ونكمل ....



توقفنا للغداء في هذا المطعم ، أخذنا 2 ستيك وشوربة مشروم وشوربة دجاج و2 سلطة سيزر مع مشروبات غازيه .... طعم اللحم ودرجة الاستواء وطريقة طبخهم لشوربة المشروم كان شيء يرسخ بالذاكرة .... السعر كان بحدود 700 غريفنا يعني تقريباً 100 ريال . كنت أعيد النظر للفاتورة أبي أتأكد أني قريت الرقم صح .... يا رخص البلد ومطاعمهم في قمة النظافة والتزيين أما المذاق فيغلب كل مطاعم الدول اللي زرتها سابقاً .



أكملنا طريقنا وتوقفنا لشراء التوت الأزرق من على الطريق .
















تعمدت أخذ صور للطريق من مراحل مختلفة كما رأيتم بالصور من أجل التوثيق ... لا حفر ولا طريق مكسر مثل ما نسمع وكل هذا الكلام غير صحيح وأي واحد يمر مع هذا الطريق بين كييف ولفيف ويجد أن الطريق يختلف عن هذه الصور في أي مرحلة منه ، يكتب لي هنا في التعليقات . الطريق هاي وي كل اتجاه بشارع مستقل وفي بعض مراحله يكون طريق واحد "رايح جاي" ولكن الطريق مرصوف بهذا الشكل على طول امتداده .

وصلنا لفيف مع بداية الليل الساعة 23:00 وفضلت المبيت فيها للإستمتاع بتكملة الطريق في اليوم التالي في الصباح ورؤية المناظر الجميلة وأيضاً كنت مرهق .



أخذنا غرفة في هذا الفندق Fest Hotel تقييمه على بوكينج 9.3 وسعر الليلة 1375 غريفنا يعادل 192 ريال شامل الأفطار وموقف خاص للسيارة .





في صباح اليوم التالي وبعد الإفطار لاحظت أن شريحة البيانات توقفت عن العمل واستلمت رسالة من شركة Vodafone تقول أنني استخدمت مشاركة الانترنت من دون دفع رسوم المشاركة 50 غريفنا 7 ريال وبحثت عن أقرب فرع لهم عن طريق قوقل ماب وكان على بعد 300 متر في مول بجانب الفندق ورحنا له مشي ، وقام الموظف بشحن البطاقة 50 غريفنا وفعل خاصية مشاركة الانترنت واشتغلت ... وعلى كذا الأفضل تفعيل هذه الخدمة عند شراء الشريحة من المطار لكن الموظفة اللي في المطار ما بلغتني .

أخذنا السيارة وطلعنا إلى سنتر لفيف تمشينا شوي وبعدها طلعنا متجهين إلى بوكوفل وكانت تبعد 250 كيلو تقريباً والطريق كله واحد رايح جاي وبنفس جودة الطريق بين كييف ولفيف . كنت خايف من طرقهم لما استأجرت السيارة ولكن اللي شفته غير اللي قريته عنها .











محطات الوقود نفس طريقة المحطات في أوروبا الغربية وبنفس طريقة الدفع ويوجد وجبات سريعة ووجبات مبرده وأيضاً دورات المياه بداخل المحطة نظيفة وتشم ريحة التعقيم من تدخلها وكأنه لم يدخلها أحد قبلك ، هذا في كل المحطات اللي توقفت عندها وأفضلها محطات OKKO و محطات Wog فيها خدمات متكاملة وفيه محطات غيرها لا تقل عنها ولكن نسيت أسمائها ، سعر لتر البنزين A95 تقريباً 28 غريفنا يعادل 4 ريال .







وصلنا بوكوفل ، وهي قرية جميلة تقع على جبال الكاربات في غرب أوكرانيا وارتفاعها 920 متر عن سطح البحر وهي مقصدنا لقضاء الإجازة .





يتبع ...

ونكمل ....

وأخذنا استوديو أربع ليالي في الدور الأرضي على مرتفع وله إطلاله خلابة ، اسم السكن Guest House Velet وتقييمه 8.5 ومبلغ الليلة 855 غريفنا وهذا يعادل 120 ريال .





مناظر من الإطلالة :

















بالقرب منا فندق Villa Livorno على بعد 300 متر ، مطعم الفندق رائع وقائمة الحلى متنوعة وعندهم اسبريسو قوي ... أعجبني .







وبجانبه مباشرة فندق Villa Blanc ، مطعم هذا الفندق أعطيه 10/10 ومذاق الأكل طيب جداً.





كان الفطور دائماً في Villa Blanc أما الغداء والعشاء كنا نكرر الزيارة بين Villa Livorno و Villa Blanc و أحياناً مطاعم ثانية .

هذي الجلسات الخارجية للمطعم في فندق Villa Blanc .

















هذا هو المنيو ... لقيت أني مصور جزء منه ، ممكن أحد قاطعني وقت التصوير ونسيت اصور الباقي مع الأسف قائمة الإفطار ما هي مصورة .... هذا المطعم رائع ... انسى إن صحنك يرجع على حاله .







وبعد هذي الفنادق بـ 100 متر فيه كوفي شوب اسمه Mafa



كانت المطاعم والقهوة وكل شي بجوارنا ما يحتاج نركب السيارة . وسعر الليلة في الفنادق اللي ذكرت أسمائها هو 1900 غريفنا يعني بحدود 270 ريال لليلة ولكن الاستوديو اللي أخذناه كان يعطينا خصوصية أكثر وفي الدور الأرضي وله تراس خرافي لذلك لم نفكر بالانتقال إلى الفنادق المجاورة .

كنا نمضي الليل دائماً في الجلسات الخارجية لمطعم فندق Villa Blanc الأكل فيها لذيذ وجودته عاليه ولا يوجد إزعاج أو صخب أو ناس تصايح والمتواجدين في المطعم عوائل أوكرانيين أو أوربيين بشكل عام ومعهم أطفالهم وساكتين بس يقرقعون بكؤوس النبيذ مع ابتسامات صامته والأفضل من هذا كله إن ربعنا مسنترين حول راديسون بلو وفي المناطق بجواره بوسط الوادي في مركز القرية وبكذا أخذنا راحتنا تمام التمام .

يتبع ....

للأسف أخي سالم بعض الأشخاص الله يسامحهم يخوفك من البلد ويذكر العيوب ويزيد عليها بعد ، طبعاً كل بلد في إيجابيات وسلبيات لكن التخويف والأوفرة الزايدة تخليك متخوف لكن ما إن تزور البلد تتلاشى معظم هذه المخاوف والكلام اللي سمعته
للأمانة حمستنا لزيارة أوكرانيا وأنا بعد توي بالصفحة الأولى من التقرير ويستاهل يكون أفضل تقرير عن أوكرانيا ولا يهونون باقي الأعضاء
مو مستوعبة سعر المطاعم وخاصتاً مطعم الإستيك وهالأسعار بعد أزمة كرونا يعني قبل أتوقع كانت أرخص