بسم الله الرحمن الرحيم .
اولاً حاب أشارك معكم في كيفية باذن الله حصولي على التاشيرة والذي من المقرر ان أقوم بزيارة السفارة اليونانية في جدة الاثنين المقبل الموافق 2-7-2018 .
طبعاً انا أرسلت عدة استفسارات هنا والحمد لله استفدت بشكل كبير وراح اشرح لكم المشاكل والمصاعب وكيف تلافيتها بشكل كبير وباقل المبالغ .
أولا قمت بحجز الطيران عبر الخطوط اليونانية عبر موقعهم الاكتروني لعدد 3 اشخاص 2 بالغين (( انا وزوجتي )) وابني البالغ من العمر 8 اشهر ويمكن ما يسافر بس بالحسبان حجزت له التذكره .
وكانت التكلفة من جدة الى أثينا بتاريخ 15 – 10 – 2018 وعودتي في تاريخ 29- 10 – 2018 م باذن الله ب3100 ريال لكافة الأشخاص والحمد لله .
طبعا انا جالس اجمع لي مبلغ محترم للسفر من غير السكن والطيران ووصل الى 20 – 25 الف ريال للسفر فقط التسوق والاكل والشرب .
طبعاً تجولت بعد الطيران في موقع بوكنج وحجزت ب2900 ريال (( راح اطرح الروابط للفنادق المعتمدة وذلك بعد حصولي على موافقة القنصلية )) يمكن ويمكن لا .. ما علينا يا احبة .

طبعاً نموذج فيزا شنغن بوابة فيزا شنغن schengen قالوا لي الواحد منكم راح يدفع 850 ريال قالوا حنا نزبطك وحنا وحنا طبعا هذي مكاتب في جدة قلت ليش ما ادخل واشوف القنصلية ودخلت على موقعهم

https://www.mfa.gr/missionsabroad/en...in-jeddah.html
وبعد ذلك على خيار VISAS

وبعد ذلك تحصل تفاصيل كثيرة للتاشيرة اخذت النموذج وسويت بحث في هذا المنتدى الحبيب والحمد لله لغتي مش ولا بد بس افهم انجليزي وتم النموذج في خلال 30 دقيقة للمسافرين وببلاش بلا مكتب لا هم .

ثم توجهت للبنك لاستخراج كشف حساب باللغة الإنجليزية لمدة 6 اشهر مع قيامي بترجمة التعريف الخاص بالراتب من مكتب ترجمة معتمد راح احط رابط قوقل هنا باذن الله بسعر 40 ريال

رابط المكتب بقوقل ماب لمن يريد
https://goo.gl/maps/bEHA55b8XXr


ووضعت كل شي على حدة علشان ما اخربط نفسي يعني فتحت ملف على جهاز الكمبيوتر وحطيت كما تلاحظون

علشان ارتب نفسي ..

طبعا تامين السفر كلفني 270 ريال للثلاث المسافرين

عبر شركة اسيج
ويمكن زيارتهم عبر
https://eservices.acig.com.sa/Travel...insurance.html

طبعا اللي وقفني هو موعد او بدون موعد قمت بالاتصال على القنصلية ورد علي واحد مقيم مصري وسالته عن الشروط وسالني عن الجنسية والوظيفة وقلت ابي احجز قال بدون موعد نستقبل اللي يبي تأشيرة من الاثنين لين الخميس من 9 ص الى 11 ص .. فرحان الاخ

طبعاً كل شي انا سويته بدون مكاتب او تدخل من غيري ..

طبعاً قررت اروح الاثنين وراح احدث الموضوع هذا وازوكم بالتفاصيل باذن الله بعد يوم الاثنين .


مواقع تهمك ::
موقع السفارة قوقل ماب ((https://goo.gl/maps/urVYcTd2ZZm ))

رابط نموذج التاشيرة Application Form

https://www.mfa.gr/missionsabroad/en...tion-form.html

______________________
طلبات لابد ان تكون معك ..
تعريف الراتب ..
نموذج التاشيرة مع اكتمال البيانات بداخله .
صورة الهوية الوطنية مع كرت العائلة للاحتياط .
صور شخصية .
كشف حساب باللغة الانجليزية .
تامين السفر .

سرد جميل والله يسهل لنا ولك،، منتظرين التحديث

بالتوفيق وسفره ممتعه

تجربة جميلة
شكرا على طرحها
وان شاء الله نبارك لك بالفيزا

بحمد الله اليوم رحت واعطوني تاشيره لمده سنه .. بدء من اليوم لي رجعة توي طالع من السفاره ..

تحديث 1 .. الحصول على التاشيرة والموافقة عليها والأوراق والخ ..

بسم الله الرحمن الرحيم ...
كم قلت لكم اني راح اروح السفارة اليونانية يوم الاثنين ..
طبعا .. جهزت أوراق كل مسافر لحاله زوجتي لحالها ابني لحاله وانا لحالي كل واحد في ملف مستقل .

طبعت رحت الساعه 8.35 ... الصبح لقيت قدامي 7 وانا الثامن

وشوي شوي العالم بدات تجي السبب ان اليوم اول يوم عندهم بالدوام وهو الاثنين ..
ودخلنا بالضبط السفارة الساعة 9 واعطونا ارقام ... وهنا السالفة ...
تأخير في التدقيق بسبب الواحد جايب معه 80 جواز وغيره 4 جوزات والخ وهذا الامر اتعبنا كثير انا دخلت على التدقيق 10.40 دقيقة بالضبط المهم في موظف هندي بشوش جلس يدقق ويعلمني ايش ناقص طلع عندي نواقص يا حبيبي قال تعال بكره قلت يرحم امك ابي اخلص قال طيب روح جيب الأشياء التالية ..
صورة جواز السفر الخاص بك انت .. تذاكر الفنادق .. الهوية الوطنية .. كرت العائلة .. تعريف الراتب .. لكل من زوجتك وابنك طلعت من السفارة لقيت جنب السفارة محل تصوير صورت ورجعت لهم على طول دبس الأوراق وحطها وزبط الأمور قال يالله انزل تحت للتبصيم والتصوير ..
المهم نزلت تحت لقيت قدامي اثنين زوج وزوجة مثلنا يبون السفر ما علينا .. الموظف اللي بالتبصيم مصري كويس وحبوب وبشوش لابعد درجة ياسمه احمد .

المهم يمكن بعد 11 دقيقه دخلت انا وسلمت عليه وجلست ع الكرسي وصورني وقال تعال بصم ودخلت زوجتي كذلك نفس الحركة وبعد ذلك قال طيب الولد نصوره دام موجود (( عمره 8 اشهر )) غلطتي اني جبته ونحاول نصوره قال الولد معصي مافيش جالس يبكي بس قال الموظف خلاص مافي مشكلة نحط صورة اللي جبتها من الاستوديو عند تقديم الطلب ..

دفعت لهم رسوم 288 لكل شخص ابني مجانا دون رسوم اعطوني موعد الخميس المقبل .. مدة التاشيرة قال لي بعطيك سنه لان جوازك سنه باقي فيه فقط .. تحسب من تاريخ يوم الخميس قلت طيب ..
اعطاني ورقة قال تعال الخميس من الساعة 2 لين 4 العصر الاستلام ..
متطلبات التقديم ...
النموذج تقوم باكمال بياناته قبل دخولك السفارة او من نفس السفارة يعطونك نموذج وانت تكمل عندهم مافي مشكلة .
كشف حساب 6 اشهر من البنك ..
تعريف بالراتب مترجم ..
حجز الطيران والفنادق ..
تامين السفر ..
صورة الهوية الوطنية وكرت العائلة .
صورة اول ثلاث صفحات من الجواز مع الأصل .
بطاقات الصراف قال ما نبيها ما نحتاجها .

اليونان بلد رخيصة وجميلة ان شاء الله موفق

موعدي بعد قليل

تم بحمد الله وطلعت التاشيره

ما شاء الله تبارك الرحمن اجتهاد شخصي رائع