فندق دوست ثاني ( ابوظبي ) - الصفحة 2

هاوية الاسفار · 18-03-2015, 07:05 PM

مثل ما شفتوا فطورنا كان شوية و الحمدلله حسبولنا لشخصين بس

بعد ما خلصوا العيال سباحه نزلنا الغرفة و خذنا شاور و اليوم كان الجمعة قعدت انا و العيال و زوجي سار المسيد يصلي

خليت عيالي يلعبون في الصالة و قلت لهم انا بدخل بصلي و اقرا قرآن ما ابغي اسمع صوت عالي

دخلت الغرفة و سكرت الباب بس كنت اسمع صوتهم واضح جدا كانهم ويايه في الغرفة شكيت انهم قاعدين عند باب الغرفة طلعت ما حصلتهم

كانوا في الصالة يلعبون بس صوتهم واضح جدا عاد هني استويت المحقق كونان و قلت ابغي اعرف ليش صوتهم واضح جدا عندي

اكتشفت السر اخيرا شوفوا هاي الصورة

شفتوا الستارة ورا التلفزيون المنطقة هذي مفتوحة على الصالة ما قدرت اصورها لاني ما كنت ابغيهم يكتشفون المكان

تعرفون اليهال اذا شافوا الممر بيلعبون رايحين و رادين و طبعا المكتبة موجوده و التلفزيون و هذا خطر عليهم

بعدها طلعنا نتغدى و امس يوم كنا نتمشى عند الوحدة مول لمحت مطعم و قلت لازم نجربة و سرنا المطعم و هو سفرة اسطنبول

موقعه في شارع محمد بن زايد

المطعم فيه مثل كباين بس مب مغلقة بالكامل

و هني الكبينه الاخيرة

المطعم دورين الارضي فيه المطبخ و ركن للحلويات الفريش مثل الكنافة و البقلاوة

و الدور الاول فيه الجلسات و الكباين و هذا المنيو

صحن المقبلات اعتقد كان باذنجان مع حمص لذييييييييييذ

طلبنا كان اسكندر دجاج و كباب اعتقد كان اسمة الملكة او السلطانه نسيت و باستا بيضاء للعيال

عصير ليمون بالنعناع و اعتقد فراولة

الحمدلله الاكل كان لذيذ و عيبنا و اخيرا حلينا بطبق كنافة و لازم تركيش كوفي

هذي اللوحة فيها ايات قرآنيه

خلصنا و طلعنا من المطعم و اول اشارة ناخذها يمين يكون الوحدة مول

يتبع

هاوية الاسفار · 18-03-2015, 09:28 PM

و شوفوا اهني احنا عند المطعم و فندقنا يبين

نسيت اراويكم هاي الاطلالة من الصالة ستاد محمد بن زايد

و هني المبنى البيج اللي بالعرض هذا الوحده مول

سرنا الوحدة مول و تسوقنا و لعبوا العيال و بعدها رجعنا الفندق بعد المغرب و على طول للمسبح مع انه كان ظلام و باقي يمكن نص ساعه

طبعا بعد السباحة كنا تعبانين و ما نقدر نطلع فقررنا الاكل يكون تيك اوي

طلع زوجي و حصل مطعم عنده بروستد

و خذ 4 عصاير تخيلوا ب 70 درهم

و هذا البروستد وياه حلقات بطاط و حمص

بصراحه الاكل ما كان وايد حلو كله زيت و البطاط مقلينه في نفس الزيت حق البروستد حسينا بطعمه

و خلص يومنا

اليوم الثالث

تريقنا من مطعم زهرة لبنان و هذا مطعم معروف في مدينة ابوظبي و عندهم فروع وااااااايد في بوظبي

ريوقنا كان فول و فلافل مع احلى فتة بالحمص بصراحه كانت لذييييييييييييييذه عمري ما كلت مثلها

تقييمي للفندق جيد جدا لكن الركن في الاستقبال ما كان يليق بالمسلمين لوجود المشرب

الشقة كانت واسعة جدا و خاصة الصالة و تقدرون تحطون سرير اضافي في الصالة و المفروض يكون فيها اريكة تتحول سرير

موقع الفندق ممتاز في قلب ابوظبي و كل شيء متوفر عدال الفندق

اتمنى ان التقرير نال على اعجابكم

و انتظروني في تجربة اخرى قريبا

شارلوك هولمز · 19-03-2015, 05:08 AM

روووووووعه شكرا لك على الطرح الرائع مشرفتنا

هولمز

توبليرون · 19-03-2015, 08:48 AM

ماشاءالله عليكم بالعافية يام علي
الفندق جمييل والاحلى حمام السباحة
لليهال يستانسون على السباحه وما يملون
شكراا للتقرير اللي يشوق لزيارة بوظبي

|القحطاني| · 19-03-2015, 10:03 AM

ما شاء الله الفندق فخم والإطلالة جميييلة

آلة القهوة هذي Nespresso الكل يمدحها ويحبها

تقرير جميييل

الله يعطيك العافية

الايمان · 19-03-2015, 12:10 PM

روعه الفندق
مرتب وهادي

هاوية الاسفار · 19-03-2015, 04:34 PM

اقتباس : المشاركة الأصلية كتبت بواسطة شارلوك هولمز

روووووووعه شكرا لك على الطرح الرائع مشرفتنا

هولمز

العفو
حياك الله

هاوية الاسفار · 19-03-2015, 04:38 PM

اقتباس : المشاركة الأصلية كتبت بواسطة توبليرون

ماشاءالله عليكم بالعافية يام علي
الفندق جمييل والاحلى حمام السباحة
لليهال يستانسون على السباحه وما يملون
شكراا للتقرير اللي يشوق لزيارة بوظبي

الله يعافيج الغالية
السباحة اهون انا عيالي يتخبلون على الدراجات كل أسبوع يبغون يركبون
تسلمين عَل المرور

هاوية الاسفار · 19-03-2015, 04:41 PM

اقتباس : المشاركة الأصلية كتبت بواسطة |القحطاني|

ما شاء الله الفندق فخم والإطلالة جميييلة

آلة القهوة هذي Nespresso الكل يمدحها ويحبها

تقرير جميييل

الله يعطيك العافية

تصدق ياخوي اول شيء ادوره في الفندق اللي بحجزه هاي المكينه اذا متواجدة على طول ااكد الحجز
الله يعافيك
تسلم عَل المرور

هاوية الاسفار · 19-03-2015, 04:42 PM

اقتباس : المشاركة الأصلية كتبت بواسطة الايمان

روعه الفندق
مرتب وهادي

الروعة مرورج الغاليه
تسلمين

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فندق ستاي بريدج ابوظبي ( staybridge )	هاوية الاسفار	بوابة الامارات	30	04-12-2018 10:20 AM
ارض الحبوش ثاني اكبر دولة سكانا في القاره السمراء	أبوهمس	بوابة اثيوبيا	15	19-07-2015 08:53 AM
لولو اسفار للشقق الفندقية - ابوظبي	MOBARKI	بوابة الامارات	22	31-05-2015 09:35 AM
تقرير مصور لتجربتي مع منتجع فرنجي باني لنكاوي Frangipani	أبوعبدالله (الاسفار )	ماليزيا	7	19-03-2015 03:46 AM
تجربتي في فندق كابيتال حياة ابوظبي	هاوية الاسفار	بوابة الامارات	37	16-03-2015 12:58 PM