السلام عليكم ورحمة الله وبركاته

في البداية احب اشكر كل شخص كتب لنا تجربته في الحصول ع الشنغن خصوصا الاخوة المقيمين نظرا لصعوبتها عليهم وأخص بالذكر السوريين واليمنيين، استفدت من تجاربكم كثير وألف شكر لكم مرة ثانية

بدون مقدمات انا يمني مواليد السعودية(ابن مواطنة) وماسافرت أوروبا أو أمريكا قبل كذه كل سفراتي كانت في إندونيسيا وماليزيا وتايلاند قلت ابغى أقدم ع الأمريكية لكن لأن نسبة الرفض في أمريكا بالذات كبيرة بسبب قرار ترامب المشهور في 2017 نصحني البعض اقوّي جوازي بتأشيرة محترمة مثل شنغن حتى تزيد فرص قبولي وهذا اللي حصل

تم التقديم بنفس الأوراق المعروفة:-
النموذج
خطاب تعريف بالراتب من الشركة(الراتب 15 الف)
خطاب ضمان من مؤسسة الوالدة
صورة هويتي مترجمة
صورة هوية الوالدة مترجمة
صورة السجل التجاري للوالدة مترجم
كشف حساب الرصيد فيه 200 الف ريال
تاشيرة الخروج والعودة
التأمين الطبي(ب90 ريال عن طريق مكتب)
حجز الطيران(مؤكد ومدفوع بالكامل)
حجز الفندق(مؤكد بس غير مدفوع)
صور شخصية غير معدلة بمقاس شنغن

تم التقديم بتاريخ 16 يوليو 2019 وتم استلام الجواز بتاريخ اليوم 20 أغسطس،، طبعا سبب التأخير هذا (34 يوم) هو خطأ من مركز الاعتماد،، اللي صار ان القنصلية الإيطالية بلغت مركز الاعتماد انهم يبغوني احضر مقابلة في القنصلية يوم 21 يوليو ومركز الإعتماد اتصل ع رقم خطأ وسجلوا عندهم انه تم إبلاغ الشخص بالحضور وتقفل الموضوع،، وانا طوال هذي الفترة اتواصل معاهم عن طريق الرقم الموحد وبرضه اشيك في الموقع ودايما القى نفس الشيء ونفس الجواب( الجواز في السفارة )،، انتظرت الين يوم الأحد اللي راح 18 أغسطس وقررت أزور المركز بنفسي وافهم سبب التأخير وبلغوني بالقصة،، طبعا اتلاعنت معاهم وقلت لهم كان المفروض تحدثوا حالة طلبي في الموقع أو أن مركز الدعم الفني يكون عنده خبر ويبلغوني بطلب حضور المقابلة.. الخ المهم اعتذروا وقالوا آسفين قلت لهم بعد ايش الآن باقي ع سفري يومين ومضطر الغي حجز الطيران وراح اخسر جزء من المبلغ بسببكم وفعلا خسرت 400 ريال من قيمة التذكرة بسبب التخلف التقني اللي هم عايشين فيه

ع كل حال حضرت المقابلة في القنصلية الإيطالية أمس 19 أغسطس ولقيت قبلي مقيم فلسطيني معاه 2 َمن موظفي القنصلية الإيطاليين وكبسوه المسكين كبس بالأسئلة لقطت بعضها مثل

قد ايش لك تشتغل؟
فين بتروح في ايطاليا؟
هل انت متزوج؟
ايش جنسية زوجتك؟
كم طفل عندك؟
مين أصحاب الشركة اللي تشتغل فيها <=== سؤال غريب
لغتك الإنجليزية ضعيفة كيف بتمشي امورك هناك؟

المهم في الأخير طلبوا منه يجيب عقد العمل حقه ويرجع لهم،، انا توترت وقلت في نفسي شكلها خربانة والله يستر، لكن تفاجأت انه طلب مني فقط احضر شهادة الميلاد واضطريت اروح البيت بسرعة اجيبها وارجع،لمن رجعت لقيت الإيطاليين مو موجودين ومكانهم موظف عربي اخذ الشهادة وصورها وشرحت له المشكلة اللي صارت من مركز الاعتماد وقال لي بكرة تلقى الجواز في المركز

وفعلا هذا اللي صار اليوم 20 أغسطس رحت مركز الاعتماد واستلمت الجواز ولقيت الفيزا مدتها 30 يوم ودخول واحد،، قلت الحمدلله انها جات وانا زي ماذكرت نيتي اقدم ع الأمريكية وماني مسافر ايطاليا،، ولولا اللخبطة اللي صارت من مركز الاعتماد كان المفترض ينتهي جوازي في 10 ايام لكن الحمدلله على كل حال

هذي هي تجربتي وأنا حاضر لأي استفسار وأوجه رسالة للجميع خصوصا المقيمين المتخوفين من الرفض بسبب ضعف الأوراق مثل الراتب أو كشف الحساب أو المقابلة في السفارة أو القنصلية... الخ احب اقول له لاتيأس الموضوع بسيط فيه طرق كثير لتفادي مشاكل مثل هذي تواصل معي وان شاء الله مايكون خاطرك الا طيب


تحياتي للجميع

تجربة جميلة كثير راح يستفيد منها
نشكرك على طرحها


المهم الواحد يجتهد و يجهز أوراقه بشكل سليم
لأن كثير يتساهل في تقديم بعض المستندات وهي مهمة

موفق وتستاهل كل خير ورحلة سعيدة بإذن الله