ما شاء الله


الحمد لله انك نزلتي موضوع عن تركيا لان لي فتره ابي انعش ذاكرتي بهذي الاراضي الجميله


لكن عندي ملاحظه صغيره ( نبي تفاصيل اكثر السكن السياره هل الاسعار نفسها )


بورصه جميله جدا ولي عوده لها

ابتديت فيها من شهر أغسطس إلى شهر نوفمبر ٢٠٢١


اكيد تقصدين 2020


الله يونسكم بخير يارب 90 يوم رحتوا غير بورصة وصلتوا الشمال التركي ايش الجدول

حي الله بليمونتنا الحزينه
الاجواء بالسفر وقت الكرونا تخوف
مع ان وايد سافرو تركيا بهالوقت عليكم بالعافيه
الصور طبعا شغل عدل
والتفاصيل حلوة قواج الله متابعين باستمتاع

نكمل معاكم يومياتي في أراضي تركيا الجميله


وتجهيزات السفر بزمن كورونا

وأول تجهيز كان لزمن كورونا علبة ماسكات كمام وعلبة قلافز ومناديل معطره ديتول ومعقم سنيتايزر حجم كبير وحجم صغير ع عددنا إلى مسافر كل من في جيبه علبه وكمامات ذات جوده عاليه للشباب اطلبوا من النت غسيل ولبس

انا طبعا حتى ديتول أكبر حجم ماخذه معاي بالجنطه ع اساس ماعندهم الأصلي وطلع كل شي عندهم بس ديتولنا احلى من ديتولهم (:


طبعا ماخذه علبه علبه لأنه عارفه تركيا بلد مصدر لهالمستلزمات إلى كل دول العالم كانت محتاجته

فأنا حسبت حسابي بس حق اول الايام وتالي اشتري منهم

وماقصرت الحلوه كل ماطلعت اشترت ماسك ذات جوده حلوه خام مخيط هناء ميد ع قولتهم اخذ لعمري واحفاد امي و لخواتي وامي اما الشيبان واخواني ادري مايلبسون جذي سوالف حدهم اسود والا الطبي مال المستشفى



انصدمت يوم اني وصلت بـ التزام الشعب بالقوانين ومافي مجال للعب والغشمره والتهاون في امه خير واحد يفصخ ينزع الكمام أو م لابس بالمره سجن أو مخالفه غرامه أو يكتب تعهد طبعا القانون ماشي ع السواح والشعب الكبير قبل الصغير الغني قبل الفقير لاتقول انا وزير ولاتقول انا شحات مايمشي هالكلام التزام ويعجبني هالشي وفشلني بنفس الوقت كدوله بحجم تركيا وعدد المواطنين إلى فيها والسواح واقدرو يلتزمون ويخافون عكس بعض البلدان الصغير بالساحه مقارنه فيها ومايلتزمون



مستحيل ندخل مول مطعم نركب تاكسي قطار الا الكمام الماسة لابسينه والا الموظف يحرجك أو السايق

وهذا شي حلو صراحه ومن صالحنا

والمعلمات بكل مكان وبكل محل ومطعم وع كل طاوله طعام وحتى بالتاكسي اهو يعطيك أو تشوفه حاطه لك بالسياره يحليلهم حريصين علينا وع أعمارهم

.
.
.
بالنسبه للوقايه مااقدر انقص وابخص بحقهم مع العلم انه عدد الحالات عندهم وايد رغم هالحرص والقوانين لكن للأسف بعض من الشعب ماكان يلتزم إذا فيه كورونا مايلتزم بالحجر لا يطلع وعادي ومايعلم احد

صادفت وايد ناس فيهم كورونا ومحجورين فكانو اعيالهم واهلهم وحبايبهم يتواصلون معاهم عن طريق البلكونه أهم تحت وأهم فوق والا من الدراويش النوافذ الشقق جيران وصادف عماره كامله اي مبنى كامل سكاني فيهم كورونا فكانت كلها محجوره ومخلين سياره شرطه عند الباب عشان ولا واحد منهم يتجرأ ويطلع من بيته ومن باب العماره

ومرات كنت اتمشى بحديقه الكويتين لونابارك بعض الشباب الكويتي المراهق مايلتزم وفاصخ الكمام يجونهم الشرطه ينبهونهم ويشرط عليهم يلبسون جدام عيونهم وهالشي حلو بعد

وانا مره توني طالعه من الشقه راكبه السياره مامداني اطلع من الشارع والا سيكل شرطه يوقفني يقولي وين الماسك قلت يحافظ وياستار انا بسيارتي وتوني راكبه وطالعه َمن حارتنا حتى مامداني اشغل المسجل واحط إبراهيم تاتلس. قالي الحين تلبسينه قلت ابشر ع هالخشم ماطلبت الا حقك


٩٠ يوم وانا اشوف انضباط وحرص للأمانه وكلمة حق اقولها ومااجذب عيوني

يا اما شفت فرق عسكريه من ٥٠ عسكري تالي الليل تنزل ع أماكن المطاعم المفتوحه وتشوف وتجيك ع الي موجود لابسين كمام والا وكذلك بين البيوت والشوارع والحداطق والمطاعم والمؤهلات عسكر جواله تمشي ع ارجولها وكذلك بالسياكل الموتر والدوريات كلهم يشوفون ويجيك ن ويراقب ن ويبحثون ع المخالف

واخر شهر صار قرار غرامه المخالف سائح والا مواطن غرامه ٩٠٠ ليره وبالنسبه للأتراك هالمبلغ جدا غالي وايد موكل من يقدر عليه ويدفعه وحتى احنا السواح هم بعد عندنا وايد المبلغ إذا كان العدد أكثر من شخص فيهم سفره حق النمسا اسبوع


صادف في عايله كويتيه خالفهم ٤٠٠٠ليره عشان بس الكمام وغيرهم وايد


سيارات الإسعاف ٢٤ ساعه تسَمع صوتهم وتشوفهم قواهم الله ويعطيهم الف عافيه ملائكة الرحمه في الأرض والمستشفيات فل فل مصابين كورونا وموملحقين مساكين عليهم


انا من ظمن تجهيزات قبل السفره كل الأعشاب والزهورات والمطيبات الحاره اخذتها معاي وبعد أخذت ادويه احتياط

قلت لاسمح الله واحد منا استمرض والا صار فيه الا انا عندي وحاسبه احسابي



وسلامتكم




بعد هالقرقا والسوالف والكلام الي قلته لكم احتاج شاي و سميت يطيب خاطري وينسيني

Simit sarayi

أكثر واحد احبه وارتاح بالجلسه فيه موقعه ف شارع هيكل الخلفي


اني رديت الكويت وخليت بورصه لأهلها وناسها








تم الإرسال من VOG-L29 باستخدام Tapatalk

بداية جميلة

الحمد لله على السلامة

اشتقنا لتقارير ليمونه

ما شاء الله الرحلة مطولة

يعني راح نستمتع معاك بصور كثيرة ولقطات متعددة



الصور روعة

منورة بعد انقطاع

مـــــــــــــــــــــــــــــــــبـــــــــــــــ ــــــــــــــد عـــــــــــــــــــــــــــــــــــــــــــة دايــــــــــــــــــــــــــــــــــــــــــــــم

الحمدلله والله الحافظ
المهم الواحد يلتزم بالتعليمات
تمام انج مظبطة ربعج بالحمايه
شوقتينا على السميت والشاي التركي
بالعافية