تقرير آخر سفره الى كاليفورنيا ديسمبر 2019 (قبل الكورونا)

العنان · 07-06-2021, 12:42 PM

Los Angeles To Las Vegas

صباح يوم 16 ديسمبر كان موعد انطلاقنا من لوس انجلوس الى لاس فيغاس، من اول ماقعدنا الصبح كان الحماس عندنا ماله حدود الجو كان حلو و البنات متحمسين للسفر وبالاخص لحضور استعراض ديفيد كوبرفيلد ، بعد ماخلصنا فطور نزلت الشنط للسياره ورجعت فوق للشقه حتى ابدل وبعدها نمسك الخط وهنا كانت بداية النكبه !! جيت ادخل للشقه فتحت الباب ولما بغيت اسكره واقفله بالمفتاح الا القفل اخترب .. كان هذا الشي الوحيد اللي ناقصنا ، كانت الساعه 8 الصبح تقريبا حاولت في القفل مارضى يعتدل حتى اني بدلت ورحت لقيت محل مقابل بنايتنا متخصص بالمعدات وادوات المنزل اخذت لي عدة سكاريب وقمت احاول محاولات يائسه ولا ضبط معاي طبعا كان معاي رقم صاحبة الشقه واتصلت عليها كذا مره وارسلت لها رسايل لكن عمك اصمخ الوقت كان وهل وصادف يوم الاثنين اول يوم دوام بعد ويك اند يعني هالكفار كل واحد راسه منتفخ من السهره .. في الاخير قررنا نغامر طبعا احنا دافعين سكن في فيغاس وغير تذاكر العروض يعني لازم نسافر ، المغامره كانت ان نقفل باب البيت بالترباس من الداخل واخوكم في الله يطلع من الدريشه مثل سبايدر مان.. الحمدلله ان واجهة الشقه كان فيها دريشه كبيره جنب باب المدخل قفلت الباب بالترباس ونطيت من الدريشه ، وخليت الدريشه وهي سحب مردوده مب مسكره من باب الاحتياط لان ارسلت رساله لصاحبة الشقه وقلت لها اللي صار وطلبت منها ترسل احد يصلح الباب واني ماراح اكون بالشقه لمدة 3 ليالي ، طبعا اخذنا معانا كل شي غالي بالشقه وتركنا بس الملابس وركبنا السياره واستودعنا الله ماتركنا ورانا.. بصراحه كان مزاجي جدا متعكر لكن قلت سبحان الله علها خيره ان الله رايد نتأخر ثلاث ساعات ممكن تكون خيره عن شي ، حطينا عنوان الفندق في القارمن وكانت المسافه تقريبا 5 ساعات وشوي وفي الطريق مرينا قهوة بلو باتل وتقهوينا وبعدها قبضنا الخط

.. الجو كان حلو والحمدلله الاجواء في السياره بدت ترجع حماسيه بعد كوب القهوة. قبل وصولنا فيغاس تقريبا بساعه ونص مرينا على منطقة الاستراحات اللي فيها محطات البترول والمطاعم شيكت بترول ومرينا اخذنا لنا وجبات سريعه اكلناها بالسياره وكملنا طريقنا ، طبعا كل ماقلت المسافة زادت اللافتات الاعلانية عن فيغاس من فنادق او عروض استعراضية، شوي شوي بدت معالم فيغاس تبين لحد ماوصلنا شارع السترب وهو شريان حياة فيغاس فنادق ولافتات ومحلات تجاريه على يمين ويسار الشارع متعه في النهار ومتعة بالليل اكبر.

المهم وصلنا فندقنا ووقفنا السياره ونزلنا الشناط ورحنا نسوي التشيك ان.

حجزنا كان عباره عنه سويت غرفتين نوم وصاله مع غرفه ثالثه كونكتد والمساحة كانت جدا كبيره، رتبنا شنطنا وكل واحد دخل خذ شاور وبدل وصلى وبعدها انطلقنا في ربوع فيغاس، تغدينا في احد المطاعم بالمول بعدها قعدنا نتمشى لين المغرب.

طبعا كان عندنا عرض بالليل لديفد كوبرفيلد فقلنا نرجع الفندق نصلي ونريح ونطلع قبل العرض بنص ساعه، وحياتكم دخلنا نريح قعدنا من النوم ثاني يوم ولاحسينا باعمارنا تعب الطريق اثر علينا والوقت كان متأخر والمشكله ضاعت من ثلاث ساعات في لوس انجلوس بسبب باب الشقة، طبعا التذاكر كل عام وانتوا بخير راحت علينا واضطرينا نشتري تذاكر جديدة بسعر مضاعف لانه في نفس اليوم وغير ان المقاعد المتوفره هي اللي قريبه من المسرح وكانت غاليه، لكن الحمدلله حصلنا التذاكر.

Abu Muataz, q8ya metnaqla, آخـــرفـــرصـــة و 4 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الي سيرلانكا 2019 ديسمبر	artist dreamsss	بوابة الهند وسيرلانكا	16	14-02-2022 10:06 AM
مشورتكم في رحلتي الي الفلبين مع العائله ديسمبر 2019	Dawas	بوابة الفلبين	2	10-11-2019 08:46 AM
شهر العسل تايلند ديسمبر 2019	alshaia	بوابة تايلند	7	23-09-2019 09:42 PM
شهر العسل تايلند ديسمبر 2019	alshaia	بوابة تايلند	0	06-09-2019 09:25 AM
سفره شتويه نهاية ديسمبر	موجة بحر	بوابة البوسنة	12	16-10-2018 05:41 PM