السلام عليكم ورحمة الله وبركاته
انه صباح يوم السبت 21/03 وبعد قضاء أول ليلة فى جنوب أفريقيا
طبعا كالعادة فى رحلاتى مضيعش وقت للنوم
النوم كان مريح الجو هناك بليل معتدل فى الوقت ده بس مع رطوبة بسيطة
صحيت من الفجر
جهزت الفطار والشاى وطبعا الغرفة فيها كل شئ







"ثلاجة وميكروويف وغلاية.... وحتى أطباق"
والصراحة صاحب المنزل مهتم جدا بالغرفة ويمكن اكثر مما نحتاج

طلعت البلكونة للفطار






ودى الفيلا من بره











صحيت صديقى واللى كان على طول بيحب النوم وبيأخرنا

زى ماقلتلكم صاحب البيت كان ساب لنا خريطة لمبومالانجا وطريق البانوراما
وكان قال انه هيحتاج منكم يوم كامل
بس قبل ما نروح كان عندنا معاد مهم جدا فى

Sabi River Adventure

ودى احد الانشطة المشهورة جدا فى مبومالانجا وهى التجديف واختراق النهر
تقدر تعملها فى نهرين يا وايت ريفر فى الكانيون ودى للمحترفين
او نهر سابى للهواة اللى زى حالاتى

قبل ما اسافر كنت مجهز كل حاجة بالايميل مع الناس

الصفحة بتاعت الاتصال
Contact Us | Sabie River Adventures

وكان فى جولتين واحدة ليوم كامل
او نص يوم وتم الاختيار وكان السعر 320 راند للفرد لمدة 3 ساعات
وهم بيبقوا اجازة يوم الحد
وكان معادنا السبت الساعة 9 صباحا
وبعتلى العنوان وعلى جوجل مابس وانطلقنا

ده باب البارك فى الفيلا



وسيارتنا المصونة مستنية اول المغامرات



تقريبا الطريق 45 دقيقة
ودخلنا وسط طرق غريبة وترابية بس الحمد لله وصلنا متأخرين
بس الناس كانوا منتظرين وصولنا واول ما وصلت رحبوا بيه وسألونى ليه اتاخرت
وبعد كده خدونا فى عربية الى النهر
كان بعيد تقريبا 5 دقايق
وشرحولنا اساسيات الرافتينج







كل مركب عليه اتنين اللى قدام ده الموجه علشان بيبقى شايف الطريق
واللى ورا ده القائد وهو اللى بيتحكم فى حركة المركب اكثر
كان الطريق فى النهر 6 كيلو تجديف وهناخدهم فى 3 ساعات مع راحة فى النص

وانطلقنا
واول ما نزلنا المايه مفيش 10 ثوانى وكنا مقلوبين فى المايه
بس النهر مش سريع قوى انه يجرف حد والعمق مش كبير
وكانوا شرحولنا ازاى نعوم ونتحرك
وطبعا خناقة مين السبب
بس يعنى القلبة دى خلتنا نعرف نتحكم صح بعد كده ونمشى مظبوط





طبعا فى الطريق اوقات بيبقى فى صخور وزى شلالات صغيرة
وهى دى اللى بتعمل الإثارة





وطبعا هو نهر فى افريقيا
لازم يكون فى تماسيح





بس التماسيح فى النهر فى المكان ده بتبقى صغيرة ومش خطر
بس حذرونا من افراس النهر هى اللى خطر
بس الحمد لله مقبلنهاش

فى اوقات بيبقى النهر هادى جدا والتجديف سهل




وكان فى بريك نص ساعة فى النص وقدوموا شيبسى ومايه
واتكلمت مع الناس هناك وقالو لى ان احنا حظنا وحش السنة دى
لانه السنة دى وعلى الرغم ان الصيف موسم المطر لا انه تقريبا مفيش مطر خالص
والسنة دى من سنوات الجفاف وطبعا ده مأثر على مستوى المايه فى النهر
وطبعا كل ما المايه تعلى المتعة تبقى اكبر

وكملنا الطريق للاخر





ووصلنا وخدنا صور تذكارية مع بعض





ورجعونا بالعربية الى مقر الشركة
خدنا دش سريع هناك
واشترينا cd الصور والفيديو وكان ب 120 راند

وانطلقنا فى جولة فى طريق البانوراما

طريق البانوراما هو جولة فى أهم معالم مبومالانجا "مناظر طبيعية رائعة وقد تكون الاجمل فى جنوب أفريقيا"
بس المسافات فعلا بين الماكن كبيرة ولازم ليها يوم كامل
بس لضيق الوقت انا قررت عدم زيارة الشلالات
واشهرهم ماك ماك و برلين و ليشبون
mac mac fall , lisbon and berlin falls
لانى شفت شلالات كتير قبل كده و كمان لينا زيارة مع الشلالات فى الجاردن رووت

انا كنت مخطط لطريق لزيارة المعالم الطبيعية واتأكدت من الخريطة اللى معايا

وخدنا العربية من البارك بتاع الرافتينج



وانطلقنا الى اول وجهة وهى

The Rock Pinnacle




وكانت تقريبا الساعة 12 ونص الظهر

صور من الطريق









مناظر طبيعية رائعة










بداية الطريق من دينة خراسكوب Graskop وهى مدينة صغيرة جدا
وتعتبر نقطة الانطلاق الى طريق البانوراما




احنا دلوقتى فى خراسكوب وزى ما قولت اول مكان the pinnacle

واضح ان الخريطة سهلة جدا وللعلم تقريبا طول الطريق مستخدمتش جوجل ماب
الطريق واضح جدا وسهل وهتلاقى يافطة عند كل معلم تشير لمكانه

كل الماكن اللى عليها نجوم فى الخريطة هى من مزارات الطريق
لكن زى مقلتلكم ضيق الوقت حكمنا اننا نختار منهم
والحمد لله كانت اختيارات موفقة

وصلنا الصخرة
وكان رسم الدخول 10 راند للسيارة وهو تقريبا رسم موحد لكل المزارات
نزلنا نكتشف المكان



وهى دى الصخرة ومميزة علشان هى واقفة لوحدها وسط المكان المفتوح ده









ونكمل جولتنا فى المكان















شلال

نكمل المناظر الرائعة




كده تقريبا أهم ما يميز النطقة دى الصخرة والشلال
وفى كل مكان هتلاقى أماكن بيع تذكارات عند المدخل
لكنى لا أهتم

نتحرك الى الشمال الى God's Window

الخريطة تانى علشان اللى نسى




وده واحدة من أشهر المعالم فى مبومالانجا كلها
وصلنا وكان رسم الدخول 10 راند



والاسواق الشعبية اللى عند كل مكان





وهيبقى عندك اختيارين للتجول فى المكان



نروح اول مطل



طبعا الصورة مش هتوضح مدى جمال المنظر







طبعا المنظر على الشرق ناحية ماحفظة ليمبوبو وكروجر بارك واخيرا دولة موزمبيق



وطبعا مش هتشوف كل ده بس المنظر رااائع

وفى اماكن كتير للمشاهدة وفيها اماكن للراحة



قعدنا ريحنا شوية وكان معانا غذاء سريع كلنا وشربنا وكملنا المسير

الى الجزء الثانى وهو جزء Rain Forest الغابات المطيرة
وده محتاج لياقة بدنية شوية
بس يستاهل و طبعا الناس اللى بتسأل على المشى ده عينة بسيطة بس النهاردة





طرق رائعة فى وسط الغابات








وصلنا الى النهاية بعد تقريبا 10 دقايق مشى بس
ولقينا المنظر الرائع ده واخد الشرق مع الشمال





والنهر اللى هناك ده blyde river





وده اللى وجهتنا التالية هتكون ليه

رجعنا من حيث اتينا



ما اروع المنظر



ووصلنا مكان السيارات



ونرجع تانى للخريطة



احنا دلوقتى فى R534 و متجهين الى الشمال ناحية R532

بعد God's Windowعلطول فى نفس الطريق Wonder view
ولكن لما قريت عنه تقريبا نفس الفكرة ومفيهوش جديد



فكملنا طريقنا ووصلنا R532



وزى ما واضح الطريق مفيهوش اى حاجة
حتى شبكة الموبايل كانت ضعيفة جدا وتكاد تكون معدومة




هيقابلك اول حاجة Berlin falls
وزى ما قلتلكم لضيق الوقت مش هندخلها
نكمل الى الشمال الى Blyde River Canyon & the three Rondavels

ودى تعتبر أخر حاجة فى الطريق شمال مبومالانجا
حد بيسأل ليه مدخلتش Bourke's luck pothole
أقوله اصبر هندخلها واحنا راجعيين

وصلنا المكان المنشود وطبعا رسم الدخول 10 راند كالعادة
واكشاك التذكارات فى البارك بتاع السيارات



نزلنا اتمشينا للمطل وكان اول حاجة نشوفها the three Rondavels



وهم ال3 قمم اللى فى الصورة اللى فاتت



وواضح طبعا الارتفاع الشاهق وتحتينا النهر





يااه على روعة المكان





الصورة مش مبينة مدى روعة وجمال المكان



ولتحت موجود الكانيون و النهر



ونكمل طريقنا مع النهر فى اتجاه السد





ومهما اتكلمت عن جمال والمنظر ومدى الارتفاع مش هقدر اوصفه

سبحان الله







وكان فى ناس راكبة مراكب فى البحيرة تحت
بس للأسف مسألتش منين أركبها ومكانش فى وقت انى ادور عليها

وبعد ما شوفنا المناظر الرائعة دى تكون للاسف رحلتنا فى المكان ده انتهت
اتجها فى طريق العودة الى العربية




ومشينا فى طريق العودة الى خراسكوب

أستنوا أستنوا
مش قولنا فى حاجة هنزورها و إحنا راجعين

بالظبط Bourke's luck pothole
ودى موجودة فى R532

وصلنا ودخلنا وكان رسم الدخول مختلف المرة دى 90 راند



والمكان كان مش بس الصخور والكانيون
لا ده فى حديقة واماكن شواء يعنى ممكن تقضوا فيها يوم كامل



نزلنا نتمشى
وطبعا احنا جايين نزور الكانيون مش الحديقة







المشى كتير شوية فى المكان ده



وقربنا نوصل



واخيرا



تشكيلات صخور روعة
سبحان الله





روعة يا بانوراما




الصور مش كفاية لازم تشوفوا بنفسكم





يا سلام على القعدة وتحط رجلك فى المايه الساقعة







مكان كبير وواسع



نقرب اكتر من المايه من تحت



سبحان الله مناظر تهبل





حاجة من الخيال



كل دى مطلات







ومن الواضح ان خلاص وقت المغرب أقترب
فقررنا العودة



رجعنا نتمشى فى الحديقة
وواضح وجود القرود اللى بتضايق الناس اللى بتشوي وبتاكل





ركبنا العربية واتجهنا فى طريقنا للعودة الى الجنوب فى R532 فى اتجاه خراسكوب

طبعا عدينا ناحية اول شلال "برلين" كانت الساعة 6 الا ربع تقريبا
واخر المزارات فى الطريق هناك الساعة 6
وزى ما قلتلكم كان مش من ضمن اولوياتى للزيارة

وصلنا خراسكوب ودخلنا محطة البنزين وملينا العربية فول تانك ب 330 راند
وليتر البنزين هناك سعره من 10.80 راند لحد 11.20 وده حسب المكان او سعر اليوم
وسألت اللى فى المحطة على سوبر ماركت وصفلى واحد
وقالى بسرعة علشان هيقفلوا 6 ونص وكانت الساعة 6 وربع

وطبعا جرى على هناك وأول ما دخلنا قفلوا الباب علشان محدش يدخل

عمار يا مصر هنا المحلات بتبدأ تشتغل المغرب

اشترينا ماية وعصاير وكولا وظبطنا نفسنا
واشتريت انا وجبة سمك كانت ب 18 راند للغدا "وكان طعمه وحش"

وظبطنا نفسنا ورجعنا للعربية وشغلنا جوجل مابس منه على بيتنا فى نيلسبروت

طبعا الطريق بليل السواقة سهلة جدا مفيهاش مشاكل
بس هناك بعد المغرب بتبقى بلد أشباح
وعديت على كذا بلد أشهرهم سابى وكلهم نايمين
وصلنا نيلسبروت بعد ساعة وربع تقريبا ودخلت ريحت شوية
وكان فى ماتش فى الدورى الجنوب أفريقي اتفرجت عليه

تقيمى لليوم

1- Sabie River Rafting

طبعا تجربة رائعة وتستاهل ومناسب ليها جولة النصف يوم
اكتر من كده هيبقى زهق
التقييم طبعا 10\10

2- طريق البانوراما

أول حاجة الصخرة لو وقتك مزنوق زى كده اللى هتشوفوه فى الthe pinnacle Rock
هتشوفوه تانى فى باقى الاماكن ممكن تستغنى عنها
او تبدلها باى من الشلالات
تقييمى ليها 7\10

God's Window مكان متنوع فيها المناظر الطبيعية والغابات اللى تمشى فيها
تقييمى ليه 8 \10 وده لان المطلات مساحتها صغيرة و بتبقى زحمة
بس طبعا يستحق الزيارة

the three rondavels اروع ما فى الطريق ويمكن من أجمل ما رأيت
مناظر طبيعية خارقة والكانيون والسد وكل حاجة
وبالنسبة ليى قد تكون الاجمل فى جنوب أفريقيا
والتقييم طبعا 10\10

3-Bourke's luck pothole مكان رائع ومتنوع وفيه حاجات كتير
وزى ماقلتلكم ممكن تقضوا فيه يوم وتعملوا حفلة شواء
المناظر الطبيعية رائعة لكن مش زى the three rondavels التقييم 9\10
وده لان المكان فى كل الامكانيات
ولكن مفيش سوبر ماركت او مكان تشترى منه حاجات
على الرغم انه مجهز لقضاء يوم كامل للعائلات

دى الحاجات اللى انا زرتها لكن الطريق فى اماكن تانية
زى Berlin falls و lisbon falls وفى زى قرى تاريخية ممكن تتزار
وفى sudwala caves وعلى كلام صاحب البيت
انها مناسبة للزيارة وزيها زى كانجو فى اودتشرون

طبعا الطريق محتاج يوم كامل لو عاوز تزور كل المزارات
بس أصحاب الوقت المحدود زى كده يبقى ترتيب الزيارات حيب وجهة نظرى

1- The Three Rondavells
2- Bourke's luck pothole
3- God's Window
وبعد كده ممكن تزور شلال من الشلالات

وملحوظه المسافات بين المزارات كبيرة وشكل الخريطة خادعة
يعنى مثلا انا كانت الجولة 5 ساعات منهم ساعتين على الاقل سواقة

وللاسف وانا سايق بتبقى فى مناظر غاية فى الروعة
وخصوصا الصبح فى الطريق من نيلسبروت لسابى
وكان جو ضبابى وسحاب ومناظر خيالية بس صعب التصوير

كده يبقى أول يوم فى جنوب أفريقيا خلص
وكان ملئ بالمتعة الإثارة طبعا

وكالعادة فى رحلاتى نمت بدرى طبعا
بس النوم كان متقطع لانى مش قادر استنى والوقت مش بيمشى
وده لان ورايا مشوار من الفجر فى (كروجر ناشونال بارك)

الى اللقاء