مساء النور والسرور

اختيار موفّق بإذن الله

- موقع سكاي سكانر: ما جربته قبل في الحجز،، بس للبحث عن رحلات الطيران
وبعدين أحجز من موقع شركة الطيران اللي أبغيها.

- سعر التذاكر مناسب وما اعتقد الأسعار بتنزل أكثر، بالعكس الأسعار ترتفع
كل ما قرّب تاريخ السفر.

- الفنادق والبيوت في جنوب افريقيا غالبا ما عندهم إلغاء مجاني للأسف،
غير قبل تاريخ الوصول بشهر وأحيانا أكثر (ما اعرف ليش!!!)،،
وإذا قبل الوصول بأقل من شهر يكون في خصم نصف المبلغ او أكثر ، حسب قوانين كل فندق.
وفندق بريزيدنت من الفنادق القليلة اللي عندهم إلغاء مجاني لين قبل الوصول بيومين.

- ممكن تتواصلين مباشرة مع فندق ميس أميس، وإذا ما طلبوا دفع مقدم للحجز بيكون زين.
وممكن تطلبين منهم خصم على سعر الغرفة.
قوليلهم أبغي الغرف رقم 9 و 11 إذا متوفرين، لأن الغرفة رقم 11 كبيرة وتناسب الثلاث أطفال،
وغرفة 9 أكبر شوية من غرفة 10 .. وعلى العموم الفندق صغير وكل الغرف قريبة من بعض.

- المحمية اللي في بلتنبيرغ بتكون بعيدة عليكم، خاصة إنكم ما بتمّون في بلتنبيرغ.
ممكن تشوفين المسافات على جوجل ماب، وتقررين.
بس أشوف إن محمية جاردن روت بتكون أقرب لكم.. وممكن تحجزين بالتواصل المباشر وياهم.
والأفضل تحجزون في أقرب فرصة علشان تحصلون فيها غرف فاضية.

يعني بعد ما تحجزون التذاكر احجزوا المحمية والفنادق..
أو ممكن حتى تحجزون فندق بريزيدنت من الحين مادام فيه إلغاء مجاني،
وفندق ميس أميس ابدئي بالتواصل وياهم لأن التواصل بالايميل ياخذ عدة أيام
في الأخذ والرد لين ما تتفقون.

- الجدول بشكل عام زين.. بس أشوف إن ما في داعي ترجعون كيب تاون
ممكن تضيفون يوم في البداية ويوم في وايلدرنس أو المحمية،
بحيث تحجزون الرجوع من مطار جورج إلى جوهانسبرغ.
والسيارة اللي بتاخذونها في كيب تاون ممكن ترجعونها في مطار جورج.

الله ييسر أموركم وتسافرون وتستانسون هناك.

وحاضرين لأي استفسارات ثانية