رحلة سريعة إلى براغ

alzaaid10 · 30-08-2018, 02:19 PM

بسم الله الرحمن الرحيم

السلام عليكم ورحمة الله وبركاته

ماعرف كيف افتح موضوع بس اعتبروني أسولف وياكم قبل فترة راجع من سفره قصيره وحلوه حبيت اتكلم عن التجربة وان شاء الله ما اكون قصرت تغطيه بسيطة صور قليلة بس استفدت من الـ5 أيام
رحلتي إلى العاصمة التشيك براغ في أول يوم عيد الفطر كانت بتاريخ 15-06-2018 الصبح الساعة 8:30 من مطار دبي الدولي إلى العاصمة براغ على متن A380 طيران الأمارات
توقيت الوصول مناسب جداً في الساعة الواحد ظهراً بتوقيت براغ, طيب أخواني مالكم بالطويلة بختصار شديد جداً بكتب لكم الجدول وبخلص الرحله كلها,

الصورة من الطائرة وقت الاقلاع وهذه خارطة الطريق

والحمدلله الوصول كان على الوقت بس بصراحة تقريبا وقفت 50 دقيقة بس على خط الجوازات نهائياً مافي تنظيم وهاذي كانت أول نقطة سلبية وبعدها رحت أخذ بطاق SIM CARD وعلى حسب معلوماتي انه
T-Mobile أفضل شركة موجودة في التشيك لعدة أسباب الباقات إلي يوفرونها و تقدر تستخدمها في أغلب الدول الاوروبية، و بعدها أخذت تكسي من شركة كانت موجودة ف المطار وما كنت حاب أخذ تكسي المطار لسبب

ملاحظ: التكاسي في براغ نصابين العداد ما يشغلونة وإذا كنت سائح وما عندك خبره عن الاسعار ياخذ منك 4 او 5 أضعاف المبلغ الاصلي فهمت علي؟
فلازم تكون حذر إذا أضطريت تاخذ أتفق معاه على السعر قبل تركب معاه أو غير هذا لا تركب وأستخدم أوبر و متوفر بكثره وأرخص وأنضف

المهم شفت شركة توصيل فالمطار واتفقت معاهم على 90 درهم إماراتي تقريباً و سكني كان يبعد عن المطار حوالي 40 دقيقة وهذا أسمها

السكن كان في شقة مكونة من غرفة فالطابق العلوي و صالة و مطبخ وحمام و خزانة ملابس
والشقة نظيفة جدا جدا ومكانها ممتاز و الامان فيها عالي وحجزتها من موقع Airbnb.com بحط لكم رابط الشقة إذا كنتوا مهتمين تشوفون صورها
https://www.airbnb.ae/rooms/8965964

على فكرة صاحب الشقة هو إلي حذرني من أستغلال التكاسي ونبهني أكثر من مره و قال أستخدم أوبر بصراحة أنقذني لانه ما كنت أعرف
بالنسبة لشقة لو نتكلم شوي كان سعرها 422 باليوم الواحد مقارنه مع الفنادق 5 نجوم أرخص ب 400 او 350 درهم إماراتي حبيت الشقة وأنصح فيها وبشده
الشيك أوت يعتمد مثلاً أنا قالي الشك أن الساعة 3 العصر و الشك أوت 11 الصبح قلت له موافق لما وصلت قلت لك الشك أوت قبل طيارتي تقريبا بـ5 ساعات
ممكن أتأخر ساعتين قال ما في حد حاجز بعدك مافي مشكلة أي وقت حبيت تروح اترك المفتاح على طاولة الصالة وسكر الباب و مع السلامة لاني دافع قبل ما أسكن

ألحين بتكلم عن الجدول للخمس أيام وما كنت مرتب قلت براغ صغيره يعني الخمس ايام تكفي وتزيد

1- ساعة براغ الفلكية Prague astronomical clock
2- ساحة وينسيلاس Wenceslas square
3- جسر تشارلز Charles bridge
4- قلعة براغ Prague castle
5- السوق السعبي Havelske trziste market
6- برج تلة بترين Petrin observation tower
7- حديقة حيوانات براغ Prague zoo
8- ساحة البلدة القديمة old town square
9- جدار لينون Lennon wall
10- البيت الراقص Dancing house
11- برج باودر أو برج البارود Powder tower
12- سوق هارفا أكبر مول بالتشيك لتسوق Galeria harfa

بالنسبة لصرف بصراحة يفضل انك تاخذ معاك يورو بس تحوله بالكورون إلي هي عملة التشيك أنا ما انصح أي أحد يتعامل معاهم باليورو لانهم
يحسبون الشغله باليورو ويردونها لك بالكورون ف أنت ما تعرف فرق السعر يعني تتلخبط في، تقريبا أفضل صراف في براغ أنزل لكم صورته
ما عليك الا انك تكتب أسمه في قوقل ماب و تروح له

وبعدها بعض الصور الجانبية لبراغ القديمة و الاماكن السياحية وممكن تلاقي قوارب تاخذك في جوله في النهر وبعض المعالم السياحية
ومتوفره باصات سياحية ببكجات تختار ألي يعجبك وفي سماعات باللغة العربية في القوارب و الباصات

الجو كان ممتاز بالنهار وبليل بارد الشروق الساعة 4:30 صباحاً و الغروب 9:15 مساءً
عن نفسي ما كنت اصحى أول الصبح بصراحة لانه النهار طويل جداً ويكفيك
بالنسبة للأكل في مطعم عربي أسمة أمير موجود على القوقل ماب أعتقد بس 3مطاعم عربية موجودة والباقي هندي و أوروبي

أسعارهم بشكل عام رخيصة أرخص الدول المجاورة لها كـ ألمانيا و النمسا يعني باليوم الواحد لو شخصين ما أعتقد تصرف 500 درهم إماراتي
الشعب بصراحة ما شفت عليهم اي شي بالعكس يرحبون فيك

ملاحظة: بالنسبة للعوائل إلي حابين يزورون براغ في شغله بس ودي انوه عليها إذا كان معاكم أطفال صعب جداً تمشي بالعربانه ( عربة الطفل )
لانه براغ القديمة مافيها شوارع كلها أنترلوك ( الاحجار الصغيره )

أتمنا اني ما نسيت شي أخواني وأسف على ردائة الصور مصورها من تلفوني وان شاء الله ما أكون نسيت أي شي، وإذا في أي سؤال تفضلوا إذا أعرف بجاوب عليها

يومكم سعيد

q8ya metnaqla, الايمان, آخـــرفـــرصـــة و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
براغ ", في رحلة خريفيّة نوفمبر 2017	كوثر طالب	بوابة الدول الاخرى	114	04-09-2019 12:48 PM
بوكت ... رحلة سريعة لكن ممتعة بقلم احلى من العقد	فريق التطوير	بوابة تايلند	61	09-08-2019 02:37 PM
رحلة من براغ الى ميونخ	قطر الندى	بوابة الدول الاخرى	5	23-06-2018 12:12 AM
رحلة سريعة في الجزء الإسكندنافي	DxbAbdulla	بوابة اسكندنافيا	7	27-06-2017 04:07 PM