بسم الله الرحمن الرحيم

الاثنين
2 / مارس

أحلى حاجه في المحميه

النوووووووم



نوم ممتع للغايه

ياجماعه هدوووووء لا يوجد مثله في العالم

كالعاده صحينا مبكراً وكلنا حماااااس ونشاااااط

فطور اليوم

مامادو تفنن وعمل لنا بيض عيون ولبنه وزبادي

وشاي وقهوه وزادنا من كرمه وعمل لنا ( كرك )

قهوة القريات

حضر رضوان .. وصدمنا بكلام مفاجئ !!



رضوان / صباح الخير .. ياجماعه ترى الغزال ( ستين بوك ) اللي صدناه أمس قيمته ( 500 ) دولار !!

أبونمر / لا هلا ولا مرحبا .. ايش اللي 500 دولار !! هو الغزال مو قيمته ( 200 ) دولار زي اللي في البكج !!!

رضوان / الغزال أبو 200 دولار من نوع ( امبالا ) .. وحق أمس من نوع ثاني .. وكذا يبقى في رصيدكم ( 500 ) دولار !!

أبوحمزه / تعال حبيبي هنا .. واجلس .. وروق .. واشرب شاي .. واشرح لنا .. ايش باقي في الرصيد 500 دولار !!!

رضوان / حسب البكج فكل واحد فيكم له غزال من نوع ( امبالا ) قيمته ( 200 ) دولار مدفوع مسبقاً .. يعني رصيدكم الخمسه ( ألف دولار ) .. حلو ؟

نجم / حلو .

رضوان / في المحميه حوالي ( 14 ) نوع من الغزلان .. بالإضافة للجواميس البريه .. وبعض الزرافات .. وكذلك حمير وحشيه .. وكل واحد له قيمته .

نجم / يعني اللي نصيده ندفع حقه ؟

رضوان / نعم صحيح .. إذا صدتوا بفلوسكم الألف دولار خير وبركه .. وإذا صدتوا أقل نرجع لكم الباقي .. وإذا صدتوا أكثر تدفعون الفرق .

نجم / من جد لا هلا ولا مرحبا !! مررره كذا مو حلو .

أبونمر / احنا كنا نحسب نصيد زي ما نبغى !!

رضوان / لا .. المجاني فقط الطيور والارانب .. صيدوا زي ما تبغوا منهم بدون عدد .

وقام رضوان بإخراج جواله وعرض علينا لسته بأسعار الغزلان والجواميس

وإليكم اللسته النكبه !!



اول غزال صدناه ( ستين بوك )


غزال من نوع ( دوكر ) قيمته أيضاُ 500 دولار



غزال الامبالا الانثى 200 دولار .. اللي سحبوا رجلنا فيه .. أصعب واحد !! واسرع واحد !!



غزال الامبالا الذكر 250دولار



غزال ( بوش بوك ) 700 دولار


غزلان أخرى


غزال ( نايلا ) ألف دولار !!!!


غزلان أخرى


أنواع أخرى


غزال ( كودو ) .. وتلاحظون اختلاف سعر الذكر عن الانثى


وأخيرا حمار الوحش .. اللي ماشفناه إلى الان


وهذي لسته أخرى لمحمية أخرى اسمها محمية ( الغندور ) لعام 2019م .. تلاحظون الاسعار متقاربه


نظرنا في بعض مندهشين !! الأسعار جدا جدا عاليه !!

والموضوع طلع سحبة رجل !!

تسويق لرحلات المقناص بطريقه ماكره !!

غزال مجاني قيمته (200 ) دولار !!

وطلع اصعب غزال ممكن تصيده !! نظراً لصغره وسرعته !!

يعني إذا تبغى تصيد غزلان .. لازم تصيد غزال من نوع ثاني وتددددددفع ياحبيبي !!!!

نجم /هذا يا اخوان زي التخفيضات .. 60% وتدخل المحل فرحان .. وتلاقي التخفيضات في ركن من المحل على شوية ملابس !! والباقي غالي !!! يعني سحبة رجل !!

أبوحمزه / ليه ما علمتنا يابوسعود على النظام ذا ؟؟ انت سبقب انك جيت المقناص ذا .

أبوسعود / أنا لما جيت مع أصحابي .. كان عددنا أربعه .. صدنا اثنين غزال امبالا .. ماصدنا غيرها .. ورجع لنا 400 دولار حقة شخصين .. عشان كذا ماكان عندنا فكره عن هذا الموضوع .

أبونمر / لا هلا ولا مرحبا !! طيب كلموا رضوان .. هو اللي صاده مو احنا !! التكلفه عليه .

نجم / أنا عندي رأي .. الغزال تعشينا منه .. واليوم ان شاء الله بنتغدى منه .. يعني احنا اكلناه .. وأخاف نشد مع رضوان .. يروح يخرب علينا الرحله .. ويودينا أماكن مافيها غزلان !! وأنتوا شفتوا بأنفسكم اليومين الماضيه كيف صعوبة القنص والبحث .. الغزلان بالعافيه نشوفها !! خلونا نمشيها .. ونشوف ايش يصير اليومين القادمه

اتفقنا على هذا الرأي .. وإن كنا محبطين

يتبع ..

انطلقنا الساعه الثامنه صباحاً ..

وبسم الله توكلنا على الله ..





هذي المره أخذنا رضوان لطرق ومناطق جديده

وذهب بنا عند البيبان والشبوك المقفلة .. ونزل مساعده وفك البيبان

ودخلنا منطقه جديده ( المحميه مقسمه لعدة مربعات .. ومقفلة بشبوك )

وعلى فكره .. هذي الأماكن اللي ما رضي رضوان يدخلنا لها اليومين الأولى لأنها تبع محميات أخرى !!!!!!!





توقف ..

رضوان وهو ماسك الناظور/ غزال من نوع ( بلو وايلد بيست )

أبونمر / بكم ذا ؟؟

رضوان / 450 دولار .

أبونمر / لا هلا ولا مرحبا .. حرك يابويا

بعد ربع ساعه توقفنا ..

رضوان / غزال هناااااك .

أبوسعود وهو متأهب وماسك البندقيه / امبالا ؟

رضوان / لا .. هذا اسمه ( ووتر بوك ) .

عبدالرحمن / وهذا الثاني بكم ؟؟

رضوان / 800 دولار

أبوسعود / احنا مارضينا بأبو 450 دولار !! بنرضى بأبو 800 دولار !! اللي بعده اللي بعده



بوسط الغابه .. قال رضوان / انزلوا اثنين هنا ..

نزلت أنا وعبدالرحمن ومساعد رضوان ومعانا بندقية قناصه وحامل بندقيه

وانطلقوا هم لمكان اخر

مشينا سيراً على الاقدام .. بهدوووووء .. وعلى حذر

لأن الغزال لديه حاسة سمع وشم قويه

تلاحظون بالصوره ذي حجم الزرع بوسط الغابه




بعد خمس دقائق ومن اثر الزرع والعشب عطست !!

نظر فيني المساعد نظره !! الله لا يوريكم !! بلعت ريقي !!



وأشر بيده بأن نكون ملاصقين فيه

بعد خمس دقائق أخرى .. جات عطسه ثانيه !! بالكاد مسكتها وطلعت صوت !!

التفت علي المساعد بسرعه .. واشار بأصبعه إلى فمه .. بمعنى لو سمحت التزم الصمت

من سرعة لفته وعصبيته كان بيطير رأس عبدالرحمن بعصاية حامل البندقيه



ساعه من المشي المرهق !! بين الاشجار والأعشاب الكثيفه

ولكن خفف علينا الجو البارد اللطيف الجميل .. والغيوم الرائعة التي أخفت حرارة الشمس ..

يمكن شفنا في ها الساعه .. ثلاث عناكب !! وسبعه مليون نمله !!

وفجأة .. توقف المساعد .. ونصب الحامل على الأرض .. وأشر بيده لي بسرعه .. وأشار لغزال مختبئ خلف أحد الأشجار ..

نظرنا وإذ هو غزال من نوع امبالا .. هدفنا ومبتغانا

نزلت البندقيه من كتفي ووضعتها بسرعه على الحامل ..

ويادوب احط عيني على المنظار لقيت الغزال اختفى !!

الامبالا ذا مشكله كبيرررره !!!

على الرغم من صعوبة وارهاق الموضوع .. لكن كان موضوع المطارده والبحث أمر ممتع جداُ جداُ .. الأدرينالين ضارب في العالي لدينا .. حمااااااااااس



استمرينا في السير .. وبعد نص ساعه أخرى

ايضا توقفنا .. وإذ بغزالين امبالا كبار بعض الشئ واقفين ينظرون إلينا باستغراب ودهشه !!

كانت البندقيه مع عبدالرحمن .. وحالما وجه البندقيه إليهم

كأنهم صابهم اعصار أو زلزال .. مناقز ونطنطه !! وهروب سرييييع .. وفجأة غزالين صغار طلعوا من خلف العشب الكثيف اللي أمامنا .. وجري وهروووب وراء الغزلان الكبار

اثاري عائلة كانت مقيله !! واحنا مادرينا عنهم !!

توقف المساعد للمرة الثالثه .. فرحنا وقلنا الثالثه ثابته

لكن طلع بيت عنكبوت في الطريق !! يحذرنا منه

نجم / هو احنا ناقصنا عناكب !!

تكلم المساعد لأول مره معانا / انتبهوا ترى فيه ثعابين في الغابه !! وكثيره كمان !!!

نجم / نعم ياخويا !!!! الحين تنبهنا بعد ساعتين مشي !!!

عبدالرحمن / اقول اتصل على رضوان .. خلي يجي يأخذنا

نجم / أي والله تعبنا من المشي .. لنا ساعتين ونص

جلسنا على الارض أمام سهل كبير بانتظار السياره لتقلنا ..

خمس دقائق .. ونشوف غبااااار كثير !!

وقفنا .. ولا ياجماعة الخير قطيع من الجواميس البرية تجري وتركض نحونا !!!



ياولد !! يارجل !! فتح عينك مزبووووط !!

قطيع من الجواميس حوالي عشرين جاموس مابين صغير وكبير .. مقبل علينا بكل قوة .. ويقودهم جاموس كبيرررر

ويقرب القطيع ويقرب !! وأصبحت المسافه حول 100 متر

والله جات في بالي الأفلام الأمريكية !!!!

تملكنا القلق والخوف .. تسمرنا في أماكننا !!

حتى المساعد الخبير وقف متصنماً !!!

خمس ثواني ونحن نفكر !! ايش نسوي !! ايش نعمل !!

نهرب !! طيب وين نرووووح !! مدعسين مدعوسين !! مافيها كلاااام

والله يا اخوان قلت لنفسي / اخرتها بموت بجاموس بري في أدغال جنوب أفريقيا !!!!

التفتنا نحو شجره نختبئ فوقها .. او صخره نختبئ خلفها

وشوف النحااااسه !! ولا شجره كبيره !! ولا صخره !!

ميتين .. ميتين .. الله يرحمنا

بعد الخمس ثواني .. جاء وقت الدعاء

رفع الجاموس القائد رأسه .. ورأنا ونحن واقفين أمامه

وفرااااااامل قويه جداُ جداُ

وتوقف القطيع معه

غباااااااار انتشر فوقهم .. وبالكاد رأيناهم من أثر الغبار

كل القطيع ينظر فينا !! يتفحصنا !! ايش اللي واقف أمامهم !! عدو ؟ ولا صديق ؟

الحمدلله طلع القائد عاقل .. ولف الى الخلف وتراجع وانطلقوا عائدين من حيث أتوا .. خايفين

وضعت يدي على ركبتي اتحسسها .. ويدي الاخرى على قلبي الذي يدق بكل قوته .. وبطني الممغوصه .. وسجدت لله شكراُ

والله يا اخوان موقف لن أنساه في حياتي

هل فقط سأصاب !! وهل هي اصابه خطيرره !! أم ننجو ونهرب !! أم كنا سنموت !!

الحمدلله حمداُ كثيراُ قدر ولطف ..

حضر الشباب بخفى حنين .. ولم يصيدوا شيئاً

وتحمدوا لنا بالسلامه بعد سماعهم لقصتنا

جينا نصيد .. وكدنا ننصاد

يتبع ..

استمر البحث والتجوال





ولا يزال الشوك والزرع عاااالي


وتوقفنا للراحه بوسط السهول الجميله





ابوحمزه وهو يراقب بالمنظار ويبحث ويرصد


بحثنا استمر اكثر من خمس ساعات متواصله

ولكن دون فائده .. فغزال الامبالا صعب صيده !! خصوصاُ في وجود الشجر والعشب الكثيف !!

رجعنا الساعه الواحده والنصف ظهراُ ..

تعبانين .. مرهقيين .. جيعانيين

وضع الطباخ الغداء ( كبسة لحم الغزال .. صيد الأمس ) وعمل بعض اللحم مسلوق مع شوربه



كبسة الغزال



كانت الشوربه مش بطاله .. ولحم الكبسه كان عادي

يتبع ..

على الساعه الرابعه قرر الشباب العوده للمقناص

ولكني لم أرافقهم لشعوري بالتعب من رحلة الصباح اللي استمرت حوالي خمس ساعات

اخذت لفه في المحميه للتعرف عليها .. وقمت بالتصوير

جاني الطباخ مامادو .. ورافقني قائلاُ / صورت السبا ؟

معقوله ؟ سبا هنا ؟

فأدخلني مبنى .. فيه سونا .. وبخار .. وغرفة مساج .. ومسبح بمويه داااافيه

والله شئ حلو وجميل .. مساج وسونا هنا في الغابات !!!

غرفة المساج


غرفة السونا




المسبح الداخلي الدافئ





بعده رحنا لمبنى كبير يصلح للعوائل الكبيرة



غرف النوم .. كبيرررره


صاله مع طاولة طعام ومطبخ


صاله مع المدفاه والتلفزيون


كما يوجد عدد اربع غرف نوم .. وثلاث حمامات .. يعني مبنى يصلح لعشرين شخص بالراحه

مامدو قال / ان المحميه تستقبل القروبات الكبيره والعوائل والاطفال ..

والرجال يذهبون للصيد .. وأحيانا بعض النساء يرافقونهم للنزهه

بعد ذلك وصلنا لمنزل كبير .. تبين أنه لصاحب المحميه شخصياُ

ويستقبل فيه أحيانا كبار الشخصيات .. ورضوان ينام به بالوقت الحاضر

صوره للمبنى من الخارج


صوره من قريب .. ومامادو مشخص فيه


على الساعه الثامنه مساء عاد الشباب ومعهم ثلاثة طيور فقط ( القطا – دجاج حبشي – حباري )

نجم / ما لقيتوا أرانب ؟

أبوسعود / لا تذكرني ياشيخ .. دورنا ولفينا .. مافي للأسف !!!

نجم / وليه تأخرتوا كذا ؟

أبوحمزه / رضوان رمى غزال يقول لصديق طلبه منه .. لكنه شرد وهو مصاب .. وجلسنا ندور ونلف عليه .. وأخذ مننا وقت طويل ولا لقيناه !!

أبونمر / يارضوان .. بالمناسبه .. إذا احنا صوبنا غزال وهرب .. ولا لقيناه .. يحسب علينا ؟ وندفع حقه ؟

رضوان / طبعاُ .. حتى لو ما مسكتوه .. لأنه مصاب وحيموت بعد فتره .. والمحميه ما استفادت منه .. فاحنا نعتبركم صدتوه وتدفعون حقه !!!

أبونمر / هيا هذا اللي كان ناقصنا !! فتح عينك أنت وهو بعد كذا .. مو ناقصنا ندفع فلوس على حاجه ما اكلناها ولا استفدنا منها !!

نجم / تعالوا اوريكم شئ .

واخذتهم لمبنى المنتجع الصحي حيث السونا والمسبح الدافئ

اندهشوا .. وسألنا رضوان عن سبب عدم اخبارنا بهذا المنتجع ؟

فاعتذر .. وتحجج بالنسيان

ملاحظات عديده على الاخ رضوان !!!

الاولى / عدم الذهاب مباشرة للاماكن الجيده والادعاء بانها لمحميات أخرى !!

والثانيه / حملنا تكلفة ماصاده !! بدون أن نطلب منه ان يصيد !!

والثالثه / عدم اخبارنا بالسونا والمسبح !!

والرابعه والاهم / عدم اخبارنا من البداية بأن كل غزال له سعر مختلف !!

أنا باذكر هذي الملاحظات للاستفاده .. والانتباه لها

الساعه عشره ونص جهز العشاء

وكان كبسة طيور وشوربه .. والطعم جيد

وبعدها عينك ما تشوف إلا النوووووم تجهيزاُ لرحلة ( صن سيتي ) غداُ ..

يتبع ..

ملاحظات مهمة وصادمة عن رضوان
يعني رحلات الصيد مكلفة جداً ولكل شئ تصيده سعر
شفت كذا اعلان عن رحلات صيد بجنوب افريقيا
وما تطرقوا لهذه النقطة والمفروض يقولون من بدري
فيه غزلان قيمتها غالية ولو صدتها مشكلة


فيه مطعم في كيب تاون يقدم لحم الغزلان مشوية
وكل سيخ من نوع مختلف
أرخص لكم لو رحتوا له ههههههه


رحلات الصيد لها طابعها الجميل
رغم السلبيات ألا أنكم ما راح تنسوا هذي الرحلة



معلومات جداً رائعة عن رحلات الصيد
متابعين يا عسل

انت تخيل ياباشا ان مقناصك سبعه ايام

ووفقك الله وصدت من اول يوم غزال الامبالا حقك

تجلس بقية الايام السته تتفرج !! وتاكل فصفص !!

ماعندك الا طيور ولا ارانب

ما الطيور عندي جنب بيتي الله مكثرها !!!

ولكن عموما رغم السلبيات

فالرحله كانت ممتعه للغايه

وكنا مبسوطين جدا

يمكن المناخ الرااااائع كان له دور

ماشاءالله الرطوبه وحرارة الشاي يابت نتيجه حلوه وفكره جميله للسفر
توني في بداية التقرير وكالعادة تقاريرك روعه يا نجم