلال الخمس سنوات الماضيه فما ادري اذا لها دخل وسهلت الموضوع او لا

وممكن موظف عن موظف يختلف فالافضل ان الواحد يمشي بالسليم ممكن يمشي معي حجز وهمي وممكن مايمشي مع غيري

لكن الحمد لله بعد ماطلعت تذكرت نفسي يوم كنت باسحب على الموعد عشان حوسة الاوراق الي ماكملتها!