السلام عليكم

ارغب في السفر الي اذربيجان من 22 سبتمبر الي 29 سبتمبر


ورجوا من خبراء اذربيجان مساعدتي

هل من الافضل حجز شركه سياحيه او انا احجز الفنادق

كيف ارتب جدولي السياحي

اروح قوبا وقابالا او وحده منهم تكفي

كيف التنقل احجز سياره مع سائق او افضل انا اسوق

وشاكر لكم تعاونكم وجزاكم الله خير

وعليكم السلام,,,

اتمنى لك رحلة سعيدة, انا رجعت من أذربيجان قبل امس وكنت مع العايلة 13 يوم والحمد لله الامور طيبة.

الفنادق:
- احجزها بنفسك.

المواصلات:
- في باكو استخدم تطبيق Bolt رخيص جداً ومتوفر دايماً ويعطيك خيار الدفع كاش او بطاقة
- خارج باكو استأجر سائق من باكو الى قابالا وغيرها واذا رجعت باكو اعتمد على Bolt

جدول الرحلة:

(حط في بالك أن قابالا وقوبا كل مدينة في جهة والمسافة من باكو الى قابالا 3 ساعات وكذلك قوبا المسافة من باكو 3 ساعات يعني مثلاُ تروح قابالا وبعدها ترجع باكو ترتاح يوم واليوم الثاني تتوجة قوبا)

- يوم الوصول الى باكو: تسجيل الدخول للفندق والراحة والتوجه الى شارع نظامي Nizami للغداء أو العشاء فيه كل شي تبغاه وشارع ممتع شغال 24 ساعة

- التوجه الى قابالا والسكن في فندق Qafqaz Tufandag Mountain Resort Hotel فندق 5 نجوم من الآخر ومناظر ترد الروح, في نفس الفندق في تلفريك يوديك للقمة وفيه دبابات وكافيهات وفعاليات وافضل شي ان التلفريك يوصلك لفندق ثاني تنزل هناك وتروح مشي للنهر قريب مره تقدر تتمشى وتأكل هناك وتستمتع وبعدها ترجع بالتلفريك للفندق.

أماكن في قابالا:
- التلفريك
- النهر توصله بالتلفريك
- شلال Yeddi Gozel Waterfall مسافة الطريق نص ساعة والمكان مو ذاك الزود بس حلو تجي تغير جو وتشوف الناس
- بحيرة Nohur Lake جميلة جداً وتستأجر قارب بالبحيرة وتستمتع بالجو والمطاعم
- في مطعم ممتاز وجميل جداً جنبك اشجار وهر اسمه Qəbələ Xanlar Restaurant لازم تجربة للغداء
- العودة الى باكو

قوبا:
- انصحك بالسكن في فندق Quba Palace Hotel رهيييب جداً جداً فيه كل شي وفعاليات

اماكن في قوبا:
(قوبا يكفيها يوم واحد فقط)

- شلال Afurdzhi Falls موجودة داخل منتجع نسيت اسمه لوحته بنفسجية تدخل المنتجه بالسيارة وتنزل تمشي للشلال رهيييييب يستحق الزيارة

شاهداق:
- انصحك تسكن فيها ليلتين في فندق Shahdag Hotel & Spa فيه كل شي جنبك تلفريك و زحليقة و دبابات ومطاعم ومناظر ومقاهي
- الزحليقة توصلك للفندق الثاني وترجعك مثل قابالا وتذاكر الزحليقة تشمل الذهاب والعودة

وسلامتك ياغالي, انت شوف الجدول كيف توزعه وتوكل على الله, تقدر تكتب اسماء الاماكن اللي ذكرتها بقوقل وتشوف الصور وتقرر,,, تحياتي أخوك/ أبو لانا