السلام عليكم ورحمة الله وبركاته
اكتر شي يحير الشخص ايش يطبخ لما يسافر بالذات لما يروح لبلد ما يناسبه أكلها أو بلد غالية أو ما يحب ياكل غير طبخ منزلي أو عنده اطفال يجوعو في اوقات متأخرة فهنا تبدا مشكلة صغيرة وهيا ادوات الطبخ أو مقادير الطبخة أو بهارات أو ماشابه ... (كتير اوقع في دي المشكلة)
طيب هنا الواحد يحتاج أكلات سريعة سهلة ومقاديرها خفيفة
في قاعدتين هنا لازم نحطهم في الحسبان
* مانبغى نتقل شنطة السفر( يعني مابدي أجيب معايا شي من بلدي) (اكتر جملة اكرهها ..لا تشتري مافي مكان في الشنطةهههههه)
* نحاول نجرب منتجاتهم وحصادهم( ننزل نشتري من سوبرماركت)
*لازم طبخة بسيطة ماعندنا وقت ازا في الصباح (ورانا يوم مليء) ازا في المسا ( ورانا نوم وتعبانين)
فضلا لا امرا كل صديق يعلق يكتب اسم طبخة جربها ومقاديرها
ابدأ انا
شكشوكة.. زيت زيتون وبيض وطماطم وفلفل رومي (اي لون /حار او حلو او بارد)وبصل وملح وفلفل اسود وجبن سايل
الطريقة : في طاوة نصب زيت زيتون بوفرة ونضيف البصل المقطع مربعات لما يتغير لونه نضيف الطماطم المقطع مربعات بعد تقليبتين نضيف الفلفل الرومي مقطع مربعات بعد تقليبتين نضيف البهارات لما تنشف مويا الطماطم يعني تقريبا ٥ دقايق ازا مو اكتر بعدين ملعقة جبن سايل بعدين البيض ونقلب دقيقة..وبالعاافية
(الكمية على حسب عدد الأشخاص)
رز بالتونة: زيت زيتون ورز وبصل وتونة وطماطم وتوم وملح وفلفل أسود وكزبرة ناشفة
الطريقة: نصب زيت زيتون وفير في قدر ونضيف البصل شرايح لما يتغير لونه نضيف التوم شرايح ونقلب مرتين ثم نضيف الطماطم المقطعة مربعات أو المفرومة * ( في زبدية نحط طماطمتين كبار ونصب عليهم مويا مغلية ونستنى دقيقتين حتصير القشرة لينة نقشرها وفي زبدية تانية نعصر الطماطم بيدنا لما تصير كأنها مفرومة بالخلاط) ثم نضيف البهارات ونحط التونة بدون تفتيت زي ما هيا نقلبها من علبتها بعدين نحط كاستين الرز أو حسب الكمية المطلوبة ونصب مويا عليهم إلين نغطي الرز بسانتي..نغطي القدر ونستنى لما يستوي تقريبا ١٢ دقيقة لاحظو اننا ما قلّبنا الرز مع الخلطة لأنو حنقلب القدر في صحن..وبالعااافية مع سلطة خضرا..ما اعرف ازا في بلدان تانية يسموها كبسة تونة يمكن
*( لاحظو اني استخدمت نفس المقادير في الطبختين يعني ما كترت مشتريات من السوبرماركت في منطقة تواجدي ..يعني يمكن حتخلص الاغراض في نفس اليوم )


تسعدني زيارتكم لموضوعي ومشاركتكم ..الموضوع ما يخص اهل الشقق فقط كمان اللي يسكنو في فنادق وماعندهم مطبخ نقدر نساعدهم بأفكار سريعة وبسيطة
مثلن (بالنسبة لي ضروري نواشف وفواكه الخضار على طاولة الطعام )
اسئل الله لكم سفرات جميلة بصحة وعافية