بسم الله الرحمن الرحيم
الحمد لله والصلاة والسلام على رسول الله وصحبه اجمعين
من منطلق الاعتراف بالفضل والمساعدة من هذا المنتدى وجميع أعضائه بعد الله سبحانه وتعالى
اود ان اشكر كل القائمين على هذا المنتدى والمشاركين فيه بتجاربهم الناجحة وفرحنا معهم ولاننسى إخواننا من فشلوا في حصولهم على الفيزا ويعلم الله انه كان يؤلمني قراءة أي موضوع تكون نهايته برفض الفيزا .. لكن هذا امر الله وقضاءه ونتمنى للجميع التوفيق والسداد.
بعد الحمد لله والشكر لله قد من الله علي بفضله وكرمه بإ ستخراج فيزة شنجن إيطاليا وسوف أقوم بسرد التفاصيل التي تحضرني ليستفيد منها الجميع وخصوصا اخواني ( المقيمين ) لكوني ( مقيم ) في هذه البلاد المباركة حفظها الله وشعبها من كل الشرور .
ونبدا على بركة الله بالموضوع ..<< طبعا بتكلم بالعامية عشان اقدر استرسل بالكلام واحط اكبر قدر من المعلومات (:
أولا كانت بدايتي بالبحث عن معلومات الفيزة في العم ( قوقل ) وطبعا كمية المواضيع كثيرة لكن قديمة جدا استغربت وجاتني ضيقة صدر من وين اجيب المعلومات وكيف اقدم ومابي اعطي فلوسي لمكتب واخرتها مايسوي شي
الزبدة جلست ع هالحالة أسبوع ونص وبقدرة قادر فتحت موضوع في هالمنتدى نسيت ايش هو بس اذا ماخاب ظني كان للاخ ( اخر فرصة ) الله يجزاه خير والجميع على كل اللي قدموه لنا ..
عموما بدأت مرحلة البحث وتقييم وضعي ووضع النقاط على الحروف عشان اقدم تقديم واحد ويكون تمام التمام وطبعا عزمنا انا وصديقي في العمل ( مقيم ) على اننا نقدم سوا رغم اني كنت خايف من هالفكرة اني ارتبط فيه او يرتبط فيني بحيث لو ملفي انرفض ينرفض هو كذلك ... والعكس صحيح أيضا .
وبعد البحث اقترح زمييلي لكونه جرب تأشيرة كندا مرتين وانرفض قال يفضل نقدم على المكتب وهو ابخص بالامور وراح يزبط الملف احسن مننا ..
طبعا انا ما اقتنعت بالامر لكوني قريت وختمت قسم الشنغن في هالمنتدى الرائع .. واخذت خلاصة ان المكاتب لايمكن تخدمك فوق ما انت تقدر تخدم نفسك ولا راح تجيب لك الفيزة بطريقة سحرية وان كل شي يعتمد على توفيق الله سبحانه وتعالى ثم قوة اقناعك بالمستندات ... الخ .
عموما زميلي كلم مكتب واتفقنا معهم للأسف وطلبو اللي طلبوه منا وعطيناهم المستندات والباقي من عندنا .. بدون ذكر الرسوم 😊
وطوال الوقت كنت مرة متضايق من الشي ذا وان المكتب بينكبنا فعليا ..
اتفقنا مع المكتب اني اسوي حجز الفندق في إيطاليا و هو يسوي لنا ... الابليكيشن + التامين + الموعد للمكتب الموحد + تذكرة الطيران ( اختلفنا فيها لاني انا كنت رافض تماما ان الحجز لازم يكون مدفوع وما ابغا وهمي او غيره ) لكن بالاخير سوت لنا تذكرة وطلع نفس اللي ببالي انها غير مقنعة بالنسبة لي .
وبعد ما استلمنا الأوراق : اكتشفت ان تعبئة الابليكيشن كانت سريع سريع ومختصرة وبدون معلومات كاملة لذلك رحت وسويت لنفسي وقلت لزميلي يسوي له ابليكيشن من جديد ويتاكد من المعلومات كاملة بنفسه .
وطبعا التذكرة كانت غير مقنعة لي أيضا وقمت ع طول حجز على الطيران المصري ودفعت وبكذا ارتحت ههههه
والحمد لله اكتملت الأوراق اللي من جهة المكتب وضبطنا وضعنا من ناحية هالامورة
بقا الأوراق والاثباتات ( الإقامة + إقامة الزوجة + إقامة الوالدة + بطاقتي الوطنية + استمارة سيارتي ) جميعها ترجمتها وارفقتها مع خروج وعودة وتذكرة الطيران الموكد والمدفووووووووووع والفندق مؤكد فقط.
طبعا انا متزوج لكن زميلي اعزب وساكن لحاله .
ووقبل الترجمة و وتقديم الطلب للمكتب الموحد واجهتني عدة مشكلات لكن سبحان الله كانت حلولها بسيييييطة جدا يارب لك الحمد والشكر
اول مشكلة : هي اسمي في الإقامة بالانجليزي مختلف تمام عن الجواز ( طبعا الاسم مكتوب حسب مزاج الموظف يوم جيت اطلع اقامتي قبل 19 سنة تقريبا )
المهم رحت للجوازات قدمت ورقة تغيير الاسم وانا واقف خمس دقايق والإقامة الجديدة بيدي وتفائلت بالخير الحمد لله
نصيحة : لذلك أي شخص بيقدم على الفيزة يتأكد من الاسم مطااابق تماما مع الجواز.
ثاني مشكلة : تعريف بالراتب .طبعا انا مالي سنتين توظفت والراتب ع قد الحال الحمد لله والشكر لله .. فكلمت موظف الموارد بصفة شخصية ع انه يعطيني راتب اعلى من راتبي والحمد لله اعطاني بمبلغ 5500 ريال لانه هذا اقصى شي يقدر يقدمه لي .
طبعا جلست اقرا تجارب من سبقني من اخواني المقيمين وفيهم اللي انرفض واللي نجح علما ان رواتبهم ماشاء الله تبارك الله عالية فوق 7000 وان الامر صعب علي.
علما ان معلومات التعريف تكون فيه تعهد ان الشركة تضمن عودتك وتكتب عاد اي شي يثبت انه الشكرة ضامنتك بترجع ..
ثالث مشكلة : الكشف البنكي طبعا انا عندي حسابين واحد للراتب والأخر لتعاملاتي وسبحان الله اللي ينزل فيه الراتب مافيه حركة ابداااا وماكنت حاسب حسابي في هالشي لكون الكشف لازم يكون الراتب عليه .
لذلك كتبت موضوع قبل اطلع الكشف واستفسرت وافادوني الاخوان والاخ اخر فرصة ان يحتاج يكون الكشف نشط ويفضل ينزل عليه الراتب بنفس المبلغ المكتوب في التعريف..
وبعد تفكير قلت توكلت على الله وطلعت كشف حسابي وكنت مودع فيه قبل أسبوعين على دفعات متفاوتة مبالغ واضحة كانت 15 الف و5000 و6000 اذا ما خاب ظني عموما طلع الرصيد 30 الف وكسور
وطلع كشف الحساب لستة اشهر ماشاء الله تبارك الله شبه مذكرة من 60 ورقة تقريبا ههههههههه واستبشرت بالخير قلت هذا اكيد بيعطي انطباع جيد للموظف هناك .
ثم بعدها تاكدنا من جميع اوراقنا صحيحة وكاملة بالإضافة الى حجوزات الفنادق م بوكينغ + بطاقة الفيزا صورتها وارفقتها طبعا .
وتوكلنا على الله الى الرياض .
كان موعدنا يوم الاحد 27 وصلنا وكان جداااا فاضي المكتب عطيناهم الأوراق واستلمنا الايصال وسددنا وطلعنا .. اليوم التالي جاتنا رسالة ان الجواز في السفارة وجاري معالجة الطلب بعدها بيومين جاتني رسالة ان الجواز استلمته ارامكس .. هنا جاتني مية الف علامة استفهام فوق راسي لكون كل اللي قريت مواضيعهم سواء مواطنين او مقيمين اقل مدة كانت أسبوع من التقديم لكن معروف ان حالتنا حنا المقيمين تستدعي مزيد من الوقت ..
قلت بنفسي خلاص خربت الدعوة وواضح انهم شافو الجواز من بعيد قالو هذا عطوه رفض ههههههههه
عموما جلست على اعصابي لين استلمت الجواز وفتحت الظرف سحبت على الجواز جالس ادور ورقة الرفض هههههههههههههههه
لكن الحمد لله فتحت الجواز ولقيت التأشيرة مختومة وموقعة يارب لك الحمد طبعا عطونا 18 يوم خلالها نطلع من إيطاليا وجدولنا اللي حطيناه انه 15 يوم بإطاليا ( كانت رحتنا 25 يوم بين إيطاليا وفرنسا .. لكن موظف المكتب قال يفضل تختصرونها على دولة واحدة احسن لكم لذلك قدمت فقط فنادق إيطاليا وسحبت على فرنسا ... والحين توقهنا هههه بناخذ كم يوم إيطاليا والباقي فرنسا )
ملاحظة مهمة : هذه اول فيزة على جوازي وجوازي ابيض وماعمري سافرت خارج السعودية الى لدولتي فقط
علما اني مغربي وزميلي مصري نفس الحكاية جوازاتنا بيضة ههههههههه
وملاحظة ثانية : أتوقع ان شهر 10و11 يكون وقت مناسب للتقديم لكون مافيه اجازات عشان كذا الجواز طلع بدري والله اعلم
وختاما الله يوفقنا ويوفق الجميع وانا حاظر للاستفسارات باذن الله ارد عليكم في اقرب وقت
7الاعجاب
03-11-2019, 10:41 AM
تجربتي في الحصول على الايطالية ( مقيم ) 
العرض العادي
المواضيع المتشابهه 
