السلام عليكم ..
عندي موضوع حصل لي في 2017 بباريس شهر عسل ..
نصب واحتيال من الشرطة بالتعاون معى أفراد حرامية من جميع الجنسيات ..بدون استثناء
سلمكم الله في اول يوم وصول لي باريس أخذت فندق في حي قريب من برج ايفل لسهولة الوصول للوجهات السياحية ..
(نصيحة وأكمل )
(بما اني سعودي باتطرق لعتب للمواطنيين السعوديين والخليجيين بصفه عامة ..
انت عينك مليانه بمعنى لو في يدك أييسكريم ماعجبك عادي بكل سهولة تطشه بالقمامة يمعنى ماتتحسف عليه غض النظر عن اكرام النعمه بس مثال علشان تتضح الصورة لك لانه باستطاعتك تشتري غيره وانت اصلن مسافر وانت مؤمن نفسك والجيب عمران المهم كل الي خارج الخليج ( الغير خليجيين ) يحسب حساب لقمته وبالمسطره والقلم يأكل توفير ومو كل شي يقدر يوفره حقيقه ذي فلذلك هم يرونك برميل بترول يمشي على الارض فأقول لكم يا اخواني. الخليجين كن مثل طبعهم. بالصرف لاتبذر لاتلبس ماركات كن طبيعي لأجل لاتلفت الأنظار ...وبعد فينا صفه حلوة داخل الخليج وبرا لاوالله انها من أكبر غلط تدري ايش الفززززززززززززعة ياخي خلك في حالك حتى لو يحط خشمة بخشمك اتركة لاتكلمة ولا حتى ابتسامه لانه ذا السائد عندهم وبتكون شاذ بمجرد ترد على الماره ويعرفون انك خليجي وشوف انواع النصب والاحتيال مثل حضرتي ... )
اكمل لكم قصتي اول يوم لي ابغى اكتشف المكان انا والمدام وقفني شخص يتكلم إنجليزي بطلاقه سألني من وين قلت لك من السعوديه ادربي برأسي ابتسم ابتسامة عريضه قلت بس بيقول لي كيف مزايين الإبل عندكم أكيد بينصبك انت ورأسك المهم قال لي صورني ابغى صورة تذكارية طبعا بعد ما نزلني تحت بالممشى حق نهر السين زوجتي تقول لي مشينا اتركه قلت لها افااا لازم أفزع له مسوي ذئب على غفله نزلت وقالت لي زوجتي باذني هذا كان يطاردنا من اول كأني حسّيت في شي لانه الرجال قاعد يكسب وقت بمعنى يفتش بمخابيه ومعاه ورقه يطوي فيها ويرجع يفتحها حطيت كامرته على الدرج وقلت له خذها وجيت طالع الاء اثنين حاطين الشاره بوجهي بوليس افااا !!! قال طلع كل الي عندك من امواااااال قلت ليش قال الشخص الي انت معاه مزور عملات واكيد انت تشتري منه !!!!!!!! وقال لي تفتيش كانت معي المحفضه من السعودية فيها صرف ريالات وعشرات شافها وقال طلع الان يالله انا بجيبي الخلفي في 1000 يورو قلت لهم لاحد يلمس زوجتي فتشوني انا فقط قال شنطتها لازم قلت شنطه ماعليه لاكن نو تتش ماي وايف اقل شي اطلع بنص ذيب قدام زوجتي 😂😂😂
المهم الرجال النصاب طلع فلوسه قبلي انواع العملات دولار يورو المهم قال لي ماعندك شي نهائي قلت مامعي يابن الحلال وانا معررررق بمكان وضع النقود 😂😂😂 المهم بعد كلام طووويل وتفتيش قال روح ولاعاد تتعودها ...
تنفست تنفس السعداء حقيقه موقف لا احسد عليه ...
طيب باشرح لكم بعد البحث في موضوعي وقابلت رجال محترم يبيع في محل يتكلم العربية شوف محل يعني مكان معلوم مو بالشارع قلت له موقفي ضحك وقال باين موضوعك انت معاك فلوس اصلية وَذَا متعاون معى الشرطه وعندهم فلوس مضروبه بيبدلها لااكثر لانه مستحيل تسرق بوجود الشرطة الكامرات بكل مكان لاكن يأخذ منك الأصلي ويعطيك مضروب اضمن له ... اهاا طلع ذا الموضوع ..
ياناااااس بعدها عشت في باريس اجمل ايّام حياتي تدرون كيف ما أكلم احد نهائي نهائي الاء صاحب محل مطعم كافية للطلب فقط ضبط امورك كل شي تبغى تسال عنه الجوال بيدك أستعلم من مثل ذا الصرح الجميل ( منتدى العرب المسافرون )
وطبقو ذا الموضوع بكل دولة بالعالم لأتكلم احد مهمى طلب مساعدتك انت رايح سياحة ولاء مكتب خدمات .. وسلامتكم
والله يوفقكم .. وكل عام وأنتم بخير