عائدون .. مغرمون وعاشقون ~ لزيزا وخصوصا كاميرون . رحلتي2 ( 2014sep ) - الصفحة 19

himzmz · 23-02-2015, 09:28 AM

حمدلله عالسلامة يا عسل وعودا حميدا
منتظرين ابداعاتك في بينانج

قصة حب · 23-02-2015, 11:24 AM

ماشاء الله
تدري انك تذكرني بأخونا وافي
نفس طريقة السرد ورصف الكلمات
عجيييييييييب
عساكم على القوه انت ووافي
شكرا لك على هالتقرير الصاروخي
قنبله موقوته انفجرت وياحلات النتيجه
صور خلابه والتقاطات رائعه
تسلم ايديات من صور وكتب هالكلمات الراقيه

ذكرت بالمنتدى القديم ولازلت اقول
ما شاءالله اخوانا السعوديين عندهم قريحه للكتابه
بشكل جميل

تحياتي للجميع وبارك الله فيكم فيما تطرحونه بهذا البيت الكبير
حتى نستفيد من تجارب بعض
وتكون رحلاتنا مكلله بالنجاح

تعبت من الكتابه
حسيت اني ابلة عربي

بانتظار العشق الكبير ( بينانج ) معشووووووووقتي الجميله

قصة حب · 23-02-2015, 11:25 AM

والف سلامه واجر وعافيه للوالدة
الله يحفظها لكم شمعه البيت

kazami · 24-02-2015, 01:11 AM

تم الوصول والهبوط في بينانغ.. وجدنا الجو جميل وبارد ومغيم في الغالب..
وللأسف وتحملوني على صراحتي وقباحة رأيي.. ماأحب بينانغ ماااااااااااااااااااااحبها
وربي ماأحبها.. وأشوفها عادية جدا ولاتستحق العناء ولاتتميز بشئ وكل مافيها
يمكن أن تجد بديلة في أماكن اخرى عدى الهضبة والله أعلم.
أعذروني على هالكلمات خصوصا عاشق بينانغ, وبقية محبي بينانغ.
لكن ربي يستر عليها ولولا كاميرون مامريتها. ماجازت لي وأكيد من يعشق لنكاوي
يسير مايشوف أجمل منها. وعموما لاتأأخذوني في هالكلام ممكن خبرتي بسيطة.

مالكم بالطويلة الرحلة ممتعه وقصيرة وطيران فايرفلاي جميل وكان اختيار موفق
والحمدلله, نزلنا مطار بينانغ واتجهت للشنط وبعدها الى البوابة الخارجية وهناك سأجد
مكتب التكاسي.

وهذا لقطة للمطار..

وكان مكتب التكاسي ثابت السعر فقد أخبروني ان المشوار الى فلامنقو هو ب50رينقت
وعند وصولي طلبو 55 للسيارة الصغيرة.وقالو اربع شنط لازم سيارة كبيرة قلت لهم
هات سيارة صغيرة شنطتها مافيها اسطوانة غاز ومالكم شغل انا راح ارتب الشنط وتكفي
بالراحة قالوا. تم.
وبالفعل كفتنا السيارة الصغيرة وانطلقنا الى فلامنقو وفي حدود 40دقيقة كنا بالفندق.
واليكم صور من الطريق.

وراكبو الدبابات النارية كثيرين في بينانغ وقيادتهم متهورة وهالشي زدني قناعة بأن القيادة في بينانغ ليست سهلة مثل لنكاوي.. وآآآآآآآآآآآآآآآآآآه يالنكاوي والله فرق

ووصلنا الفندق.
وبصراحة فندق متهالك(مستهلك) لكنه رائع وجميل واعجبني فيه بشاشة العاملين وتلبيتهم للرغبات وهو خيار اقتصادي ممتاز واغلب سكانه عرب.. واليكم الصور:

وهذا جار فلامنقو .. فندق برادايس.. فندق اقتصادي اكثر وارخص وسكانه صينيين
وجميل بوفية العشاء فيه ورخيص وايضا العصيرات ممتازة.

ونرجع لفلامنقو..وهذي المواقف تحت..

وهنا المدخل الجميل.

وهنا شعار الفندق وهو طائر الفلامنقو

واليكم لقطات للبهو ومافيه...

وهنا الاستقبال (رسبشن)

وهنا مكتب لاي استفسارات

ومكاتب مسؤولي الفندق

وبقالة صغيره فيها اغلب الاحتياجات.

وهنا بوفية المشروبات

ثم الى الجلسات الخارجية وهي قمة المتعه والروقان.

ثم قالو الغرف جاهزة واصلا تسجيل الدخول كان سلس وفي 10دقايق وهم منتهين.
وخصوصا انهم طلبو ورقة الحجز وهالشي لاحظته بكل الفنادق فورقة الحجز تطبع بالانقلش وتسلم لهم ويكون حقك محفوظ. ولابد من النسخة الورقية.
وبالمناسبة اتذكر يوم دخلت الفندق كان قبلي 3كويتين حبايب ربي يحفظهم وحايسين مع الرسبشن ولالقيو لهم حجز. ورحت صورت واستلمت الغرف وريحت ونزلت ثاني مره للاستقبال ولقيتهم مازالو هناك. ودقو على خويهم بالكويت اللي حجز وقالو له تفاهم معهم ولاحظت ان اللي كلمهم من الكويت كان بالانقلش افضل من الباقي وبالنهاية طلع رقم الحجز في غلط وانحلت الاززمة.

والتامين عطيتهم 200رينقت.. وكما تعلمون في بينانيغ نظام جديد وهو الضريبة على الفنادق..

المهم استلمت غرفتي وكنت مسبقا طلبت بالادوار العلوية وقالو تم. والان نبهوني قالو مافي الا شقة بالادوار العليا وسريرين منفصله. بالدور 12 او 14 والثانية بالدور 5.
شفناهم وطلعو فرق واضح. ونزلت الاستقبال وقلت للموظفة سوي بيننا قرعة انا واخوي
وحطت كل مفتاح بيد واختار اخوي اول ثم اخترت وسار من حظي اللي فوق.

طبعا انا بموت ضحك لانه هذي الثانيه بعد الاندمان (والافضل يجي من نصيبي) وهو يقول وش هالحظ الخايس ومنقهر.
طلعنا الغرف. واليكم الصور... وهذي هي المصاعد ويوجد بالخلف اثنين اضافية.

ملاحظة وقت الذروة وفي المواسم تكون هالمصاعد من سلبيات الفندق لانها قليلة وبطيئة
لكن ماواجهت هالشي.
واتذكر موقف مضحك حصل عندما اتجهنا نشاهد غرفة اخوي بالدور الرابع فنحن صعدنا مع الدرج. لان الفندق كان مسوي تجربة واختبار لحادث حريق ويبون يشوفون المخارج ووسائل السلامه. المصعد طبعا وقت الحريق يوقف. فطلعنا مع الدرج. وجرس انذار الحريق شغال
ونبهيني الموظف انها تجربة فقط.
وفجاءة. اربع بنات حافيات ومرعوبات والحمدلله متغطيات. ونازلات طبلون من فوق لتحت جري تقول سباق هجن. يحسبونه حريق حقيقي والهجه.
قابلنا وجه لوجه وشافونا نسولف ونضحك وبغو يصدمونا قلت لهم سلامات؟؟!!
ترى مافي حريق ماغير تجربة. وبس قلته ومكانهم جلسوا. وقام الموظف يهديهم وقال احنا اعلنا والموضوع كله بروفه. انا فيني ضحك ومستحي وهم يحزنون قمت
وخرت عنهم وفكيت امها كاي. . خصوصا معهم وحده دبية تقول روعتونا الله يروعكم.
الله يقلعكم يالملاعين .. الله لايوفقكم.. وتلعن الموظف وهو مبتسم. وانا مسوي نفسي مااسمع
ولايلامون والله . وتركناهم ومشينا. واليكم لقطة دورنا اتوقع الرابع عشر.

وهاي صورة مكان المساج

بعد هالموقف رجعت اخذت الشنط والكازامية وطلعت غرفتي.
وحطيت شنطتي. بالغرفة وانا مازلت افكر في اخوي.ماودي يتضايق.

ورجعت الرسبشن وقلت لهم مايسر كذا. غرفتين بالدور العلوي وسرير كبير مزدوج.هذا حجزي ولاارضى بغيره.
والا راح اسوي لكم حفلة. وثم ناديت حق الشنط اللي كان معي من أول ولاحظت انه كبير بالسن ويحترمونه ولابس اخضر وكانه مسوول.
ويدخل عندهم بالمكتب ومتكي جوه معهم وقلت تكفى واعطيته 20رينقت. وقبل اعطيته 10. قال ابشر الان روحو خذوا لكم لفة وتغدوا وماترجعون الا وكلش جاهز لان الان وقت خروج وبنلاقي لكم اللي تبون. قلت ابيض وجه ودقيت على اخوي وغادرنا الفندق نتمشى ونتغدى والجو المغيم خوققققاق.

هنا اتوقف والقاكم في تفاصيل اكثر غدا باذن الله.

Toota2 · 24-02-2015, 02:56 AM

ألف الحمدلله على سلامه الوالده أجر وعافيه ان شاء الله ..

تقرير رائع بكل تفاصيله ماشاء الله تابعته في المنتدى القديم والآن متابعين معاك وفندقك ريومز في سيلانجور كان منقذ لنا الحمدلله حجزت اول ليله فيه وانا في المطار وانا مغمضه لأني قد قرأت تجربتك فيه من قبل جزاك الله ألف خير ..
متابعين معاك للآخر ان شاء الله ..

himzmz · 24-02-2015, 09:44 PM

انا اتفق معك
بينانج ما تعجبني وما في شي عجبني فيها اﻻ الهضبة
ومن ضمن اﻻسباب كثرة الصينين والبحر اللي ما يصلح للسباحة

kazami · 25-02-2015, 02:02 PM

قررنا التوجه الى بيتزا هت وتناول وجبة الغداء والوقت تقريبا بعد العصر.. يعني غداء عشاء

بعد كذا رجعنا للفندق.. وكنت أحس بالسخونة فقررت انزل المسبح الجميل رغم ممانعة الكازامية
لوجود الاصابة ..ولكن المسبح إغراء لايقاوم.

ولاطولت وطلعت وتكيت بالمطل الجميل عند الكافي.

وشويات وجاني اخوي يضحك ومبتسم ومعه الشايب مسوول الشنط. وقالي ابشرك اعطوني غرفة جنب غرفتك وبيننا باب مشترك. قلت الحمدلله.
وعندها لاحظ العامل الاصابة والدم من اصبع قدمي وقال اصبر لحظة. وراح جاب شنطة اسعافات وانثنى يسوي لي العلاج والتنظيف. وهنا بدت معركة
انا اقول والله تسوي شي واستحيت من شيبته وهو جالس عند قدمي. وهو مصر الايكمل
بالنهاية رضخ لي وترك الاسعافات وخلى الكازامية تقوم باكمال المهمة.
واصر علي الا اراجع مستشفى في اقرب فرصة وقال كيف تسبح اصلا؟
ودلني جزاه الله كل خير واياكم على مستوصف قريب من فلامنقو.

طلعنا الغرفة لنشاهدها بالتفصيل.. واليكم الصور ..

ازرار الاضاءة والاصوات والمكيف كلها هنا

وهنا تكون اجمل السواليف

الخزنة

الدولاب ومخدات اضافية.

دورة المياه اجلكم الله

دولاب في المدخل لوضع الشنط والاحذية اكرمكم الله..

وهذي الشرفة

وشوفوا المسبح من هنا

ولقطة على الشاطي من البلكونة

وهذي كما عودتكم خريطة الدور اللي تقع فيه غرفتي

وهذي لقطات من الممر امام الشقة

واسترحنا لكن ماكو راحه فالموضوع زاد سوء والالم سار اقوى. وعزمت اتوجه للمستوصف القريب.
اخذت المظلة وكنت البروق والرعود تلمح الى اقتراب المطر. والتكاسي اختفت بالمساء. وحسب كلام الشايب ان المكان قريب فقلت امشي له. وبسم الله نص كيلو مافي شي
كيلو مافي شي والمشي يتعبني ولاتكسي يوقف. لكن الجو جميل يخليك تستمر.
ثم واصلت وخفت فالدنيا هدوء وسارت المسافة اثنين كيلو ولالقيت شي. ولمحت هالشقق وكانت رهيبه

ويوم مشينا 3كيلو تقريبا جاء الفرج والحمدلله وصلت للمكان المطلوب.

وكان المكان عبارة عن عيادة للاسعافات الاولية او مانسمية (مستوصف) واغلب العاملين فيه
شكلهم من الهندوس.
لقيت قدامي 4شيبان وعجوز صافين سرا.. تقدمت للمكتب وقلت عندي جرح ويبي له تنظيف وتعقيم قالو هات معلوماتك وفندقك ورقم غرفتك واسمك وجنسيتك ورقم جوالك
قال مابي الا البصمة ماودكم؟

وقلت كيف طريقة الدفع؟ والحساب هنا؟ كاش فيزا؟ثم هي بالجلسة؟ او مجاني مع انه مستحيل. فقال فررري ..قلت انزين وماني مصدق وجلست.

ربع ساعة وهم ينادون ودخلت وشافني الدكتور وهاتك حويس وتعقيم وبالاخير دقني بابرة مضاد في الكتف . بل من كبرها ماسارت ابره سرة موية نوفا ابونص.
ثم قال بنسوي عملية بسيطة ونسحب الظفر من مكانه قال اييش اييييش.؟؟؟
لا والف لا سوي تعقيم ونظفة ولفه وخله. قال طيب.
وشوي وجابو لي حبوب وقالو سدد الفاتورة .. قلت اي فاتورة ورحت الاستقبال وطلبو 205رينقت. وحسب مافهمت ان الكشفية بلاش ولكن بقية الاشياء والعلاجات بفلوس.
والحمدلله على كل حال. فقد تورم كتفي باليوم الثاني واستمر ثلاث ايام من الابرة. ومن جرف في دحديرة. ولكن لن ادع شي يخرب علي رحلتي وسويت ان كل الامور تمام وهذا هو الافضل.

واقرب تكسي وهوبا على الفندق

واليكم لقطات ليلية.. هذا المسبح

وهذا الباتوفرينجي

وحديقة الفندق

تصبحون على خير.. انتهى هذا اليوم الانتقالي فمن لنكاوي الى بينانغ . ومن الاندمان الى فلامنقو. واجرو ان اكون اسعدتكم.

فيصل · 26-02-2015, 02:20 AM

أحترم رأيك ورأي الكل
ليس ما يعجبني يعجبك
لكن صدقني اللي ما أعجبك ما أعجبني هالمره
يا شيخ ما فيه ديره سافرت لها وتضايقت منها مثل بيانيغ وان شاء الله انها أخر ديره أتضايق فيها

A.Alsubhi · 26-02-2015, 09:51 PM

اخوي الكازمي الحبيب بيض الله وجهك جزء ولا اروع عجبني فندق الفلامنقو مع انه الاغلب يذم فيه وتقيماته سيئة نوعاً ما .. كيف رايت مستوى النظافة وحجم الغرفة... تقريباً افضل فندق في بينانج من ناحية الاطلالة ع البحر لقربه من البحر .... صراحة كل جزيرة لها جوها الخاص لنكاوي حلوة وتعجبني جداً يكفيك الهدوء جميل وشعبها طيب 90 % ماليزيين اصليين وسكانها قليل حدود 50 الف .. اما بينانج ايضاً تعجبني جداً ولو اعرف انه بينانج لايوجد فيها غير فندق القولدن ساندس لاذهبت اليها واستمتعت يكفيك المشي في شارع الباتو فرينجي والغيوم فوقك ومطر هتان ياسلام سلم ايضاً المسجد العائم يعجبني فيه راحة نفسية عجيبة لمن تصلي كذا فرض فيه وبينانج جزيرة ومدينة في نفس الوقت عدد سكانها كبير جداً مليون ساكن في الجزيرة ... اللي شفته من الصينيين في بينانج كل خير .. وتعاملهم رائع .. بعض من اصحاب التاكسي الصينيين هما الوسخين شويتين ومعاهم الهنود شوية

ياسمين و جوري · 27-02-2015, 09:50 AM

تسلم أخوي الكازمي عجبني الفندق الفلامنقو لو دريت أنه بهذا المستوى كان حجزت فيه مع أني من عشاق الهوليدي أن والباتو فرنجي
بيانج رائعه بس ماهي مثل جزيره الرومانسيه والهدوء لنكاوي
أذواق الناس تختلف زوجي من عشاق بيانج وماعجبته لنكاوي

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فنادق كاميرون	شهد	ماليزيا	9	05-06-2015 05:21 PM
فندق ليك هاوس .. في كاميرون هايلاند بعدسة ابو ساره11*	أبوعبدالله (الاسفار )	ماليزيا	4	19-03-2015 08:12 AM
فندق century pines resort في كاميرون هايلاند بعدسة أحمد ياهوو	أبوعبدالله (الاسفار )	ماليزيا	4	19-03-2015 03:26 AM
القيادة في ماليزيا وخصوصا لنكاوي	Ahmedzahran	ماليزيا	11	10-01-2015 03:07 PM