ابوعبدالهادي ورحلة بريطانيا ٢٠١٨ - الصفحة 4

ابو عبدالهادي · 21-09-2018, 11:06 AM

ابوعبدالهادي ورحلة بريطانيا ٢٠١٨

الجزء 6

خطة اليوم

اليوم بنكمل استخدام التذكرة اللي بها خمس اماكن, فكان الاختيار على مكان اسمه شريكز, ويقع بنفس مكان لندن ايز. مكان مناسب للصغار وفيه العاب تفاعلية حلوة. بس للاسف كان اقل جوده من شريكز دزني بـ اورلاندو – امريكا .

كعادة أي مكان ترفيهي باوروبا وامريكا عند الدخول ياسالونك اذا تبي تصور للذكرى, بس استغربت عند الدخول لهذا المكان التصوير كثير و اماكن مختلفه و بوضعيات كثيرة, مثل مرة تكون واقف و اخرى تكون جالس وبعدها كانك تركض و و و و و و طفشت صراحة , بس اذا عٌرف السبب بُطل العجب
يجمعون كل الصور في كتاب واحد مع احداث تاريخية للمان وكانه مرجع خاص لك ولعايلتك

بعدها تبدا الفقرات المتنوعة من داخل القاعات, للاسف الاضاءة خافته والتصوير لم يكن جيد,

تقييمي لهذا المكان 6 من 10 لاني جربت نفس الفعالية بامريكا وكانت افضل بكثير من حيث القاعات و الالعاب التفاعلية للصغار و بنهاية الوقت الاطفال ياخذون صور مجانية مع عدد كبير من شخصيات شريكز, وللاسف ماشفتها بهالمكان

بعدها حبيت اجرب الاكل الخليجي هناك, وجاتني توصية على مطعم عيش و دقوس الكويتي, بشارع ادجوارد, المكان لاباس بة

انتهى الجزء 6 من الرحلة, ولمشاهدته على اليوتيوب تفضل الرابط

انتظرو الجزء 7

فارس الجبيل, توبليرون, أم ريمه و 3 آخرون معجبون بهذا.

ابو عبدالهادي · 23-09-2018, 10:56 AM

ابوعبدالهادي ورحلة بريطانيا ٢٠١٨

الجزء 7

خطة اليوم

اليوم زرنا الحي الصيني, منطقة سوهو, متجر ام اند ام, ومحلات ليجو.

الحي الصيني جميل باشكال وديكورات المباني لانها شي جديد علي, اللي ماسافر الصين بتكون عالم جديد له.
لكن ماحبيت اصور لاني انغثيت من اشكال و روائح الاكل من المطاعم.

وكملت لـ متجر ام اند ام وللمعلومية مقابلة محلات ليجو, بجانبه منطقة سوهو.

داخل متجر ام اند ام زحمة ولكن الحمدلله طلعنا باقل الخساير

منطقة سوهو مليانه كافيهات ومتاجر حلوة وناس عايشة بعالم آخر

بعد التعب من كثرة المشي ه جاء وقت الراحة والرجوع للشقة

محطات الميترو صارت اعلانات

ماقدرت اقاوم النغم الحزين

انتهى هذا الجزء من الرحلة, ولمشاهدته على اليوتيوب تفضل الرابط

انتظرو الجزء 8

توبليرون, أم ريمه, ali pontiac و 2 آخرون معجبون بهذا.

ابو عبدالهادي · 23-09-2018, 01:01 PM

ابوعبدالهادي ورحلة بريطانيا ٢٠١٨

الجزء 8

خطة اليوم

اليوم بناخذكم الى حديقة ليجو لاند بمدينة ويندسور. تبعد بالقطار من لندن تقريبا سعة ونيُف. للمعلومية فية اكثر من محطة قطار بلندن توديكم, بس كان اقرب شي لي هي محطة قطار ووتارلو بمنطقة ويستمنستر.

الافضل تطلع بدري علشان توصل هناك بوقت كافي و تستمتع مع الاطفال. تقريبا كل نصف ساعة يتحرك القطار من لندن الى مدينة ويندسور.

تابع الموقع الرسمي للحديقة اذا تبي تعرف اوقات العمل واسعار التذاكر
https://www.legolandholidays.co.uk/

انا تاخرت ووصلت لمحطة ووترلو تقريبا الساعة 9 صباح, وعند جهاز التذاكر ابي اقرا واعرف المواعيد, وسألت احد الموظفين علشان يساعدني, ناضر فيني تدرون ايش قال!

هل تقدر تركض؟؟!!

قلت بنفسي وش دخل الركض بالموضوع,,,
وقال وزوجتك تقدر تركض,,

وانا اقول ماني رايق لك ,, ايش السالفة؟
قال فيه رحلة بعد خمسة دقايق!! وهذي اخر رحلة مخفضة (2كبار و 3 صغار بـ 30 باوند ذهاب وعودة), واللي بعدها باكثر من نصف ساعة سعرها بيزيد اكثر من الضعف. المشكلة مو هنا, المشكلة ان رصيف القطار بعيد ولازم تركض علشان توصل!!! او تعال بكرة.

قلت للعيال شغلو التيربو ولا توقفون الا عند هذاك الرصيف وانا باشتري التذاكر واجيكم
وعينك ماتشوف الا النور

اللي انتبهت له ان الشرطة يراقبوني حتى وصلت الرصيف قفلو علي الباب

الله يرحم والديكم ابي الحق
لما عرفو اني بري وماعندي شي غير القطار فتحو البوابة

ودخلنا القطار بسلامة الله وحفظة

فرق بس دقيقتين وتحرك القطار

بعد ماتحرك القطار تقربيا خمسة دقايق ولا حركة استرجع النفس اللي طار من الركض بالمحطة

تاكد من المحطة اسمها ويندسور – ريفير سايد علشان وقت الرجوع مايوديك محطة ويندسور داون تاون

بعدها تقدر تاخذ باص 702 او باص خاص لـ ليجولاند كل نص ساعة

ليجو لاند زينة لانك تطلع من صخب لندن. وهي مخصصة للاطفال اقل من 15 سنة, تختلف عن دزني وتختلف عن يونيفيرسال ستوديو.
الجميل بهالمكان ان اكثر الالعاب مثل ورشة عمل للاطفال, الموديلات الجديدة لـ العاب ليجو معاها رقايق الكترونية تقدر تنزل برامج واكواد من النت وتصير مثل الروبورت.

مجسمات من العاب ليجو

بعدها خلاص من التعب الجسم يباله راحة, وتبدا رحلة العودة

انتهى هذا الجزء من الرحلة, ولمشاهدته على اليوتيوب تفضل الرابط

انتظرو الجزء 9

توبليرون, أم ريمه, فارس الجبيل و 3 آخرون معجبون بهذا.

ابو عبدالهادي · 23-09-2018, 02:41 PM

ابوعبدالهادي ورحلة بريطانيا ٢٠١٨

الجزء 9

خطة اليوم

اليوم بنكمل استخدام التذكرة اللي بها خمس اماكن, فكان الاختيار على مكان اسمه عالم البحار (Sea life), ويقع بنفس مكان لندن ايز. مكان مناسب للكبار و الصغار وفيه العاب تفاعلية حلوة.

في بعض الاماكن تكون الارضية قزاز وتشوف الاسماك الكبيرة تحتك

ليش الحلو زعلان

سبحان الله انواع كثيرة من الاسماك

وصلنا القطب المتجمد

نهاية الجولة فيه كباين مثل كباين الهاتف اللي بالشوارع, استغربت ايش شغلتها, هذي تحط باوند او اثنين وتعيش داخلها مثل المنطقة اللي تضربها عواصف قوية تصل سرعتها اكثر من 72 كيلو مع شاشة تفاعلية لاماكن حقيقية ضربتها العواصف
تجربتها حلوة

انتهى هذا الجزء من الرحلة, ولمشاهدته على اليوتيوب تفضل الرابط

انتظرو الجزء 10

توبليرون, أم ريمه, فارس الجبيل و 2 آخرون معجبون بهذا.

ابو عبدالهادي · 23-09-2018, 05:35 PM

ابوعبدالهادي ورحلة بريطانيا ٢٠١٨

الجزء 10

خطة اليوم

اليوم بنشوف منطقة قريبة و جديدة, منطقة التلفريك او (Emirates Air Cable, Royal Dock)قريبة من كناري وورف. منطقة احتفالات و العاب و مطاعم و سينما.
بدينا بالعربات المعلقة او عربات طيران الامارات, (لكن للاسف اخذت منا وقت كثير و تاخر الوقت على بقية الفعاليات),
للمعلومية, يسوون لك تخفيض اذا انت جاي على طيران الامارات, او معاك بطاقة اويستر.

العربات تجربة جميلة انك تشوف لندن من الجو وكانك داخل طيران الامارات

الجههة الاخرى فيها كافيهات ومطاعم على البحر , بس ماجازت لنا لان اكثر اللي هناك لابسين من غير هدوم!!

قررنا الرجعة

داخل كل عربة شاشة تحكي تفاصيل المشروع و المنطقة المحيطة

بعد مارجعنا من العربات المعلقة , لقيت مكان للاطفال محاكاة للطيران تعليمي او مايسمى
Flight Simulator لكن الوقت متاخر وقفل.

بعدها اتجهنا الى ساحة المطاعم, بصراحة كبيييييرة ومن كثرهم ماعرفنا أي واحد نختار,
اقرب واحد كان مطعم ناندوز. جميل ولكن زحمة, وعليهم حركات

مقتطفات من منطقة المطاعم

انتهى هذا الجزء من الرحلة, ولمشاهدته على اليوتيوب تفضل الرابط

انتظرو الجزء 11

توبليرون, أم ريمه, فارس الجبيل و 2 آخرون معجبون بهذا.

توبليرون · 23-09-2018, 05:41 PM

حلو فكرة البوم الصور لشريك
بس احسه للأطفال شي حلو
اما بالنسبة للمطعم الكويتي افااااا ليش بدون تعليق عطنا السلبيات والايجابيات علشان نشوف تجربتك عنه
ونشوف يستحق الزيارة والا لأ

فارس الجبيلمعجبون بهذا.

توبليرون · 23-09-2018, 05:50 PM

حلوو البيكاديللي ومحل ام اند امز دايما زحمة
والمنطقة حلوة للتمشي
انا مارحت الحي الصيني بس شايفة بطهم وديايهم المعلق ههههه
بشارع الكوينز واي قبل والحمدلله على النعمة
بتابع بعد قليل الأجزاء الباقية

فارس الجبيلمعجبون بهذا.

توبليرون · 23-09-2018, 08:21 PM

حلووة الفعاليات بالليجو لاند واحلى شي الركضة هههههه والحمدلله ان دخلكم والا راحت عليكم لا وبعد تعبان سلامتك واجر وعافية

اليهال لازم لهم نصيب كبير من الترفيه اذا كانو مسافرين مع الاهل ويستاهلون ربي يحفظهم

الاكواريوم جميل ومتعة الكبار وخاصة اللي يحبون صيد الأسماك يحبون يشوفوت انواع الاسماك مثل بوحسين يستانس على الاكواريم

التلفريك ما حبيت تجربته بعد ما شفت انه ينقل من مكان لأخر بس وعبور النهر
بس اذا رحت ورحت للمنطقة ما يمنع من تجربته
متابعين باستمتاع

فارس الجبيلمعجبون بهذا.

بوصلووح · 24-09-2018, 08:39 AM

متابعين و مستمتعين
الله يحفظ لك عائلتك
رحلة جميلة بس يريت تكبر الصور شوي
والله يعطيك العافية

فارس الجبيل و توبليرون معجبون بهذا.

أم ريمه · 24-09-2018, 09:54 AM

تسلم يا ابوهادي على التقرير المفيد
ليت بس تكبر الصور شوي و تكون اكثر

في انتظار باقي التفاصيل
الله يعطيك العافية

فارس الجبيل و توبليرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الحمد لله وصلنا سورابايا ٢٠١٨/٧/١م	الشايب	بوابة اندونيسيا	25	05-01-2019 06:57 PM
رحلتي الى اسطنبول ١٤-٢٤ يوليو ٢٠١٨	bargima	بوابة تركيا	19	30-09-2018 06:59 PM
أجواء أزنجول الآن ٣٠ يوليو ٢٠١٨ امطار وضباب وبراد	أبو يوسف2018	بوابة تركيا	33	27-08-2018 10:45 AM
أوزنجول الآن ١٣/ أغسطس /٢٠١٨	أبو يوسف2018	بوابة تركيا	11	16-08-2018 04:48 PM
الحمد لله وصلنا اندونيسيا امس ٢٠١٨/٥/٣١م	الشايب	بوابة اندونيسيا	70	29-06-2018 01:43 AM