الزين كله في لندن
اليوم الأول
الجمعة 12 / 8 / 2022




الطيران والوصول








وعد ولازم نوفيه
كان وعد بوحسين للزين ان سفرة الصيف للندن للعايلة كلها والأهم الزين فيها

وقت الحجز تعذر والدا الزين عن الروحة معانا بسبب الشغل
وقلنا لهم الزين معانا لأن السفرة لها وقالو مافي مانع مع اجدادها وعماتها وعمها العود وحرمه

وحجزنا التذاكر ليوم 12 / 8 / 2022 والعودة يوم 27 / 8 / 2022

كان سعر التذكرة 225 دينار كويتي اونلاين
بس احنا اخذناها من المكتب بالأفنيوز ب 247 دينار

المكتب احسن لان ماتعرف الظروف نحتاج تغيير التاريخ او غيره ترجع لنا المبالغ اما الاونلاين ماترجع وتروح علينا


هذا سعر الاونلاين





وهذا السعر للتذكرة من المكتب





ملاحظة كان جواز الزين بينتهي بعد شهر وقلت للموظفة ان تسجلها وقالت اذا غيرنا الجواز لازم نراجع علشان تجديد البيانات وهذا اللي حصل بس تاكدوا من البيانات ورجعوا لي التذكرة اوكي

ورتبنا حجوزاتنا والفيزا الالكترونيه قبل موعد السفرة
وكان سعر الشخص الواحد ب 30 £


ويوم 11 / 8 جهزنا الجناط ونومة خفيفة للساعه 3 الفجر ونروح المطار

وصلنا ابو زيونه ودخل معانا على اساس يطلع ورقة او شي كفالة ان تكون معانا قالو له ما يحتاج اي شي

وهذه الزين كله بداية دخول المطار ونصورها للذكرى




وعند اللافتة




وهذا رقم كاونترنا






وخايفة على جنطتها عند الوزن بالكاونتر







الحمدلله الوزن اقل من المسموح طبعا لان الروحة الجناط خفيفة والعودة بتكون ثقيلة
والميزان اليدوي لازم يسافر معانا





خلصنا الاجرائات كانت زحمة خفيفة
ورحنا لدخول البوابات والسوق الحرة
الحين السوق الحرة ما نتمشى الا على الخفيف ولكن الريوق لابد منه



كل مجموعة راحو صوب

















بدينا ندلع زيونه اشتري شي
ماتبي لان الجنطة متروسه بفك وحلاو والعاب





وانا قلت مابي الا عصير ليمون بارد









كينز الذ دياي مقرمش عنده بس ما يفتح الفجر






وبعد التمشي والريوق رحنا فوق قعدت انا جهة المصلى انطر الآذان
















صليت والبنات ناس تصلي وناس تقعد مع الاغراض وبعدين رحنا عند البوابة
والا كله اسيوين نازلين ترانزيت وبيواصلون معانا لندن

واحنا قاعدين مروا علينا المضيفات يشيكون على التذاكر والجوازات وقلت لها تضيف لي الأميال وضافتهم بالبطاقة





والعلم في الصغر كالنقش في الحجر








بعدين اسمحوا ندخل عند بوابة العبور بس قعدونا الساعه 4.30 دقيقه
وننطر وننطر تاخروا وقالو لأن الطيارة توها واصلة من تايلند وقاعد ينظفونها وهذه بوابتنا







وننطر بعد قالو في تأخير ساعه وعقب دخلونا الطيارة اخيراا الساعه 6 المفروض نكون طايرين قبل ثلث ساعه
المهم ندخل الطيارة وممر السعادة






















دخلنا وشافو تذكرتي قال ما يصير انتي تقعدين هني مع ان حاجزة الكراسي الاماميه لي ولابوحسين ودافعة مبلغ 40 دينار للكرسي الواحد
هذه تذكرتي غير رقم الكرسي





بس ليش العمر واكيد علشان باب الطوارئ
قلت له طيب غير مع الوسط اذا شباب يقعدون هني وانا اقعد مكانهم قال اوكي بس نشوفهم الحين روحي مع العيال ورا وقعدني مع زوج وزوجته حامل بالشهر السادس هنود
والعيال جدامي وابوحسين جدام مكانه ماغيروه







بس مر المضيف قلت له ها شصار على مكاني قال لي تعالي
وخلاني اقعد جدام عيالي في كراسي محد ماخذهم ويت عندي بنتي ووسعنا على بعض
صار كل اثنين بينهم كرسي فاضي الا زيونه مع ثنتين من عماتها
المهم اقعد عدل ويم الدريشة لان في وسع امد ريلي اليسار




وهذا كله والطيارة للحين واقفه
ونتنفس الصعداء لما تحركت الطيارة الساعه 7.30 بالضبط
وتمشي الطيارة على الأرض ثلث ساعه وعقب طارت الحمدلله يعني ساعتين تأخير
شوفو مسارها على الارض الى مدرج الطيران
اول شي دعاء الركوب





نوع طيارتنا
















اراقب اشلون بنطوف من الجسر











اشوه لف يسار جهة المدرج الرئيسي
تقول زيونه لما شافت الصور انا كنت نايمه ماشفت هذا حبيبتي نامت او ما صعدنا سهرانه





واخيراا طارت

صور مباني الكويت تحتنا











صورة الابراج من الطيارة









وهذا جسر جابر





الجزر الاصطناعيه للجسر










يتبع .....

نتابع معاكم اليوم الاول






وصلنا الفندق اللي تم حجزه لمدة 5 ايام عند محطة مترو
* ايرلي كورت *
سنة 2016 كنا حاجزين فيه وحبينا نحجزه مره ثانيه
كنت كاتبه عنه في تقرير سابق
هو شقق فندقيه مخدومة يعني استقبال موجود وتغيير فرش وفوط وتنظيف الشقة وتزويدكم بادوات الحمام

اسم الفندق

No 1 The Mansions By Mansley

وهذا حجزنا





بتقولون غالي صح راح تشوفون ان كل فلس حلال عليهم يستاهلونه وكاتبين 2 حمام لا شوفو معاي تفاصيل الشقة

المدخل من الداخل







هذا عند المدخل وحاطين تقييماتهم







وصورة للزين







وعلى الفكرة المدخل محد يدخل الا بالكرت او تدق الجرس يكلمونك ويسئلونك عن رقم الغرفه بعدين يفتحونه مع ان في كاميرا عند الباب بس يتأكدون عدل
السلالم النمط الانجليزي











والمصعد على الطراز القديم باب خارجي حديد







وباب داخلي شبك سحب







مثل ما قلت لكم قبل لازم تسكرونهم وراكم لما تطلعون من الاصنصير علشان لا توهقون غيركم
صارت معاي بنزل والا ما يصعد لي
نزلت ولقيته بالدور التحتي مفتوح الشبك





الباب اللي يسار يودي للاستقبال






هذا الممر يودي على غرفة الاستقبال يسارنا
ويمينا غرفة مخزن ومطبخ صغير واذا كملنا سيدا تلاقون تكرمون الحمامات وغرف ادارة بعد

و هذا استقبالهم قعدنا على قلبهم نبي ندخل اغراضنا 8 جناط كبيره وجنطتين صغار












قعدنا قالو الشقة تتجهز بس تقدرون تحطون اغراضكم بالمخزن عندنا وتروحون وتيون او تقعدون تنطرون عادي



قالو العيال وابوحسين خل نروح نتغدى ونرجع
طلعنا واتجاهنا يمين تلاقون شارعنا كله مطاعم ومحلات وبقاله وسوبر ماركت مارك سبنسر للاغذيه
والمحطه وبوتس كل شي يمنا












محل مارك سبنسر للاطعمة كل شي فيه جاهز بس طبخ خفيف



وهالمحل عجبني الزرع على المطعم او بار بكل مكان لهم يتميزون بديكور الورد هذا










مطعمنا جارهم وهو كيلوبترا
مطعم مصري بس متنوع الاطباق


















طلبنا وقعدت اصور لكم المكان واللي يخدمنا شاب عراقي خدوم












وصل اول طلب سفن اب لي او شبيه للسفن
طبعا انا حاشتني الكرونا قبل السفرة باسبوعين وصرت بس ابي شي بارد خفيف سفن او موهيتو ليمون




وطلبات ربعي للمشروبات







ورق عنب وحمص





لزانيا لي













وطبق اصابع الفيش لحسين






وسندويشات شاورما دجاج طلبات البقيه
















وسلطة ضيافة






زيونه وعماتها راحو ماكدونالد تغدو فيه وهو في نفس الشارع

الحمدلله الاكل حلو وكميته كافيه والسعر مادري عنه لان ابوحسين يحاسب عند الكاشير واحنا بعدنا ما خلصنا



بعد الغدا رجعنا الفندق ولقيناهم بعدهم ما خلصت الشقه

طلبنا الواي فاي وعطونا هالكرت








يتبع ....🏩🏩🏩

ونتابع تفاصيل الشقة






البنات راحو يشترون خطوط تلفون وباص وحسين قال بروح حق نادي تشيلسي سمع الشاب العراقي قاله 10 دقايق مشي ودلاه الطريج واصلا كلهم قامو يفتحون خريطة غوغل ويمشون عليها
وبوحسين قال بروح اتمشى على ما تجهز الشقة
ظليت انا وزيونه عند الريسبشن ..وشوي قال الشقة جاهزة
وياخذنا فوق للشقة ونزل صعد لي الجناط كلها
وهذه شقتنا 3 H






وانا على ما اييب الجناط قعدت اصور لكم

ممر تقريبا نفس ممر الريسبشن
في غرف يمين يسار وندخل اول غرفة او نقول صالة براحة كبيره وفيها تلفزيون كبير










شفتوو الوسع وحجم الغرفه


فيها هالخزانه فتحتها والا كتب قصص نفس الشقة السابقة كان في قصص بعد















الزين تبي قصة اطفال لقيت لها قصة صغيره عطيتها بس شافت اول صفحة وردتها تقول * نت فور ماي إيج *





وهذه خزانه ثانيه بنفس الغرفة الجرارات كلها فاضيه علشان تستخدمونها











شايفين الوسع صج شقة عائلية بس تدرون يمكن بس اقل من ساعه خلال الفتره اللي قعدناها هني قعدنا بهالصاله لان الجو ما يسمح كل غرف النوم فيها مراوح بس هذه الصاله وغرفة الطعام مافيهم وعلة هالغرفه ان الشبابيك ما تنفتح الا فتحة صغيره تنسيم بس ما تنفع بالصيف الحار


الغرفة الثانية غرفة الطعام والوسع واضح























طاولة 8 كراسي



وبعد فيها مكتب وخزانه لتستخدمونهم
















شفتو الوسع
هذه قعدنا فيها وايد بس نفتح الشباك يدخل علينا البراد


ونطلع مقابلهم غرفة فيها سريرين وحمام وفي باب يدخلكم لغرفة فيها سرير بونفر





الوان ورق الجدران هاديه ومريحة للعين

هذه الغرفة فيها بعد ميز تواليت وكبت
ميز التواليت والمروحة








الكبت شوفو طرازه القديم وايد حبيت الاثاث










وهذه الغرفة الصغيرة ام سرير واحد لها بابين واحد بظهري يطلع على غرفة البنات
والثاني يطلع على ممر المطبخ اللي باين بالصورة وفيها ميز تواليت وخزانه مادري ليش ما صورتهم



مطلهم على حديقة صغيره تابعه للفندق







نرجع نشوف حمامهم فيه بانيو وفي شاور بوكس

















واسع بعد وفيه شاور بوكس وبانيو

ونطلع من غرفة البنات




الممر ونشوف باب الشقة وعلى اليسار الصاله وغرفة الاكل
واليمين غرفة البنات

وراي اخر الممر نلاقي غرفة بعد فيها سريرين وخزانه وميز تواليت الخزانات بالشقه كلها طراز قديم ما صورتهم هني بس اكيد بيطلعون صورهم بالاجزاء اليايه










هذا الرف ما احبه ههههه رقع راسي رقعه للحين مكانها اذا چسته يعورني
كله بسببي بشيل الشاحن من الايفون وأنا قايمه والا اوف انرقع راسي حسيت بدوار بس اشوه ماكو شي

نكمل الغرفه











نطلع من الغرفه هذه دريشه تطل على الحوش للعمارة ويمها كبت فيه مكنسه واوتي وطاولة الاوتي











وهذا الحمام الثاني بعد فيه بانيو وشاور بوكس
















وهذه ماركة الشامبو وتوابعه اللي يحطونها لنا










وبعد الحمام نروح المطبخ







وهني ضاق خلقي

قلت للريال وهو يصعد الجناط تعال احنا طالبين 7 سراير وهني بس 5 وين الباجي

چان يقول تعالي معاي وياخذني المطبخ ويطلعني من باب المطبخ الثاني والا غرفة وحمامها


وهذه الغرفة







وهذا حمامها اعذروني اخر شي الصور صارت فيه رجة من التعب ههههه










نرجع المطبخ وهذا الباب اللي يدخل على الجناح الصغير وهو ممر فيه الحمام ويسار غرفة النوم









وهذا المطبخ فيه كل الاجهزه غسالة ونشافه وغسالة مواعين وفرن وچولة ومكرويف وثلاجة وفريزر















وحاطين لنا بوكس شاي وقهوة انواع وايد وبطلين ماي كبار بالثلاجة مع ان ماي الحنفيه عندهم صالح للشرب





















خلصت تصوير الشقه

المهم قعدت اريح وانطر حسين وزوجته ...بخيرهم الغرفة الثانيه او اللي ورا المطبخ يبون

لان الاولى خلاص حق البنات وزيونتي معاهم وحسين اختارو اللي ورا المطبخ




وقعدنا انا وزيونه نريح وطبعا الزين شبكت انترنت تكلم اهلها بالايباد وتلعب مع اخوها روبلكس

يتبع ...

نتابع اليوم الاول ....والتمشي



نشوف تمشي العيال اتابعهم بالسناب واخذ صورهم


وهذه دانه راحت حطت كرت تلفون وانترنت من عند فودافون

ولازم تشرب قهوة بارده







رايحة نيرو بس ما لقت عندهم القهوة البارده








وهي راده شايفه هالسيارة والتعليق اللي عليها






وحسين وتشيلسي عشق لا ينتهي
























































البنات رجعو الشقه وكانو شارين لنا تذاكر الاويستر للباص والمترو لمدة اسبوع سعر البالغ ب 37 باوند ...الزين فري








ريحو شويه وشافو غرفتهم وبعدين خذو زيونه وراحو الاكسفورد وعقب ساعتين رحت انا ودانه وابوحسين لهم ....رحنا بالمترو مع ان محطة الباص قريبه على الفندق بس قالت دانه زحمة الحين خل نروح بالمترو


وطبعا المسارات والاتجاهات كلها من غوغل بس تكتبون اسم المكان وتطلع لكم المعلومات في التطبيق
ننزل السراديب







زحمة المترو







اعلانات مسرحيات دزني









لقينا الطلعه عقب جم لفه مسكرين بوابات بس اللي يسأل ما يتوه
















بس طلعنا وهذا تقريبا تقاطع الاكسفورد
والا شباب وبنات مراهقين اغلبهم افارقة يركضون فوق ال 100 والشرطه يركضون وراهم وصفارات
واحنا اخذنا كورنر ووقفنا يخلصون

وبعدين كملنا بالباص الى السيلفردجز البنات ينطرونا بيسلموني زيونه







السياكل واقفين من العصر













وشفت الزين واخذتها وهني يعني تدليني وين ملابس والعاب اليهال






حسافه مطعم البوفيه اللي قبل شايلينه وفاتحين مطعم بيتزا ومطعم ياباني وكافيه آلن موجود






ماخلينا شي ما جربناه











هذا شنو







هذا مكينة كاكاوي توبليرون
تقدرون تطبعون الاسم حاولت اكتب بالجهاز بس ما صار ومافي احد واقف قلت بمرهم يوم ثاني بس ما مريت






كان هالحلاو هبه عندنا
























سوالف غنومه


وهذا تصوير حسين








































تعبنا بعد هالجوله وهذا ماركس سبنسر اللي عند سيلفردجز صورته حق بوحسين اقول له تعال هني علشان نركب الباص المحطة بينه وبين السيلفردجز جهة السيلفردجز

لما مرينا على هارودز زحمة خليجين بالليل عنده اكيد علشان المطاعم اللي صوبه













ونزلنا عند محطة ايرلي كورت بنتعشى واخذنا ماكدونالد














وبعد العشا سيدا الفندق ونووم بعد يوم طويل

والى طلعات اليوم الثاني ....

ما شاء الله الشقه وايد راهيه وحلوه ونظيفه والاحلى على الطراز الفيكتوري

شلون اكل مطعم كيليو بترا ؟ تقييمج؟

ياسلااام الصور تقولي قومي حجزي على اول طياره
الاكسفورد تشيلسي كل شي حلووو
بس اقوى شي الوافل احلى وافل مر علي هذا عوااافي 👌🏽👌🏽👌🏽
ما شاء الله مبينه زحمتنا 😂😂😂