صباح / مساء الخير

النية بإذن الله نقضي راس السنة ب لندن
يعني السفر على نهاية ديسمبر

صار لخبطة في اجازتي في الصيف ما قدرنا نروح مكان
ف أول ما انحلت المشكلة رتبت اجازتي ل ديسمبر من الحين و الحمدلله تم الموافقة عليها

اختكم بالله تحمست حبتين
و على طول رحت و سويت الابليكشن
و ما انتبهت ان باقي على تاريخ السفر 97 يوم
(مع شرط السفارات عادة التقديم يكون 90 يوم من السفر)
و كنت راح الغي موعدي و استرجع المبلغ و اقدم مرة ثانية
لكن بعد استشارتكم و سؤال اكثر من شخص توكلت على الله و قدمت

الابليكشن لما بديت اسويها انتبهت انها نوعاً ما مختلفة عن القديمة
آخر مرة قدمت كان في 2014
ف دخلت على المنتدى و موضوع اخونا آخر فرصة بالتحديد اتأكد من معلوماتي فيها

التقديم ل فيزا سياحية لمدة سنتين
بقيمة 466 دولار - ما يساوي 176 دينار بحريني تقريباً

و حجزت موعد الاربعاء 26/9/2018 الساعة 12.45 ظهراً

في الابليكشن الجديدة أول 7 صفحات تكون عبارة عن إقرار بصحة المعلومات
و قائمة بالمستندات المطلوبة ( فقط الجواز - ما نحتاج صورة شخصية )
و قائمة بالمستندات المساندة ( مستندات مالية - حجوزات - أخرى)

جهزت انا من نفسي ما يلي
الابليكشن
ورقة الموعد
الجواز
رسالة راتب و قسيمة راتب
كشف حساب شهرين (حسابي جديد في البنك - عادة وقت تقديم الفيزا اقدم كشف حساب 3 شهور)
كشف حساب ل زوجي ل 3 شهور ( في الابليكشن كتبت انه بيدفع عني تكاليف السفر)
ونسخة من كل ما سبق خليتها معاي احتياط

وقبل الموعد ب يومين تقريباً
لقينا عرض على طيران الخليج و حجزنا و عرض في بوكينغ على الفندق ف حجزنا
و أخذت الحجوزات معاي

في يوم الموعد وصلت تقريباً قبل الموعد ب 45 دقيقة
و لكن ضاع الوقت و أنا أدور موقف لسيارتي في بناية المواقف التابعة للمركز
(المركز في بناية الدبلومات للمكاتب في المنطقة الدبلوماسية - زحمة فضيعة في المنطقة و البناية نفسها) لحد ما بقى على الموعد ربع ساعة فقط
ف إضطريت أكلم حارس البناية و اقول له عن ظرفي
و جزاه الله خير فتح لي موقف خاص و قال لي على مسؤوليته و نزلت بسرعة

الدخول للطابق الاول من البناية و اخذ بطاقة ثانية تفتح المصعد
المركز في الطابق ال 18

كل هاللف في الحر وترني و وصلت قبل الموعد ب 10 دقايق
بعد التفتيش و طلب اني اخلي موبايلي على الصامت

موظفة الاستقبال سجلت اسمي و الايميل و رقم التلفون
وطلبت الجواز و الابليكشن اول 7 صفحات فقط
عطتني رقم للانتظار و عدد من الاوراق للامانة ما عديتهم

كل ورقة تعتبر فاصل للمستندات اللي عندي
يعني مثلا ورقة للمستندات الخاصة بالحالة المالية
و تحتها احط اوراقي
ورقة الحجوزات
و تحتها احط حجوزاتي
و هكذا

طبعاً المركز فاضي ما فيه إلا انا و عايلة ثانية

ف على طول نادتني موظفة هندية
قلت لها للحين ما فصلت الاوراق قالت عادي عطيني ارتبهم لج

اول شي خذت الابليكشن .. و وقعت عليها
خدت الجواز
تعريف الراتب و كشف حسابي و حساب زوجي فقط

سألتني عن موعد السفر قلت لها 23 ديسمبر قالت اوكي اقل من 90 يوم

سألتني تبين تقدمين شي بعد ؟
قلت لها عندي حجوزات طيران و فندق

خذتهم و قالت خلاص كفاية
قالت ترا ما ناخذ الاوراق راح اصورهم و ارجعهم لج

دفعت (دينار - 10 ريال) لخدمة الرسائل النصية
و إنتظرت

لما خلصت تصوير الاوراق رجعتهم لي و قالت دورج للبصمة بعد العايلة لان عندهم اطفال

لكن من زود فضاوة المركز ناداني موظف خدمة ال VIP
و دخلني عندهم
جلست قدام الكيمرا و اقول اسمي و تاريخ ميلادي
و صورني
بصمت
و سألني عن نوع الفيزا

و وقعني على رصيد
و عطاني نسخة منه و قال خلصنا

خلصت كل الاجراءات الساعة 1.20

الساعة 4.27 العصر
وصلتني رسالة

ان الجواز راح السفارة

و دعاوتكم




المختصر

الابليكشن سهل جداً فقط نتبع خطوات آخر فرصة الله يجزاه خير
للتقديم تحتاج
الجواز - كشف حساب و تعريف راتب اذا بتدفع لنفسك و كشف حساب الشخص اللي بيدفع عنك (مثل حالتي)
حتى التأمين الطبي غير مطلوب

الحضور في البحرين
قبل ب وقت كافي لصعوبة الحصول على الموقف

والله يسهل لنا و لكم

بالتوفيق

ان شاء الله تطلع الفيزا باقرب وقت

لسه يطلبون منكم مستندات كثيرة الحمدلله احنا اكتفوا بالجواز والصفحة الاولى من الابلكيشن

يعطيك العافية لذكر تجربتك ليستفيد منها الاخوة بالبحرين

الحمدلله تسهلت الامور يام ريمه
بس والله غاليه الفيزا لسنتين وايد وايد ليش جذيه ؟
ان شاءالله تصير الكترونيه نفسنا ب ١٥ £ بس
طبعا الدخول مره وحده
اذا طلعت وبدش مره ثانيه لازم اسويها مره ثانيه
قبل لما كانت من المكتب ما تزيد عن ٣٧ دينار
اهم شي نبيج ما تنسينا من التقرير حبيبتي

تجربة جميلة
نشكرك على طرحها ام ريمة


الاجراءات سهلة جدا و اللي سهلها ترتيبك للاوراق من بدري
توقيت التقديم ممتاز لان ماعندهم زحمة ابد


وانا اقول لك من الان مبروك مقدما
وان شاء الله نشوف تقرير عن بريطانيا بعيون بحرينية


الله يسعدك

سلام عليكم اختي

بغيت اسأل عن فيزا لندن

إن شاءالله بسافر في شهر 12 بعد بس تاريخ 24

وللحين ما سويت الفيزا

هل تعتقدين بسوون مشكله ؟ من بعد ماشفت موضوعج في المنتدى خفت صراحة

حاولت اتصل فيهم بس عطوني رقمهم في ابوظبي و طلع مسكر الحين وشكله بعد ما راح يجاوبون على اسئلة تخص الفيزا

ليش ما سويت الفيزا للحين لان الكشف الحساب توني حاطه فيه مبلغ يعني ماكان فيه الا مبلغ بسيط و قالو ان لازم يكون فيه مبلغ في البنك ولازم يكون المبلغ موجود مدة 28 يوم ؟ مادري صراحه اذا صج او لا

مع العلم ان اشتغل يعني واضح ان الراتب يكون موجود كل شهر كدليل فقلت ان بروح اقدم على نص عشرة عشان يكون شهرين من موعد السفر

المرة الاولى اللي رحت فيها لندن كان خمسة ايام بس وعطوني عادي ماتذكر قبل جم يوم قدمت على الفيزا بس الحين متخوفة مادري شسوي

ان شاءالله تروحين يام ريمه وتكون احلى سفرة
وتقرير مفصل نبيه هذه العشق لندن
وحتى بعد سفرة تخرج اخوج بنشوف تقرير ثاني وبالبركة مقدما تخرجه