بسم الله الرحمن الرحيم .. أسعد الله مساءكم





الدول الاسكندنافية

في البداية فكرة زيارة الدول الاسكندنافية في بالي من زماااان لكن الظروف كانت ما تسمحلي .. وطبعا فكرة السفر الى الدول الاسكندنافية في الشتاء كانت مستبعدة تماما لشدة البرودة في تلك الدول خاصة في شهر الشتاء .. ولأن اجازتي السنوية غالبا تكون في شهر يناير .. فكل سنة كنت كانت تتأجل هذه الرحلة و اقول ما ينفع اسافر وابحث فيها عن دولة اخرى ويستمر التأجيل لهذه الرحلة لسنوات .. لكن هذه السنة لما تأكدت ان اجازتي كذلك ستصادف انها بوقت الشتاء قلت خلاص كفاية تأجيل راح ازورها في فصل الشتاء ولا همني ايش بيصيرلي هههههه ومن هنا بدأت المغامرة (السفر للدول الاسكندفانية في فصل الشتاء هو فعلا مغامرة)

وهنا تقرير تقدروا تقولون عنه قصير أو مبسط لهذه المغامرة .. و اتمنى ان تستمتعوا معي





مدة الرحلة

مدة الرحلة كاملة من 29 ديسمبر 2018 الى 4 يناير 2019
التفاصيل:
4 ايام في الدنمارك (كوبنهاجن)
يوم في السويد (مالمو)
يومين في فنلندا (هلسنكي)



المسافرون:

أنا و أحد اصدقائي

شخصيا احب في السفر ان المرافقين ما يكونوا كثير .. والحمدلله في هذه الرحلة رافقني شخص واحد فقط مثل ما تمنيت



الطيران المعتمد:


الخطوط البريطانية

تم اعتماد الخطوط البريطانية بالنسبة للرحلة الدولية (من جدة الى كوبنهاجن ذهاب وعودة) .. طبعا السبب اللي خلاني افضلها على الخطوط السعودية هي سعرها الممتاز .. اذ كلفتني الرحلة 2200 ريال للخص الواحد وكان سعر الخطوط السعودية 2900 للشخص الواحد .. الفرق كبير مثل ما انتو شايفين
.
.
.
.


الخطوط النرويجية

تم اعتماد الخطوط النرويجية للرحلة من كوبنهاجن الى هلسنكي


اما بالنسبة للرحلة من كوبنهاجن الى مالمو فاستخدمنا القطار



التأشيرة:

بالنسبة لي تم استخراج التأشيرة الدنماركية
وهنا تجربتي في استخراج التأشيرة الدنماركية
https://www.arabtrvl.com/vb/t37471.html


اما صديقي فاستخرج التأشيرة الفرنسية وعمل حجوزات وهمية تؤكد انه سيمكث في فرنسا مدة اطول بما ان المحطة الاولى هي الدنمارك

المواصلات:


في الدنمارك : الباصات (بما ان الميترو عندهم سيء ومحطاته قليل حول المدينة)
في السويد: مشي على الاقدام
في فنلندا : الباصات و الترام (الترام هو مثل الميترو لكنه قطار فوق الارض)



العملة:



في الدنمارك العملة الرسمية هي الكورونة الدنماركية
والتي تساوي 10 كورونة دنماركية = 58 هللة سعودية
.
.
.
.


وفي السويد العملة الرسمية هي الكورونة السويدية
والتي تساوي 1 كورونة سويدية = 42 هللة سعودية
.
.
.
.

وفي فنلندا العملة الرسمية هي اليورو
والذي يساوي 1 يورو = 4.2 ريال سعودي



المستوى المعيشي:

صراحة الغلاء المعيشي بالدول الاسكندافية جدا جدا عالي وملاحظ بشكل واضح للجميع .. طبعا السبب الرئيسي في ارتفاع الاسعار هي الضرائب المرتفعة اذ انها تصل لحوالي 30% .. لذلك انصح للي ناوي يسافر للدول الاسكندنافية ان يجمع صح وتكون ميزانيته مرتفعة


الطقس في شتاء الدول الاسكندنافية:

طبعا كما هو معروف .. كان برد قااارس جدا وكما هو متوقع
درجة الحرارة بالدنمارك كانت تترواح بين 3 درجات الى صفر درجة مئوية
درجة الحرارة بالسويد كانت حوالي 2 درجة مئوية
درجة الحرارة في فنلندا كانت تتراوح بين -8 الى -11 درجة مؤوية وهي البلدة الابرد طبعا



الأكل في الدول الاسكندنافية :

طبعا موضوع الاكل مثلهم مثل اي دولة اوروبية تقريبا متوفر جميع المأكولات مثل الصينية والتركية والعربية و المحلية كذلك متوفر لديهم مطاعم الوجبات السريعة مثل ماكدونالدز وكنتاكي و برجر كينج وغيرها



اللغة:

اللغة الرسمية في الدنمارك: اللغة الدنماركية
اللغة الرسمية في السويد: اللغة السويدية
واللغة الرسمية في فنلندا: اللغة الفنلدنية واللغة السويدية

لكن عموما جميعهم يجيدون الانجليزية لذلك لا تشيلون هم





مقارنة سريعة بين الدنمارك والسويد وفنلندا (بوجهة نظري)

1- فنلندا هي الابرد من بينهم اذ وصلت درجة الحرارة الى سالب 11 درجة مئوية
2- فنلندا هي الافضل و الاكثر في موضوع التنوع في المواصلات العامة
3- الدنمارك هي الاعلى غلاء من بين هذه الدول
4- انعدام تواجد السياح الخليجيين في هذه الدول (ممكن لانه شتاء؟ لا اعلم)
5- كثرة تواجد السياح الصينيين و الكوريين في هذه الدول
6- مطار الدنمارك هو الاكبر والاكثر تنظيما
7- الشعب الفنلندي شعب جدا ودود ويقدم لك المساعدة بكل لطافة
8- الامان في هذه الدول جدا عالي لذلك لا خوف حتى بالتجول باخر الليل في هذه الدول




تابعونا بالرد القادم ..[/]

اليوم الأول تاريخ 29 ديسمبر

انطلقنا من مطار جدة على الساعة 9 صباحا الى لندن (ترانزيت لمدة ساعة و 20 دقيقة)

وهذه صورة لمطار لندن بعد وصولنا اليه



كثير اشوف البعض يتخوف من الترانزيت اللي بساعة وشوي وانها مدة قصيرة لكن عن نفسي اشوفها كافية وكافية جدا تقريبا نص ساعة ووصلنا للبوابة التي ستقلع لكوبنهاجن واصلا البوابة لسه فتحت حتى .. لذلك لا تشيلون هم بالوقت القصير للترانزيت فقط حاولوا تعجلوا شوي وتنطلقوا للبوابة مباشرة

المهم بعدها ركبنا الطائرة الاخرى والمتوجهة الى عاصمة الدنمارك مدينة كوبنهاجن ، وهذه صورة اثناء الرحلة ..



بعد ما وصلنا بالسلامة الى مطار كوبنهاجن توجهنا الى الجوازات لتختيم جوازاتنا للدخول



ولكن الموضوع ما مشي بالسهولة اللي توقعناها ، والسبب هو تأشيرة صاحبي الفرنسية واللي سببتلنا مشكلة ، اول ما شافت الموظفة تأشيرته الفرنسية قالت له انت المفروض تدخل فرنسا اول ليش جاي هنا؟ عاد قلتلها انه هو ناوي يزور فرنسا لمدة 7 ايام وبيجلس هنا لمدة 5 ايام فقط (طبعا تكلمت عنه لانه هو ما يجيد الانجليزية) اتصلت على مديرها وشرحت له موضوعنا وقالها حوليهم علي ، واعطتنا هذه الورقة



المهم دخلنا على المدير وقالنا انتظروا ، انتظرنا تقريبا ربع ساعة ورجع .. شرحنا له الموضوع قال احتاج اثبات ان خويك بيروح فرنسا ولا ما راح يدخل للدنمارك .. طبعا صاحبي مجهز حجوزات فنادق وهمية وعنده حجز طيران حقيقي لفرنسا (طبعا نحنا صدق رايحين لفرنسا لكن مدة اقامتنا فيها 3 ايام وليس 7 ايام هو هو موجود في الحجوزات الوهمية اللي عند صاحبي) المهم اخذ الحجوزات وخرج من المكتب حوالي نص ساعة ورجع .. قالنا ابغى اثبات اخر انه رايح لفرنسا مثل حجوزات لمطعم او معلم سياحي او اي شي ، من حسن حظنا انه كان عندنا حجز لديزني لاند اون لاين ، اخذ الحجز وغاب حوالي نص ساعة اخرى ورجع قالي نظاميا المفروض اني ما ادخله لانه المفروض تكون معاه تأشيرة دنماركية قلتله بس النظام بالسفارة عندكم بالسعودية قالولنا ان التأشيرة تخرج من البلد الاكثر اقامة قالي بالحرف (مالي دخل باللي يقولونه انا عندي نظام يقول لا تدخل اي مسافر الا اذا عنده تأشيرة دنماركية) وقالنا بمشيها له هالمرة بحكم انه ما عنده علم لكن المرة الجاية اذا بيجي للدنمارك لازم تكون معه تأشيرة دنماركية ولا ما بيدخل

صراحة جدا انصدمت انا من يوم فتحت عيوني للسفر وانا اعرف ان التأشيرة تستخرج للمدة الأطول وليس بلد الوصول .. عموما لحسن حظنا انه ما شيكت على الحجوزات واكتشف انها وهمية ولا كان فيها علوم ثاني ذي هههههه


المهم بعدها دخلنا الحمدلله ل كوبنهاجن





بعد ما دخلنا واستلمنا الشنط والعفش انطلقنا الى information services الموجود في ترمنل 2 لشراء بطاقة كوبنهاجن السياحية .. باختصار هذه البطاقة توفر لك الدخول المجاني لجميع الاماكن السياحية في كوبنهاجن (باستثناء مبنى الاوبرا) كذلك توفر لك دخول جميع المواصلات العامة بالمدينة سواء الباصات او الميترو او الاترام

شخصيا انصح بها جدا جدا جدا فادتنا كثير ووفرت علينا الكثير ايضا

سعرها للشخص الواحد 690 كورونة دنماركية (لمدة 72 ساعة)

وهنا المعالم التي بإمكانك الدخول لها مجانا في حال امتلاكك لهذه البطاقة

https://copenhagencard.com/attractions



بعد ذلك صعوبات هذا اليوم لم تنتهي بعد .. لاننا طبعا ما وجدنا صرافة لا في مكة ولا جدة توفر لنا العملة الدنماركية بحولنا كل الفلوس الى اليورو .. ولاحظنا العمولة في صرافات المطار جدا مرتفعة لذلك قررنا نروح للستي سنتر (بعفشنا واغراضنا) عشان نحول اليورو للكورونة .. فيه صرافة هناك ممتازة محددينها من قبل السفر .. طبعا الميترو ما يوصل من المطار الى السيتي سنتر مباشرة فيه محطة لازم تغير فيها القطار .. وخذلك مرمطة وتعب لان العفش والشنط معانا .. وبعد ما وصلنا للصرافة لقيناها مقفلة وقتها كانت الساعة 7 ليل (والسبب لاننا ما حسبنا حساب التأخر في الجوازات) وجالسين ندور صرافات وكلها مقفلة .. ياساتر على الورطة اللي نحنا فيها خاصة اننا لازم ندفع للفندق بالعملة الدنماركية عشان ندخله وما معانا ولا كورونة (المشكلة ما معي فيزا) .. لكن الحمدلله صاحبي كان معاه فيزا مسبقة الدفع وحاط فيها 2500 ريال قال كنت مخليها احتياط وهذا الاحتياط اللي انقذ حياتنا ههههه .. سحبنا مبلغ الفندق + 500 كورونة نمشي فيها امورنا لليوم هذا بس .. بعدها انطلقنا للسكن واللي هو في الحقيقة بيت شباب أو hostel .. سبب اختيارنا لبيوت الشباب اولا رخيصة ثانيا اننا نبغى نتعرف على بعض المسافرين من الجنسيات الاخرى وهذا الخيار ما راح تجده الا بال hostel ..

سعر الليلة لغرفة خاصة 3 اسرة (ما كان متوفرة غرف بسريرين) ب 665 كورونة لليوم الواحد

وهذه صور للهوستل (طبعا تم التقاط الصور باليوم التالي لان اليوم اللي وصلنا فيه كان ظلام ومو باين شي)


.
.
.
وهذه صور للوبي أو كما يسمى في بيوت الشباب ب common room


.
.
.
وهذه صورة للغرفة

.
.
.
بعدها اتجهنا الى سفن اليفن (ميني ماركت مثل ميد عندنا بالسعودية) لشراء بعض المستلزمات

وهنا سعر الكولا يبين لك مدى غلاء هذه المدينة



علبة الكولا سعرها حوالي 12 ريال سعودي


كذلك طلعوا يبيعوا شريحة انترنت (60 قيقا ب 99 كورونة) يعني 48 ريال تقريبا .. سعر جدا ممتاز مقارنة باسعار الانترنت عندنا



وبما ان عندنا راوتر فاكتفينا بشراء شريحة واحدة لنا نحن الاثنين

وبعدها لقينا مطعم تركي رخيص يبيع وجبات سريعة تعشينا منه ..



سعر الوجبة الواحدة ب 90 كورونة تقريبا 48 ريال سعودي

وبعدها رجعنا للهوستل واحلى نومة بعد يوم مليء بالمشاكل الغير متوقعة


عموما وبكذا انتهى يومنا القصير هذا هنا ..



يتبع

ماشاء الله بداية رائعه جدا ومعلومات مفيدة للسائح خاصة موضوع الدخول للدنمارك
سعر التذكره للخطوط البريطانية حلو بس كيف الترانزيت مايطلبون تاشيرة

احترنا مع السفارات الحين لا نعلم هل نصدر التاشيرة من بلد الوصول او الاكثر اقامة وزين خويك حجوزاته صحيحه وعنده حجز لديزني موكد



توقيتك للسفر شتوي بحت وكالعادة الناس تسافر لـ هالدول بالصيف هل تنصح بالسفر في هالوقت



متابعين معااااك

آخر مواضيع فارس من خيال

- من أجمل ما رأت عيني (جزيرة جيجو - كوريا ) - استطنـــــ(في خاطري شوق وحكايات واسرار)ـــبول - على اطلال (هونج كونج)2017 - هَِنأّ يِّفِّيِّض أّلَأحٌَّسأَّّس وِتّشٍبِعٌ أّلَحٌوِأَّّس(أوِروِبِــًـِـُـأّ) - بين الكلام والصمت جمال (نيوزيلــــ New_Zealandـــــدا)

توقيع : فارس من خيال

يوماً ما سَـأرحل دُون »وَداع« أَتمنى أن يَذْكرني أحدكم بدَعــوهْ Save

ماشاءالله تقرير ممتع مفيد بنفس الوقت
الدنمارك باين عليها صعبة النفسيات هههه بداية من المرور بالجوازات والتأشيره
المهم الحمدلله ان عندكم بعض الحجوزات
مستمتعين معاكم ومتابعين على ثاني كرسي

يا سلام على السرد الجميل
والتفاصيل الدقيقة


دول اسكندنافيا مشددين على الفيز وقد ذكرت هذا
لدرجة ان موظف ايسلندا دخل على السيستم
يتاكد ان حجز الطيران مؤكد لنا او لا
لذا ينبغي الواحد يكون حريص معهم
لكن الفيصل هو نظام شنغن يا غالي
واللي ينص على ايتخراجها من الدولة الاكثر اقامة
لكن كل موظف يجتهد



يا ساتر على غلاء الكوكا كولا
اشوف النرويج هي الاغلى



متابعين و مستمتعين

الدول الاسكندنافيه بالشتاء غريبة الاغلب يزورها بالصيف
ان شاءالله نستمتع معاكم بالتقرير ونشوف الثلج
غريب تصرفهم بالدنمارك الصحيح ان المدة الأطول نطلع منها الفيزا
الله يعينكم اجراءاتهم معقدة والحمدلله انكم مجهزين كل الاوراق
متابعين للتقرير الشتوي

[اليوم الثاني تاريخ 30 ديسمبر

بعد الورطة اللي كنا فيه اليوم الماضي قمنا هذا اليوم بدري على الساعة 8 صباح والشمس لسه ما اشرقت حتى من أجل تحويل العملة اللي معانا .. انطلقنا الى السيتي سنتر وتحديدا الى افضل مكان لتحويل العملات (حسب تقييمات قوقل ماب)



بعد ذلك رحنا لاقرب كافي نجلس فيه عشان نجلس فيه نص ساعة كذا الى ان تشرق الشمس





بعد ما اشرقت الشمس اتجهنا مباشرة الى قناة Nyhavn

هذا المكان باختصار هو من اشهر الاماكن زيارة في كوبنهاجن طبعا المكان مليء بالمطاعم والكافيهات والاسواق وايضا يشتهر بالمباني الملونة التي تعكس منظر جميل جدا

اترككم مع بعض الصور ..















بعدها اتجهنا الى Guinness World Records أو متحف جينيس للارقام القياسية .. واللي هو قريب جدا من المكان اللي مصوره لكم فوق لدرجة اننا وصلنا له مشيا على الاقدام



الدخول لهذا المتحف مجانا لأصحاب بطاقة كوبنهاجن

وهذا متحف باختصار يستعرض فيه بعض الاشياء التي دخلت موسوعة جينيس .. وطبعا صعب اني احط اصور كل الموجود بالمتحف ولكن وهذه بعض من المعروض في المتحف عشان تاخذوا خلفية عن فكرة المتحف



هذا اسمن رجل بالعالم بوزن 481 كم
.
.
.


اطول نفس تحت الماء ب 22 دقيقة
.
.
.


اطول شارب بالعالم بطول 3 متر
.
.
.


اكبر حلاوة مصاص بوزن 2 طن
.
.
.
بصراحة متحف جميييييل جدا وممتع قضينا وقت فيه اكثر من ساعة بدون ما نحس بالوقت .. لازم تزوره اذا لك زيارة لكوبنهاجن

بعد الانتهاء من المتحف والخروج منه يوجد متحف الرعب .. بداخله بعض المجسات المرعبة

الدخول لهذا المتحف مجانا لاصحاب بطاقة كوبنهاجن

هذه بعض الصور للمتحف





للاسف المتحف من جوا ظلام وممنوع استخدام الفلاش لذلك ما قدرت اصور فيه كثير .. لكن عموما متحف بايخ ما استمتعت فيه شخصيا ..



عموما بعدها تجولنا في شوراع كوبنهاجن الحية والباردة ..




ونحنا بنمشي لقينا مطعم يعتبر مطعم رخيص وقلنا نتغدى فيه ونكمل مشي



هذه الوجبة اللي قدامكم تكلفتها كان تقريبا 45 ريال ..
.
.
.
واصلنا بالمشي حتى وصلنا لبرج The Round Tower وهو كذلك من المعالم الشهيرة بالمدينة .. بإمكانك الصعود لقمة البرج (لايوجد مصعد) ومشاهدة المدينة من فوق

الدخول لهذا البرج مجانا لأصحاب بطاقة كوبنهاجن


.
.
.
وهنا صورة اثناء الصعود للقمة


.
.
.
وهنا منظر المدينة من قمة البرج




.
.
.
بعد ما انتهينا من البرج استكملنا توجولنا في المدينة مشيا على الاقدام .. حتى وصلنا لمتحف Ripley's Believe It or Not! أو متحف (صدق أو لا تصدق) وهو متحف يستعرض اشياء غريبة نوعا ما للزائر .. بصراحة كذلك انصحكم فيه اذا بتزورون كوبنهاجن ..جدا رائع وممتع ويستحق فعلا الزيارة

الدخول لهذا المتحف مجانا لاصحاب بطاقة كوبنهاجن





هذا مجسم صانعينه من الدولارات الامريكية




.
.
.
شوفو هذا سبحان الله كيف لسانه


.
.
.
كذلك المتحف مليئ باللوحات التفاعلية مع الزائر .. مثل كذا





بعد الانتهاء من هذا المتحف الجميل واصلنا المشي .. دائما اقول ان ما يميز كوبنهاجن هو مبانيها الفريدة وتنوع الوانها اللي تعطي منظر يفتح النفس


.
.
.
اثناء مشينا وجدنا بالصدفة متحف يختص بالاداء المسرحي اسمه The Theatre Museum .. وهو اقدم متحف في الدنمارك عمره حوالي 250 عام وقد ادو الممثلان هانز كريستيان أندرسن والكونتيسة دانر اخر عروضهم في هذا المسرح .. عموما هذا المتحف ما كان ضمن خطتنا


الدخول لهذا المتحف مجانا لاصحاب بطاقة كوبنهاجن






بصراحة ما حبيت المتحف كثير ممكن بسبب عدم ميلي للاداء المسرحي بشكل عام



عموما واصنا طريقنا حتى وصلنا لمتحف الحرب الوطني أو Danish War Museum .. وهو متحف ضخم جدا يستعرض فيها بعض العدات والملابس التاريخية التي استخدمت الحروب التي خاضتها الدنمارك منذ حروب الفايكينق حتى الحرب العالمية الثانية ..


الدخول لهذا المتحف مجانا لاصحاب بطاقة كوبنهاجن












.
.
وهنا رسمة للحرب التي خاضوها في افغانستان


.
.

متحف ضخم وممتع كذلك اذا بتزوروه لا تنسون تطلعون الدور الثاني ففيه معروضات تستحق المشاهدة ..


بعد ما خلصنا من المتحف اقترب وقت الغروب فقررنا الذهاب لمتحف الموسيقى أو The Danish Music Museum بما انه كان على طريقنا الى الهوستل .. فكرة المتحف هو استعراض بعض الالات الموسيقية القديم منها والجديد .. كذلك يعطونك ايباد خاص فيك بإمكانك سماع اي معزوقة لاي الة معروضة انت تختارها .. اليكم بعض الصور..

الدخول لهذا المتحف مجانا لأصحاب بطاقة كوبنهاجن







بصراحة المتحف ماهو وااو ولاهو سيء .. لو كنت متهم كثير بالموسيقى انصحك تزوروه .. اما لو مالك في الموسيقى تقدر تتخطاه ..

بعد ما خرجنا من المتحف وقتها غربت الشمس تماما لذلك رحنا تعشينا في اقرب مطعم وبعدها رجعنا للنوم لينتهي يومنا هنا ..





يتبع]

تقرير شتوي جميل

يعطيك العافية

اتمنى يكتمل التقرير