السلام عليكم ورحمه الله وبركاته

بكتب لكم تجربتي في التقديم على الفيزا الكندية خصوصا ان ما في مواضيع وايد عنها

اول شي في عندهم نوعين من التقديم
الاول : online
والثاني ورقي

في البداية اخترت اون لاين واجبت على اسئله كثيرة وبعد ما خلصت اكتشفت ان بعدني ما دخلت في التدقيم على نموذج الفيزا وان الاسئله اللي اجبتها عليها فقط اسئله للابقاء على سرية الحساب
يعني السالفة مطلولة
وفي الاون لاين يطلبون صورة جوزات كل العائله ( الام, الاب,الاخوان والاخوات) بينما في التقديم الورقي يكتفون فقط بالمعلومات الاسم وتاريخ الولاده
وغير هذا كل شوي اتصل مركز الاتصال الخاص بالفيزا الكندية مره يفيدوني ومرات ما استفيد من اجوبتهم

اول شي وهالشي جدا مهم ندخل على الصفحة الرئيسية ولازم تستخدم متصفح internet explorer وفي حال استخدامك لمتصفح chrome الابليكيشن ما بيفتح
2.لازم يكون عندك برنامج ادوبي ريدر

https://www.canada.ca/home.html

ونختار اللغة الانجليزية , علما ان اللغة المستخدمة هي الانجليزية والفرنسية فقط



بعدها نختار Immigration and citizenship



بعدها نختار Find an application form على يمين الصفحة



وبعدها ننزل تحت وبنلقى كلمه Visitor visa



مثل ما انتو شايفين السهم الاسود اذا ضغت عليه معناه انك بتقدم Online
واذا ضغط على السهم الأحمر معناه بنقدم عن طريق الاوراق




وانا اخترت الطريقة الثانية التقديم عن طريق الورق, تختار الدولة حسب جوزاك ( الجنسية) وبعدها تغضط على كلمة get documenet



بعدها تختار Application for Temporary Resident Visa



مثل ما ذكرت مسبقا يتوجب استخدام متصفح internet explorer
في حال استخدام متصفح chrome بتطلع لك مثل هذي الصفحة



وهذا شكل النموذج



ويتوجب تعبئته بدقة والصدق في كل اجابة

بعد ما تخلص تعبئة النموذج بتطبعه وبتوقعه
تروح للاستديو وتطلب صورة للفيزا الكندية لان مقاساتها مختلفة عن الامريكية والشنغن

وهذا رابط الاوراق المطلوب اخذها معك للسفارة

https://www.canada.ca/content/dam/ir...s/imm5484e.pdf

الخطوة الثانية وهي دفع رسوم الفيزا

نرجع للصفحة الرئيسية واللي اخترنا منها الابليكيسن على يمين الشاشة

https://www.canada.ca/en/services/im...tizenship.html

ونضغط على Pay your fees



نجاوب على الاسئلة كما هو موضح بالصورة



بعدها ننزل تحت وبنشوف في نوعين للدفع
الاول في حال التقديم اون لاين يتم اختيار خيار الدفع اون لاين
الثاني في حال اختيار التقديم الورقي يتم اختيار الاختيار وكما هو موضح في الصورة



للدفع يتوجب يكون عندك كرديت كارد فيزا, ماستر, امريكان اكسبريس او بطاقة الخصم المباشر

ننزل لتحت الصفحة ونضغط على answer question to get fees



وبعدها نختار على خيار Temporarily visit, work or study in Canada ومن ثم متابعه




بعدها في سؤال انت مع من قادم لكندا وتختار هل انت مسافر لوحدك ام مع العائلة




السؤال اللي بعده : ماذا ستفعل في كندا
والاجابة : زيارة



السؤال اللي بعده : نوع النموذج اللي بتدفع عنه
الاجابة : فيزا سياحية



هل تحتاج للدفع عن البيانات الحيوية مثل البصمة
في حال كانت اول مرة لك لزيارة كندا تحتار نعم
في حال زرتها من قبل وبتجدد فيزتك ولم يمضي على اخذ بصماتك 10 سنوات فانه لا داعي لاخذ بياناتك الحيوية



وبعدها بتطلع لك قيمة الفيزا وقيمة اخذ بياناتك الحيوية
ومن ثم تضغط على login and pay



بعدها اذا كان عندك حساب تدخل بياناتك مثل الايميل والباسورد
واذا ما عندك تضغط على كلمه تسجيل



بعد ما تخلص الدفع تدخل لموقع VSF Canda لتحديد موعد للمقابله

https://www.vfsglobal.ca/canada/uae/index.html



ننزل تحت وتختار المركز اللي بتقدم منه
انا اخترت ابووظبي



وبعدها اذا عندك حساب تدخل الايميل والباسورد وفي حال ما عندك تنشئ لك حساب





وبجذي خلصنا شرح اجراءات التقديم على الفيزا الكندية

وبعطيكم تجربتي
رحت ليوم المقابله وكنت متواجده في مركز التاشيرات الموحد في المركز التجاري في ابوظبي الساعه 7:45 صباحا قبل الموعد بربع ساعه
اخذت الرقم ودخلت
اول مشكله ان الاسم مب مكتوب بالطريقة اللي هم يبونها
كتبت اسم العائله مثل ما هو في الجواز
والاسم الاول وهو اسمي
رفضوا وقالوا لازم الاسم الاول يكون اسمي واسم الاب والجد

حصلت هذا الجواز على النت
اسمه صاحب الجواز هو سامي ابراهيم علي الحداد
اسم العائله : الحداد
الاسم الاول: سامي ابراهيم علي



وبسبب هالشي تقريبا دفعوني 35 درهم لتعديل فقط الاسم

المشكلة الثانية اخترب السيستم عندهم وتميت انطر ساعتين واخر شي قالوا لي السيتيم خربان على معاملتج بس انتي وتعالي راجعينا قبل الساعه 4
فقلت لهم لو رجعت والسيستم ما اشتغل وصارت الهوشة وياهم

وقالوا لي خلاص بس يعتدل السيستم بنتصل فيج
طبعا نطرتهم 3 ساعات ومحد اتصل واخر شي قررت اني ارجع للمركز واشوف شنو السالفة

والحمد لله تصلح الخلل ودخلوا المعاملة

المشكلة الثالثة: قلت لها بقدم على المعاملة وعطيني جوازي قالت لازم نسوي كوبي على كل صفحات الجواز وقيمة الصفحة 0.44 دولار كندي
قلت لها خلي الجواز عندج ما ابيه

يعني في حال المقدم على الطلب يبي ياخذ جوازه يسوي كوبي للجواز كامل ويعطيهم اياه ويقدر ياخذ الجواز الاصلي معاه

دخلت بصمت وصورني
هذا الكلام يوم الاحد

يوم الثلاثاء من نفس الاسبوع وصلني ايميل من السفارة ان بصماتي تم قبولها وان ماله داعي اسوي بيانات حيوية لمدة 10 سنوات

الثلاثاء اللي بعده وصلني مسج ان الجواز جاهز للاستلام
استلمته وعطوني مدة 7 سنوات فيزا وهي نفسها مدة الجواز


اتمنى يكون الموضوع مفيد لكم

شرح وافي وكافي وشكرا على المجهود المبذول وإن شاء الله الجميع يستفيد منه

شرح رائع تسلمين
الفيزا الكندية هي الاطول اجراءات و الاطول نموذج في الاونلاين
مدري ليه كل هذا التعقيد
المفروض يسهلون الشغلة عشان يكسبوا زوار و طلبه اكثر
لكن الهجرة عاملة لهم قلق

فيه اكثر من تجربة فاشلة بالتقديم اونلاين
لذا ننصح الجميع باعتماد التقديم عن طريق vfs

الله يسغدك

شرح جميل ومبسط
السؤال لو ذهبت للمركز الموحد بدون التقديم عن طريق الاون لاين ينفع

هل مسموح للسعوديين استخراج فيزا سياحة بعد المقاطعة الي صارت في عام الماضي ؟

هل تحتاج الي حجز فندق او تذاكر طيران موكدة ؟

الله يعطيك العافية
فيه سوال بخصوص فقرة خطة السفر هل اكتب على صفحة ورد وارفقه مع المستندات؟