على كثرت الأماكن اللي حاطتها ولكنها كلها موجوده بالسنتر وقريبه من بعض
انصحك تروحين لألعاب الوندر لاند اللي يحطونها كل سنة قبل الكريسماس بالهايدربارك
وانصحك تروحين للوستفيلد مجمع تسوق ومطاعم كبير كبير مره
اما شيبرد بوش فهذا مكان شعبي ولا فيه اي شي ولا يستاهل اجرة الباص اصلا
اما ساحة ترافلقار فما انصحك فيها لأن الجو بارد ولا فيها اي متعه بهذا الجو
متعتها هي و البيكاديللي سكوير بالصيف لما تتجمع الناس وتصير فيها انشطة عفويه وخصوصا بالويك اند
الأجور رود ما فيه شي ممتع ,, انا امر عليهم اذا ابي مطاعم عربية بس
بما انك بتروحين ام اند امز يعني بتدخلين شارع ريجنت الراقي ومحلاته الراقيه
اذا كان الجو يساعد انصحك تروحين حديقة هولند بارك حديقة صغيره ولكنها رايقه وتصميمها رائع
انصحك تصعدين مع اولادك برج شارد يعتبر اعلى برج في بريطانيا ويمكن في اوروبا ( يمكن )
قصر كنزنقتون هذا القصر اللي انولدت فيه الملكه وبعدين صار لديانا اول زواجها وهو القصر الرسمي للعائلة المالكة قديما ومكانه بحديقة كنزنقتون واللي بعض الناس على باله انها امتداد للهايد بارك
وخوذلك لفه في لندن تاور القلعه الأثريه على نهر التيمز ومو بعيده عن بق بن ولكن بالجهة الثانية من النهر
وبالأخير انصحك تروحين المطاعم اللي بشارع جيمس واللي هو ثالث شارع بعد سلفريجز
ودي اقولك لندن بهالوقت ما تصلح للأولاد لكن انتم مصممين