اليوم الأول تاريخ 29 ديسمبر

انطلقنا من مطار جدة على الساعة 9 صباحا الى لندن (ترانزيت لمدة ساعة و 20 دقيقة)

وهذه صورة لمطار لندن بعد وصولنا اليه



كثير اشوف البعض يتخوف من الترانزيت اللي بساعة وشوي وانها مدة قصيرة لكن عن نفسي اشوفها كافية وكافية جدا تقريبا نص ساعة ووصلنا للبوابة التي ستقلع لكوبنهاجن واصلا البوابة لسه فتحت حتى .. لذلك لا تشيلون هم بالوقت القصير للترانزيت فقط حاولوا تعجلوا شوي وتنطلقوا للبوابة مباشرة

المهم بعدها ركبنا الطائرة الاخرى والمتوجهة الى عاصمة الدنمارك مدينة كوبنهاجن ، وهذه صورة اثناء الرحلة ..



بعد ما وصلنا بالسلامة الى مطار كوبنهاجن توجهنا الى الجوازات لتختيم جوازاتنا للدخول



ولكن الموضوع ما مشي بالسهولة اللي توقعناها ، والسبب هو تأشيرة صاحبي الفرنسية واللي سببتلنا مشكلة ، اول ما شافت الموظفة تأشيرته الفرنسية قالت له انت المفروض تدخل فرنسا اول ليش جاي هنا؟ عاد قلتلها انه هو ناوي يزور فرنسا لمدة 7 ايام وبيجلس هنا لمدة 5 ايام فقط (طبعا تكلمت عنه لانه هو ما يجيد الانجليزية) اتصلت على مديرها وشرحت له موضوعنا وقالها حوليهم علي ، واعطتنا هذه الورقة



المهم دخلنا على المدير وقالنا انتظروا ، انتظرنا تقريبا ربع ساعة ورجع .. شرحنا له الموضوع قال احتاج اثبات ان خويك بيروح فرنسا ولا ما راح يدخل للدنمارك .. طبعا صاحبي مجهز حجوزات فنادق وهمية وعنده حجز طيران حقيقي لفرنسا (طبعا نحنا صدق رايحين لفرنسا لكن مدة اقامتنا فيها 3 ايام وليس 7 ايام هو هو موجود في الحجوزات الوهمية اللي عند صاحبي) المهم اخذ الحجوزات وخرج من المكتب حوالي نص ساعة ورجع .. قالنا ابغى اثبات اخر انه رايح لفرنسا مثل حجوزات لمطعم او معلم سياحي او اي شي ، من حسن حظنا انه كان عندنا حجز لديزني لاند اون لاين ، اخذ الحجز وغاب حوالي نص ساعة اخرى ورجع قالي نظاميا المفروض اني ما ادخله لانه المفروض تكون معاه تأشيرة دنماركية قلتله بس النظام بالسفارة عندكم بالسعودية قالولنا ان التأشيرة تخرج من البلد الاكثر اقامة قالي بالحرف (مالي دخل باللي يقولونه انا عندي نظام يقول لا تدخل اي مسافر الا اذا عنده تأشيرة دنماركية) وقالنا بمشيها له هالمرة بحكم انه ما عنده علم لكن المرة الجاية اذا بيجي للدنمارك لازم تكون معه تأشيرة دنماركية ولا ما بيدخل

صراحة جدا انصدمت انا من يوم فتحت عيوني للسفر وانا اعرف ان التأشيرة تستخرج للمدة الأطول وليس بلد الوصول .. عموما لحسن حظنا انه ما شيكت على الحجوزات واكتشف انها وهمية ولا كان فيها علوم ثاني ذي هههههه


المهم بعدها دخلنا الحمدلله ل كوبنهاجن





بعد ما دخلنا واستلمنا الشنط والعفش انطلقنا الى information services الموجود في ترمنل 2 لشراء بطاقة كوبنهاجن السياحية .. باختصار هذه البطاقة توفر لك الدخول المجاني لجميع الاماكن السياحية في كوبنهاجن (باستثناء مبنى الاوبرا) كذلك توفر لك دخول جميع المواصلات العامة بالمدينة سواء الباصات او الميترو او الاترام

شخصيا انصح بها جدا جدا جدا فادتنا كثير ووفرت علينا الكثير ايضا

سعرها للشخص الواحد 690 كورونة دنماركية (لمدة 72 ساعة)

وهنا المعالم التي بإمكانك الدخول لها مجانا في حال امتلاكك لهذه البطاقة

https://copenhagencard.com/attractions



بعد ذلك صعوبات هذا اليوم لم تنتهي بعد .. لاننا طبعا ما وجدنا صرافة لا في مكة ولا جدة توفر لنا العملة الدنماركية بحولنا كل الفلوس الى اليورو .. ولاحظنا العمولة في صرافات المطار جدا مرتفعة لذلك قررنا نروح للستي سنتر (بعفشنا واغراضنا) عشان نحول اليورو للكورونة .. فيه صرافة هناك ممتازة محددينها من قبل السفر .. طبعا الميترو ما يوصل من المطار الى السيتي سنتر مباشرة فيه محطة لازم تغير فيها القطار .. وخذلك مرمطة وتعب لان العفش والشنط معانا .. وبعد ما وصلنا للصرافة لقيناها مقفلة وقتها كانت الساعة 7 ليل (والسبب لاننا ما حسبنا حساب التأخر في الجوازات) وجالسين ندور صرافات وكلها مقفلة .. ياساتر على الورطة اللي نحنا فيها خاصة اننا لازم ندفع للفندق بالعملة الدنماركية عشان ندخله وما معانا ولا كورونة (المشكلة ما معي فيزا) .. لكن الحمدلله صاحبي كان معاه فيزا مسبقة الدفع وحاط فيها 2500 ريال قال كنت مخليها احتياط وهذا الاحتياط اللي انقذ حياتنا ههههه .. سحبنا مبلغ الفندق + 500 كورونة نمشي فيها امورنا لليوم هذا بس .. بعدها انطلقنا للسكن واللي هو في الحقيقة بيت شباب أو hostel .. سبب اختيارنا لبيوت الشباب اولا رخيصة ثانيا اننا نبغى نتعرف على بعض المسافرين من الجنسيات الاخرى وهذا الخيار ما راح تجده الا بال hostel ..

سعر الليلة لغرفة خاصة 3 اسرة (ما كان متوفرة غرف بسريرين) ب 665 كورونة لليوم الواحد

وهذه صور للهوستل (طبعا تم التقاط الصور باليوم التالي لان اليوم اللي وصلنا فيه كان ظلام ومو باين شي)


.
.
.
وهذه صور للوبي أو كما يسمى في بيوت الشباب ب common room


.
.
.
وهذه صورة للغرفة

.
.
.
بعدها اتجهنا الى سفن اليفن (ميني ماركت مثل ميد عندنا بالسعودية) لشراء بعض المستلزمات

وهنا سعر الكولا يبين لك مدى غلاء هذه المدينة



علبة الكولا سعرها حوالي 12 ريال سعودي


كذلك طلعوا يبيعوا شريحة انترنت (60 قيقا ب 99 كورونة) يعني 48 ريال تقريبا .. سعر جدا ممتاز مقارنة باسعار الانترنت عندنا



وبما ان عندنا راوتر فاكتفينا بشراء شريحة واحدة لنا نحن الاثنين

وبعدها لقينا مطعم تركي رخيص يبيع وجبات سريعة تعشينا منه ..



سعر الوجبة الواحدة ب 90 كورونة تقريبا 48 ريال سعودي

وبعدها رجعنا للهوستل واحلى نومة بعد يوم مليء بالمشاكل الغير متوقعة


عموما وبكذا انتهى يومنا القصير هذا هنا ..



يتبع