ابــريــل 2019 ميامي - اورلاندو - لاس فيغاس - سان دييغو - بورتلاند - سيياتل - الصفحة 2

ali pontiac · 23-12-2019, 08:09 AM

حياكم الله جميعا و شكرا على تفاعلكم

من عادتي اني اكتب تقرير رحلتي بعد العودة مباشره وتكون الذاكره مشحونه تفاصيل ولمحات من الرحلة

لكن للأسف هذي المره بسبب ضغوط العمل ما مداني اكتب التقرير مباشره و نسيت امور وربما بعض المواقف

بحاول اجمع بعض الأمور مثل اسعار المصاريف و غيرها اذا حصلت شي لأني بالعاده اسجل عندي المصاريف في مكان ما

يتبع...

قطرية كول, توبليرون, الايمان و 2 آخرون معجبون بهذا.

ali pontiac · 23-12-2019, 09:07 PM

الرحلة الثالثه وليش الرحله الثالثه؟

المخطط كان اليابان ارض الشمس المشرقه وكان توقيت جدا ممتاز لليابان (موسم الساكورا) و لكن عندي خطة مسبقا امريكية بعد زيارتي الأولى وتعرفون من تقريري لزيارتي الأولى ليش احب امريكا

بعد الرحلة الأولي سويت خطة حق اشوف المدن الي ودي ازورها

وبالتحديد سان دييغو و بورتلاند و سيياتل وفيغاس للمره الثانيه.... انه من محبين الغرب الأمريكي ولكن ضفت اورلاندو و ميامي كتسجيل زياره واكون زرت اهم المدن السياحية الي نفسي اشوفها و الحمدلله رب العالمين توفقنه (مع اني ودي في سفره خريفية لأقليم New England الي اهوه الشمال الشرقي مع العلم انه غير سياحي مثل باقي المناطق لكن اريافه في الخريف تصير ساحره).... وسبب مهم ايضا الي خلانه نفضل امريكا لأنه نهاية هذي السنة تنتهي التأشيره وقلنا نروح ونحللها

الرحلة كانت بتاريخ 10 ابريل على الناقل الألماني Lufthansa سعر التذكره 450 دينار للشخص ... كانت 400 دينار وماحجزتها قلت يمكن ترخص

خط سير الرحله البحرين - ستوب في الرياض - ترانزيت في فرانكورت مدته تقريبا 6 ساعات وتالي اورلاندو

بشكل عام لوفتانزا طيران الماني عريق جدا وممتاز واغلب اسطولهم طيارات حديثه ولكن حظنا انه الشركة تشغل في رحلتنه البوينق B747-4 القديمة ومب الـB747-8 (في الرحلتين من فرانكفورت الى اورلاندو و الرجوع من سياتل الى فرانكفورت)
اما بالنسبة من البحرين لفرانكفورت A330-300 والعوده من فرانكفورت الى البحرين بعد A330 لكن كانت مجدده بالكامل

انطلقنا بحفظ الرحمن ورعايته و وصلنا فرانكفورت
ترانزيت طويل ومطار كبير ولكن مع التمشي واخذ قسط من الراحه الوقت طاف علينه

الموقف العجيب

صار جريب وقت البوردنق وتمشينه للبوابة للمغادرة الى اورلاندو

وجاني واحد على طول من بد كل افواج المسافرين الي يمشون ياني لي وحق زوجتي بالتحديد وسألني .... مستر فلان الفلاني؟؟ قلت له يس وطلع جواله وراواني صورة تأشيرتي الأمريكيه

وقالي اسمه (والله ناسي شنو كان اسمه) وطلع الأخ من امن المنافذ والحدود الأمريكية... قال تسمح لي اشوف جوازاتكم

وعطيته الجوازات....وانه متوتر...
وبدأ يسأل بكل لطف وشوي يسولف وين سافرت اخر 3 سنوات؟؟ ... هل زرت ايران؟؟... ليبيا ... الخ الخ... وين بتروح في امريكا ؟؟ انه كنت اشتغل في قطر و ...و ...و الأكل عندكم لذيذ في الخليج.....( وانه اشوفه يقلب في صفحات الجوازات بسرررررعه وكأنه يدور شي) هل مازلت في وظيفتك نفسها؟؟؟

وسلمني الجوازات وقالي our guys will take care of you there !!

وانه في قلبي اقول لا والله لا ابيهم تيك كير أوف9 مي ولا هم يحزنون ابي ادخل بسلام

وسألته عفوا بس من باب الفضول هل في شئ ؟؟؟
قال لا مجرد اسأله روتينيه لأنه تأشيرتك قديمة

و صعدنا البوينق

و بعد 8 ساعات من فرانكفورت وصلنا اورلاندو الساعه 5:55 مساء

يتبع

قطرية كول, توبليرون, albarood و 7 آخرون معجبون بهذا.

قطرية كول · 23-12-2019, 11:01 PM

اللللللله وابتدى المشوار

والله أنه ربي حابك وفكك من اليابان وخلاك تقرر تروح أمريكا ..

صراحة ماعنده سالفة موظف أمن المنافذ اشدعوى بتطير الدنيا جايكم يركض زوغ قلوبكم؟

مافيه صبر ينطر لين توصلون البوابة وتسلمون جوازاتكم لهم ويشيكون على راحتتهم؟

في ناس في هالوظايف تنقصهم اللباقة والحكمة في التصرف..

وعسى ما خذوا كير أوف يو يوم وصلتوا البوابة وافتكيتوا منهم؟

متابعين للتكملة بكل شوق وترقب

Abu Muataz, ali pontiac, الايمان و 1 آخرون معجبون بهذا.

منيرة · 24-12-2019, 09:15 AM

بداية اكشن

منتظرين باقي التقرير

ali pontiac, توبليرون و آخـــرفـــرصـــة معجبون بهذا.

ali pontiac · 24-12-2019, 09:35 PM

وصلنا اورلاندو وطابور حق موظفين الجوازات

وصلنا عندهم ... وبصمنا ، وقالو خلوكم على جنب ايه صارت

المهم اخذنا احد الموظفين حق صاله وفيها ايضا ناس معانه في الرحله ... وشفت جوازاتنه عندهم على الرف.... وانتظر بس لي مايجي الدور عليك و كالعاده اسأله و اسأله

وجابو لنه الشنط و خلصنا من هذي الموضوع بسلام والحمدلله

رحنا لمكتب تأجير السيارات من شركة Dollar لأستلام السياره ، وكانت من نوع شفر Cruze

وحجزتها موقعhttp://Rentalcars.com

كانت الخطة ان اول مانوصل اورلاندو نروح اقرب AT&T لشراء بطاقة التلفون لكن تأخرنا في المطار وظلم الوقت و تقريبا كل محلات AT&T قفلت

ضبطنا الGps على فندقنا Quality Inn & Suites By the Parks الفندق مجدد .....و جدا جدا بسيط ولكنه نظيف وصاير بالتحديد في منطقة Kissemmee

حجزت في الفندق من Booking بسعر 153 دينار لمدة 5 ليالي، واهم شي فيه المواقف مجانيه
https://www.booking.com/hotel/us/qua...mee.en-gb.html

اول ماوصلنا وبعد الـ Check in السلس على طوووول نوم بعد التعب والدرب الطويل

يتبع............

توبليرون, قطرية كول, الايمان و 3 آخرون معجبون بهذا.

توبليرون · 25-12-2019, 12:00 AM

اليابان حلوه ويمدحونها بس مدام فيزتك بتنتهي زين سويت رحتو امريكا
البداية بالمطار والرحله حلوة بس تعب ترانزيت وسفر طويل

سعر الفندق للخمس ليالي حلو 150
المهم التقرير ناقصه الصور
ننطرها

ali pontiac, قطرية كول, الايمان و 1 آخرون معجبون بهذا.

قطرية كول · 25-12-2019, 12:34 PM

بعد؟؟ لاااا عيل كانوا ناويين عليها ومحددين الأسامي في كشف عشان جذي جاكم موظف المنفذ يشيك على جوازاتكم في مطار الترانزيت..

ترى عادي هذي اجراءات احترازية فقط ويسوونها على عينة عشوائية ..

على مايقول المثل لا تبوق..لا تخاف..

خل يشيكون ويفتشون على راحتهم ماعندنا شي نخاف منه..بس الواحد يتملل إذا عايلة او معاه أطفال والرحلة طويلة مايصدق يطلع من المطار..

الفندق اللي اخترتوه حلوو ونظيف وفعلا شكله مجدد بالكامل ..وسعره روووعة ...بس طبعا هالسعر لايمكن تلاقيه في اشهر الصيف اللي كل شي يتغير 3 أضعاف سعره

متابعين بشوق حتى بدون صور ..لأن ماشاء الله كل شي تذكره نستفيد منه معلومة..

Abu Muataz, توبليرون, الايمان و 2 آخرون معجبون بهذا.

ali pontiac · 28-12-2019, 02:55 PM

اورلاندو
اليوم الأول

صحينا الصبح صلينا وتجهزنا ولازم وجهتنا تكون حق اقرب AT&T

وبعدها نروح مطعم Hash House a go Go من المطاعم الي قريت عنها وتقييمها عالي فقلت ان شاءالله بخليه اول مكان نتريق فيه

ركبنا السياره ونبي نشغل الـ GPS ،،، هذي GPS عباره عن جوال شركة Honor و مبرمجينه حق يكون GPS بس ماتقدر تستخدمه كجوال عادي

المهم نبي نشغله ومايشتغل البتري مخلص الشحن ماله.... افا شلون !!!

كان عندنا شاحن متجول ولكن الـGps منتهي وماياخذ شحن بسرعه بطيئ وماعندنا شريحة حق نستخدم Google map من الجوالات

قلت الحمدلله انه الشحن ماخلص واحنه طالعين من المطار ولا جان مابنعرف درب الفندق عقب التعب

...قلت حق زوجتي احين خليه على الشحن وبنتوكل على الله نتجول على مايشحن شي بسيط ونضبطه ويمكن واحنا نمشي بالسياره نشوف محل AT&T او حته T-Mobile بكون ممتاز

تحركنا والجوو عجيب جو صافي نقي وماكان حار وانا اسوق في السياره شفت لافتة International Drive طريق غني عن التعريف في اورلاندو مطاعم ومحلات و اوتلت وغيرها .. اكثر السياح يفضلون يسكنون قريب من الـ International Drive

وشفنا هالماك ... اكبر ماك في العالم

وانا اسوق السياره السياره على امل نلمح At&t او T-Mobile شفت المطعم الي نبيه

سبحان الله رب العالمين وصلنا له

قلنا ننزل نتريق ونخليه الشاحن يشحن الGPS على راحته لنه بطيئ

وهذي المطعم

انه طلبت اسبريسو حق التصحصح وكورن بيف مع اومليت وزوجتي طلبت اومليت

حجم اطباقهم كبيره انه ذاك اليوم عقب الريوق ماحسيت باليووع

عند المدخل صور المشاهير الي زارو المطعم

طلعنا وشغلنا الـ GPS الي اخيرا خذ جارج شي بسيط حق يوصلنا على اقرب AT&T

وبعد ماخذينا الشريحة اعتمدنا على قوقل map من الجوال اسرع واحسن من الـ GPS مالهم

اول وجهة بحيرة Eola في الداون تاون، وارولاندو فيها اكثر من 100 بحيره !!

حوالين المنطقة مطاعم ومقاهي وتعتبر منطقة ايضا مفضلة للسكن ،، بس الشوارع كانت فاضية وايد وماكان في حركة اتوقع في الليل وايام العطل تصير فيه حركة

تمشينا في المنطقة

وبعدها رجعنا للفندق ارتاحينا شوي وطلعنا العصر للـOld Town

وعلى حظي كان في تجمع سيارات

وبعدها رحنا Disney Springs

بالنسبة لي احس ديزني سبرنقس في النهار تكون احلى حسيتهاوايد مظلمة في الليل

وهذي نهاية اليوم الأول

يتبع

قطرية كول, Abu Muataz, توبليرون و 7 آخرون معجبون بهذا.

قطرية كول · 28-12-2019, 04:07 PM

واااايد حلوة جولة اليوم الأول ..

GPS مشكلة إذا مو جهاز منفصل ومبرمج فيه الأماكن المطلوبة للسفرة من البلد قبل السفرة ومشحون وجاهز..

بالنسبة لي أبدا ما احب اعتمد على قارمن البيلت إن في السيارة أو ألموبايل ..دايما قارمن السيارة المتنقل أسلم حل خصوصا مع مدن وولايات الإرسال فيها ضعيف مثل أورلاندو وسان فرانسيسكو لأنها مرتفعة والابراج المحيطة بها تمنع الإرسال داخل الداون تاون..

جربت فرع هذا المطعم في سان دييجو وكان عادي جدا ومايستاهل المدح اللي ماخذه ولا السعر الغالي له وأطباقه فعلا جدااا كبيرة

متابعين للتقرير

ali pontiac, توبليرون, الايمان و 1 آخرون معجبون بهذا.

ali pontiac · 28-12-2019, 10:12 PM

اورلاندو
اليوم الثاني

اليوم الثاني البرنامج في يونفرسال ستوديو، طبعا احنا مسوين خطه و جدول حق كل يوم وين نروح فيه

اشتريت تذكرة 2 parks حق يومين

وهذي اليوم كان في Universal Studios واليوم الرابع خليناه حق Universal Islands of Adventure

جميع مزارات وبرامج الرحله احجهم اونلاين قبل السفر ، ويكون عندي تالي صرف اليد فقط عباره عن مبلغ جدا بسيط كاش والباقي موزع في بطايق البنك

واخليكم مع الصور

وهذي اليوم الثاني قضيناه كامل في يونفرسال

نهاية اليوم الثاني

يتبع

قطرية كول, Abu Muataz, توبليرون و 7 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى امريكا ” لوس انجلوس ، سان فرانسيسكو ، لاس فيغاس ، سان دييغو ،	بن قوت	بوابة امريكا	872	18-04-2023 04:26 PM
الولايات المتحده ٢٠١٩ (نيويورك- اورلاندو - ميامي - البهامز - لاس فيغاس - لوس انجلوس)	ek201	بوابة امريكا	66	16-04-2022 03:59 PM
اورلاندو ميامي 15 يوم في يناير هل هي مناسبة	ابو راشد 2010	بوابة امريكا	3	23-09-2019 05:20 AM
ديزني لاند اورلاندو + يونيفيرسال استديو اورلاندو	abo.battal	بوابة امريكا	4	23-09-2019 05:14 AM
الذهاب الى سان دييغو ولاس فيغاس !	اريج منصور	بوابة امريكا	3	31-07-2016 09:47 AM