رحلتي لبنت النيل.. اولها فُله وآخرها علقه !!

Distinctive2022 · 21-03-2022, 03:11 AM

ورجعنا تاني 👀 وآسفه جدا على التأخير 🙏
ونكمل الجزء الثاني من الرحله..

حجزنا فندق كمبنسكي النيل من خلال موقع اقودا وكان وقتها عليه عرض حلو الليله تقريبا كانت ٤٥٠ ريال ، وقبل موعد الرحله بكم يوم اتواصلنا مع الفندق لتأكيد الحجز اللي هو "غرفه ديلوكس مطله عالنيل"..
وحرصنا انه يكون معانا سائق خاص لأنها اول سفره للقاهره.. وبعد البحث حصلت على رقم سائق في المنتدى، وبعدما اتواصل زوجي معاه وسأله عن يوميته رد عليه تسجيل صوتي وقال ( انا آخر حاقه افكر فيها الفلوس يكفيني انك فكرت فيا دا معرفتك وحدها مكسب ليا.. أصل معرفة الرقاله كنوز ) ! طبعا انا قلت في نفسي الله يستر اما زوجي انبسط وانحرج في نفس الوقت.. مشكلتنا الصدق والطيبه يالخليجيين☺.. المهم اتفق معاه على ٥٠٠ جنيه في اليوم وانه يستقبلنا في المطار عالساعه ١ مساء تقريبا ..

الرحله كانت من جده للقاهره مدتها ساعتين عالخطوط المصريه ، تكلفة التذكره ١١٨٠ ريال تقريبا.. الوجبه فراخ وخضار سوتيه 🙃

وصلنا مطار القاهره عالساعه ١ ظهرا وكان وصولنا في صاله ٣.. اول مادخلنا لقينا طابور طويل على طلب التأشيره وقفنا ننتظر تقريبا ٤٠ دقيقه لحد ماجا دورنا وبعدها دخلنا على صاله صغيره بموظف جوازات واحد وكانت خاليه من الخدمات تقريبا ✋ انهينا اجراءات التفتيش والجوازات و بحثنا عن كشك لشرايح الجوال مالقينا كمان الصرافات مافي الا بنك صرافه واحد كان عند المدخل بس عديناه قلنا حنلاقي غيره جوا لكن مالقيناش غيره للأسف قلت في نفسي ايه البدايه السعيده دي ! لكن في نفس الوقت قلت يالله مش مشكله نصرف وناخذ الشرايح من مكان ثاني..

خرجنا لقينا السواق في انتظارنا واخذنا عالفندق اللي كان يبعد عن المطار ٢٠ دقيقه.. واكتشفنا بعدين عن طريق السواق ان الصاله اللي نزلنا فيها هي الصاله الموسميه مش صاله ٣ زي ماكان مسجل في البوردنق ! .. وان الصاله ذي كانت قبل جائحة كورونا مجهزه لحجاج بيت الله الحرام فقط لكن حالياً اصبحت تستخدم للسياح والمسافرين السعودين القادمين من الرياض وجده والدمام والمدينه !

وصلنا الفندق وكان استقبال الموظفين جميل جدا لكن كان فيه تأخير في تسجيل الدخول لحوالي نص ساعه تقريبا..

الفندق جميل ونظيف واللي يبحث عن الهدووء والراحه فلا يدور غيره ، الغرف جميله واثاثها حلو وعزل الغرف جيد لما تكون في غرفتك تحس انك لوحدك في الفندق من قوة الهدوء الين ماتفتح باب البلكونه وتطلع .. وقتها حتحس انك جالس في وسط الشارع من ازعاج السيارات على الرغم من جمال الجلسه في البلكونه واطلالتها الحلوه عالنيل الا ان مكانها مزعج جدا للأسف لوجود شارع امام الفندق يفصل بينه وبين النيل..

اطلالة البلكونه ..

AL Tunaiji, آخـــرفـــرصـــة, سارة محمد و 4 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
افضل كافيهات على النيل - الدقي	ابو نديم	بوابة مصر	5	07-03-2018 01:24 AM
استفسار عن افضل مركب في النيل	همسة حنين	بوابة مصر	3	11-09-2016 06:00 PM