نبدأ في بورصة ؟

شفيها بورصة ؟
التلفريك
والشجرة المعمرة ؟
وبعدين؟

سمعت وايد مثل هالكلام واكيد كلكم سمعتوه
جلست فيها 4 ليال وماشبعت منها
ومارحت التلفريك!
ولا رحت الشجرة المعمرة!
ولا القرية العثمانية !

مب لأنهم اماكن ماتستاهل
انما لضيق الوقت ورغبة في التغيير

تخيلوا اني اقولكم 4 ايام في بورصة وضيق الوقت
الفضل لله ثم لاخواننا الكويتيين عشقي بورصة ومساعد العتيقي وغيرهم
الي متملكين في بورصة ومايقصرون في مساعدة الناس وارشادهم على أحلى الأماكن
انا حاط في بالي جذي خذ معلومات بورصة من الكويتيين

وخذ معلومات طرابزون والشمال التركي من السعوديين هههه
ماجلان تركيا والاخوان النشطين في تويتر وكذلك في المنتدى اخوي نواف وماجد الفهد وكل الاعضاء ما يقصرون
وطبعا خالي ماجد القطري الي شجعني اني ازور تركيا أول مرة.


وانا أعتقد ان الناس الي ماتعجبهم بورصة لسببين
1- اما يروحون مع سواق اسطنبولي مايعرف في بورصة الا مكانين او 3 ويبي يسوق حق كم محل ياخذ من وراهم فايدة
2- مايقرى ويحضّر عن المدينة قبل مايزورها.

بس قبل ما نبدأ في بورصة باقولكم وين سكنت اول يوم ..


الليلة الأولى سكنت في يلوا في اكواخ

وكثير الي يسألون عن اكواخ في بورصة او قريب منها
هذي وحدة منهم وباعرض غيرهم في التقرير

واعذروني على قلة الصور
تعرفون الحال اذا معاكم العيال في هالعمر الواحد زين منه يقدر يشوف بغض النظر عن التصوير هههه


منتجع بغداد
https://goo.gl/maps/21j8ddus4WCbWmQT6

الطريق له سهل من بعد جسر عثمان غازي تكمل باتجاه بورصة
بعد ماتتجاوز يلوا بمسافة قصيرة تدخل في قرية ومنها الى طريق جبلي
ممهد ومافيه صعوبة كبيرة ثم تلقى المنتجع على يمينك














هذا المدخل بعد مواقف السيارات




هذا النهر الصغير في المنتجع نفسه وفيه اسماك
كنا ناخذ لهم الي يزيد من خبز الفطور ( اكمك ) اسم الخبز بالتركي









حليو و المكان صغير توقعته اكبر اعطيه 7 من 10

عبارة عن بضع اكواخ مطلين على حديقة جميلة ومسبح
وفيه مطعم مطل على جدول ماء وتحيطه الجبال ، المنظر جميل والطريق مب بعيد من يلوا
عندهم اكواخ كبيرة وصغيرة , الكبيرة نظام طابقين تكفي من 4 الى 6 وفيها بلكونه

والصغيرة تكفي 2 الى 3 ، كانت اجازة العيد خذت الكوخ الكبير ب1500 ليرة , غالي ما يسوى لو 600 ممكن يكون السعر جيد






هذي الأكواخ الصغيرة



هذا مطعم المنتجع


الأكل لذيذ والخدمة ممتازة





لكن اعتقد السعر بسبب الاجازة ، في الايام العادية ممكن يكون ارخص ، المكان هادي حق استجمام
و انا بغيت اليوم الأول نعيش اجواء ريفية قبل مانروح بورصة واسترحنا فيه
مثل ماقلت لكم فيه مسبح وفيه حيوانات المزرعة و خيول وغيرهم.






الحين نبدأ في بورصة ؟ يلا

الليلة الاولى كانت جميلة هادية وبعد الفطور انتقلنا لبورصة



سكنت 3 ليال في شقق جيدة جداً اقيمها 8 من 10



ليلتها ب200$ من شركة شفتها في النت اسمها شركة الزيادي ، مادري هل مسموح احط الرقم ولالا
الظاهر انها شركة بيع عقارات لكنها تأجر هذي الشقق كنوع من التسويق والشقة مب موجودة في بوكنق

على العموم حولت لهم جزء من المبلغ كضمان للحجز وكان استقبالهم جيد
واطلالة الشقة حلوة وملاصقة لماركا مول اشهر مولات بورصة

3 غرف وحمامين وميزاتها كثيرة منها انها ملاصقة لمول واطلالتها حلوة ووسيعة وفيها مطبخ بأدواته
وبسبب وجود مطبخ - بالرغم من اننا استفدنا منه - صرنا نكسل نروح مطعم للفطور والي يفوته الفطور في تركيا فقد فاته شي كثير

عيب الشقة ان غرفة وحدة والصالة مكيفة بمكيف سبليت
اما الغرفتين بمكيف صغير الي تعبيه ماي فكان يبرد احيانا ويسخن احيانا مما جعل النوم غير مريح .

للأسف ماعندي صور اكثر للشقة =(

في الجزء القادم اكتب لكم أبرز الأماكن الي زرتها في بورصة