السلام عليكم
اعزائي مالقيت احد اسأله غيركم
فبما انكم اعطيتوني الحماس الشديد اني ازور جنوب افريقيا احملكم ذنبي
انا ابي ازورها تقريبا ٨اغسطس او ١٨اغسطس وبعد ما خلاص اتوكلت على الله بحجز
سمعت نذرة الامطار فيها والناس تصرف كمياات قليله جدا في اليوم
فهل هذا منطبق على السائح 》》》ياليت المقيمين هناك او الي تو راجعين يخبرونا
لان فكري مشوش نفسي اروح وخايفه.

والشي الثاني..
انا الشي الوحيد الي اعرفه احجز الطيران الدولي فقط ماعرف احجز الطيران الداخلي من هنا
لوالفنادق ممكن احجزها من بوكينق بمشورتكم طبعا وحسب خبرتكم فيها
وانا احس اني احتاج سائق او مرشد مادري شلون احس بضيع بدون مرشد
وابو الشباب مايبي يسوق هناك

وبيني وبينكم ودي اريح راسي واخذ البرنامج مجدول جاهز من الى
بس بعد مابي شي مكلف
مو تقولولي اقرأي المواضيع قرأت وقرأت لين تعبت

ابي منكم تساعدوني
هل زيارتها في هالوقت امر سليم من حيث الماي
كم تقدير الرحله كامله على وجه التقدير لاربعه بالغين وطفل سبع سنوات وطفل سنتين؟
مع التذاكر(سواء من الدمام او البحرين اوالكويت ثنتينهم جيرانا فما تفرق) والسياحه وكل شي واحنا الحمدلله مو تبع تسوووق بس نبي نستمتع بطبيعتها ومغامراتها الجبااااره الي خلتني انهاااار ابي اروحها
وياليت اذا تعرفون شركه سياحيه مضمونه واسعارها حلوه مناسبه تفيدونا فيها

ياااليت ماتطولون علي

اختيار موفّق بإذن الله بالنسبة للوجهة وللتوقيت.
ما في داعي للتوتر والتردد
المهم الاستخارة قبل كل شي والتوكل على الله.

بالنسبة لموضوع الماء، فالأخ Oman Knight
يدرس حاليا هناك، وكتب في تقريره إن ما في أي مشكلة بالنسبة للماء ولله الحمد.

بالنسبة للسائقين، بتحصلين في ها التقرير في الصفحة 5 و 6 أرقام سواقين

https://www.arabtrvl.com/vb/t26381.html

مع إني أفضّل تأجرون سيارة وتسوقون بروحكم،
بتكون التكلفة أقل بكثير، وبتكونون على راحتكم،
خاصة لما تسيرون الجاردن روت.

بتحصلين في تقريري جداول للأماكن التي ممكن تسيرونها كل يوم،
فما في داعي لأي مكتب سياحي ياخذ منكم مبالغ كبيرة.

https://www.arabtrvl.com/vb/t22297.html

الميزانية تعتمد على عدد أيام الرحلة والطيران والفنادق اللي بتحجزونها،
بس بشكل عام جنوب افريقيا وايد أرخص من أوروبا، خاصة في السكن والأكل والنشاطات.

ما قصرت أم نوف

الحقيقة فيه توجيهات من الحكومة حالياً بترشيد استخدام المياه
وينطبق على الكل سواء مقيمين أو سياح
لكن للتو تواصلت معهم في كيب تاون ويقولون الآن الاوضاع أفضل
لأكن لازلنا على خطة الترشيد

وعليكم السلام ورحمة الله وبركاته

حياك أنا موجودة الآن هناك ماحسينا بأي شي الحمدلله الوضع تمام التمام البلد جميلة جدًا لاتفوتينها

بالنسبة للسيارة كنا بنستأجر وعلى آخر شي هون زوجي والحمدلله صارت خيرة تعاملنا مع سائق سوداني أمين وخلوق جدًا
وحتى قارنت بالأسعار للقاردن روت وهو الأفضل للأمانة أخذت رقمه من المنتدى من موضوع أخ عماني على ماأظن
اسم السائق أبو آمنة 0027832455981

و عليكم السلام أختي
بالنسبة لمشكلة الماء، كما ذكرت أختي أم نوف أنا موجود في كيب تاون من ٤ سنين و عايشت مشكلة الماء من بداياتها. المشكلة عمليا أنتهت و لم نعد نحس بوجودها إلا بقايا اللوحات الإرشادية. الشهر الماضي شهد أمطار غزيرة و أرتفع منسوب المخزون المائي بشكل كبير.

بالنسبة للسائقين، أنا أفضل إنكم تسوقون بأنفسكم و لكن إن إستدعت الحاجة فأنا أوردت أرقام ثلاث سائقين عرب في تقريري مثلما ذكرت أختي إيليا.

بالنسبة للجدول، فلا زلت أقول أنه يعتمد على شخصيتكم و ميزانيتكم و وقتكم و نوعية الأماكن التي تفضلونها. بإمكانك المرور على تقريري، و تقارير أختنا أم نوف و يوميات مشرفنا و أختاري ما يناسبك.

ماشاء الله تعاونكم يحرجني جدا
ناوين على ١٥يوم باذن الله ولو كانت الاسعار حلوه لابأس ب٢٠ يوم لو كانت تستاهل هذي الايام
ودي في جميع الانشطه والمغامرات واكيد رحلات السفاري
اشكركم جدا على تفاعلكم
وياليت اتصيرون وسيعين بال معاي عندي كم سؤال..
اعزائي اقدر احجز الانشطه من هنا بعد ما اخلص حجوزات الطيران والفنادق؟
كيف الجو هناك نحتاج الى ملابس ثقيله بالخصوص عندنا اطفال
اعتقد الوترفرونت الظاهر في كيب تاون》》》ان شاء الله الاسم كتبته صح حديثة عهد بهالاماكن

اقدر احجز الانشطه من هناك والا تنصحوني باني احجزها من هنا؟!
هل تحتاج الى فيزا ؟!
انصحوني يااخوان بالاماكن الي رحتوها واتمنيتو مارحتوها والاماكن الي اتمنيتو تروحوها وماحالفكم الحظ
والاماكن الي رحتوها وعجبتكم بقوووووه
انا بلقي نظره على الصفحات والتقارير الي دليتوني عليها وباخد افكار وبستشيركم فيها
شاكر لكم روح التعاون
كونو معي
اول مره اخطط لسفره بدون رجوعي لمكتب سياحي وانتم ماتقصرو

إذا تقدرون تخلونها 20 يوم فهي تستاهل، وبإذن الله بتستمتعون بالاجازة.

ما في داعي لحجز الأنشطة قبل السفر بفترة، لأن ها الايام ما تعتبر موسم عندهم
الحين شتاء والطلبة عندهم مدارس.. بس الخليجيين اللي هناك الحين

ممكن وإنتوا هناك تتواصلون وياهم قبلها بيوم أو بيومين وتحجزون.
أما حدائق الحيوانات فممكن تزورونها بدون حجز.
السفاري بيحتاج حجز من قبل، خاصة إذا بتباتون ليلة هناك،
والحجز يكون عن طريق التواصل وياهم مباشرة بالايميل أو التلفون،
بس بيطلبون تدفعون نص المبلغ الحين، والباقي عند الوصول.
نحن نسويلهم تحويل على حسابهم في البنك وبعدين هم يطرشولنا تأكيد الحجز.

الجو بيكون بارد وحلو ، تقريبا الحرارة في النهار 20 وفالليل 15.
فطبعا لازم جاكيتات ومظلة للمطر تكون وياكم دايما، في أي وقت ممكن ينزل مطر،
ووقتها غالب الحدائق تكون شغّالة عادي، بس بعض الأنشطة ما تقدرون تسوونها،
مثل القفز بالبراشوت ورحلات البحر.

جنوب افريقيا محتاجة فيزة،
ممكن الأخ أبو غسان يخبرج كيف التقديم عندكم في السعودية،
وهي ما تاخذ وقت، تطلع خلال 4 أو 5 أيام تقريبا.
بس ضروري تسوون ترجمة لشهادات ميلاد الأطفال اللي أقل من 18 سنة
وتقدمون نسخة منها ويا طلب الفيزة،
والأصلية تكون وياكم في المطار، عند السفر و العودة، أحيانا يطلبون يشوفونها.

بالإضافة إلى تقريري اللي خبرتج تشوفينه، في تقرير ثاني فيه معلومات تفصيلية عن أماكن النشاطات والحدائق

https://www.arabtrvl.com/vb/t20122.html

إن شاء الله تستفيدون منه.