رحلتي لبنت النيل.. اولها فُله وآخرها علقه !!

Distinctive2022 · 29-03-2022, 06:15 AM

اليوم الرابع والاخير في رحلتنا كان يوم الجمعه وكنا مخصصين اليوم ذا للإهرامات والقريه الفرعونيه لانها كلها في الجيزه فكانت قريبه من بعض

بعدما فطرنا في الفندق طلعنا عالساعه ٩ واتجهنا لإهرامات الجيزه وكان الجو وقتها بارد ومناسب جدا لزيارة مثل هذا المعلم السياحي المعروف بحرارته العاليه وتعامد اشعة الشمس الحارقه على المنطقه صيفاً.. لكن كان فيه رياح نشطه مزعجه نوعاً ما بس عموماً الجو كان صافي وجيد..

في طريقنا للاهرامات وبعد نقطة التفتيش اتعرضنا اكيد لناس همج من اصحاب الحناطير والخيول.. ومن بعض المواقف اللي اتعرضنا ليها كانت لواحد مريض اتعلق في القزاز ناحية السواق و قام يعرض اسعار الحناطير ولما اتجاهله السواق وهو ماشي ضرب بإيده ضربه قويه فجعتني كانت بتكسر القزاز اللي ورا من جهتي 👊😰..
وصلنّا السواق لشباك التذاكر ووقفنا في طابور طويل وانتظرنا تقريبا ربع ساعه حتى حصلنا على التذاكر ودخلنا للساحه اخيرا.. سعر التذكره ٤٠ جنيه للشخص.. اتمشينا بين الاهرامات سيرا على الاقدام وحسينا ان الوضع كذا اريح بكثير بشرط تلبس حذاء رياضي و كاب على الراس وتاخذ معاك ماء للشرب لأنك حتحس بالعطش هناك 🥵.. واكتفينا بمشاهدة الاهرامات من الخارج بدون الدخول للهرم الكبير .. كانت تجربه حلوه على الرغم من بعض الصعوبات اللي واجهناها حتى الوصول بس ما انصح بتكرارها.. مره وحده تكفي🤚

بعد الاهرامات توجهنا للبحر الاعظم قاصدين القريه الفرعونيه.. وكلها ١٠ دقايق ووصلنا للبوابه..
وكانت برامج واسعار القريه لغير المصريين كما يلي:
رحلة القرية و 5 متاحف 375 جنيه
رحلة القرية و 5 متاحف و رحلة باليخت 425 جنيه
رحلة القرية و 5 متاحف و يخت و وجبة غداء بمطعم توت 495 جنيه
الاطفال من سن 3-5 سنوات 60 جنيه فقط باكج لعبتين بالملاهي و فن بالآرت سنتر
الاطفال من 5-10 سنوات 20% خصم
مواعيدها يومياً من 9 ص حتى 5 م

اخترنا رحلة القريه و 5 متاحف ب 375 جنيه للفرد ..
وانتظرنا في صالة استقبال وكافتريا في نفس الوقت فيها جلسات على البحيره لحد مايكتمل العدد .. طلعنا بعدها في القارب اللي حياخذنا للقريه وابتدت الجوله الجميله بشرح تفصيلي بمكبرات الصوت لآلهة قدماء المصريين ووصف حياة الفراعنه و الحرف اليدويه والصناعات وقتها.. كانت جوله شيقه وممتعه وحبينا كل شيء فيها من الأجواء لطريقة العرض لإتقان المشاهد التمثيليه للتنسيق المنظم باحترافيه عاليه للقريه للمتجر الجميل اللي عند بوابة الخروج واللي اخذنا منه هدايا تذكاريه مميزه للأهل 🎁 .. منطقه فعلا تستحق الزياره 👍

وبعد ٣ ساعات من المتعه ونص ساعه تأخير من السواق طلعنا وكنا ميتين جوع فقررنا يكون الغدى بحري بما انه يوم جمعه فوقع اختيارنا على مطعم قدوره وكان يبعد تقريبا نص ساعه مع الزحمه وانطلقنا الى وجهتنا 🚙 بس واحنا في طريقنا للمطعم اقترح علينا السواق مطعم بحري اقرب من قدوره ومدح لنا في المطعم واحنا مع الجوع طبعا وافقنا وقلنا يالله يمكن خيره ... المطعم اسمه اسماك وادي النيل حي العجوزه بالجيزه وفعلا كانت خيره واتوفقنا في المطعم 👍.. ديكور المطعم متواضع والنظافه لا بأس بها والجلسات عاديه لكن الأكل مش عادي ابدا طلبنا سمك قاروص سنجاري و ٤ كابوريا بين مسلوق ومشوي و جمبري مشوي ومقلي وشوربة سي فود.. الطبخ مضبووط والطعم حكايه 👌 والسعر منافس جدا.. باستثناء الكابوريا المشوي لأنهم شاويينه بدون مايفتحوه وينظفوه من جوا !

رجعنا الفندق عالساعه ٦ تقريبا ريحنا شويه وطلعنا لكافيه سرايا الجزيره في الزمالك .. الكافيه يتميز باطلاله رائعه على النيل و اجواءه الجميله والمناسبه لسهره حلوه على انغام الطرب ومنظر النيل الساحر .. طلبنا ٢ عصير ليمون بالنعناع وسهره لمنتصف الليل ..

وبكذا انتهت ليلتنا الأخيره في بنت النيل والى يوم المغادره باذن الله ..

[/SIZE][/CENTER]

سارة محمد, AL Tunaiji, بن قوت و 4 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
افضل كافيهات على النيل - الدقي	ابو نديم	بوابة مصر	5	07-03-2018 01:24 AM
استفسار عن افضل مركب في النيل	همسة حنين	بوابة مصر	3	11-09-2016 06:00 PM