اليوم الثاني كان يوم الأربعاء موعد عملية زوجي الساعه ٩ صباحاً فما كان فيه احداث كثير لأنه بعد العمليه زي ماقال الدكتور حيحتاج للراحه لفتره معينه والافضل انه مايعرض عيونه للإضاءه المباشره وعلى هالأساس رتبنا جدول الرحله واختصرنا الطلعات في هذا اليوم لطلعه وحده بس في الليل 🤚

وطبعاً ترتيبنا لبرنامج الرحله كان من اهم اسباب نجاح الرحله👌.. وعن تجربه اقول ضروري جدا التخطيط المسبق وترتيب جدول مناسب للرحله وخصوصاً اذا كانت المده قصيره لانه ماحيكون فيه وقت تضيعه وانت تفكر وتبحث لأماكن.. اما لو كانت الرحله اسبوعين او اكثر فمافي مشكله لو مارتبت جدول مع اني اشوف الأفضل انك ترتب علشان بالك يبقى مرتاح ورايق وقت السفر 😴


طبعا انا كنت ناويه اروح مع زوجي المستشفى لكن اللي حصل ايييه ؟؟ ... اللي حصل اني سحبتها نومه للظهر  بسبب سهرة البلكونه الليله اللي قبليها   فلا رحت مع زوجي ولا لحقت الفطور في الفندق 😭💔..

المهم.. فتحت عيني الساعه ١٢ الظهر على نظاره سودا كبيره قدام وجهي 😎 بسم الله الرحمن الرحيم خير اللهم اجعله خير 👀.. دا كابوس دا والا سيد مكاوي طلع لي على غفله؟؟ نسيت العمليه ونسيت كل حاجه 🥴 وشويه شويه بدأت ترجع لي الذاكره وبدأ بعدها سيل من الأسئله العاصفه .. الحمدلله على السلامه متى رحت ومتى عملت العمليه وليه ماصحيتني اروح معاك؟؟.. طيب على الأقل صحيني افطر !! .. بيني وبينكم مقهوره على الفطور اللي فاتني صراحه اكثر من المستشفى لأنه كان اول فطور لنا في الفندق ☹😂💔


طبعا اللي حصل ان زوجي الحنيّن لما شافني الصبح رايحه فيها ماحب يصحيني فطلع وراح العياده وعمل العمليه و رجع والحمدلله كانت ناجحه والأمور تمام التمام 👍😎 بس اول يوم الرؤيه ماكانت واضحه و كان فيها شوية زغلله وخصوصا لما يطل على مصادر الإضاءه في الليل مثل أعمدة الإناره في الشارع وعلشان يريح عينه يلبس نظاره شمسيه و استمر على لبسها اسبوع تقريبا وخلال الفتره ذي كان النظر يزداد وضوح يوم بعد يوم وكل ذا طبيعي بعد العمليه حتى وصل نظره لمستوى مرضي جدا بعد شهر من العمليه اللي كلفته ٦٠٠٠ جنيه ، تقريبا ١٢٠٠ ريال عند الدكتور "طارق عبدالوهاب" دكتور ممتاز وخبره وكفاءته عاليه عيادته في الجيزه ٣٣ جامعة الدول العربيه.. والمهتمين بتفاصيل العمليه ممكن يتواصلو خاص..

بعدما وصل زوجي ريّح الين الساعه ٥ العصر وانا عملت لي كوباية شاي بالنعناع واحلى جلسه واطلاله في بلكونتنا الجميله ☕🥰

وبعدها نزلنا نتغدى في مطعم العثمانلي في الفندق نفسه.. مطعم تركي جميل يقدم اكلات تركيه مشويات ومحاشي وسلطات وطبعا اسماء الأطباق كانت غريبه شويه علينا لأنها بمسميات تركيه بس الحمدلله كان الطلب موفق..
طلبت دجاج محشي وزوجي طلب مشويات مشكله بصوص خاص مع متبل وسلطة  وللأسف نسيت اسم الأطباق المدوّن في المنيو ..
تقييمي للمطعم ١٠/٩ .. نزلت واحد لأنه غالي حبتين 💰






رجعنا الغرفه واتجهزنا للطلعه الوحيده يومها وكنا مخططين نروح مجمع تيفولي دوم بمصر الجديده.. طلعنا مع السواق ولما وصلنا استقبلنا السكيوريتي عند المدخل وكان مشدد على لبس الكمامه..!! .. قلت في نفسي اخيرا افتكرتو ؟؟ ... المكان الوحيد في مصر اللي ذكرنّا بأنه فيه فايروس في الحياه اسمه كورونا بعدما كنا ناسيينه تماما لمدة يومين بسبب الوضع العجيب للشعب اللي ماخذ راحته عالآخر ولا كأنهم عرفو حاجه عن الوباء و لاحد فيهم لابس كمامه وعايشين والحياه حلوه اوي ولما تسأل واحد فيهم ليه ماتلبسو كمامات يجاوبك باستغراب شديد : (ونلبس كمام ليه كفى الله الشر ؟!! ).. عالم مش فاضيه للكلام الهايف ده 😁

المهم دخلنا التيفولي دوم وكان من اجمل الأماكن اللي زرناها في القاهره .. مكان جميل جدا ورايق تتوسطه نافوره منظرها جميل وفيه مجموعة مقاهي ومطاعم راقيه مثل عنب بيروت وكاريبو كوفي ومطعم كرييف و موري سوشي.. الجلسه كانت روعه عالنافوره طلبنا من كاريبو كوفي كابتشينو وكيكة عسل وكيكة جزر الأخيره كانت لذيذه و الكابتشينو جيد.. وطبعا عجبني فيه النظافه و اهتمامهم بالاجراءات الاحترازيه 👍









يتبع
.
.
.
.

ما شاء الله تقرير شامل و جميل غلفته البساطة و العفوية
و أمتزج بروعة الخيارات مثل الفندق الجميل ..
الأهم الحمد لله على نجاح العملية و سلامة أبو العيال

ما شاء الله
إلى الآن كل شيء على مايرام
الفندق مريح ومجمع تيفولي دوم جميل ومتنوع.
أتفق معك أن التخطيط من أهم مقومات نجاح السفر.
متابعين معك اليومين المتبقيين من الرحلة.

الحمد لله على سلامته
المفروض غنى لك " الأرض بتتكلم عربي "

توفقتوا في الدكتور وهذا أهم شي بالرحلة

فعلاً الناس مش مهتمة لكورونا اطلاقاً
اللي يلبس كمامة السواح ولا واحد عايش برا
عايشين حياتهم ببساطة وهذا المهم

مجمع جميل و رايق
الجلسة على السطح ترد الروح