السلام عليكم، مساء الخير

أنا بإذن الله مخططة على سفرة نهاية ديسمبر 2020 وجدول الخطة للآن هو على ثلاث ولايات:

أسبوع نيويورك
أسبوع فلوريدا
أسبوع كالفورنيا

طبعًا أحنا تقريبًا 4 أشخاص و 2 من أصل 4 راح يتقاسموا المصاريف سواءً من سكن أو مواصلات و أكل وشرب

اسألتي هي الآن تخصني أنا وأختي لأني أنا حدفع عني وعنها أحتاج يعني مبلغ تقريبي يكفينا هناك مع اكل وشرب ومواصلات وشوبينق؟

طبعًا بدون حق التذاكر الأساسية من السعودية لأمريكا والعكس

ادري كله يعتمد عليا وعلى صرفيتي بس يعني احتاج يعني ما لا يقل عن كم يكون معايا هناك وأموري تكون تمام؟ لأني صراحةً ما ابا ينقصني شيء ولا شيء هناك فتكون زيادة أحسن من نقصان

وبخصوص الطيران أيش أفضل طيران لهذا النوع من الرحلات؟ بما انه أول مرا حسافر ذي المسافة ومتى أفضل وقت للحجز؟

أما بخصوص السكن احنا ما نبا فنادق غالية أو مبالغ فيها نبا نظام بيت يعني زي اللي يكون ايجاره لونق ستاي واعطتني وحدة ابلكيشن اسمو Airbnb وفيه كذا خيار هناك بس اذا أحد عنده نصائح أخرى وممكن يفيدنا عن محلات وكيف وايش الأفضل

كمان مافيه احد فينا يسوق يعني المواصلات كيف؟
فيه سواقين هناك أقدر أتعامل ولا صب واي ولا ايش الأفضل؟
وهل تنصحوني بمكتب سياحي ينظم لي الرحلة؟ علمًا أن الأغلب مبالغ جدًا في أسعاره
عشان كذا جيت آخذ شوركم ومن واقع خبراتكم

وايش احسن الأماكن اللي يستاهل ازورها في ذي الولايات من أماكن ترفيهية أو أوتليت وغيره..
ويفضّل أبدأ رحلتي من وين وأنهيها وين؟


أما بين الولايات ايش أفضل شيء أحجز من هنا ولاّ لما أوصل هناك من طيرانهم؟
لأنه الأغلب قالو لي من هناك تحجزي أفضل وإذا من طيرانهم ايش الطيران اللي عندهم سعرو كويس مو مبالغ فيه؟

الخلاصة أبغى اعرف كم مبلغ يكفيني أنا واختي سواءً بالدولار او بالريال شامل الأكل والشرب والمواصلات والسكن والشوبينق مع الرحلات الداخلية حق امريكا أما الرحلات الأساسية وحق التأشيرة وكله أنا فاصلة مبلغهم

آسفة على الإطالة صح الرحلة ماهي قريبة بس منجد ضايعة بالرغم أني سألت كثير بس مالقيت الإجابات الكافية وأنا أحتاج أخطط لها من الآن وأعرف عن كل شيء يخصها من بدري عشان أقدر أرتب أموري.

شكرًا لكم 💙💙.