السلام عليكم ورحمة الله وبركاته

صباح الخير على الجميع.

الحمدلله وصلنا امس مطار ميلان مالبيسنا، الكاونترات زحمممة وبتلنا ساعة واقفين سرى الاوروبي والبريطاني والاسترالي والاسرائيلي والياباني يمكن 14+ لهم مسار سريع باقي الجوازات امسك سرى حتى لو معك اطفال.

الختم تم بدون اي سؤال وهذي ميزة عن مطارات المانيا لكن الكارثة هي شركات تأجير السيارات. حصل موقف من اسوأ ما مريت فيه مع شركات تأجير السيارات.

بعد وقفة الجوازات وتحميل الشنط تركت زوجتي وبنتي الصغيرة يرتاحون ورحت بستلم السيارة، سرى طويل اخذت فيه ساعة عند Sixt كان فيه عربي شفته يتهاوش مع موظفة اسمها سارة ومن حسن حظي وصل دوري وكان عند سارة ههههه اول ما قلت مرحبا طالعت بزميلها وتكلمت معه بالايطالي واللي فهمته انها ابتلشت بعربي ثاني، قالها زميلها اتركيه عندي ههههههه انا عرفت اني باكلها مفلفلة قالت لي سارة سيئة الذكر انا اسفة مقدر اخدمك توجه لزميلي هناك اذا انتهى من العميل هذا بيخدمك عطيتها نظرة حادة وقلت ليش انتظر!! ووين انتظر!؟ رفضت ايضا واعتذرت عن خدمتي وقالي الموظف الثاني انتظرني اخلص من عميلي وبخدمك، انا هنا عرفت ان الشخص هذا بيجيب اجلي ههههههه كلهم يحولوني عليه، انتظرت واول ما شفت واحد ثالث فاضي توجهت له وتركت هذاك اللي ينتظرني وانا تعمدت اختار الشخص الثالث لان شفت تعامله حلو مع الصينيين قلت خيرة افتكيت من سارة سيئة الذكر العنصرية والمشكلة انها سمراء وبرضو عنصرية شي غريب تشوفه باوروبا. ما لكم بالطويلة، توجهت للثالث واول ما طلعت له بطاقة السفر رفعها لي وهو زعلان قال هذي ليست كريدت كارد هذي مسبقة دفع! تعرف هالشي جاوبته صحيح اعرف وسبق استأجرت ب2016 من المانيا بمسبقة دفع قال مستحيل ورفضها قلت حصل خير وطلعت له كريدت كارد كنت اخذها احتياط الحمدلله. قالي حجزك غير متوفر وبسوي ابقريد بضعف السعر، قبل هذا كله خويي اللي كانوا يحولوني عليه جا عند الموظف اللي استقبلني ويتكلم بالايطالي وهو زعلان على زميله واللي فهمته انه يقوله هذا صيدتي ليش تستقبله انت هههههههه بعدين عطاني جوازي وارواقي قال ارجع زميلي هو قايلك تنتظره ليش جيتني يوم جيت برجع لهذاك رفض قال خلاص ما اقدر اخدمك ارجع للموظف اللي استقبلك يكمل حجزك، هنا باعلى صوتي قلت فيه مشكلة بينكم او انكم تخدمون العميل بناء على شكله تجمعوا كلهم وسوالف بالايطالي اخر شي رجعت للموظف اللي استقبلني يكمل حجزي، قالي سيارتك غير متوفرة لازم ابقريد والسعر بيتضاعف، رفضت قلت الكريديت كارد وعطيتك وش تبي اكثر قال هذا اللي عندي تبي ولا كنسل حجزك قلت ما اكنسل ولا وش فايدة الحجز المسبق، قال انت متأخر رديت عليه التأخير بسبب السرى حقكم. شاف ما هنا فايدة قال بخفض السعر ونزل منه مبلغ وقدره وجابني للجهاز قال شف هذا اخر شي اقدر اعطيك ولقيته مسوي اضافة لتأمين الزجاج وطلبت حذفه وانخفض السعر 50 يورو فقط، انا طوال هالوقت كنت افكر اتركهم واشوف شركة ثانية بعدين شفت السرى عند الشركات الثانية يبيله اقل شي ساعتين زيادة ويمكن يكون السعر اعلى، التعب وتعب زوجتي وبنتي يوم كامل بدون نوم اجبرني اقبل ولا لو اننا شباب وقفنا لهم وقفة لو اسبوع. وسحب 1200 يورو + 500 الوديعة. توجهت للاستلام وعطوني المفتاح بدون ما احد يسلمني وطلعت خيرة لأن السيارة اللي حجزت طلعت صغيرة وهذي اكبر منها ومع ذلك يادوب شالت الشنط، اخذت صور للحكات وفيديو لداخل السيارة ومشيت.
وطلب الرخصة الدولية حاولت امشيها بدون رخصة دولية رفض وقاعد يدور اي شي عشان يلغون حجزي امرهم محير مره الاكيد تجربة لن تتكرر.

والله ما اظن مر علي تعامل بهذا السوء انا مدري هم يشوفونا بشر ولا ايش هههههههه.

الخلاصة، فرع Sixt مالبينسا لا تقبل بطاقة مسبقة الدفع + التعامل سيئ وغالبا لن تجد حجزك وبيرتفع السعر فأحسب حسابك حتى لو كنت بتصمل على الرفض الفرع سيئ جدا توقع منهم اي شي حتى اني اشوف الايطاليين يطلعون منه زعلانيين وما ادري كل هذا بسبب الزحمة او ادارة الفرع فيها مشكلة. بعد هذا كله وانا رايح استلم السيارة جاني واحد عربي سلم علي وجواله على اذنه قال فيه مشكلة مع ايجار السيارة؟ يحسب اني بقول ايوه افزعلي لانه يعرف الفرع هذا سيئ ولازم فيه مشكلة، قلت ياحبيبي اشكرك ما عندي اي مشكلة فأنتبهوا من هالاشكال بعد.

الموضوع للتحذير وكل واحد يجهز نفسه للتعامل واي مبلغ اضافي ولا تعتمد على حجزك. ورحلة سعيدة ويوم للنسيان.

صدقت
يا زين اوطانهم ويا شين العيشة معهم، ما يشوفونك شي يدعسونك دعس ههههههه

تختلف المواقف و التعامل ما بين الأشخاص
و الحقيقة موقف موظفي سيكست في مطار ميلانو غريب و يستحق أن يثار برفع ملاحظة و تقييم الشركة ... و لو أني تعاملت مع شركة سيكست في ألمانيا و كان التعامل على النقيض تماماً قمة في الرقي و الأسلوب حتى بطاقة السفر من بنك الأستثمار كانت مقبولة لديهم بعد أن تأكدت شخصياً منهم بالسؤال و لكني للأمانة أستلام السيارة كان من مكتبهم في داخل مدينة ميونخ و قمت بأستئجار السيارة قبل السفر من الرياض و دفعت المبلغ مع التأمين الشامل مقدماً و عند وصولي تم ترقية فئة السيارة بدون طلب و بدون دفع أي مبلغ أضافي سوى قيمة تانكي البنزين فل كي يتم اعادة السيارة بالمتبقى دون المطالبة بإعادة التعبئة ..

"الدنيا و السفر تجارب و مواقف " و لكن أستمتع برحلتك ....

مرحبا ابومعتز حياك.

حتى الشخص العربي اللي قبلي وانا ماسك سرى كان فيه مشادة معهم واعتقد عشان الحجز مو انا لوحدي، عموما بالاخير طلعت خيرة والسيارة اللي كنت حاجزها صغيرة جدا على الشنط. وبخصوص Sixt انا لي تجربة مثالية معهم في فرانكفورت فرع المدينة كان تعامل جميل وترقية مجانية وفاضي المكتب وقبل مسبقة الدفع ولا سألني عن الرخصة الدولية ابداً. هذي مشكلة ايجار السيارات معيارها الوحيد مزاجية الموظف وانت وحظك. الموضوع للتنبية على مسبقة الدفع والرخصة الدولية اما الموقف هذا فيتكرر كثير باوروبا ونسيته اليوم الثاني.

السلام عليكم

تحديث بتاريخ اليوم.

تواصلت قبل اسبوعين مع خدمة العملاء بالشركة وكتبت تقرير عن الحادثتين وتعاملوا مع الموضوع باحترافية:

تم محاسبة الموظفة على حسب كلامهم.
مبلغ الابقريد الاضافي اللي اجبرني عليه الموظف اعادوه لي وسحبوا مبلغ حجزي الاون لاين فقط.

للامانة شي يثلج الصدر والحمدلله على التيسير.

شكرا لك اخي سعد على ذكر تجربتك ليستفيد منها الجميع
ولاحظت في الفتره الأخيرة كثرة الشكاوي على شركة سيكست بالذات
وعدم توفر السيارة اللي يختارونها ويجبرونهم على الابجريد ودفع مبلغ اكبر من المتفق عليه

العفو ابواحمد عمدتنا الغالي تعلمنا منك الكثير

اللي شفته بمطار ميلانو لا يتقصر على سيكست صادفت كثيرين عند شركات اخرى وكلها معروفه لكن sixt تبقى افضل السيئين. افضل حل لا تجادل الموظف، اما ان تتصل على رقم خدمة العملاء او استلم السيارة ثم ارفع شكوى، واطلب من الموظف ان لا يكتب choice upgrade بالعقد وخذ اسم الموظف وكمل رحلتك.