تعديل
بعد انتهاء السفرة وحسبة التكاليف صارت تكلفة السفرة لشخصين 13 الف والتفاصيل صفحة 6

تفاصيل السيارة ايجارها وتامينها صفحة 2




...........

السلام عليكم ورحمة الله و بركاته

أنا الآن متواجده ببراغ إنطلاقا لرحلتي لهذه الدول الثلاث لمدة 14 ليلة بإذن الله

لما بدأت أخطط للرحلة و أسوي الحجوزات واجهت صعوبة لندرة التقارير التي تشمل هذي الدول الثلاث وأنا من الناس اللي ما أحب اخاطر و أستكشف ابي مكان سبق ل (عرب) غيري أن زاروه و نقلو تجربتهم له

فالان حبيت اني أنا احط لكم تقرير يشمل الدول هذي لعل شخص يجد فيه الفائدة

بدأت أول شي بحجز الطيران وكان على الخطوط البريطانية بقيمة4524 ريال لشخصين الخطوط جدا جميلة وتعامل طاقمهم وبشاشتهم مع العرب ولطافتهم تفتح النفس و لكن لا أنصح بها لدول اوروبا لان المسار مختلف بتقطع 7 ساعات للندن ثم تنزل ساعتين لمدن اوروبا هذي تسع ساعات غير الانتظار عكس لو بتوقف بشي بنفس المسار بيقلل الوقت ولو تحصل شي مباشر يكون افضل بس براغ ما لها رحلات مباشرة

بعد كذا حجزت موعد للتأشيرة التشيكية من المركز الموحد بقيمة 203 ريال لشخصين
وتأمين طبي من التعاونية ب 107 ريال لشخصين
والتاشيرات 600 ريال لشخصين واستلمتهم خلال اسبوع

وحجزنا سيارة من شركة رينتل بلس التشيكية ويبدأ الايجار بعدثلاث ايام لاننا ما راح نحتاج سيارة ببراغ و بأضيف سعر السيارة و التأمين و الوديعة لما نستلمها ان شاء الله

والحين نجي للمسار اللي بمشي عليه بإذن الله وراح يكون : براغ ثلاث ليالي_ فيسلا ليلتين_ ليبتوفيسكي ميكولاتش ليلتين_ زاكوباني ثلاث ليالي_ كراكوف ليلتين_ براغ ليلة ثم العودة للوطن

حجزنا الفنادق بالاسعار التالية:
براغ فندق اي ايه كريستال بالاس ثلاث ليالي 863
فيسلا wisla ليلتين بشقة domek u bartusia ب 539 ريال شامل الضرايب و انا تاخرت ما حجزته الا امس و بروح له بعد كم يوم واشوف واحد بتويتر الان موجود فيها حاجزها بميتين ريال لليلة فوقت الحجز يفرق بالسعر
ليبتو فيسكي شقق apartmany savary ليلتين 276 ريال
زاكوباني ثلاث ليالي بشقة تاترازانسكا اوستويا 780 ريال وياخذون تامين 402 ريال يرجعونه اذا جيت تطلع بعد ما يتاكدون من سلامة الشقة
كراكوف ليلتين فندق قولدن توليب ميتروبولو 362 ريال
براغ ليله بفندق ...... 215 ريال
كلهم شامل الضرايب والمجموع للسكن 3027 علما ان فيه مساكن جميلة ارخص وتقدر توفر اكثر

ونبدأ تقرير الرحلة بسم الله

وصلنا اليوم الصباح الساعه عشرة ونص لمطار براغ
وكان تفتيش جوازاتهم جدا سهل فرق عن ميونخ بس شاف التاشيرة وطابق الصورة و ختم ومشينا بدون سالفة ورينا حجوزات و تذاكر ومدري ايش

أخذنا من المطار شريحة من شركة t mobile او البعض يسميها twist ب 16 يورو فيها اربعة قيقا بايت اوروبية لكل دول الشينقن

ثم توجهنا لكاشير التكاسي واخذنا تاكسي للسكن ب 35 يورو وكان يعتبر غالي بس كنا تعبانين من طوول الترانزيت ولا لنا نفس نسال و ندور غيره

ثم توجهنا للسكن وكان سكننا بهالفندق قريب للساحة مشي مسافه عشر دقايق وفيه تكييف ولازم تتاكد اذا جيت تحجز باي فندق ببراغ انه يكون فيه تكييف لانه حرر بالصيف


نمنا الى العصر ثم طلعنا تغدينا بماكدونالد ب 38 ريال وجبتين و سوبرماركت 100 ريال وتمشينا بالسنتر و حوالين الساعة الفلكية و سوق هافل الشعبي ثم رجعنا للفندق نتقهوى (معنا قهوة عربية ) وانتهى بهذا يومنا الأول


وبإذن الله خلال الأيام القادمة برفع صور للرحلة و بكمل باقي التقرير وبكتب التكلفة النهائية للرحلة

بدايه حلوه اسماء

براغ جميله جدا والمشي في الساحه القديمه وجسر تشارلز بتماثيله الرائعه على نهر الفلتافا ممتع جدا خاصة بالبراد والاجواء الحلوه ، واكيد جربتو الجمني اللي ينباع بكل زاويه تقريبا

اثرتي ذكريات جميله جدا لي في براغ ، بس انا زرتها اخر فبراير

شلون الجو هالايام حر؟؟

اختي بتسافر بولندا الاسبوع الياي انا ما شفتها ، بس سلوفاكيا رحنا لها يوم واحد وكان كافي عليها الصراحه

بانتظار باقي التقرير لا تأخرين

ما شاءالله بداية وايد حلوه اسماء

وفعلا هالدول عنها التقارير صعبه تحصلينها

بس برافو مخططج اشوفه حلو ومع انج ما تحبين تستكشفين

التكاليف و أسعار الفنادق وايد حلوه مو غالية

أكيد بنستفيد من التقرير لان قلة التقارير عن هالدول

كملي ومتابعين معاج ان شاءالله

اليوم الثاني في براغ

حجزنا معاه فطور بس حنا فضلنا اننا ننام الصباح ونصحى الظهر نصلح لنا قهوة مع فطور خفيف كنا جايبينه معنا من السوبرماركت امس ونطلع بعد ما نصلي الظهر والعصر جمع...

توجهنا بداية الى مول هارفا اللي يعتبر اكبر مول في براغ





رحنا بتطبيق هنا عندهم اسمه bolt احيانا يكون ارخص من اوبر واوقات اغلى حسب وقت الطلب وأخذ مننا ٤٥ ريال تقريبا

المول جدا عادي فيه محلات معروفة مثل اتش اند ام و نيو يوركر وغيره والمطاعم الموجودة كنتاكي و ماك و برجر كنج و مطعم فلافل و مطعم هندي وكم مطعم من مطاعمهم
فيه كثير محلات ما بعد فتحت

بعد كذا طلعنا للمترو قدام احد بوابات المول وشرينا تذكرتين بقيمة ٨ ريال و توجهنا الى مطعم دونر تركي قريت له مدح بتويتر و كله بمساعدة قوقل ماب طبعا للتعرف على محطات المترو




كان طلبنا واحد دونر لحم وواحد شيش طاووق وواحد شوربة فطر وواحد كولا وواحد سبرايت والحساب 68 ريال تقريبا
الاذواق تختلف بس بالنسبة لي كان لذيذ وهذا لوكيشن المطعم و هو قريب للساعة الفلكية والسنتر
https://maps.app.goo.gl/9kutgvtemnvaYNg76

ثم طلعنا من المطعم مشي للساعة الفلكية



ومنها للجسر المؤدي الى قلعة براغ


ويوجد تحت هذا الجسر قوارب و بالقرب منه جسر الامير تشارلز الشهير

وكملنا لحد ما وصلنا للبرج و توبه اطلع له مشي كان متتعب لانه طلعه لفوق


القلعة جمييلة و الدخول للساحة والمطل مجانا وهذي صورة من المطل


وبعدها طلعنا من القلعة ومشينا مسافة ربع ساعه لحد اقرب محطة ترام و ركبنا الى اقرب محطة للفندق و مرينا بقالة جنبنا اخذنا شيبسات و شوكلاته للقهوة و تسلية لباقي اليوم ورجعنا للفندق ليكون نهاية يومنا



عندي سؤال لأهل الخبرة

في المترو وفي الترام محد طلبنا البطاقة والناس تدخل ما تدفع احد يعرف كيف كذا؟؟ المترو شرينا التذكرة و رميناها و الترام ما دفعنا شي؟

حلو اليوم الثاني خفيف وعلى الراحه

اسماء دربالكم تقطون التذكره او ما تشترونها
في ألمانيا كنت نفسكم ما اشوف اي جهاز او شخص يشوف التذكره طلع عندهم فجأة يشيكون يركبون اللي يتأكدون من التذاكر ويشيكون عليهم

انا صادفوني وكانت تذكرتي معاي بس شكلها طاحت مني غرموني 60 يورو على تذكره ما تسوى يورو

خلو بالكم لا تستهينون لازم معاج التذكره


Sent from my iPhone using Tapatalk

تقرير من بدايته رائع
ان شاء الله لي عودة