رحلتي للمالديف ٢٠٢١ - الصفحة 2

أميرة اللي تحب السفر · 26-09-2021, 10:08 PM

رحلتي للمالديف ٢٠٢١

رحلتي كانت في سبتمبر، في وقت الاحترازات من كوفيد١٩

لطالما رغبت في توثيق رحلاتي وذكر العيوب والمميزات و النفع بتجاربي كما انتفعت بتجارب العديدين جزاهم الله خير، ووجت انه من الشاق القيام بهذه التقارير والمستهلك من الوقت، عرفت ذلك من خلال اعدادي لهذا التقرير ، واتمني الفائده لمن بحث عنها من خلال تقريري.

رحلتي كانت للمالديف من ١٩-٢٥ سبتمبر ٢٠٢١ تم التخطيط للرحله في وقت قصير في اقل من اسبوع والرحله لمده ست ليالي.لشخصين فقط

١- التخطيط للسفر:
أ-حجز الرحلات:
تم حجز الطيران علي الخطوط السعوديه من ابها الى المالديف مع ترانزيد الرياض لمده اربع ساعات في الذهاب و ترانزيت جدة لمده تسع ساعات في العوده، لم يتوفر اي رحله لابها على اي خطوط في هذا الوقت لذلك رضينا بالتسع ساعات.
رحله الخطو ط في هذا الوقت اتوقع تكلف حدود الست الاف ولكن احنا استخدمنا نقاط الفرسان ذهاب و عوده نقصنا كم ميل واشترينا اميال زياده.

ب-حجز الفندق:
بالنسبه للبحث في الفنادق كان محير جدا لان اغلب الفنادق متشابهه وعددها كبير جدا ، بالاضافه الى ان الاسعار متفاوته ومتقاربه احيانا، بحثت عن الفنادق و مراجعات الناس في المنتديات واليوتيوب ولكن اعتمدت اكثر شيء على مراجعات الناس في بوكينج والتقييم ، كانت النقاط الاساسيه اللي ابحث عنها هي، فيلا بحريه مع خدمات بتقييم عالي مثل السبا والمطاعم، كمان قربه من المطار كانت نقطه اساسيه لان الرحله اصلا متعبه من ابها ومانبغى نقل طويل ،متعب زياده، ممكن بعض الاشخاص يبحثون عن خدمات الغوص و الانشطه المائيه او نادي الاطفال، ولكن هذي ماكانت من نقاط اهتمامنا.
بعد المقارنات الطويله رسيت انا وزوجي على ((منتجع كونستانس هالافيلي))، اهم نقاط جذبتنا فيه هو قربه من المطار من ٢٥ الى ٣٠ دقيقه، التقييم العالي له في بوكينج.

ج-اجرائات المطار الفيزا والجمارك:
ماتطلع للمطار اي رحله قبل ماتكون ماخذ الجرعتين حتى للرحلات الداخليه.
طبعا تحليل ال PCR المالديف تطلبه يكون متسوي قبل ٩٦ ساعه، احنا سويتاه في مختبر والمختبر ورطنا ماطلعه لنا تاخر فيه ورحنا المطار مو معنا، اللي سويناه طلعنا لرحلتنا على الرياض وفصلوها لنا عن الرحله الدوليه، ،قررنا ان نسوي التحليل في مطار الرياض في الصاله الدوليه ٢وحجزنا موعد عن طريق الموقع للمختبر ، تطلع نتيجته خلال ساعه ونص او تختار تحليل اخر خلال ثلاث ساعات تقريبا تكلفته حدود ٧٠٠ريال. فيه نقطه مهمه المختبر لازم يكون معترف فيه ومعتمد وتقدر تشيك على المختبرات المعتمده من خلال موقع الخطوط السعوديه.
نقطه اخرى قبل الذهاب للمطار لابد من تعبئه استبيان التصريح الطبي قبل تروح للمطار وصلاحيته ٢٤ ساعه هذا رح يوفر عليك وقت كثير ويمنعكم من الوقوف في المطار لانهائه.
المنتجع تواصل معي عن طريق محادثات بوكينج، ولكن ما انتبهت عليها ولا فتحتها الا قبل السفر بيومين كانو يطلبون مني معلومات مثل الاسماء كامله ورقم الرحله والوصول عشان ينسقون لنا النقل من المطار عند الوصول. كمان ارسلو لي رابط استبيان التصريح الطبي ورابط اخرى مفيده اطلع عليها قبل السفر،

( الكود للرابط الصفحه والتطبيق حق الفندق من الفندق)

د-تجهيز الحقيبه:
لابد من حمل واقي شمس للجسم و للوجه لان الشمس تحرق حتى لو الجو بارد. كمان كريم طارد للحشرات والبعو ض ضروري خصوصا للاشخاص الماكثين في فيلا شاطيئيه -بالنسبه لي اشتريته ولكن ما احتجته ابداـ انصح بعدم حمل مناشف لانها تاخذ حجم في الشنطه والفندق يوفرها. انصح كذلك باحضار فرشاه الاسنان لان بعض الفنادق يعيدون استخدام الفرش بعد التعقيم (بالاتراسونك) وهو تعقيم غير مضمون. احضار بنطلون وحذاء مغلق، لان بعض المطاعم تشترط لبس معين وقت وجبه العشاء مثل تجنب لبس الشورت فوق الركبه والشبشب.
بالنسبه للماسك ومعقم اليد الطيران السعودي ماقصر اعطاني في كل رحله.
لابد من وزن الشنطه قبل السفر -فيه ميزان صغير ينباع في جرير وبعض الاماكن زي الدانوب وسنتر بوينت يوزن الشنطه عملي وانصح فيه- الخطوط السعوديه تسمح بحقيبتين بوزن ٢٣ كيلو للشخص وحقيبه في المقصوره ٧ كيلو، في الطائره المائيه اقصى وزن للحقيبه اتوقع ١٣ كيلو مو متاكده كم ولكن اقل من وزن حقيبه الخطوط. في كل الاحوال انا انصح بعدم الاكثار في الحقائب والاغراض. لان الفندق تقريبا موفر اغلب الاحتياجات حتي حقيبه الشاطيء موفرها( لاني طلعتها من شنطتي في اخر لحظه).

٢-يوم السفر:
ضروري يوم السفر الذهاب للمطار من بدري وتجهيز الشنط الليله اللي قبل، وضروري جدا تكون متواصل مع الفندق ممكن يفيدك بالاشياء المطلوبه منك في المطار وتعبئه الاستبانات وهذي الامور كلها.
بالنسبه لنا كانت رحلنا عشره في الليل وترانزيت في الرياض ٤ ساعات الصراحه مرت بسرعه ماحسينا فيها ولكن تعرفون المطار ورحلاته لابد من التاخير . والحمدلله ال PCR حقنا وصلنا لما كنا في الرياض وكان معتمد. الرحله كانت ملياااانه والطائره فل اغلبهم سعوديين ومن الهند لان اتوقع المالديف ترانزيت للهند وسريلانكا. يعني لاتفرحون بمقاعد فاضيه ، الرحله كانت تقريبا خمس ساعات من الرياض الى مطار ماليه.

٣-النقل من والى المطار:
يكلف ٥٣٠ دولار للشخص ذهاب واياب بطائره مائيه، دفعناها للفندق، اول ماوصلنا المطار استقبلنا موظفين الفندق ودلونا على استراحه الفندق اخذونا بباص مدتة عشر دقائق موجود في منطقه المطار. انتظرنا موعد الطياره ونفس الشيء في الرجعه، استراحه المطار جميله ونظيفه ومريحه جداً مطله على البحر فيها snake و دورة مياة و واي فاي مجاني. مدتة النقل بالطائرة المائيه نص ساعه.

عند الحجز في الفندق بادر بمراسله الفندق فوراً واعلامهم برقم الرحله و وقتها لتوفير رحله نقل من المطار الى الفندق في وقت مناسب لان الرحلات تحتاج سبع ايام قبل القدوم للتنسيق، اللي صار معنا ان تواصلنا معهم قبل الرحله بيومين فقط و وفرولنا رحله طائره مائيه والانتظار اربع ساعات، ولكن اصرينا عليهم بتوفير رحله اقرب لاننا متعبين من الطيران حقنا ومانقدر ننتظر ، فحاولو مشكورين باقصى ما امكنهم و وفرو رحله فوراً ما انتظرنا الا خمس دقايق بس في الاستراحه.

ترحيب الطاقم لنا لحظة وصولنا

( الاستراحه في المطار والطائره المائيه اللي نقلتنا للمنتجع)

٤-التوقيت:
يفرق التوقيت عن الرياض مقدم ساعتين والجزيره اللي احنا فيها كانت مقدمه عن العاصمه بساعه، ،اضطرينا نغير التوقت مانيولي ،الوقت مهم عشان اوقات العشاء والفطور مايروحون عليكم كمان بعض حجوزات الانشطه.

هذا فرق التوقيت بينا وبينهم

٥-المنتجع:
هنا الجزء المهم والممتع واللي استمتعت في تصويره والكتابه عنه.
المنتج اصلا الشركه المشغله له بريطانيه، ولكن اغلب طاقم العمل من المالديف، اكثر ماعجبني في الفندق انه صديق للبيئه الللي لاحظته ان اغلب الادوات من اشياء يعاد استخدامها واقل استخدام للاشياء البلاستيك، كمان يعدون كومبوزيت وسماد نباتي خاص من بقايا الاطعمه، اللي عجبني ان اثاث الفندق مصنوع بايدي محليه، كمان ديكور الفندق مثل الاكواخ السكان الاصليين من قش وخشب.
المنتجع حاصل علي جائزه عالميه.

في الصوره العلم للتكريم اللي ماخذه المنتجع

في الصوره يظهر الاكواخ على التصميم المالديفي الصوره التقطت اثناء التنقل بالعربه (bugy) وهي كانت وسيله التنقل بين المرافق، طبعا السياكل لم تكن متوفره حفاظا على سلامه النزلاء ـ يعني عشان لايطبحون في البحر-

أ-الغرفه:
اول مادخلنا الغرفه كان فيه تشوكلت ومشروب ترحيبي.
اهم نقطه وجود شطاف في الحمام، و المني بار complimentary (مجاني) القهوه والشاي فقط. كنت اتمني يكون فيه مشروبات بارده مجانيه اخرى مثل بعض المنتجعات ولكن لايوجد.
الغرفه فيها TV وموجود فيه كل شيء تحتاجه من انشطه ومنيو وخريطه للموقع و اوقات عمل كل قسم في المنتجع. كمان فيه تطبيق للجوال تقدر تتطلع علي كل هذي الاشياء.
تنظيف الغرف يتم مرتين في اليوم، كنا لما نطلع للفطور والعشاء نكلمهم عشان نرجع نلاقي الغرفه نظيفه.

(صور للغرفه و المشروب اترحيبي)

ب-الخدمات:
اول ماقدمنا للمنتجع سألونا عن سبب قدومنا وايش رغبتنا من الرحله، قلنا لهم ذكرى عيد زواج ورغبتنا هو عزله واسترخاء، فعملوا لنا تجهيزات لطيفه كيكه ومشروب في الغرفه، وخصم على خدمات السبا باشراف Sachika، كمان وافق وجودنا اليوم الوطني السعودي، ارسلونا تبريك و حلى ومشروب وشوكلاته للغرفه بتنسيق جميل باشراف Sameera. كمان حطولنا طاولات خاصه بزينه خضراء لجميع السعوديين الموجوديين. Sameera كان موجود حولنا على طول ويشوف طلباتنا ولاحظ اني احب السوشي وكم مره جاب لي سوشي وحضره لي مخصوص بالرغم انه مو موجود في المنيو ولاحتى دفعنا عليه زياده. شكر خاص له .

(صور اليوم الوطني و تجهيز الغرفه)

ج-طاقم العمل:
ودود جداً ولبق ومحترم، خصوصاً من تعاملت معهم بشكل شخصي sameera , sachika, كانو قمه في الاخلاق والروعه والتعاون، اتوقع كل طاقم العمل بنفس الاخلاق ، ولكن هذولا اللي تعاملت معاهم. كذلك المشرفه على المطعم خلوقه جداً.

هذا ساميري اللي ساعد في رفاهيه رحلتنا

طبق السوشي اللي كان بتنسيق من ساميري كلفته جميله باليوم الوطني مع تنسيق المكان والطاوله باللون الاخضر

ساشيكا اللي نسقت لنا الاحتفال بعيد الزواج

البنت البشوشه المسوله في المطعم الرئيسي

الشيف مع الحلى

د-المطاعم و الاكل :
المنتجات المستخدمه قادمه من دبي ، لاحظت المتجات مكتوبه بالعربي وسالت الشيف وقالي هذي المعلومه، كمان المنتجات البحريه من المحيط من عندهم اكيد.
انصح باخذ half board فطور وعشاء في اي منتجع ، الفطور في المطعم الرئيسي كان كونتننتال، والعشاء متنوع كل يوم من مطبخ مختلف (الايطالي والهندي والشرق اوسطي والاوربي والياباني(عندهم بوفيه سوشي متنوع لذيذ جداً). مطعم (ميرو) يفتح ايام مختلفه مو كل يوم يقدم انواع مختلفه من اللحوم والستيك و الاستكوزا. كان عندهم مطعم ثاني بس مايحمس مطعم (جنق) يقدم اطباق اسيويه. اكثر ما عجبني في المطعم انه يجهزلك اطباق مو موجوده في البوفيه على طلبك اذا هي متوفره من دون مايحاسبونك عليها. كانو يحضرون لنا اي طعام نطلبه حتى لو مو موجود في البوفيه، مثلاً كنا نطلب خبز الباراتا وكانوا يحضرونه لنا فوراً وهو مو موجود في البوفيه.

المنتجات مكتوبه بالعربي

هـ-الانشطه و السبا:
الانشطه البحريه المجانيه، هي العاب اللوح، القارب الاصفر ،قارب تجديف لشخصين، العاب اخرى مدفوعه قارب التجديف الشفاف و الدباب المائي، رياضه ونادي وكلاسات يوغا مدفوعه، عده الغطس تستطيع استعارتها مجاناً. خدمات السبا مدفوعه وقد تحصل على خصم اذا كنتم عرسان، كان فيه ساونا وخدماته كومبليمنتري.

مشروب ترحيبي في السبا

و-البيئه الحيه والحشرات:
احسن شيء في فيلا البحر ماشفنا ابداً وزغ او ناموس او حشرات مزعجه، ممكن الفيلا الشاطئيه يشوفونها، الحيونات البحريه من سمك ملون وسمك القرش والراي والسلاحف متواجده دائماً ، استعرنا عده غطس وشفنا الحياه تحت الماء و الحياة وفيره مو زي لما نشوفها من برى سلاحف و اسماك قريبه ونقدر نلمسها، سمك الراي مذهل شكله هو يسبح قدامي، تمنيت معي كاميرا تحت الماء عشان اصورها. اللي شفناه علي الجزيره مجموعه متنوعه من الطيور منها النورس و شفت خفاش يتنقل بين الاشجار في النهار، وطيور كثيره، في الجزيره كمان فصيله من قرد اللامور ممكن اكثر ناس يشوفنه هم اصحاب الفلا الشاطئيه، مشاهدت الحيونات البحريه شيء ممتع جداً ومت،اجده في كل مكان لدرجه ان شفناها في الليل كمان.

طائر من فصيله المالك الحزين

قرد الامور من الكتالوج حق المنتجع، ماشفته ولكن في الليل سمعنا اصوات فوق النخل وعرفت انه القرد متخبي

سمك الراي في الليل

ى-نادي اطفال:
فيه نادي للاطفال ولكن الفتره اللي احنا كنا موجوديين فيها ماكان فيه اطفال كثير، والصراحه ماشفت انشطتهم. اتوقع المنتجع مايعطي فيلا بحريه للعائلات مع اطفال لان ممكن يكون خطير عليهم.

نادي الاطفال صوره لجزء منه

٦-اختيار توقيت الحجز، ٧-الجو:
انصح بشده الاطلاع على طقس المالديف وعلى هذا الاساس الحجز، الفتره من ١٨-٢٥ سبتمبر كانت متذبذبه مابين امطار و جو مشمس واغلب الوقت رياح.كذلك اوقات اكتمال القمر يكون المد والجزر مرتفع وتصاحبه الرياح غالبا. شيكو على مواقع الطقس فيه مواقع تعطيك كمان التوقعات للجو في كل ساعه. والطقس يختلف من جزيره لجزيره، الجزر متباعده عن بعض عشان كذا مختلف الجو فيها حاولو تشوفون اي جزيره افضل في الوقت اللي ترغبون فيه الشرق او الغرب وهكذا. ممكن مكاتب السياحه يكون عندها معلومات اكثر بهذا الخصوص.
حاولنا قدر الامكان استغلال الساعات الي يكون الجو فيها كويس ومن غير امطار ورياح قويه والاستمتاع فيها، المطر والرياح مرات قويه تطير الاشياء من التراس.

صوره للجلسات في االتراس لحظه وصولنا والجو هاديء

صوره لنفس المكان والجو غائم وممطر في يوم ثاني ، الصراحه تحول الجو سريع من ساعه للساعه اخرى

٨-العوده:
كانت رحله العوده الساعه ١٠ و يفترض التشيك اوت الساعه ٢ الظهر من الغرفه، ولكن نسقو معنا التشيك اوت حسب وقت الطائره المائيه واللي توصل الساعه ٥ ونص العصر وهذا شيئ حللو مره من المنتجع. اخر رحله في الطيران المائي الساعه ٥:٣٠ العصر وبعدها تقفل. رحنا للمطار وكان المطار زحمه الاجرائات تتاخر مره في كل مكان طابور طويل، حتى الصعود كان فيه انتظار وغير منظم. العاملين في المطار ودوديين جدا واخلاقهم عاليه ولكن يعيبهم التاخير والزحمه في كل مكان، زي ماقلت المالديف ترانزيت لاكثر من دوله والرحلات دايم فل فيها. يعني حاولو تكونون مستعدين للزحمه والطياره على الاغلب مابتكون فاضيه، او انتم وحظكم. الترانزيت كان تسع ساعات في جده اخذنالنا فندق قريب من المطار-طبعا فندق المطار لسى مو شغال- وانصحكم ب (اوبر) ارخص من تاكسي المطار.

٩-ختاماً:
الحمدلله كانت رحله سعيده وهاديه جدا اشكر زوجي عليها، اهم شيء انصحكم فيه تاخذون وقتكم في اختيار المنتجع، لان المنتجع لو كان كويس وخدماته كويسه رح تنبسطون فيه، وكل شخص يعرف ايش رغبته من الرحله وعلى هذا الاساس يختار المنتجع، يحكمها كمان وجود الاطفال. كمان نقطه ثانيه مهمه ((الجو)) ، لازم تشيكون علي الطقس قبل التنسيق للرحله من الاساس. المنتجعات كثيره جدا واغلبها متقاربه في الخدمات حاولو تدورون العروض الكويسه من المواقع او المكاتب.

الايمان, ريما مزيد, عبدالرحمن الصلال و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
عودة الطيران المباشر بين قطر ومصر يوم ١٨ يناير ٢٠٢١	NayefUSA	عالم الطيران	1	21-01-2021 04:42 PM
رحلتي الى اسطنبول ١٤-٢٤ يوليو ٢٠١٨	bargima	بوابة تركيا	19	30-09-2018 06:59 PM
قصتي مع مركز التآشيرات الموحد ( اسبانيا ) في الرياض ١٢-٠٧-٢٠١٦	Ta3bt	فيزا	33	06-07-2017 04:20 PM