بسألك عن البحرين كيف أهل المنامة عادهم يذكروني (2019 )

هاوية الاسفار · 27-10-2019, 08:40 PM

السلام عليكم و رحمة الله و بركاته

طبعا أول ما نسمع طاري البحرين على طول تتردد على مسامعنا أغنية

ما معاكم خبر زين يا رسول السلامه لا تخيب ظنوني

بسألك عن البحرين كيف أهل المنامة عادهم يذكروني

و أنا صارلي شهر تتردد على مسامعي

طبعا فقدت الامل اني أسافر مع زوجي طول الوقت دوام ما عنده اجازات

و أنا في خاطري أسافر و أعيد الذكريات

كنا قاعدين يوم الجمعة ويا خواتي و نسولف فقالت أختي الصغيرة ليش ما نسافر البحرين أول الشهر

يومين ويكند و نرجع أنا أول وحده قلت موافقه و أختي الثانية قالت موافقه

و طبعا لازم يكون ويانا محرم قلت حق ولد أختي قال على حسابكم ما عندي مانع

اتصلت في زوجي و كان الخبر مثل الصاعقة بالنسبه له و قال من متى تسافرين بدوني

قلت الحين بسافر و قعدت أقنعه كم يوم لين قال خلاص سوي اللي تبغينه

طبعا هاي كانت حالتي طول الوقت و يوم جرب أول الشهر اختي كلمت زوجها و رفض قال توج راجعة

من السفر و بتسافرين بعدين مره ثانية

و أنا قلت بسافر الاربعاء أحسن عل الأقل نقدر نتمشى على راحتنا ما يكفينا يومين

أختي الصغيرة قالت ما عندي اجازة و مر أول الشهر و زعلت و تضايقت

و الاسبوع اللي بعده يوم الأحد قالت أختي أنا عندي اجازه هالاسبوع بتسافرون

طبعا كانت مريضة و عندها اجازه مرضيه أسبوع

و أنا عيالي الصغار بيسافرون ويايه ما أقدر أغيبهم عن المدرسة أكثر عن يوم

ولد أختي يدرس في الكلية و عنده الخميس اجازه

تشاورنا و اتفقنا و يوم الثلاثاء في الليل حجزت التذاكر و الفندق قلت بوصل هناك و بحجز

لأنه ربيعتي عندها دوره نفس الوقت و حاجزه في فندق رامادا و قلت بحجز وياها على أساس

نتلاقى و نطلع مع بعض و زواجها بعد اسبوعين و بنشوف سوق الذهب

بعد ما حجزت التذاكر طلعت لأقرب مول عندنا و صرفت مبلغ 3 آلاف درهم

و الباقي في الحساب و الكريديت كارد

رجعت البيت و تجهيز الشنط على السريع

يوم الأربعاء

9 / 10 / 2019

أعضاء الرحلة

محدثتكم
أختي أصغر عني
ولد أختي الكبيرة طالب في الكلية
عيالي 2 الكبير ما سافر يلس في البيت
و الصغار واحد شهر 12 بيكمل 11 سنه
و الصغير شهر 1 بيكمل 5 سنوات

**************************

العيال ساروا المدرسة و أنا رجعت أنام و قمت الساعة 10 و سرت المدرسة أطلعهم

لأنه الرحلة بتكون الساعة 4 و 10 دقايق و أنا قلت بطلع بعد صلاة الظهر و عشان ألحق

أتمشى في السوق الحرة و أكيد المطار بيكون مزدحم

لكن أخروني في المدرسة لين الساعة 12 و أذن الظهر و أنا بعدني ما سكرت الشنط

رجعت و أسرع سريع خلصت كل شي و خذت شاور ما شي أسرع منه

و مروا علينا عيال أختي و أنا دخلت المطبخ أرتب ما أبغي أي شي يعكر مزاجي يوم برجع

و السبب عدم وجود خادمة في البيت

و انطلقنا الى بيت الوالد ناخذ أختي و أسلم على الوالده و بعدها بسرعة إلى المطار

أدري طولت عليكم بس متعوده أكتب التقرير بالتفصيل من الألف إلى الياء للي ما يعرفوني

وصلنا و المطار كالعادة مزدحم تيرمنال 3 خاص بطيران الامارات و أشوف فلاي دبي نفس المكان

ما أقدر أوصفلكم شعوري و لين الحين مب متخيله و لا مصدقه اني بسافر

أول شي قلت بغلف الشنطة لأنها ممكن تتكسر و زوجي ماخذنها من أمريكا و غالية

و الحين وصلنا للوزن طبعا ما عندنا شي غير ثيابنا و الشنط كلها صغيرة و تدخل الطيارة

بس قلنا ما نبغي نسحب شنط نبغي نمشي على راحتنا

قصينا البوردنج و أنا كنت حاجزة المقاعد أون لاين

خلصنا بسرعة ما شي زحمة على طيران الامارات

و مشينا بسرعة عشان نلحق نتغدا و نتمشى في السوق

حبيت ديكورات الكافيه

طبعا أنا يمكن من غيروا المطار ما سافرت على طيران الامارت

و آخر مرة سافرت بالطيارة من مطار بوظبي على طيران الاتحاد

و أختي تقول تبغين أي شي خذيه الحين برع أغلى أقوللها لا ورايه سوق الذهب

في البحرين ما أبغي اصرف فلوسي هني يوم برجع باخذ

و هي تقول في الرجعة السوق الحرة وااااايد صغير ما فيه شي و أنا أقول لا

المهم قعدنا في كافيه و تغدينا ما صورت الا طبقي المفضل أفوكادو توست

و الباقي خذوا كابوتشينو و ناجتس و سندويشات

و حطيت الجوازات على الطاولة و طرشت سناب لأني ما خبرت حد اني بسافر

خلصنا و مشينا شوي و الا نشوف قسم العطور و هني ما قدرت أقاوم و خذت عطر واحد بس

حبيت ريحته و على كلام أختي برع وايد أغلى

احنا وقفنا عند العطور و الشباب كملوا لين مدخل الطيارة و يتصلون وينكم باقي نص ساعة

و تطير الطيارة و أختي ماخذه راحتها عل الآخر

قمنا نمشي بسرعة عشان نوصل و النداء الأخير

أول ما ركبنا وزعوا على الصغار دفاتر تلوين و ألوان

طبعا ولدي الصغير أول مرة يركب الطيارة و مستانس كنت خايفه انه يتأثر بالضغط أو يخاف

بس ما شاء الله عليه من الحماس ما خاف و كل شوي يسألني متى بتطير الطيارة

ما شاء الله الطيارة امتزرت ( امتلأت ) و كانت 3 * 4 * 3

احنا قعدنا آخر شي

أنا و عيالي عند الدريشه و أختي و ولد أختي في النص محد عدالهم

بانتظار الاقلاع

4 و خمس دقايق بدأت الطيارة بالرجوع للخلف و 4 و عشر دقايق بالضبط على الموعد

بدأت بالتحرك

سارة محمد, توبليرون, مسقط الخير و 6 آخرون معجبون بهذا.

هاوية الاسفار · 27-10-2019, 10:34 PM

هذي الطيارة تمشي جدامنا

هذي منطقة القصيص و الطوار قريبين من المطار و الله يعينهم على أصوات الطيارات

و هذيل ورانا

و أخيرا حلقنا الساعة 4 و 35 دقيقة

طبعا سبب التأخير كثرة الطائرات المحلقة ما شاء كان أسطول طويل من الطائرات

هذي مناطق ديره و بر دبي و واضح في الصورة خور دبي

و نودع دبي بالمرور فوق ميناء راشد

بعد 10 دقايق وزعوا علينا وجبة خفيفه

عبارة عن سندويش دجاج تركي و كيكة بالزنجبيل لذيذه و عصير برتقال

بس ما حبيت الخدمة لعدم وجود خيارات اللي ما ياكل التركي شو يسوي

قالوا هذا الموجود ما عندهم خيارات ثانية يمكن الرحلات الطويلة بس يعطون خيارات

و صرنا فوق هام السحب و أحلى منظر سبحان الخالق

بينت ملامح البحر يعني اقتربنا

بين ميناء سلمان

يا مرحبا و أهلا و سهلا

منطقة عراد و الحد

وصلنا الى مطار البحرين الدولي بالسلامة و كانت رحلة مريحه جدا و سريعه

بصراحة ما حسينا بالوقت أبدا و الكابتن ما شاء الله عليه ممتاز

و هذي طيارتنا

و تحية كبيرة لكابتن الطائرة

توبليرون, مسقط الخير, الايمان و 5 آخرون معجبون بهذا.

سارة محمد · 27-10-2019, 11:23 PM

وتحية لك هاوية الأسفار

والبحرين تستحق هذا الحب وهذه اللهفة لزيارتها. جعل الله لي نصيبًا من زيارة هذا البلد الطيب وأهله الطيبين.

في انتظار باقي التقرير البحريني الجميل.

وفقك الله

توبليرون, هاوية الاسفار, أسيرالغربة و 2 آخرون معجبون بهذا.

هاوية الاسفار · 28-10-2019, 12:14 AM

وصولنا كان مع طائرة سعودية و الشعب السعودي ما شاء الله عليه كله في المطار

تأخرنا تأخير بسيط جدا عند الجوازات و دخلنا على طول بالاتجاه لاستلام الشنط

و حبيت برادة الماي

طلعنا بالاتجاه الى مكاتب تأجير السيارات

و أختكم تبغي تدلع نفسها بالسيارة أدور لكزس فورويل ما حصلت
حصلت سيارات يديده و رخيصة لكن أبغي فورويل لأني متعوده عليها
ما أحب سيارات الصالون و بصراحة أخاف أسوق

أخيرا استقريت على نيسان بترول و السعر كان مبهر بالنسبه لي 35 دينار لليوم

خذتها لمدة 3 أيام ب 105 دينار تقريبا لكن الموديل قديم شوي 2015

هذا المكتب

و 2018 ب 55 دينار لليوم بعد ما دفعت تذكرت التدخين و قلت أبغي اشوف أول يمكن

ريحة السيارة دخان ما أتحمل قال كل شي تمام و فل أوبشن و بلاتينيوم

طلعت برع و الا أشوف السيارة مكفخة من كل صوب

فتحت الباب أشم الريحه ريحة سجاير على معطر الجو

قلت لا ما أبغيها و كان في واحد ينظفها و ياب معطر بيرش قلت لا بتذبحني

ما أتحمل العطر في السيارة فيني حساسية وصلت أختي و قالت لا ريحة عادية

ولد أختي قال الريحة قوية قلنا خلاص الحين دفعنا و طلعنا برع ما فينا ندخل مرة ثانية

و البترول قبل الخط الأخير و المفروض يكون فل

توكلنا على الله و انطلقنا يوم بغينا نطلع من المواقف قال ادفعوا دينار ليش قلتله سيارة

ايجار مب مالتي و محد خبرنا على طول سألنا مكتب أوسكار قلت نعم قال دايما يسوون

هالحركة مع الزباين بس يوم بترجعون السيارة خبروهم يرجعون المبلغ

توكلنا على الله و فعلت خدمة التجوال الدولي ب 35 درهم لليوم

حطيت احداثيات فندق رمادا باي ويندهام المنامة تقريبا 20 دقيقة لكن الشوارع مزدحمة

وصلنا الفندق و أول شيء قلت بشوف الغرف متعقدة من التدخين

الحمدلله دخلت الغرفة و الريحة تمام الدور الخامس لغير المدخنين

طلبت غرفتين متصلتين و نزلت تحت أحجز

هذا محل صغير في الفندق

و هذا مطعم الفندق

سألت عن السعر للغرفتين طبعا طلع غالي قلت خلاص بحجز من بوكينج

وقفت و 10 دقايق خلصت الحجز و طلعوا الغرفتين ب 159.13 دينار

نزلنا الاغراض و طلعنا للغرفة

أول ما ندخل على اليسار الكبت

و تكرمون الحمام

خذت غرفتين مفردتين

و هذي الغرفة الثانية

ريحنا و صلينا و على طول نزلنا و الوجهة باب البحرين و البحث عن محلات الذهب

و المطاعم الموجوده في مول باب البحرين

يا الله كيف شعوري ما أقدر أوصفه ذكريات قديمة في هالمكان

طبعا درنا وايد و ما حصلنا مواقف و آخر شي وقفنا في المواقف المقابلة للمدخل

و مشينا شوي و حصلنا محل قالت أختي بتاخذ بطاقة حق النت

و قعدنا يمكن 10 دقايق شفت ما شي فايده يواعة نبغي نتعشى
خذت عيالي و توجهت للداخل بشوف المطاعم

طبعا هالمكان في الشتاء بيكون رووووعه

شفت منيو المطاعم قلت ما ينفع للعشاء باجر بنتريق فيه

و رجعت شفت أختي بعدها و البطاقة ما تشتغل رجعتها للمحل و دخلت محل ثاني

و أنا و عيالي خلاص تعبانين و نبغي نتعشى خليتها مع ولد أختي و رجعت للسياره

و قعدت أدور مطاعم و شفت بابل في الافنيوز و بعد ما رجعوا انطلقنا للأفنيوز

توبليرون, مسقط الخير, الايمان و 3 آخرون معجبون بهذا.

توبليرون · 28-10-2019, 12:45 AM

ياحلوو البحرين والاغنية على طوول بالبال

زين بوعلي رضا تسافرين تمام ربي يخليه لكم

والف مبرووك للعروسة ربي يهنيها
المطار والتسوق لابد منه بالروحة بالردة ما لنا خلق نتسوق
الوجبه بالطيارة يمكن لان الرحلة قصيره مافي اختيارات اشكثر الوقت لين وصلتوا ؟

حلوو انكم استاجرتو سيارة واعتقد باليوم كان 35 بحريني
غلطة مطبعية عندج
الفندق حلوو وسوق باب البحرين في مواقف لو ماشين شوي جدام بتحصلينهم

متابعين لاحلى تفاصيل انا اموت في التفاصيل

الايمان و أسيرالغربة معجبون بهذا.

هاوية الاسفار · 28-10-2019, 01:03 AM

تقريبا ربع ساعة وصلنا لكن مواقف السيارت بعيده وايد عن مدخل المول

دخلنا و على طول سألنا عن المطعم قال يسار و آخر شي وصلنا و الحمدلله

حصلنا مكان و ما كان مزدحم نفس اللي عندنا في دبي مول

ضيافة المطعم بصراحة أقدر المطاعم اللي تحط ضيافة

طبعا أنا قبل اسبوعين تقريبا تعشيت في بابل دبي مول لأول مرة و حبيت الاكل

و تقريبا طلبنا نفس المقبلات و الاكل

العصاير

مشاوي مشكلة و عرايس

و طبعا الشيش طاووق لازم يكون في صحن بروحه بعيد عن اللحوم لي أنا

الحمدلله الأكل كان لذيذ و المقبلات ما عليها كلام و الفتوش مميز عندهم

ولدي الكبير خلص العشاء و حط راسه على الطاولة و خذاها نومه

قلت بنحلي قالوا شبعانين ما نقدر قعدت اغريهم لين اقتنعوا و طلبنا طبق واحد للمشاركة

لذيذ جدا عبارة عن عجينة فستق و فوقها مثل جلاش مقرمش و حلو و آيس كريم

و اللي فوق احنا نسميه لحية الشيبه ( شعر البنات ) و مسميات كثيره

و طلبنا 2 تركش كوفي

الحمدلله خلصنا و أعتقد المبلغ كان 30 و شوي يعني مناسب

طبعا ما في مجال نتمشى ولدي راقد و بالغصب يمشي و المحلات اغلبها سكروا

المواقف

طلعنا الساعة 10 و نص و ما فينا نوم و قلت ما برجع الفندق بنتمشى شوي

و سرنا شارع المعارض و منطقة الحورة و القضيبية طبعا هاي كلها مناطق سكنا فيها قبل

و كنا نتمشى من بيت لبيت و محل لمحل و قضينا أيام جميله و حلوة من يوم كان عمري

7 سنوات كانت أول زيارة للبحرين و الحمدلله بعدني أتذكر بعض التفاصيل

وقفنا عند محطة البترول و فولت السياره تقريبا 14 دينار

حصلنا محل تلفونات و نزلت اختي تشوف بطاقة و أنا في السيارة

نسيت أخبركم عن بلاوي السيارة أول ما تحركنا اشتغل منبه الماي ما فيها ماي

و السينسر ( الحساسات )خربانه ما تشتغل و الليت اللي تحت على اليمين مكسور

و غير أطراف السيارة كلها مشحوفه ورا و جدام و شوي فيها عفصة عند الباب الخلفي

مشاش الجامة الاماميه خربان و خيس لي الجامه بدل ما ينظفها

قعدت أدور من وين يفتحون البونيت عشان نعبي الماي ما حصلت شي

صورت و طرشت حق أخويه أساله لأنه عنده نفس السيارة و شوفوا شو لقيت

ندمت بصراحة أني خذت السيارة بدون ما أشيك عليها

و بعد ما حصلت اختي البطاقة رجعنا للفندق

و أحلى نومه من بعد يوم طويل و متعب و حااار

و نلقاكم في اليوم الثاني

و دمتم بود

توبليرون, مسقط الخير, سارة محمد و 6 آخرون معجبون بهذا.

توبليرون · 28-10-2019, 01:13 AM

عوافي بابل لذيذ الصراحة

مساكين اليهال تعبوا من قعدتهم للمدرسه وبعدها سفر وتمشي تعب بس حلوو للنوم السريع

اما السيارة لو مصورين كل شي خراب فيها علشان لا يقطونه عليكم

الاماكن اللي تعيدين زيارتها تعيد الذكريات الجميله اكيد
مستمتعين مع البحرين الغاليه

هاوية الاسفار و الايمان معجبون بهذا.

أبوفيصل · 28-10-2019, 09:40 AM

الحمد لله على السلامة من زمان عن تقارير جديدة في البوابة

متابعين

هاوية الاسفار, توبليرون و أسيرالغربة معجبون بهذا.

هاوية الاسفار · 28-10-2019, 09:00 PM

اقتباس : المشاركة الأصلية كتبت بواسطة سارة محمد

وتحية لك هاوية الأسفار

والبحرين تستحق هذا الحب وهذه اللهفة لزيارتها. جعل الله لي نصيبًا من زيارة هذا البلد الطيب وأهله الطيبين.

في انتظار باقي التقرير البحريني الجميل.

وفقك الله

الله يحييج
ان شاء الله تسافرين في اسرع وقت
شكرا على المتابعة

توبليرون و أسيرالغربة معجبون بهذا.

هاوية الاسفار · 28-10-2019, 09:07 PM

اقتباس : المشاركة الأصلية كتبت بواسطة توبليرون

ياحلوو البحرين والاغنية على طوول بالبال

زين بوعلي رضا تسافرين تمام ربي يخليه لكم

والف مبرووك للعروسة ربي يهنيها
المطار والتسوق لابد منه بالروحة بالردة ما لنا خلق نتسوق
الوجبه بالطيارة يمكن لان الرحلة قصيره مافي اختيارات اشكثر الوقت لين وصلتوا ؟

حلوو انكم استاجرتو سيارة واعتقد باليوم كان 35 بحريني
غلطة مطبعية عندج
الفندق حلوو وسوق باب البحرين في مواقف لو ماشين شوي جدام بتحصلينهم

متابعين لاحلى تفاصيل انا اموت في التفاصيل

الحمدلله ما كنت متوقعه أبدا انه يوافق
الله يبارك فيج
صح 35 دينار
المواقف فل و درنا المنطقة كلها صعب تحصلين مواقف و خاصة السياره كبيره

اقتباس : المشاركة الأصلية كتبت بواسطة توبليرون

عوافي بابل لذيذ الصراحة

مساكين اليهال تعبوا من قعدتهم للمدرسه وبعدها سفر وتمشي تعب بس حلوو للنوم السريع

اما السيارة لو مصورين كل شي خراب فيها علشان لا يقطونه عليكم

الاماكن اللي تعيدين زيارتها تعيد الذكريات الجميله اكيد
مستمتعين مع البحرين الغاليه

الله يعافيج بس باقي أجربه عندكم في الكويت
ما عليج صورنا كل شي في السياره قبل لا نتحرك و هم أصلا عارفين بس غشاشين
شكرا عل المتابعة

توبليرون و أسيرالغربة معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أين تذهب في البحرين في 2019	أم ريمه	بوابة البحرين	40	10-05-2024 04:04 PM
حبيبتي البحرين 2019	توبليرون	بوابة البحرين	87	02-12-2021 10:22 PM
فندق كمبنسكي البحرين ـ وحالياً فندق ويستن البحرين	Bu Rashid	بوابة البحرين	28	14-08-2019 09:21 PM
البحرين 2018 .. ماهو الجديد في البحرين	اسمر وغالي	بوابة البحرين	7	31-03-2019 08:07 AM
دليل فنادق البحرين و شقق البحرين رقم الهاتف و الايميل	عامر	بوابة البحرين	23	06-10-2018 12:55 AM