السلام عليكم

حصل لي أكثر من موقف في باريس وحبيت انبه المقبلين على السفر بشكل عام


انا سافرت لباريس في شهر نوفمبر الماضي وطبعاً نسبة السياح الخليجيين قليله في هذا الوقت من السنة
المهم قبل لا اسافر وانا محرص المدام انتبهي ولا تكشخين تراك تجذبين النظر لك .. وتسلك لي
وقبل نسافر سالتني وين الجوازات قلت ليه قالت بحطهم في حافظه ماركه جلد لماع وعليه شعار ذهبي

الموقف الاول كنا في جسر العشاق او مدري وش يسمونه حق الاقفال وكل جسورهم فيها اقفال المهم فكنا نصور فالمدام معها مظله فحطتها عشان تصور على جمب
تقريبا دقيقتين بالكثير خمس دقايق وانا في نفس الموقع .. شوي ترش قالت وين المظله ؟؟ قلت مدري عنك ماخذتها قالت انا اذكر حاطتها هنا وسالنا البنغالي الي يبيع اقفال جمب المكان بالضبط كانه موب خلفه
قال مدري
قمت انا اتفقد واشوف المكان الي تقول انها حاطته فيه الا احصلها مسقطه بين الحاجز والخشب الي محطوط على الحاجز واول ما طلعتها قال البنغالي هذا حقك انا احسبه حق خويي نكذب عيني عينك

الموقف الثاني

كنا نتمشى في الشانز ندخل محل ونطلع .. دخلنا لمحل نايك للمستلزمات الرياضية معروف كل العالم تدخله موب محل وااو خيالي يعني شعبي يعتبر لانتشاره

وجلست المدام تقلب في القسم النسائي وانا قلت باخذ لفه اشوف القسم الرجالي .. طبعاً يوم رجعت وقربت لاحظة حرمه فرنسيه لابسه قبعه كبيره ومدنقه راسه وكانها تتسوق وتقلب في الملابس
ولاصقه في زوجتي ويوم قربت الا اشوف زوجتي تطالعها بنظره زي الي ناقده عليها .. وش تبي!!
واول ماتلفتت زوجتي الا وتتحرك الحرمه باتجاهي وماتدري اني معها ومنزله راسها وراحت كانها بتطلع من المحل .. (المحل دورين وانا كنا في الدور الثاني )

يوم وصلت لزوجتي الا تفتش في شنطتها وتقولي الجواز موب معي انت ماخذه !! الـ (شتيمه) سرقته ..

هنا السيستم عندي وقف طبعاً عيوني على ذيك الحرمه وين تروح لكن زوجتي تقول امسكها فتشها وان اقول في نفسي طيب لو مسكتها واشتكت علي اني اتحرش ولا ما معها شئ ونبلش
طبعاً لحقناها وجلسنا وراها وهي مسويه نفسها تتسوق ولا تطالعنا نهائي منزله راسها وانا اناظر السكيورتي واناظرها وكاني اسمع السكيورتي عنده اثنين ويناقشونه زي الي عندنا مشكله شكلها ذي سارقتهم وما انتبهوا

وفي نفس الوقت انا اقول لزوجتي خليني بنادي السكيوتري الي عند الباب وهي تقول لا فتشها ..
شوي وانا نتناوش وشوي نتلاقط الا جتنا وحده من موظفات المحل وتقول تراكم طيحتوا جوازكم فوق
هنا انا قلت شكرا وكنت اتابع ذيك الي راحت لقيتها تناظرنا وتشوف وش بنسوي وفي نفس الوقت تسوي نفسها تتسوق
انا ما ارتحت للموظفه حتى احسهم متفقين لان الموظفه بعد ماعطتنا الجواز التفتت على ذيك الحرمه بسرعه كانها عارفتها

بعد ما سالت المدام ما حسيتي فيها ؟؟ وخاصه ان شنط الحريم ما شاء الله كل شئ فيها حوسه فاكيد بتحس بالحركه
طبعاً هي فتشت في الشنطه وحسبت ان الجواز هو محفظة الفلوس وخذتها على هذا الاساس ... ويوم لحقناها نطلته او انها يوم فتحته واكتشفت انه ورق ماله فايده رمته

الموقف الرابع

اول ما وصلت لباريس قصيت تكت نقل عام فسالة الموظف قلت هذا لكل شئ قال ايه لكل باريس
المهم حللنا التكت في التنقل وجاء اليوم الي بنروح له لديزني وكان عندي شك يوم اقص التكت وسؤالي للموظف عن هالنقطه المهم قلت هو قال كذا خل ندرعم
ومسكنا خط في القطار ويوم وصلنا لاخر محطه ونزلنا جينا ندخل من بوابة محظة ديزني يقولنا ان التكت حقي بس اظاهر زون 1.2.3
وديزني اظاهر 5

المهم جاني واحد وقال انت ماتقدر تدخل لان الزون حقك وكذا وقال انا معي تكت ليوم واحد روحه ورجعه وانا ما ابيه بدخل وانت ارجع فيه ... انا هالاشكال ما احب اتعامل معها حتى لو انها
ارخص لان اعرفهم نصابين احب اشتري من المصدر مباشره لو انه اغلا لكن اضمن..

المشكله تلفت يمين يسار ابي اشوف اله كشك عسكري موظف مافيه الا هذا قدامي .. قلت بكم ومدري وشو قال مبلغ قلت يالله .. عاد الي شككني في الموضوع اكثر انه ما دخلني مع البوابه العاديه
دخلني مع بوابة المعاقين وكان فيه واحد قبلي هو جاء ودفها ودخل وحط التكت من جهت البوابه ... فاستغربت يعني وين عسكرهم ماقالو عننا شئ وانا مجموعة دخلنا مع بعض
يوم خلصنا من دزني وانا راجعين طلعت البطاقة اصلا منتهيه حتى الرجعه مافتحت لنا الباب واضطريت اقص تذكره من جديد
طبعا يوم رجعت اكتشفت ان فيه محطه قبل ديزني يمكن اقل من خمس دقايق حقت الاوت ليت كان يمديني ارجع لها واقص تكت

الموقف الخامس

عند برج ايفل فيه افارقه يترزقون ويبيعون اغلبهم يبيعون مجسمات حديد لبرج ايفل يدورون .. وفيه بعضهم معهم اساور من الخيوط ويقرب منك وحتى لو صديت عنه يقولك السلام عليكم ويمد يده واول ماتمسك
يده يربط الحبل على يدك ويجلس يسالك من وين وكيف باريس ومدري وشو الزبده على طول يخلص الا مسوي على يدك اسواره.. قلت بكم يقول عادي اي شئ ... قلت كم الناس يعطونك قال 25 يورو
يستهبل قلت لا خلها لك امسك قال لا لا خلاص جب 15 للثنتين قلت لا مابيها قال جب اي شئ عاد ما اذكر كم عطيته يا 5 او 10 يورو ما كان عندي فكه والجد خفت على نفسي يتسلطون علينا

الي ابغا انبه عليه والي يستفاد من هالمواقف:

أولاً: قبل لا تسافر ارفع صور جوازاتك على ابلكيشن موقع وزارة الخارجية ويفضل يكون عندك نسخه لكل مستنداتك على الايميل.
ثانياً: زوجتي تقول انا حاسه بأن فيه أحد كان يفتش في شنطتي وتوقعته انه انت يازوجي (( لاتخلون شنطكم يالحريم مفتوحه وفي مكان تغفلون عنه ولا تاخذون شنط ماركات عند ناس فقر )) طبعاً شنطه وجوالات واي شئ
تراهم مايوفرون شئ.
ثالثاً: انتبه من اماكن الزحمه والي يلصقون فيك.
رابعاً: لا تحاول انك تبين انك كاش قدام الاجانب خاصه اذا كنت في مكان عام او شعبي .. خل لبسك انيق ونظيف يكفي (( حادثة لندن للاماراتيات كانت بسبت الاكياس الي شارينها ومظهرهم ))
خامساً: لاتثق في الغرباء وخل تعاملاتك كلها رسميه وخل عنك شغل السوق السوداء ولا تعطي احد وجه.

ادري اني ما جبت موضوع جديد لكن من باب زيادة التاكيد والتذكير

آخر مواضيع ATL

- المالديف مايو 2023 - اشتراطات الدخول لالمانيا - تغيير الصالة في رحلة الترانزيت - رأيكم بخط السير ؟؟ - القاهرة، مصر !! رحلة الغصب

توقيع : ATL

اللهم لا تجعل في قلوبنا غلاً للذين آمنوا

---

التعديل الأخير تم بواسطة ATL ; 18-03-2015 الساعة 09:57 AM

و عليكم السلام

يا كثر السرقة باوروبا و خاصة بالمدن الكبيرة

افريقيا آمن منها بكثير

شكراً على التنبيه

المشكلة العرب وخصوصاً الخليجيين يعتبرونهم ثروة تمشي على الأرض...ولازم النصب بأي طريقة
والله يستر منهم


شكراً أخي على التنبيه وتوضيح المواقف

الحذر واجب في كل مكان

شكرا لذكر تجربتك والتنبيه

آخر مواضيع fanda

- استفسار عن منتجعات بوكيت - تجربة استخراج فيزا شنغن من السفارة الالمانية - البحرين - غدانا مجابييييس - هنا البحرين 2017 - مساعده في خط الرحله

توقيع : fanda

غارقة في نعمك يا الله ... فلك الحمد حتى ترضى أم ريم

شكراً للتحذير ..

السؤال لماذا تتجوّلون بجوازاتكم ..؟

نسخة من الجوازات وفيها ختم الفندق يكفي للتجوال ..

فقدان الجواز بحد ذاته مصيبة تقلب الرحلة رأساً على عقب ..

اخي العزيز
اول شئالحمد لله علي السلامة
ومن فوائد السفر السبع هي التعلم
واكيد انت تعلمت وعلمت غيرك
وبأذن الله ماحد يصير لة مثله المواقف

لكن مثل ما قال اخوي اكسير
ليش تتجولون بجوازاتكم ؟؟

أهم شيئ أنك أستفدت من هذه التجارب وأردت إفادة غيرك
تحياتي

وعليكم السلام
شكرا لك علي النصائح مهمه حقيقه

الحذر واجب

شكرا لك


هولمز