بسم الله الرحمن الرحيم

الأثنين
16 / 7 / 2018

في هذا اليوم سوف نستكمل أنا والعائله الاماكن اللي ما تيسر لنا زيارتها في سفرتنا الماضيه

وهي / مول زورلو .. حديقة أمير جان .. الكورنيش المقابل للحديقه

كانت البدايه بالمول

مول زولو من المولات الحديثه .. مختص بالماركات الراقيه
مول فخم .. وزباينه من الطبقه المخمليه









ها تبغون شئ ؟؟ اشتريلكم حاجه ؟؟

التفت العيون مبحلقة !!

والله يابابا !!

امممم أنا أبغى .. وانا أبغى .. وانا أبغى !!

أنتوا ماحد يمزح معاكم !!

مشي أنتي وهي .. المول ذا للفرجه فقط

أخذنا فيه حول الساعتين .. وبعدها ذهبنا إلى حديقة أمير جان

هذه الحديقه هي إحدى الحدائق العامه الكبرى في اسطنبول





التاكسي دخل بنا بوسط الحديقه .. وسيدا على مطعم بوسط الحديقه .. ونزلنا أمام المطعم

احنا تمشينا بوسط الحديقه .. وارتحنا على كراسيها



الحديقه كانت متعبه جداً في المشي !!
طلعاااااات !! ونزلااااااات !!
وشمس !! وحررررر !!

تلاحظون من الصور أن الطريق غير مستوي !! وطالع !! ونازل !! متعب بصراحه !!









رجعنا للمطعم .. وكان مرتفع على تله وذا اطلاله جميله على البحر

ريحنا فيه أبو ساعتين .. وبعدها سألنا عن بوابة الخروج للكورنيش

وبرضوا طلعااااااات !! ونزلااااااات !!

الزبده / لا أنصح بهذه الحديقه خصوصاً إلي معاه كبار في السن أو أطفال
إذا عندك وقت زايد في رحلتك تجي للمطعم مباشرة فقط

خرجنا من الحديقه .. وعلى الكورنيش مباشرة

تمشينا مع الناس اللي تتمشى

الغريب أن الكورنيش مافيه حاجز على البحر .. يعني تلعب كوره ولا سكيتنج ولا ما تنتبه لعيالك .. على البحر الغريق على طوووول !! فخذوا حذركم

على الكورنيش مطعم وكافيهات .. جلسنا في أحدها

اسمه / tas kahve emirgan









النادل مارضي يعطينا جلسه مباشره على الكورنيش !! بحجة أن الطاولات كلها محجوزه !! لكن ما استسلمنا .. مفاوضات وضغط الين وافقوا بشرط المغادره عند غروب الشمس بحجة أنها محجوزه لناس مخصوصين !!

كانت جلسه جميله ورايقه .. طلبنا شاي وحاجات خفيفه

النادل كل شوي يجينا
غداء ؟
لا
عشاء ؟
لا
حلويات ؟ كيك ؟
لا
شاي ثاني ؟
لا

غثنا وطفشنا !! واحنا نقاوم .. وش نسوي !! مو وقت عشاء
لان احنا مرتبين العشاء في تقسيم

صوره مسائيه لجسر الفاتح من مطل المطعم





جلسنا ساعتين .. ومشينا .. كملنا مشي على الكورنيش مع الغروب الجميل ومنظر جسر الفاتح

بعدها أخذنا تاكسي لساحة تقسيم

الساحه كانت زحمممممممممممه بشكل غير طبيعي !!!
شارع الأستقلال الناس فوق بعضها !!!





لفينا في شارع الاستقلال .. وبعدها عدنا لمطعم المدينه للعشاء



المطعم أيضاً كان مزحوووووم !ّ! وانتظرنا عشر دقائق لما فضيت طاوله

مطعم المدينه يعتبر من أفضل المطاعم .. وكمان يعتبر من أغلاها !!!

صوره لطلب جيراننا



شوفوا الولد في الصوره كيف منفجع من النيران




احنا طلبنا جرة اللحم بالخضار .. وكان سعرها لحالها 190 ليره !!
وطلبنا طاجن لحم بالباذنجان .. وشيش طاووق .. وكباب لحم .. وحمص وكولا .. وخلافه

الأكل كان لذيذ عموماً .. والفاتوره 450 ليره !!!

رجعنا الفندق لتجهيز الشنط والنوم .. استعداداً للسفر إلى طرابزون ( الشمال التركي )

زعلانين وحزينين على مفارقة اسطنبول الجميله البهيه

لكن اللي هون علينا أننا سنعود لها بعد ثمانية أيام سنقضيها في الشمال التركي الخلاب

يتبع ..